E-ba le Pono e Nepahetseng ka Mohau oa Molimo

NGAKA e ne e le mosa ’me e amehile haholo. Ho ea ka kahlolo ea eona e molemohali, mokuli oa eona o ne a hloka ho buuoa kapele-pele e le ho boloka bophelo ba hae. Ha mokuli a ne a qea-qea ’me a hlahisa taba ea litšelo tsa mali, ngaka e ile ea makala. Ha a ne a hlalosa hore ka mabaka a bolumeli o ne a ke ke a lumela tšebetso e amanang le tšelo ea mali, e ne e maketse haholo. E ile ea leka ho nahanisisa ka thata ka tsela ea ho mo thusa. Qetellong, e ile ea nahana hore e e fumane. E ile ea re: “Ua tseba, haeba u sa amohele tšelo ea mali, u tla shoa. Na u batla ho shoa?”

Mokuli o ile a re: “Ho hlakile hore ha ke batle ho shoa.”

“Empa, ho bonahala eka, haeba u ka amohela tšelo ea mali, u tla ba khahlanong le litumelo tsa bolumeli ba hao, tseo le tsona li leng bohlokoa ho uena. Joale, tlhahiso ea ka ke ena. Amohela tšelo ea mali ’me ka hona u boloke bophelo ba hao. Joale ebe u ipolela ho Molimo hore u entse sebe, ’me u bake. Ka tsela ena, u tla boela u khutlisetsoe bolumeling ba hao.”

Ngaka e neng e na le maikutlo a matle e ne e nahana hore e fumane karabelo e phethahetseng. E ne e hlokomela hore mokuli oa eona o lumela ho Molimo o mohau. Ha e le hantle, ena e ne e le ketsahalo e loketseng ea ho sebelisa hamolemo mohau oa Molimo! Empa na tlhahiso ea eona e ne e hlile e utloahala joalokaha e ne e bonahala?

Na le ka Mohla Re Nahana Joalo?

Ka linako tse ling re ka ’na ra iphumana re nahana ka tsela eo ngaka e neng e nahana ka eona. Mohlomong re tšosoa ke ho hlaha ha khanyetso e sa lebelloang sekolong kapa mosebetsing. Kapa re ka ’na ra iphumana re le maemong a tsietsang moo re leng tlas’a khatello ea ho etsa ntho e itseng e siteloang letsoalo la rōna. Re tsomelitsoe, re ka ’na ra sekamela ho khetha mokhoa o bonolo oa ho tsoa bothateng ’me ra etsa seo re tsebang hore se fosahetse, re nahanne ho kōpa tšoarelo hamorao.

Kapa batho ba ka ’na ba lekoa ke litšekamelo tse fosahetseng tsa bona ka bobona. Ka mohlala, mohlankana a ka ’na a iphumana a le boemong boo a lekoang ka matla hore a kopanele boitšoarong bo bobe. Ho e-na le hore a loantše takatso e mpe, a ka inehela, a nahanne ho lokisa litaba le Molimo hamorao. Ba bang ba bile ba ile boholeng ba ho etsa sebe se tebileng ba ntse ba tseba hore ho ka etsahala hore ba khaoloe phuthehong ea Bokreste. Kamoo ho bonahalang ka teng ba ile ba nahana hore, ‘Ke tla emela hore ho fete nako e itseng. Joale ke tla baka ’me ke khutlisetsoe.’

Maemo ana ’ohle a na le lintho tse peli tseo a tšoanang ho tsona. Ea pele, batho baa inehela ho e-na le ho loanela ho etsa se nepahetseng. Ea bobeli, ba ikutloa hore ka mor’a hore ba etse phoso, ho tla iketsahalla feela hore Molimo a ba tšoarele ha ba kōpa.

Pono e Nepahetseng ke Efe?

Na see se bontša kananelo e loketseng ea mohau oa Molimo? Nahana ka mohau oo ka motsotsoana. Jesu o itse: “Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) Moapostola Johanne o ile a hlalosa kamoo mohau oo o sebetsang ka teng ha a ne a re: “Ke le ngolla taba tseo, le tle le se ke la etsa sebe. Ekare ha motho a entse sebe, re na le moemeli pel’a Ntate: ke Jesu Kreste ea lokileng.” (1 Johanne 2:1) Ka hona, haeba ka lebaka la ho se phethahale re oela sebeng, re ka tla ho Molimo ka thapelo ’me ra kōpa tšoarelo motheong oa sehlabelo sa Jesu.

Leha ho le joalo, na hoo ho bolela hore, ha ho tsotellehe hore na re etsa sebe kapa che, hafeela re kōpa tšoarelo ka mor’a moo? Le hanyenyane. Hopola mantsoe a ho qala a qotsitsoeng: “Ke le ngolla taba tseo, le tle le se ke la etsa sebe.” Mantsoe a Johanne a tsoelang pele temaneng eo a bontša tokisetso e lerato ea Jehova ea ho sebetsana le ho se phethahale ha rōna. Leha ho le joalo, re tlameha ho leka ka hohle kamoo re ka khonang ho qoba ho etsa sebe. Ho seng joalo re bontša ho hloka tlhompho ho utloisang bohloko bakeng sa lerato la Molimo, joaloka bao Juda a buang ka bona ba neng ba sebelisa mosa o sa tšoanelang oa Molimo e le seipato bakeng sa boitšoaro bo hlephileng.—Juda 4, NW.

