Baboleli ba ’Muso Baa Tlaleha

“Ho Thabile Motho ea Fumaneng Bohlale”

MAELE ana a ipakile e le ’nete Korea, moo hona joale ho nang le Lipaki tsa Jehova tse thabileng tse ka holimo ho 71 000. (Liproverbia 3:13, NW) ’Me ak’u nahane, karolo ea 42 lekholong ea basebeletsi bana ba tšebeletsong ea nako e tletseng! Liphihlelo tse latelang li tla bontša hore thabo e khōlō ho bao ba batlang bohlale ba ’nete.

Sebakeng sa Pusan mosali o ne a ’nile a kena e ’ngoe ea likereke tsa Bokreste-’mōtoana ka lilemo tse 16. O ne a ile a hlokomela litšebeliso tse ngata tseo e seng tsa mangolo hoo a ileng a qala ho nahana hore e ka ’na eaba Molimo ha o eo. Ka lehlakoreng le leng, o ne a sa latole boteng ba Molimo, kahoo ka botšepehi o ile a rapela Molimo hore a fumane kereke ea ’nete haeba ho ne ho e-na le ntho e joalo. Hang-hang o ile a nahana ka Lipaki tsa Jehova, ’me a hopola hore kereke ea hae e ne e ile ea li nyatsa ’me ea hlokomelisa batho ba eang kerekeng ka tsona hobane Lipaki li ne li sa lumele Boraro-bo-bong, mollo oa lihele, le lithuto tse ling tsa Bokreste-’mōtoana. Ebe mohlomong e ne e le tsona tsa kereke ea ’nete? Ka thuso ea moahelani oa hae o ile a fumana sebaka sa Holo ea ’Muso. Letsatsi le hlahlamang feela, a be a ea sebokeng.

O ile a makatsoa ke tlhophiso ea seboka. Ho ne ho se na lerata kapa ho bina ba thohothetsoe joalokaha ho ne ho etsoa kerekeng ea hae. O ile a tsebana le Paki e neng e lakatsa ho ithuta Bibele le eena, ’me thuto ka lekhetlo la ho qala e ile ea nka lihora tse ’maloa ka lebaka la lipotso tsa hae tse ngata. Lekhetlong la bobeli la thuto, o ile a tsebisa hore o il’o itokolla kerekeng ea hae le ho ba Paki. O ile a bolella khaitseli hore ha a sa tla hlola a hloka ho ithuta le eena, kaha a ka ea libokeng feela. Leha ho le joalo, o ile a bontšoa bohlokoa ba ho ba le thuto ea botho ea Bibele ho phaella ho kopaneleng libokeng. O ile a amohela tlhahiso, a sebelisa seo a ithutang lithutong tsa hae, ’me ka nako e tšoanetseng a kolobetsoa.

Hona joale o thabile haholo hore ebe o fumane bohlale ba Molimo oa ’nete, Jehova, ’me o na le tšepo ea ho phela ka ho sa feleng lefatšeng le lecha la Molimo.

Molaoli-kakaretso ea Pensheneng o Ithuta ’Nete

Mosali oa molaoli-kakaretso oa lebotho o ile a kolobetsoa ka 1962. Qalong monna oa hae o ile a mo hanyetsa, empa hamorao o ile a khaotsa ho mo hanyetsa, ’me lilemong tse 28 tse latelang, baena ba fapaneng ba ne ba ithuta le eena, ba leka ho hōlisa thahasello ea hae ’neteng. O ile a ea ho tse ling tsa liboka le likopano, empa e ne e le e mong oa batho bao ba monyebe ho nka ’nete ka ho teba. Ka 1990 eena le mosali oa hae ba ile ba ea Japane, moo ba ileng ba ea kopanong ea setereke. A mamela ka hloko lipuo—e leng seo a neng a e-s’o ka a se etsa pele. O ile a tšosoa ke lipuo tse matla tse pepesang bolumeli ba bohata, empa tsena li ile tsa bulela mahlo a hae boikaketsi ba Bokreste-’mōtoana. O ile a khahloa ke tlhophiso le thabo ea batho ba Molimo Japane, tse neng li tšoana hantle feela le tseo a neng a li bone Korea. Ha a khutlela Korea, o ile a qala thuto ea Bibele e tebileng ’me qetellong a kolobetsoa.

Joale ke eng seo a neng a tla se etsa ka mor’a kolobetso? O ile a itokolla boemong ba hae e le mookameli oa hotele e tummeng ea bahahlauli ’me a kopanela le mosali oa hae tšebeletsong ea nako e tletseng ea bopula-maliboho. O ikutloa hore ho ba pula-maliboho ea ka mehla ke tsela e molemohali ea ho lefa lilemo tse 28 tseo a li sentseng a sa etse letho.

Hona joale oa hlokomela hore maele a reng “ho thabile motho ea fumaneng bohlale” a boetse a sebetsa ho eena!