Ho Ananela Mpho ea Bohlokoa ea Bophelo

BOPHELO—Ke leruo la bohlokoa hakaakang! Ka ntle ho bona re ke ke ra etsa letho. Hang ha bo felile, bo ke ke ba tsosolosoa ka boiteko ba motho. Haeba bophelo ba rōna bo le kotsing, re etsa sohle seo re ka khonang ho se etsa ho bo boloka. Hoa makatsa hore ebe ba bang ba ka ba ba batla thuso e tsoang mohloling o phahametseng matla a motho ha ba le mahlomoleng!

Sena se re hopotsa tlaleho ea Bibele ea sekepe se neng se le leoatleng ha ho tsoha sefefo se matla. Nakong eo se neng se le haufi le ho robeha, basebetsi “ba sekepe ba tšoha, ba rapela e mong le e mong molimo oa hae.” Hamorao, kaofela ha bona ba ile ba bitsa Molimo oa ’nete: “Oho Jehova, oho, u se ke ua re timetsa.” Tlaleho ea Bibele e boetse e re: “Ba ba ba lahlela leoatleng mesebetsi e ka sekepeng, ho fokotsa boima ba sona.”—Jonase 1:4-6, 14; bapisa le Liketso 27:18, 19.

Basebetsi bao ba sekepeng ba ne ba ikemiselitse esita le ho tela maruo a bona ao ba a ratang ka boiteko ba ho boloka bophelo ba bona. Maruo a lahlehileng a ka boela a fumanoa—empa ha ho joalo ka bophelo. ’Me hobane ka tlhaho re rata bophelo ba rōna, re balehela kotsi. Re fepa ’mele ea rōna, rea e apesa, le ho e hlokomela. Re batla phekolo ea meriana ha re kula.

Leha ho le joalo, Monehi oa bophelo o hloka ho fetang feela hore re latele mekhoa ea tlhaho ea ho itšireletsa. Etsoe, bophelo ke mpho ea bohlokoahali, ’me bo tsoa Mothong oa bohlokoa ka ho fetisisa bokahohleng bohle. Ka baka la kananelo ea ’nete bakeng sa Monehi le mpho ena, na ha rea lokela ho hlokomela bophelo? ’Me na seo se ke ke sa akarelletsa ho hlompha bophelo ba batho ba bang?

Joale, ha hoa lokela ho re makatsa hore ebe Molao oo Jehova Molimo a ileng a o fa sechaba sa Iseraele o ne o akarelletsa litaelo tse entsoeng ka morero oa ho sireletsa bophelo le bophelo bo botle ba batho ba bang. (Exoda 21:29; Deuteronoma 22:8) Ka ho tšoanang Bakreste kajeno ba lokela ho ameha ka ho sireletseha ha ’mele ea bona. Ka mohlala, haeba u na le bana ba banyenyane ka lapeng la hao, na u siea lintho tse kang lifaha le lipele moo ba ka li fihlelang, kapa lintho tse sehang tse ka ’nang tsa ntša bana ba hao kotsi e khōlō ha ba bapala ka tsona kapa ba li ja ba sa tsebe? Na u behile lik’hemik’hale le meriana e kotsi moo bana ba ke keng ba e fihlela? Haeba metsi a qhalane fatše, na u potlakela ho a tlosa e le hore u ka thibela kotsi? Na lisebelisoa tsa motlakase tse sa sebetseng hantle u li lokisa hang-hang? Na koloi ea hao e hlahlobjoa khafetsa? Na u mokhanni ea hlokolosi? Haeba u hlile u ananela bohlokoa ba bophelo, u tla susumelletseha ho nka mehato e bontšang ho lekanyetsa lintho hantle litšobotsing tsena le tse ling tse tšoanang.

Leha ho le joalo, ho bohloko ho bolela hore batho ba bang ba nka esita le bophelo ba bona habobebe. Ka mohlala, ke mang kajeno ea sa tsebeng hore ho tsuba koae ho senya bophelo? Leha ho le joalo, batho ba limillione ke makhoba a tloaelo ena, le hoja bophelo ba bona bo botle bo fokola nako le nako ha ba hoha mosi ona o chefu. Ba bang ba sebelisa lithethefatsi hampe, ’me ba bang ba sebelisa tahi hampe, ’me tsena tsohle li fella ka kotsi ho bona. AIDS ke boloetse bo bolaeang boo ho sa tsejoeng pheko ea bona. Empa batho ba bangata ba ka be ba ile ba qoba ho ba le boloetse bona ka hore ba balehele boitšoaro bo bobe ba likamano tsa botona le botšehali, mefuta e itseng ea tšebeliso e mpe ea lithethefatsi, le litšelo tsa mali. Ke ho hloka kananelo ho hokaakang bakeng sa bophelo!—Ba-Roma 1:26, 27; 2 Ba-Korinthe 7:1.

