Ho Fumana Senotlolo se Isang Kamehong ea Bana ba Motho

“Ekeletsang . . . boinehelong ba lōna ba bomolimo kameho ea bana ba motho.”—2 PETROSE 1:5-7, NW.

 1. Le leng la mabaka a maholo ao lipokano tsa batho ba Jehova e leng liketsahalo tse thabisang ke lefe?

KA NAKO e ’ngoe ngaka eo e neng e se e mong oa Lipaki tsa Jehova e kile ea e-ba teng ha morali oa eona a ne a amohela mangolo Sekolong sa Bibele sa Watch Tower sa Gileade, seo a neng a fumane koetliso ea boromuoa ho sona. E ile ea khahloa haholo ke letšoele le thabileng hoo e ileng ea hlahisa maikutlo a hore e tlameha ebe ho na le bokuli bo fokolang haholo har’a batho bana. Ke’ng se neng se entse hore letšoele leo le thabe hakaalo? Ha e le hantle, ke eng se etsang hore lipokano tsohle tsa batho ba Jehova, liphuthehong, likopanong tsa potoloho, le likopanong tsa setereke, e be liketsahalo tse thabisang? Na hase kameho ea bana ba motho eo ba e bontšanang? Ntle ho pelaelo kameho ea bana ba motho ke le leng la mabaka ao ho ’nileng ha boleloa hore ha ho sehlopha se seng sa bolumeli se fumanang monyaka o mongata, thabo, le khotsofalo bolumeling joalokaha ho etsa Lipaki tsa Jehova.

 2, 3. Ke mantsoe afe a mabeli a Segerike a sebetsanang le maikutlo a rōna e mong ho e mong ’me litšobotsi tsa ’ona tse ikhethang ke life?

² Re lokela ho lebella ho bona kameho e joalo ea bana ba motho ka mor’a ho nahana ka mantsoe a moapostola Petrose ho 1 Petrose 1:22 (NW): “Kaha le hloekisitsoe liphefumolohi tsa lōna ka ho utloa ha lōna ’nete ka phello e le kameho e se nang boikaketsi ea bana ba motho, ratanang ka matla ho tloha pelong.” O mong oa metso ea motheo oa lentsoe la Segerike le bontšitsoeng mona e le “kameho ea bana ba motho” ke phi·liʹa (kameho). Moelelo oa lona o amana haufi-ufi le moelelo oa a·gaʹpe, lentsoe leo hangata le fetoleloang e le “lerato.” (1 Johanne 4:8) Le hoja hangata kameho ea bana ba motho le lerato li sebelisoa ka ho fapanyetsana, li na le litšobotsi tse khethollehileng. Ha rea lokela ho li ferekanya, joalokaha bafetoleli ba bangata ba Bibele ba etsa. (Sehloohong sena le ho se latelang, re tla tšohla lentsoe ka leng ho ana.)

³ Mabapi le phapang pakeng tsa mantsoe ana a mabeli a Segerike, setsebi se seng se bontšitse hore phi·liʹa “ka ho hlakileng ke lentsoe le bontšang mofuthu le katamelano le kameho.” Ka lehlakoreng le leng, a·gaʹpe e amana haholo le kelello. Kahoo ha re bolelloa hore re rate (a·gaʹpe) lira tsa rōna, ha re na kameho ka tsona. Hobane’ng? Hobane “litloaelano tse mpe li bolisa mekhoa e metle.” (1 Ba-Korinthe 15:33) Se boetseng se bontša hore ho na le phapang ke mantsoe a moapostola Petrose: “Ekeletsang . . . kamehong ea lōna ea bana ba motho lerato.”—2 Petrose 1:5-7, NW; bapisa le Johanne 21:15-17.a

Mehlala ea Kameho ea Bana ba Motho e Khethehileng Haholo

 4. Ke hobane’ng ha Jesu le Johanne ba ne ba e-na le kameho e khethehileng e mong ho e mong?

⁴ Lentsoe la Molimo le re fa mehlala e mengata e metle ea kameho ea bana ba motho e khethehileng haholo. Kameho ena e khethehileng hase phello ea khopolo e itlhahetseng feela tjee e ne e sa reroa empa e thehiloe kananelong ea litšoaneleho tse hlahelletseng. Ha ho pelaelo hore mohlala o tsebahalang hamolemo ke oa kameho eo Jesu Kreste a neng a e-na le eona ho moapostola Johanne. Ntle ho pelaelo, Jesu o ne a e-na le kameho ea bana ba motho ho baapostola ba hae bohle ba tšepahalang, ’me ho le joalo ka lebaka le letle. (Luka 22:28) Tsela e ’ngoe eo a ileng a bontša sena e bile ka ho ba hlatsoa maoto, kahoo a ba ruta ka boikokobetso. (Johanne 13:3-16) Empa Jesu o ne a e-na le kameho e khethehileng ho Johanne, e leng seo Johanne a se bolelang khafetsa. (Johanne 13:23; 19:26; 20:2) Le hoja Jesu a ne a e-na le lebaka la ho bontša kameho ho barutuoa ba hae le baapostola ba hae, haholo mohlomong Johanne o ile a etsa hore Jesu a be le kameho e khethehileng ho eena ka lebaka la kananelo ea hae e tebileng haholoanyane ho Jesu. Re ka bona sena mangolong a Johanne, Kosepeleng ea hae le mangolong a hae a bululetsoeng. Ke hangata hakaakang a bolelang lerato mangolong ao! Kananelo e khōloanyane ea Johanne bakeng sa litšoaneleho tsa Jesu tsa moea e bonoa ho seo a se ngotseng ho Johanne likhaolong 1 le 13 ho isa ho 17, hammoho le ka litšupiso tseo a li entseng khafetsa ka ho ba teng ha Jesu pele e e-ba motho.—Johanne 1:1-3; 3:13; 6:38, 42, 58; 17:5; 18:37.

