‘Na ke Lokela ho Kolobetsoa?’

HAR’A liqeto tsohle tseo re lokelang ho li etsa bophelong, mohlomong ha ho na eo e leng ea bohlokoa ho feta ena: ‘Na ke lokela ho kolobetsoa?’ Ke hobane’ng ha e le ea bohlokoa hakaale? Hobane qeto ea rōna mabapi le potso ena e na le phello e tobileng eseng feela mokhoeng oa rōna oa bophelo hona joale, empa le bakeng sa boiketlo ba rōna ba ka ho sa feleng.

Na u talimane le ho etsa qeto ee? Mohlomong e se e le nako u ithuta Bibele le Lipaki tsa Jehova. Kapa e ka ’na eaba batsoali ba hao ba ’nile ba u ruta Mangolo ho tloha boseeng. Joale u se u fihlile mothating oo u lokelang ho etsa qeto ea hore na u lokela ho etsa joang. E le hore u tle u khone ho etsa qeto e nepahetseng, u tla tlameha ho utloisisa se akarelletsoang ke kolobetso le hore na ke bo-mang ba lokelang ho kolobetsoa.

Se Akarelletsoang ke Kolobetso

Joaloka lenyalo, kolobetso ke mokete o tiisang kamano. Tabeng ea lenyalo, monna le mosali ba amehang ba se ba ile ba hōlisa kamano e haufi-haufi. Mokete oa lenyalo empa e le ho tsebahatsa phatlalatsa qeto e ileng ea etsoa lekunutung, e leng, hore joale bobeli ba bona ba kena tlamong ea sebele ea lenyalo. O boetse o bula litokelo tse tla thabeloa ke banyalani ’me o tlisa boikarabelo boo ba tlamehang ho bo phelela hammoho bophelong ba bona.

Boemo ke bo tšoanang le ka kolobetso. Ha re ithuta Bibele, re ithuta ka lintho tse lerato tseo Jehova a re etselitseng tsona. Ha aa re fa bophelo feela le tsohle tse hlokahalang bakeng sa ho bo tšehetsa empa o re file le Mor’a oa hae ea tsoetsoeng a inotši ho bulela batho ba baetsalibe ho ba le kamano le Eena le ho fumana bophelo bo sa feleng lefatšeng la paradeise. Ha re nahana ka sena sohle, na ha re susumelletsehe ho nka khato?

Re ka etsa joang? Mor’a Molimo, Jesu Kreste, oa re bolella: “Haeba mang kapa mang a batla ho ntšala morao, a ke a itele a be a jare thupa ea hae ea tlhokofatso ’me a ntatele a sa khaotse.” (Mattheu 16:24, NW) E, re ka ba barutuoa ba Jesu Kreste, ka ho latela mohlala oa hae oa ho sebeletsa lithahasello tsa Ntate oa hae, Jehova. Leha ho le joalo, ho etsa seo, ho hlokahala hore re ‘itele,’ ke hore, ho rera ka boithaopo ho etelletsa thato ea Molimo ka pele ho ea rōna, sena se akarelletsa ho nyehela kapa ho nehela, bophelo ba rōna ho etseng thato ea hae. Ho tsebahatsa qeto ena ea boithaopo le ea botho, ho etsoa mokete oa bohle. Kolobetso ea metsing ke ona mokete o tšoantšetsang boinehelo ba rōna ho Molimo phatlalatsa.

Ke Mang ea Lokelang ho Kolobetsoa?

Jesu o ile a laela balateli ba hae ho ‘ruta batho ba lichaba tsohle, le ho ba kolobetsa ka lebitso la Ntate le la Mora le la moea o halalelang, le hore ba ba rute ho boloka tsohle tseo a ba laetseng tsona.’ (Mattheu 28:19, 20) Ka ho hlakileng, ho hlokahala hore ba kolobetsoang ba hōle kelellong le pelong ho isa bohōleng bo itseng. Ka thuto ea bona ea botho ea Lentsoe la Molimo, ba fihletse ho ananela tlhokahalo ea ho ‘baka le ho sokoloha’ mokhoeng oa bona oa pele oa bophelo. (Liketso 3:19) Joale, ba bone bohlokoa ba ho etsa mosebetsi oa ho bolela evangeli o neng o etsoa ke Jesu Kreste, ka hona e e-ba barutuoa ba hae. Sena sohle se etsahetse pele ho mohato oa kolobetso.

Na u se u le boemong boo khōlong ea hao ea moea? Na u lakatsa ho sebeletsa Molimo? Haeba ho joalo, nahana ka thapelo ka tlaleho ea Bibele ea leqhalaha la Ethiopia, joalokaha e tlalehiloe ho Liketso khaolo 8. Ha monna enoa a hlalosetsoa boprofeta ba Jesu Messia, o ile a hlahlobisisa kelello le pelo ea hae eaba oa botsa: “Ho ka hana eng hore ke se ke ka kolobetsoa na?” Kamoo ho bonahalang ka teng ho ne ho sena letho le neng le mo thibela; kahoo o ile a kolobetsoa.—Liketso 8:26-38.