Ba ka Fetoha!

Batho ba ananelang ’Mopi oa bona e Moholo, Jehova, ba na le mabaka a matla a ho talima bophelo e le ba bohlokoa. Bophelo ke mpho ea hae e halalelang. Kahoo ba ikemiselitse ho etsa liphetoho life kapa life tse hlokahalang e le hore ba ka bo tšoara joaloka mpho ea Molimo. Nahana ka phihlelo ea Kwaku, eo e leng tichere Ghana. E le lekhoba la tahi le bohlasoa, o ne a senya bophelo ba hae.

Kwaku oa hopola: “Ke ne ke leka ho qobella mosali oa ka hore a ntlhomphe, e leng seo hangata se neng se fella ka likhang tse matla le lintoa, haholo-holo ha ke tahiloe. Ka baka la ho noa lino tse tahang ka ho tlōlisa, hangata ke ne ke hloka chelete, ’me ke ne ke atisa ho hlōleha ho fana ka chelete ea ho phelisa lelapa la ka. Hoa utloahala hore sena se ne se halefisa mosali oa ka haholo. Neng le neng ha ke ne ke felloa ke chelete (’me sena se ne se etsahala khafetsa), ke ne ke etsa ntho efe kapa efe e le hore nka ntšetsa mokhoa oa ka oa ho noa lino tse tahang pele. Nkile ka ea bohōleng ba ho sebelisa chelete ea ho ngolisa liithuti lihlahlobong tsa sechaba. Ke ile ka lemalla tahi ke sa khaotse ke bile ke rekela batho bao ke noang le bona joala. Nako ea ho ikarabella bakeng sa liketso tsa ka tsa nako e fetileng e ile ea fihla kapele. Hoja mookameli oa sekolo a se ke a kenella ka nako e loketseng, nkabe ke ile ka lelekoa mosebetsing.

“Bophelo ba ka bo ne bo le boemong bo bobe haholo. Ke ne ke soabile, empa boikutlo boo bo ile ba fela kapele. Eaba ke qala ho hōlisa menahano ea ho ipolaea hobane ke ikutloa ke se na thuso bophelong. Ho ntse ho le joalo, ke ne ke sitoa ho lokoloha bokhobeng ba tahi. Empa eare ka tsatsi le leng ha ke ameha ntoeng ea matahoa ka bareng moo ke bileng ka hlajoa ka thipa, ke ile ka hlokomela ntlha e sa thabiseng ea hore ka tsatsi le leng lerato la ka la tahi le tla mpolaea.

“Ka nako eo, Lipaki tsa Jehova li ne li ile tsa etela lapeng ha ka ka makhetlo a itseng, li leka ho tsosa thahasello ea rōna Bibeleng. ’Na le mosali oa ka re ne re li baleha hobane re ne re nahana hore lia khathatsa. Leha ho le joalo, ka lekhetlo le leng ke ile ka etsa qeto ea ho li mamela ka baka la ho li utloela bohloko. Kapele thuto ea Bibele e ile ea ntlhokomelisa ka tebello e hlollang ea ho phela ka ho sa feleng tsamaisong ea Molimo e ncha. Ha ke ntse ke ithuta Bibele ka ho eketsehileng ka thuso ea Lipaki tsa Jehova, kananelo ea ka bakeng sa Jehova joaloka Monehi-Bophelo oa rōna le bakeng sa mpho ea bophelo e ile ea teba ka ho eketsehileng, ’me ke ile ka khahloa ke ho sebetsa ha keletso ea Bibele ka ho eketsehileng. Sena se ile sa tsoela pele ho nkhothalletsa ho hloekisa bophelo ba ka. Sena ha sea ka sa ba bonolo, kaha ke ile ka tlameha ho tsoela pele ho hanela tahi le ho tlohela metsoalle ea ka ea nakong e fetileng. Jehova, Moutloi oa thapelo, o ile a bona boikemisetso ba pelo ea ka a ba a nkutloa.a

“Le hoja mosali oa ka e se e mong oa Lipaki tsa Jehova, hona joale oa ntlhompha o hlompha le bolumeli ba ka ka baka la phetoho e khōlō eo a e hlokomelang bophelong ba ka le kamanong ea rōna ea lenyalo. Baahelani ba rōna ha ba sa tlameha ho kenella litoantšanong tsa ka le mosali oa ka. Ke ananela khotso ea kelello eo ke e thabelang hona joale. Ruri, ho ananela Jehova Molimo joaloka Monehi-Bophelo oa rōna, ho ba le pono ea hae ka bohlokoa ba bophelo, le ho utloa litaelo tsa hae tabeng ea kamoo re ka phelang ka teng ke eona feela tsela e molemo ea bophelo.”

