Kahlolo ea ho Qetela

“HA U e-shoa sephefumolohi sa hao se tla hlokofatsoa se le seng; hoo e tla ba lihele tsa sona: empa letsatsing la kahlolo ’mele oa hao o tla kopana le sephefumolohi sa hao, ’me joale u tla ba le lihele tse peli, sephefumolohi sa hao se tla lutla marotholi a mali, ’me ’mele oa hao o apareloe ke bohloko bo boholo.”

KE KAMOO moruti oa lekholong la bo19 la lilemo C. H. Spurgeon a ileng a hlalosa pono ea baruti ka letsatsi la kahlolo le ho hlokofatsoa ha ba ahloletsoeng ho ea liheleng. Monna oa Letaliana ea etsang litšoantšo Michelangelo o ne a e-na le tumelo e tšoanang e tšosang, joalokaha ho bonoa setšoantšong sa hae sa “Kahlolo ea ho Qetela” (karolo ea sona e bontšitsoe ka holimo), se leboteng la Sistine chapel e Roma. The New Encyclopædia Britannica e re ka setšoantšo sena: “Nakong ea Kahlolo Kreste ke molimo o tšosang ho e-na le ho ba mopholosi oa Bakreste, o amehileng haholo ka ho ahlola moloko oa motho ho e-na le ho amohela ba lehlohonolo leholimong.”

Thuto ea Bokreste-’mōtoana

Makholong a fetileng a lilemo, letsatsi la kahlolo le mollo oa lihele e ne e le lihlooho tse ratoang tseo baruti ba neng ba ruta ka tsona. Baruti ba kang C. H. Spurgeon ha ba le lifaleng, ba ne ba bua ka matla ka litlhaloso tse hlakileng tsa litlhokofatso tse tšosang tse emetseng baetsalibe. Mehleng ea kajeno, ke ka seoelo re utloang thuto ea mofuta o joalo. Empa mollo oa lihele le kahlolo ea ho qetela e ntse e le lithuto tsa sehlooho tsa likereke tse ngata.

Bongata ba malumeli a Bokreste-’mōtoana a lumellana le thuto ea Roma e K’hatholike ea hore likahlolo tsa Molimo li tla ka mehato e ’meli. Oa pele, ho na le “kahlolo e ikhethang.” Ha motho a e-shoa, sephefumolohi sa hae seo ho nahanoang hore ha se shoe ka potlako sea ahloloa ’me se isoa liheleng kapa leholimong hore se e’o phela teng ka ho sa feleng.a Joale ho latela kahlolo ea ho qetela kapa e akaretsang, bofelong ba nako ha ’mele ea bafu e tsosoa ’me e kopanngoa le liphefumolohi tsa bona tse sa shoeng.

Letsatsing lena la kahlolo, liphefumolohi tse leholimong li lula moo ’me li kopanngoa le ’mele e fetotsoeng e sa senyeheng. Ba utloang bohloko liheleng le bona ba lula moo, ’me liphefumolohi tsa bona li kopanngoa le ’mele ea bona e tsositsoeng, e sa senyeheng. Ho ea ka ba bang, sena se etsa hore ba liheleng ba utloe bohloko haholoanyane. Ba ntseng ba phela joaloka batho lefatšeng ha ba shoe. Ba ahloloa nakong eo ba ntseng ba phela ’me ba ea leholimong kapa liheleng ka ho toba, “’mele le sephefumolohi” kamoo ho bonahalang ka teng.

Taba ea hore ho ka etsahala hore motho a mamelle litlhokofatso tse ke keng tsa lekanngoa mollong oa lihele e entse hore taba eohle e amang kahlolo ea ho qetela e tla tlisoa ke Jesu Kreste e be ntho e tšosang haholo hore motho a ka e nahana. Mabapi le sena, na u ka makala ho tseba hore, ha e le hantle, hangata likahlolo tsa Molimo ke lebaka la ho nyakalla le hore Letsatsi la Kahlolo e tla ba le leng la linako tse thabisang ka ho fetisisa historing ea batho? Sena se ka etsahala joang?

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 3]

Random/Sipa Icono