Ke Ile ka Ikokobetsa Eaba ke Fumana Thabo

KA 1970, ke ne ke le lilemo li 23 ’me ke na le takatso e tebileng ea ho tuma. Moo ke neng ke hiriloe teng mokhatlong oa makoloi Ivrea, Italy, ke ile ka nyolleloa boemong ba ho ba tlelereke e ka sehloohong. Ke ne ke ikemiselitse ho ba motho oa bohlokoa. Empa ke ne ke khathatsehile ebile ke tepelletse. Hobane’ng?

Monna oa ka o ne a qeta boholo ba nako ea hae a le litameneng a bapala likarete le metsoalle ea hae, ’me o ne a ntlohella hore ke jare boholo ba boikarabelo ba lelapa. Kamano ea rōna e ile ea qala ho senyeha. Re ne re pheha khang ka lintho tse nyenyane. Ka baka leo, kelello ea ka e ile ea tlala menahano e sa lokang.

Ke ne ke ee ke re, ‘Ha ho na motho ea hlileng a u thahasellang. Ba mpa ba rata ho nka monyetla ka maemo a hao.’ Ke ne ke hlola ke ipolella: ‘E tlameha ebe Molimo ha o eo hobane haeba o ne o le teng, o ne o ke ke oa lumella ho utloa bohloko le bokhopo bo bokaale. Bophelo e mpa e le mokhoa oa ho re akofisetsa lefung.’ Ke ne ke sa utloisise hore na ke hobane’ng ha ho le tjena.

Ho Qaleha ha Phetoho

Letsatsi le leng ka 1977, Lipaki tsa Jehova tse peli li ile tsa kokota monyakong oa rōna. Monna oa ka, Giancarlo, o ile a re li kene, ’me ba ile ba leba ka kamoreng ea ho phomola ho ea buisana. Morero oa hae e ne e le ho etsa hore joaloka eena ba lumele hore lintho li itlhahisitse, empa ke bona ba ileng ba fetola monahano oa hae!

Kapele Giancarlo le eena o ile a qala ho etsa liphetoho bophelong ba hae. O ile a fetoha motho ea nang le mamello haholoanyane, ea fanang ka nako le thahasello e ngatanyana ho ’na le morali oa rōna. O ile a leka ho bua le ’na ka lintho tseo a neng a ntse a ithuta tsona, empa ka mehla ke ne ke khaotsa moqoqo ka mantsoe a hlabang.

Ka letsatsi le leng Lipaki tseo li ile tsa fihla, ka lula fatše ’me ka hla ka mamela. Li ile tsa bua ka ho fela ha tsamaiso ena ea lintho le ka ’Muso oa Molimo, lefatše la Paradeise, le tsoho ea bafu. Ke ne ke hlolletsoe! Ha nka ba ka robala masiu a mararo a latelang! Ke ne ke batla ho tseba ho eketsehileng, empa boikhohomoso bo ne bo nthibela ho botsa monna oa ka lipotso. Eaba ka letsatsi le leng o mpolella ka ho tiea: “Kajeno u tl’o mamela. Ke na le likarabelo tsa lipotso tsa hao kaofela.” Eaba o se a ntšollela linnete tsa Bibele.

Giancarlo o ile a mpolella hore Jehova ke lona lebitso la ’Mōpi, le hore tšoaneleho ea Hae e khōlō ke lerato, hore O ile a romela Mora oa Hae e le thekollo e le hore re ka fumana bophelo bo sa feleng, le hore ka mor’a ho felisoa ha ba khopo ka Harmagedone, Jesu Kreste o tla tsosa bafu nakong ea Puso ea hae ea Lilemo tse Sekete. O ile a re ba tsositsoeng ba tla fihlela phetheho ea kelello le ea ’mele le hore ba tla fumana monyetla oa ho phela ka ho sa feleng lefatšeng Paradeiseng.

Ka letsatsi le latelang, ka lekhetlo la pele ke ile ka tsamaea le monna oa ka ho ea Holong ea ’Muso. Hamorao ke ile ka ’molella: “Batho bana baa ratana. Ke batla ho tsoela pele ke tla mona hobane ruri ba thabile.” Ke ile ka qala ho ea libokeng ka mehla, ’me ke ile ka khanneloa thuto ea Bibele. Ke ne ke nahana haholo ka seo ke neng ke ithuta sona ’me kapele ke ile ka kholiseha hore ke fumane batho ba ’nete ba Molimo. Ka 1979 ’na le monna oa ka re ile ra tšoantšetsa boinehelo ba rōna ho Jehova ka ho kolobetsoa.

