Jerusalema—Motse o Nang le Bohlokoa bo Imenneng Hangata
JERUSALEMA e ne e se feela motse-moholo oa sechaba se itseng sa lefatšeng. Ke oona feela motse oo Jehova Molimo a ileng a beha lebitso la hae ho oona lefatšeng lohle. (1 Marena 11:36) Ka mor’a hore areka ea selekane e fallisetsoe moo, Jerusalema e ile ea fetoha ‘bolulo’ ba tšoantšetso ba Jehova, “nģalo ea phomolo” ea hae. (Pesaleme ea 78:68, 69; 132:13, 14; 135:21; bapisa le 2 Samuele 7:1-7, 12, 13.) Kaha marena a leloko la Davida a ne a tlotsitsoe ke Molimo, a lutse “teroneng ea Jehova” (1 Likronike 29:23; Pesaleme ea 122:3-5), Jerusalema ka boeona e ne e boetse e bitsoa “terone ea Jehova”; ’me ha e le hantle, merabe kapa lichaba tse neng li retelehela ho eona hobane li amohela bobusi ba Molimo li ne li phutheha ka baka la lebitso la Jehova. (Jeremia 3:17; Pesaleme ea 122:1-4; Esaia 27:13) Ha e le hantle, ba neng ba hloile Jerusalema kapa ba e loantša, ba ne ba hanyetsa pontšo ea bobusi ba Molimo. Joang kapa joang sena se ne se tla etsahala, ka baka la polelo ea boprofeta e ho Genese 3:15.
Ka hona Jerusalema e ne e emela setsi sa puso e neng e tsamaisoa ke Molimo kapa ’muso oa Molimo oa tšoantšetso. Molao oa Molimo, lentsoe la oona, le tlhohonolofatso ea oona li ne li tsoa hona teng. (Mikea 4:2; Pesaleme ea 128:5) Ka hona ba neng ba sebeletsa ho ntšetsa pele khotso ea Jerusalema le ho e hlahisetsa molemo ba ne ba sebeletsa hore morero o lokileng oa Molimo o atlehe, hore thato ea oona e atlehe. (Pesaleme ea 122:6-9) Le hoja Jerusalema e ne e bonahala e khahleha, bophahamo ba eona ba ’nete le botle ba eona bo ne bo tlisitsoe ke tsela eo Jehova Molimo a neng a e tlotlile le ho e tlotlisa ka teng, e le hore e ka sebeletsa e le “moqhaka o khanyang” ho eena.—Pesaleme ea 48:1-3, 11-14; 50:2; Esaia 62:1-7.
Ka hona, meaho e meholo e neng e ahiloe motseng oo hase eona e neng e tla rera hore na Jehova o tla tsoela pele a ntse a sebelisa motse oo kapa che empa ke batho ba leng ho oona, babusi le ba busoang, baprista le sechaba. (Pesaleme ea 102:18-22; Esaia 26:1, 2) Nakong ea ha ba ntse ba tšepahala, ba hlompha lebitso la Jehova ka mantsoe le ka tsela ea bona ea bophelo, o ne a hlohonolofatsa Jerusalema le ho e sireletsa. (Pesaleme ea 125:1, 2; Esaia 31:4, 5) Kapele sechaba le marena a sona se ile sa oeloa ke khalefo ea Jehova ka baka la tsela ea bofetoheli eo ba bangata ba neng ba e latela. Ka baka lena Jehova o ile a phatlalatsa morero oa hae oa ho lahla motse oo o neng o e-na le lebitso la hae. (2 Marena 21:12-15; 23:27) O ne a tla tlosa ‘tsohle tseo motse o iphelisang ka tsona,’ ho neng ho tla fella ka hore o tlale bohatelli, botlokotsebe ba bana, hammoho le ho hloka tlhompho ho banna ba leng libakeng tse hlomphehang; Jerusalema e ne e tla theoloa boemong ’me e tlotlolloe habohloko. (Esaia 3:1-8, 16-26, BPN) Le hoja Jehova Molimo a ile a tsosolosa motse oo lilemo tse 70 ka mor’a ho o lumella hore o timetsoe ke Babylona, batho le baeta-pele ba bona ba ile ba khutlela tseleng ea bona ea bokoenehi hape.