Kajeno ba bangata ba botsa potso e tšoanang: “Ho ka hana eng hore ke se ke ka kolobetsoa?” Ka baka leo, ba 300 945 ba sa tsoa inehela ba ile ba kolobetsoa ka 1991. Sena se ile sa tlisa thabo e khōlō ho batho bohle ba Jehova, ’me baholo ka liphuthehong ba thabela ho thusa ba bang ba pelo li lokileng ho hatela pele le ho finyella litšoaneleho tsa kolobetso.

Leha ho le joalo, mohlomong baholo ba phutheho ea heno ba khothalletsa hore u eme. Kapa, haeba u mocha, batsoali ba hao ba ka ’na ba u bolella hore u eme. Joale u lokela ho etsa joang? U se ke ua nyahama. Hopola hore ho kena kamanong ea botho le Ea Holimo-limo ke taba e tebileng. U tlameha ho finyella le ho boloka litekanyetso tse phahameng. Kahoo mamela litlhahiso tse fanoeng ’me u li sebelise ka pelo eohle. Haeba u sa utloisise ka ho felletseng mabaka a fanoeng, u se ke oa ba lihlong, empa u botse lipotso ho fihlela u utloisisa ka ho felletseng tokisetso eo ho hlokahalang hore u e etse.

Ka lehlakoreng le leng, batho ba bang ba ka ’na ba tsila-tsila ho nka mohato ona o moholo, kamoo ba o bitsang ka teng. Na u e mong oa bona? Ke ’nete hore ho ka ’na ha ba le mabaka a tiileng a u tlamang ho liehisa boinehelo le kolobetso. Empa haeba ua tšoaneleha feela u sa ntsane u tsila-tsila, ho molemo hore u ipotse: “Ke eng se nthibelang hore ke se ke ka kolobetsoa?” Hlahlobisisa boemo ba hao ka thapelo ’me u bone hore na ho hlile ho na le lebaka le utloahalang le etsang hore u liehe ho arabela memong ea Jehova ea ho kena kamanong ea botho le eena.

‘Ke sa le Monyenyane’

Haeba u motho e mocha, e ka ’na eaba u ntse u nahana, ‘Ke sa le monyenyane.’ Ke ’nete hore haeba batho ba bacha ba lula ba utloa ’me ba mamela batsoali ba bona ba Bakreste ’me ba sebelisa Mangolo kahohle kamoo ba ka khonang ka teng, ba ka kholiseha hore Jehova o ba talima ba “halalela.” Ha e le hantle, Bibele e re bolella hore kamohelo ea Molimo ho batsoali ba lokileng e fetela le ho bana ba ikarabellang ho bona. (1 Ba-Korinthe 7:14) Leha ho le joalo, Bibele ha e fane ka moeli oa lilemo tseo nako ena ea ho itšetleha ka batsoali e fellang ka tsona. Kahoo, ke ha bohlokoa hore bacha ba Bakreste ba nahane potso ena ka ho teba: ‘Na ke lokela ho kolobetsoa?’

Bibele e khothalletsa bacha ho ‘hopola ’Mōpi oa bona e Moholo matsatsing a bocha ba bona.’ (Moeklesia 12:1, NW) Tabeng ena, re na le mohlala oa Samuele e mocha, eo ‘ha e ne e le mohlankana, a neng a ntse a sebeletsa Jehova.’ Ho boetse ho na le mohlala oa Timothea, eo ho tloha boseeng a ileng a nka ka ho teba ’nete eo ’mè oa hae le nkhono oa hae ba ileng ba mo ruta eona.—1 Samuele 2:18; 2 Timothea 1:5; 3:14, 15.

Ka ho tšoanang kajeno, bacha ba bangata ba nehetse bophelo ba bona bakeng sa ho sebeletsa Jehova. Akifusa, ea lilemo li 15, o itse karolo e itseng Sebokeng sa Tšebeletso e ile ea mo thusa ho etsa qeto ea hae ea ho kolobetsoa. Ayumi o ile a kolobetsoa ha a le lilemo li leshome. O ne a batla ho sebeletsa Jehova hobane o bile le lerato la ’nete ho eena. Hona joale o lilemo li 13 ’me o sa tsoa thabela ho bona seithuti sa hae sa Bibele, seo le sona se bileng le lerato ho Jehova, se kolobetsoa se le lilemo li 12. Moena oa Ayumi, Hikaru, le eena o ile a kolobetsoa a le lilemo li leshome. Oa hopola: “Ba bang ba ne ba re ke sa le monyenyane haholo, empa Jehova o ne a tseba kamoo ke ikutloang ka teng. Ke ne ke ikemiselitse ho kolobetsoa hang ha ke etsa qeto ea ho nehela bophelo ba ka ho mo sebeletseng ka sohle seo ke nang le sona.”