Tšebeletso ea Nako e Tletseng

Kopanong ea potoloho hamorao selemong seo, ho ile ha fanoa ka puo e khothalletsang mosebetsi oa boboleli oa nako e tletseng. Ke ile ka utloa ke susumelletseha ho nka tšebeletso eo, ’me ke ile ka rapela Jehova ka taba ena. Empa ke ile ka ima, ’me merero ea ka e ile ea sitisoa. Ka lilemo tse latelang tse ’nè, re ile ra ba le bana ba bararo. Ba babeli ba bona, ka makhetlo a fapaneng, ba ile ba ba le mathata ’meleng a neng a beha bophelo ba bona kotsing. Ka lehlohonolo, ka lekhetlo ka leng, ba ile ba fola ka ho felletseng.

Joale ke ile ka utloa hore ke sitoa ho behella merero ea ka ea tšebeletso ea nako e tletseng ka thōko. Ke ile ka tlohela mosebetsi oa ka oa boipheliso hore ke khone ho tsepamisa mohopolo haholoanyane boikarabelong ba ka joaloka mosali le ’mè. ’Na le monna oa ka re ile ra etsa qeto ea ho phela ka moputso o le mong, ho neng ho bolela ho tela lintho tsohle tseo eseng litlhoko. Ho ntse ho le joalo, Jehova o ile a re hlohonolofatsa ka ho enneng, le ka mohla a sa re tlohelle bofutsana kapa ho hloka.

Ka 1984 morali oa ka, ea neng a le lilemo li 15 ka nako eo, ebile a sa tsoa kolobetsoa, o ile a qala tšebeletso ea nako e tletseng e le pula-maliboho. Ka nako e tšoanang, monna oa ka o ile a khethoa e le moholo. Joale ’na? Ke ikutloa hore nke ke ka khona ho bula maliboho, ke ile ka ipehela pakane ea ho qeta lihora tse 30 ka khoeli mosebetsing oa boboleli. Ke ile ka e finyella ’me ka ipolella: ‘Ke hantle! O etsa ho hongata.’

Leha ho le joalo, ke ile ka boela ka ba le bothata ba boikhohomoso. (Liproverbia 16:18) Ke ile ka lula ke nahana mabapi le kamoo ke neng ke etsa hantle ka teng le hore ho ne ho sa hlokahale hore ke etse tsoelo-pele e eketsehileng moeeng. Bomoea ba ka bo ile ba qala ho fokola, ’me ke ile ka qala ho lahleheloa ke litšoaneleho tsohle tse molemo tseo ke neng ke se ke e-na le tsona. Eaba ke fumana taeo eo ke neng ke e hloka.

Ka 1985 balebeli ba babeli ba tsamaeang le basali ba bona ba ile ba fihlela ha rōna ha ba le ketelong ea bona e tloaelehileng phuthehong ea rōna. Ho bona Bakreste bana ba ikokobelitseng, ba itetseng, ruri ho ile ha etsa hore ke nahanisise litaba haholoanyane. Ke ile ka etsa lipatlisiso tabeng ea boikokobetso, ke sebelisa likhatiso tsa Mokhatlo oa Watch Tower. Ke ile ka nahana ka boikokobetso bo boholo boo Jehova a bo bonahatsang litšebelisanong tsa hae le rōna batho ba baetsalibe. (Pesaleme ea 18:35, NW) Ke ne ke tseba hore ke tšoanetse ho fetola tsela eo ke nahanang ka eona.

Ke ile ka kōpa Jehova hore a nthuse ho hlaolela boikokobetso e le hore nka mo sebeletsa ka tsela eo a e batlang le hore a ntataise hore ke sebelise limpho tseo ke nang le tsona bakeng sa khanya ea hae. Ke ile ka tlatsa foromo ea tšebeletso ea bopula-maliboho, ’me ke ile ka qala ho mo sebeletsa tšebeletsong ea nako e tletseng ka March 1989.

Hona joale nka re ke thabile e le kannete ’me ho ikokobetsa ke hona ho tlatselitseng thabong ea ka. Ke fumane lebaka la sebele la ho phela—ho thusa ba hlokang ho tseba hore Jehova, Molimo oa ’nete, ha a hōle le ba mo batlang.—Joalokaha ho boletse Vera Brandolini.