Jehova o ile a boloka motse oo ho fihlela a romela Mora oa hae lefatšeng. O ne o lokela ho lula o ntse o le teng e le hore boprofeta ba Bomessia bo ka phethahatsoa. (Esaia 28:16; 52:7; Zakaria 9:9) Tsela ea Iseraele ea bokoenehi e ile ea fihla sehlohlolong ha Messia, Jesu Kreste, a ne a khokhotheloa. (Bapisa le Mattheu 21:33-41.) Joalokaha a ile a khokhotheloa Jerusalema, ka tlhohlelletso ea baeta-pele ba sechaba le tšehetso ea sechaba, sena se ile sa fana ka tiiso ea hore Molimo o ne o tla lahla motse oo ka ho felletseng le ka ho ke keng ha etsolloa hore o se ke oa hlola o emeloa ke oona le ho jara lebitso la oona. Ho joalokaha Jesu a itse: “Jerusalema, Jerusalema, ea bolaeang baprofeta, ea tlepetsang ka majoe ba rongoang ho uena, ke ratile hangata hakakang ho bokella bana ba hao hammoho, joale ka khoho ha e bokella litsuanyana tsa eona tlas’a mapheo a eona, empa le hanne! Bonang, ntlo ea lōna e tla sala e le lesupi; ’me ka ’nete kea le bolella, ke re: Ha le ka ke la hlola le mpona, ho be ho fihle mohla le tla re: Ho bokoe ea tlang ka lebitso la Morena.” (Luka 13:34, 35; bapisa le Mattheu 16:21.) Jesu leha e le baapostola ba hae ha baa ka ba bolela esale pele ho tsosolosoa leha e le hofe ha Jerusalema ea lefatšeng le tempele ea eona ke Molimo ho neng ho tla tla ka mor’a hore motse oo o timetsoe tlas’a taelo ea Molimo, e leng ho ileng ha etsahala ka 70 C.E.
Leha ho le joalo lebitso la Jerusalema le ile la ’na la sebelisoa e le le tšoantšetsang ho hong ho hoholo ho feta motse oo oa lefatšeng. Moapostola Pauluse, tlas’a pululelo ea Molimo, o ile a senola hore ho na le “Jerusalema oa holimo,” eo a buang ka eona e le “’m’a” Bakreste ba tlotsitsoeng. (Ba-Galata 4:25, 26) Sena se beha “Jerusalema oa holimo” boemong ba ho ba mosali oa Jehova Molimo Ntate le Monehi-Bophelo e moholo. Ha Jerusalema ea lefatšeng e ne e sebelisoa e le motse-moholo oa sechaba se khethiloeng ke Molimo, le eona ho ne ho buuoa ka eona e le mosali, ea nyetsoeng ke Molimo, ea kopantsoeng le oona ka litlamo tse halalelang kamanong ea selekane. (Esaia 51:17, 21, 22; 54:1, 5; 60:1, 14) Ka hona e ne e emela phutheho eohle ea bahlanka ba Molimo ba batho kapa e e tšoantšetsa. Ka hona e tlameha e be “Jerusalema oa holimo” e emela phutheho eohle ea bahlanka ba tšepahalang ba moea ba Jehova.
Jerusalema e Mocha
Ho Tšenolo e bululetsoeng, moapostola Johanne o tlaleha boitsebiso bo mabapi le “Jerusalema e mocha.” (Tšenolo 3:12) Ponong Johanne o bona ‘motse ona o halalelang’ o “theoha leholimong ho Molimo, o itokisitse joale ka monyaluoa ea itlhophiselitseng monna oa hae.” Sena se amana le pono eo a e bonang ea “leholimo le lecha le lefatše le lecha.” Ho ne ho thoe “monyaluoa” enoa ke “mosali oa Konyana.” (Tšenolo 21:1-3, 9-27) Mengolo e meng ea baapostola e sebelisa setšoantšo sona sena bakeng sa phutheho ea Bokreste ea batlotsuoa. (2 Ba-Korinthe 11:2; Ba-Efese 5:21-32) Ho Tšenolo khaolo ea 14 “Konyana” Kreste Jesu e bontšoa e eme holim’a Thaba ea Sione, e leng lebitso leo hape le amahanngoang le Jerusalema (bapisa le 1 Petrose 2:6), ’me ba nang le eona ke ba 144 000 bao lebitso la eona le lebitso la Ntate le ngotsoeng liphatleng tsa bona.—Tšenolo 14:1-5.
Jerusalema e sa Tšepahaleng
Kaha lintho tse ngata tse buuoang mabapi le Jerusalema ka Mangolong ke tseo e nyatsuoang ka tsona, ho hlakile hore Jerusalema e ne e tšoantšetsa mokhatlo o hlophisitsoeng oa Jehova oa leholimo, ’me ka linako tse ling e tšoantšetsa phutheho ea ’nete ea Bokreste, e leng “Iseraele oa Molimo,” hafeela e tšepahala. (Ba-Galata 6:16) Ha e sa tšepahale, e ne e tšoantšetsoa e le letekatse le mosali oa seotsoa; e ne e tšoana le Baamore le Bahethe ba bahedene ba kileng ba busa motse oo. (Ezekiele 16:3, 15, 30-42) Ha e le joalo, e ne e ka tšoantšetsa bakoenehi feela, ba latelang tsela ea ‘botekatse’ ea ho hloka botšepehi ho Molimo oo ba ipolelang hore ba jere lebitso la oona.—Jakobo 4:4.
Ka hona ho ka bonoa hore “Jerusalema” e sebelisoa ka kutloisiso e imenneng hangata, ’me ho tlameha ho hlahlobjoe se fuperoeng ke boitsebiso hore ho fumanoe kutloisiso e nepahetseng ka lekhetlo le leng le le leng.