Mpho ea Molimo ea Bophelo bo sa Feleng

Batho ba likete ba kang Kwaku, ba ile ba thusoa ke Lipaki tsa Jehova hore ba ‘apare motho e mocha, ea bōpiloeng ka setšoantšo sa Molimo, ho lokeng le khalalelong ea ’nete.’ (Ba-Efese 4:24) Ha baa fetoha ba ananelang bophelo ba bona ba hona joale feela empa hape ba ananela tšepo ea bophelo bo sa feleng lefatšeng la paradeise. Bibele e tšepisa hore Paradeiseng eo e entsoeng ke Molimo, ha ho moahi oa lefatše ea tla ke a utloe bohloko ba ho lapa, hobane “Jehova oa makhotla o tla etsetsa lichaba kaofela mokete oa lijo tse hlabosang.”—Esaia 25:6.

Hona joale, le hoja bophelo e le mpho e hlollang, ke ba nakoana. Motho e mong le e mong o talimane le lefu, ’me lefu le utloisa bohloko hakaakang! Ho shebella motho eo u mo ratang a tloha har’a ba phelang a kena lebitleng le khutsitseng ke ntho e bohloko, re sa feteletse litaba. Empa tlas’a ’Muso oa Molimo, oo Kreste a busang ho oona, tšepiso ea Jehova e tla phethahala: “Lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšenolo 21:4.

Ka nako eo mpho ea bophelo e tla atolosoa ka mokhoa o hlollang. Baphonyohi ba mahlomola a ho qetela ba tla ba le monyetla oa ho finyella bophelo bo felletseng. ’Me, ka tsoho, ho khutlisoa ha bophelo, Jehova Molimo o tla boela a fana ka mpho ea hae ea bohlokoahali ho batho ba robetseng lefung. (Johanne 5:24, 28, 29) Sena se tla bolela ho khutla ha baratuoa ba shoeleng le batho ba mehleng ea boholo-holo ba neng ba tšaba Molimo!

Na ho thata ho lumela see sohle? Che, hobane “ha ho letho le ke keng la etsoa ke Molimo.”—Luka 1:37; bapisa le Jobo 42:2.

Ho feta moo, Jehova Molimo ka boeena o file batho tiiso ea hore sena sohle se tla etsahala. Joang? Ka ho tela motho eo a mo ratang ka ho fetisisa, Mora oa hae ea ratoang, Jesu Kreste, hore a re rekolle sebeng le lefung. Ba-Roma 8:32 ea re tiisetsa: “Oona [Jehova Molimo] o sa kang oa qenehela Mora oa oona oa sebele, oa mpa oa mo tella rōna bohle, na o ke ke oa re sitsa ka lintho tsohle le eena na?” Bibele e re bolella hore sena se tla akarelletsa ho hloekisa batho ho hlepheng ha boitšoaro le ho felisa mefuta eohle ea ho hloka toka, tlōlo ea molao, le pefo. (Esaia 11:9) Bophelo ha bo sa tla hlola bo talingoa joaloka ntho eo eseng ea bohlokoa.

Esita le hona joale, tlas’a maemo a sa phethahalang, bophelo e ka ba bo thabisang haholo. Ke mang ea sa thabeleng monko o lutlisang mathe oa lijo, ho fokoa ke moea o fokang hamonate letsatsing le chesang, ho bona thaba e phahameng, ho likela ha letsatsi ho hotle, ho phalla ha metsi a nōka ho khutsitseng, lipalesa tse hlollang ka botle, molumo oa ’mino o monate, kapa ’mino oa linonyana? Ak’u re khefu hanyenyane. A k’u nahane, ho thabela lintho tse joalo ka ho sa feleng ho ne ho ka ba joang?

Joale, na ke ntho e utloahalang ho lahla tokelo e ntle ea ho phela ka ho sa feleng ka baka la monyaka oa nakoana oo tsela ea bophelo ea booatla le ea ho ikhotsofatsa e ka ’nang ea fana ka oona? (Bapisa le Ba-Heberu 11:25.) Ka bohlale Bibele e re eletsa hore re ‘se ke ra hlola re phela ka litakatso tsa batho, mehleng e sa setseng ho rōna ho phela nameng ka eona, e mpe e be ka ho rata ha Molimo.’ (1 Petrose 4:2) Re le khothatsa ka pelo eohle, e, re le phehella hore le etse sena ka ho ithuta Lentsoe la Molimo, Bibele, le ho sebelisa lintho tseo le ithutang tsona bophelong ba lōna. (Johanne 13:17) Kahoo le tla ba le kamano e ntle le Jehova, Molimo o nang le molemo le mohau o khaphatsehang, o ka le putsang ka bophelo bo sa feleng!

[Mongolo o botlaaseng ba leqephe]

[Setšoantšo se leqepheng la 5]

Na tsela eo u phelang ka eona e bontša hore u ananela bophelo?

[Setšoantšo se leqepheng la 7]

Lefatše le lecha la Molimo le tla etsa hore re thabele menyaka ea bophelo ka ho sa feleng!