Ho talima mohau oa Molimo e le mofuta oa ntho e itseng eo re ka oelang ho eona hobane re tseba hore re sireletsehile, ho sa tsotellehe seo re se etsang, ho nyenyefatsa bohlokoa ba mohau oa Molimo ’me ho etsa hore ho bonahale eka sebe hase ntho e mpe hakaalo. Sena ho hang hase ’nete. Moapostola Pauluse o ile a bolella Tite: “Mohau oa Molimo, o ka bolokang batho bohle, o bonahetse; o ntse o re ruta ho tela ho se tšabe Molimo le litakatso tsa lefatše, re tle re phele nakong ea joale ka kelello, ka ho loka, le ka borapeli.”—Tite 2:11, 12.

Pauluse o ile a bontša kananelo ea hae bakeng sa mohau oa Molimo ka tsela eo a ileng a loana ka eona khahlanong le ho se phethahale ha hae. O itse: “Ke mpa ke laea ’mele oa ka, ke ithapisetsa oona; e se re mohlomong ha ke boleletse ba bang Evangeli, ’na ka fumanoa ke sa lokeloa ke ho amoheloa.” (1 Ba-Korinthe 9:27) Pauluse o ne a sa nke lintho habobebe feela ka ho nahana hore o ne a tlanngoe ke sebe nako le nako. Na re lokela ho nka taba ena habobebe?

Pono ea Jesu

Ketsahalong e ’ngoe, Jesu o ile a bontša kamoo a neng a talima maikutlo a ho sekisetsa ho se nepahetseng le ho nka tsela e bobebe bakeng sa ho qoba ho utloa bohloko. Ha a qala ho bolella barutuoa ba hae ka lefu la hae la sehlabelo le ka pele, Petrose o ile a leka ho mo tlosa maikutlong ao, a re: “Morena, u ikutloele bohloko: tse joalo li ke ke tsa u hlahela.” Karabelo ea Jesu e bile efe? “Tloha ho ’na, Satane, u khopiso ho ’na, hobane ha u utloe tsa Molimo, u utloa tsa batho feela.”—Mattheu 16:22, 23.

Khalemelo ea Jesu e matla ho Petrose e ne e bontša ka ho hlaka hore Jesu o ne a hana ho nka tsela e bobebe e neng e kopanyelletsa ho etsa ntho e khahlanong le thato ea Molimo. Tlaleho e bontša hore o ile a latela tsela e nepahetseng a sa thekesele, a feta tlhekefetsong e sa khaotseng e tsoang ho Satane. Qetellong o ile a songoa, a otloa ka sehlōhō, ’me a shoa lefu la mahlomola. Leha ho le joalo, ha aa ka a sekisetsa, ’me ka lebaka lena o ile a khona ho nehelana ka bophelo ba hae e le topollo bakeng sa rōna. Ka sebele ha aa ka a tiisetsa ho sena sohle e le hore re ka ‘ikutloela bohloko’ ha ho hlaha mathata kapa liteko!

Ho itsoe ka Jesu: “U ratile ho loka, ’me u hloile ho se ee ka molao.” (Ba-Heberu 1:9, NW) Ho nka tsela e bonolo ho tsoa mathateng hangata ho kopanyeletsa ho tlōla molao. Ka hona, haeba kannete re ho hloile—joalokaha Jesu a entse—ka mehla re tla hana ho sekisetsa. Bukeng ea Liproverbia, Jehova o re: “Mora oa ka, hlalefa, u nthabise pelo, ’me ke tla ba le puo ho fetola ba nkomanyang.” (Liproverbia 27:11) Ho loka ha Jesu ho leka-lekaneng empa e le ho sa sekisetseng ho ile ha tlisa thabo e khōlō pelong ea Jehova. Re ka thabisa Jehova ka ho tšoanang haeba re latela tsela ea Jesu ea botšepehi.—1 Petrose 2:23.

Ho Koetlisoa ka Tiisetso

Moapostola Petrose o ngotse: “Ke sona seo le se thabelang haholo, leha empa joale le sa ntse le hlomohile ke meleko e mengata, leha empa e le ka motsotso o mokhutšoanyane kamoo ho le tšoanetseng; hore tumelo ea lōna, ha e se e lekiloe, e leng e fetisang hōle gauda e timelang, athe le eona e ee e lekoe ka mollo, e tle e le fetohele poko, le hlompho, le khanya, mohla Jesu Kreste a hlahang.” (1 Petrose 1:6, 7) Kaha ha rea phethahala ’me re phela ka har’a lefatše la Satane, re tla lula re ntse re tobana le liteko le meleko. Joalokaha Petrose a bontša, sena se ka sebeletsa morero o motle. Li leka tumelo ea rōna, hore na e-ea fokola kapa e matla.