Mohlala oa batsoali le oona o phetha karolo e khōlō, joalokaha ho ka bonoa phihlelong ea khaitseli e mong e mocha. Ntate oa hae o ne a thibela ’mè oa hae ho ithuta Bibele le eena le khaitseli ea hae le moen’ae. O ne a ba otla ’me a chesa libuka tsa bona. Empa ka baka la mamello le tumelo ea ’mè oa bona, bana ba ile ba bona bohlokoa ba ho sebeletsa Jehova Molimo. Ngoanana enoa e mocha o ile a kolobetsoa a le lilemo li 13, ’me khaitseli ea hae le moen’ae ba ile ba latela mohlala oa hae.

‘Ke Tsofetse Haholo’

Mopesaleme o ile a re: ‘Maqheku hammoho le bana, a ba ke ba rorise lebitso la Jehova.’ (Pesaleme ea 148:12, 13) E, batho ba baholo le bona ba tlameha hore ba hlokomele tlhokahalo ea ho ema ka lehlakoreng la Jehova. Leha ho le joalo, batho ba bang ba baholo ba na le tloaelo ea ho qoba ho etsa liphetoho. Ba na le boikutlo ba hore “thuto ea boholo ea roba.” Empa, hopola hore Abrahama ea tšepahalang o ne a le lilemo li 75 ha Jehova a ne a ’molella hore: “Tloha naheng ea heno le mofuteng oa heno, ’me u ee lefatšeng leo ke tla u supisa lona.” (Liketso 7:3; Genese 12:1, 4) Moshe o ne a le lilemo li 80 ha Jehova a mo fa thomo: “U ntše sechaba sa ka . . . naheng ea Egepeta.” (Exoda 3:10, BPN) Banna bana le ba bang bohle ba ne ba tloaetse mokhoa oa bona oa bophelo ha Jehova a tla ba bolella hore ba bonahatse lerato le boinehelo ba bona ho eena. Ha baa ka ba tsila-tsila ho arabela pitsong ea Jehova.

Ho joang kajeno? Shizumu e ne e ile ea e-ba Mobuddha ka lilemo tse 78 ha a qala ho ithuta Bibele. Lelapa la hae le ne le mo hanyetsa, le sa mo lumelle le ho ithuta ka ntlong ea hae. Ka mor’a selemo feela, o ile a bona tlhokahalo ea hore a inehele ho Jehova, ’me o ile a kolobetsoa. Ke hobaneng ha a ile a etsa phetoho eo? O ile a re: “Ke ile ka thetsoa ke bolumeli ba bohata ka lilemo tse ngata, ’me ke ne ke batla ho tsoela pele ke amohela ’nete e tsoang ho Jehova ka ho sa feleng.”

‘Eo Joale e U Pholosang’

Nako e ntse e-ea e fela. Bophelo, ho akarelletsa ba hao, bo kotsing. Ho potlakile hore u nahane ka ho teba ka qeto ea boinehelo ho Jehova ’me o ho tšoantšetse ka kolobetso ea metsing. Moapostola Petrose o ile a hatisa sena ka ho re: “Kolobetso e re pholosang joale.” O ile a tsoela pele ho hlalosa hore kolobetso hase “e hlatsoang litšila tsa ’mele” (motho oa be a se a ile a etsa hoo pele a tšoanelehela kolobetso) empa ke “ho itlama ha letsoalo le letle pel’a Molimo.”—1 Petrose 3:21.

Ka mor’a ho finyella litekanyetso tsa Jehova, morutuoa ea kolobelitsoeng joale o ba le letsoalo le letle. Ka ho tsoela pele ho etsa sohle seo a ka se khonang tšebeletsong ea Jehova, o ba le khotso ea kelello le khotsofalo. (Jakobo 1:25) Ka holimo ho tsohle, a ka lebella ka tšepo litlhohonolofatso tse sa feleng tse tsoang ho Jehova tsamaisong e ncha e tlang. E se eka seo e ka ba kabelo ea hao ha u arabela potso ena hamolemo: ‘Na ke lokela ho kolobetsoa?’

[Setšoantšo se leqepheng la 21]

Samuele o ile a sebeletsa Jehova e sa le moshanyana

[Setšoantšo se leqepheng la 22]

Moshe o ne a le lilemo li 80 ha a rongoa ke Jehova

[Litšoantšo tse leqepheng la 23]

Kajeno bacha hammoho le ba hōlileng ba ka lebella litlhohonolofatso tse sa feleng tsamaisong e ncha ea Molimo