Li boetse li sebeletsa ho re koetlisa. Jesu o “ithutile kutlo ka tse bohloko tse mo hlahetseng.” (Ba-Heberu 5:8) Le rōna ka ho tšoanang re ka ithuta kutlo, hammoho le ho itšetleha ka Jehova, haeba re tiisetsa tlas’a teko. ’Me tšebetso ena ea ho ithuta e tla tsoela pele ho fihlela e phethahetse, joalokaha Petrose a itse: “Molimo . . . o tla le etsa ba phethehileng, o le tiise, o le fe matla.”—1 Petrose 5:10.

Leha ho le joalo, haeba re sekisetsa tlas’a teko, re iponahatsa re le bokoala kapa re fokola, re haelloa ke lerato le matla ho Jehova le bakeng sa ho loka kapa re haelloa ke boitšoaro. Bofokoli leha e le bofe bo joalo bo beha kamano ea rōna le Molimo kotsing e khōlō. Ruri, temoso ea Pauluse e ka sebetsa le boemong ba rōna: “Ekare ha re etsa sebe ka boomo, ha re se re filoe tsebo ea ’nete, ha ho sa le sehlabelo se seng sa libe.” (Ba-Heberu 10:26) Ho molemo haholo hakaakang ho se etse sebe qalong ho feta ho inehela bofokoling le ho ba kotsing ea ho lahleheloa ke tebello eohle ea bophelo!

Botšepehi bo sa Itšetlehang ka Maemo

Mehleng ea moprofeta Daniele, Baheberu ba bararo ba ile ba sokeloa ka lefu la mollo haeba ba ne ba ke ke ba rapela setšoantšo. Karabelo ea bona e bile efe? “Bona, Molimo oa rōna, oo re o sebeletsang, o na le matla a ho re lokolla sebōping sa mollo o bohale, ’me o fela o tla re lokolla letsohong la hao, morena. Leha ho se joalo, u tsebe, morena, hobane re ke ke ra sebeletsa melimo ea hao, re ke ke ra khumamela setšoantšo sa gauda seo u se emisitseng.”—Daniele 3:17, 18.

Ba ile ba ema ba tiile hobane ba ne ba batla ho etsa se nepahetseng. Haeba ho ne ho isa lefung, ho ne ho se nang. Tšepo ea bona e ne e le tsohong. Leha ho le joalo, haeba, Molimo a ne a ka ba lopolla, ba ne ba tla khetha hoo. Empa khato ea bona e tiileng e ne e sa itšetleha ka maemo. Ka hona ka mehla ho lokela ho ba joalo ka bahlanka ba Molimo.

Mehleng ea rōna ba bang ba ileng ba hana ho sekisetsa ba ile ba tšoaroa, ba hlokofatsoa, esita le ho bolaoa. Ba bang ba entse lintho tse bonahalang mahlabelo, ba khetha ho lula ba futsanehile ho e-na le ho rua ka ho sekisetsa melao-motheo e lokileng. Ho etsahetse’ng ka mosali oa Mokreste ea hlalositsoeng qalong ea sehlooho sena? O ile a ananela sepheo se mosa sa ngaka le hoja se ne se khopame, empa ha aa ka a sekisetsa tumelo ea hae. Ho e-na le hoo, tlhompho ea hae ho Jehova e ile ea mo etsa hore a hane ho buuoa. Ka thabo, o ile a hlaphoheloa ’me a tsoela pele ka mafolo-folo ho sebeletsa Jehova. Leha ho le joalo, ha a ne a emela khato ea hae ka tieo, o ne a sa tsebe hore na liphello e tla ba life, empa o ne a itokiselitse ho tlohella taba eohle matsohong a Jehova.

Ke eng se mo thusitseng ho ema a tiile hakaale tlas’a khatello? Ha aa ka a leka ho itšetleha ka matla a hae, ’me leha e le ofe oa bahlanka ba Molimo ha aa lokela ho itšetleha ka matla a hae. Hopola, “Molimo ke setšabelo sa rōna le matla a rōna, ke thuso e fetisisang litsietsing.” (Pesaleme ea 46:1) Ho molemo haholoanyane hakaakang ho retelehela ho Molimo bakeng sa thuso ha re le tlas’a teko ho e-na le ho etsa sebe ebe joale re tlameha ho retelehela ho eena bakeng sa mohau!

E, le ka mohla a re se keng ra nka mohau o moholo oa Molimo habobebe. Ho fapana le hoo, a re hōliseng takatso ea sebele ea ho etsa se lokileng, esita leha re tobane le mathata. Sena se ka tebisa kamano ea rōna le Jehova, sa re fa koetliso eo re e hlokang bakeng sa bophelo bo sa feleng, le ho bontša tlhompho e loketseng bakeng sa mohau oa Molimo. Boitšoaro bo joalo bo bohlale bo tla tlisa thabo pelong ea Ntate oa rōna oa leholimo.

[Setšoantšo se leqepheng la 24]

Tšepo e feletseng tsohong e ile ea thusa Baheberu ba bararo ho boloka botšepehi