 5. Ho ka thoe’ng ka kameho e khethehileng eo Pauluse le Timothea ba neng ba e-na le eona e mong ho e mong?

⁵ Ka ho tšoanang, re ne re ke ke ra batla ho hlokomoloha kameho ena ea bana ba motho e khethehileng eo moapostola Pauluse le molekane oa hae oa Mokreste Timothea ba neng ba e-na le eona e mong ho e mong, eo ha e le hantle, e neng e thehiloe ho ananeleng litšoaneleho tsa e mong le e mong oa bona. Mangolo a Pauluse a na le litlhaloso tse ntle ka Timothea, tse kang: “Ha ke na e mong eo pelo ea hae e tšoanang le ea ka joale ka eena, leha e le ea hlokomelang taba tsa lōna ka sebele joale ka eena. . . . Le tseba liketso tsa hae, kamoo a ntšebelelitseng Evangeling kateng, joale ka ngoana ha a sebeletsa ntat’ae.” (Ba-Filippi 2:20-22) Ho na le litšupiso tse ngata tsa botho mangolong a hae a eang ho Timothea a senolang kameho e mofuthu ea Pauluse ho Timothea. Ka mohlala, hlokomela 1 Timothea 6:20: “Oho Timothea, boloka hle se beiloeng kalosong ea hao.” (Hape bona 1 Timothea 4:12-16; 5:23; 2 Timothea 1:5; 3:14, 15.) Haholo-holo ha ho bapisoa mangolo a Pauluse a eang ho Timothea le lengolo la hae le eang ho Tite a hatisa kameho e khethehileng ea Pauluse ho mohlankana enoa. E tlameha Timothea a ne a ikutloa ka tsela e tšoanang ka setsoalle sa bona, joalokaha ho ka hlokomeloa mantsoeng a Pauluse ho 2 Timothea 1:3, 4: “Ha ke phetse ho u hopola merapelong ea ka . . . ke ntse ke hopola meokho ea hao, ’me ke lakatsa haholo ho u bona, ke tle ke tlale thabo.”

 6, 7. Ke boikutlo bofe boo Davida le Jonathane ba neng ba e-na le bona e mong ho e mong, hona hobane’ng?

⁶ Mangolo a Seheberu le ’ona a fana ka mehlala e metle, o kang oa Davida le Jonathane. Re bala hore ka mor’a hore Davida a bolaee Goliathe, “pelo ea Jonathane ea holehana le pelo ea Davida, ’me Jonathane a mo rata, joale ka ha a ithata.” (1 Samuele 18:1) Ha ho pelaelo hore kananelo mohlaleng oa Davida oa ho chesehela lebitso la Jehova le sebete sa hae sa ho ea loantša Goliathe oa senatla e ile ea etsa hore Jonathane a be le kameho e khethehileng ho Davida.

⁷ Jonathane o ne a e-na le kameho e joalo ho Davida hoo a ileng a beha bophelo ba hae kotsing ho sireletsa Davida ho Morena Saule. Ha ho mohla Jonathane a kileng a hlonamela ho khethoa ha Davida ke Jehova hore e be morena oa Iseraele ea latelang. (1 Samuele 23:17) Davida o ne a e-na le kameho e tebileng ka ho lekaneng ho Jonathane, e bonahalang ho seo a se buileng ha a ne a llela ho shoa ha Jonathane: “Ke tsielehile ka baka la hoo, Jonathane, ngoan’eso: u no u khahleha ho ’na; lerato la hao ho ’na e ne e le le makatsang, le fetang lerato la basali!” Ka sebele, kananelo e tebileng e ile ea tšoaea kamano ea bona.—2 Samuele 1:26.

 8. Ke basali bafe ba babeli ba ileng ba bontšana kameho e khethehileng, hona hobane’ng?

⁸ Re boetse re na le mohlala o motle ka Mangolong a Seheberu oa kameho e khethehileng ea basali ba babeli, Naomi, le ngoetsi ea hae ea mohlolohali Ruthe. Hopola mantsoe a Ruthe ho Naomi: “U se ke ua mphehella hore ke u siee, ke tlohele ho ea le uena; hobane ke tla ea moo u eang, ke lule moo u lulang; chaba sa hao ke chaba sa ka, ’me Molimo oa hao ke Molimo oa ka.” (Ruthe 1:16) Na ha rea tlameha ho etsa qeto ea hore Naomi ka boitšoaro ba hae le ka ho bua ha hae ka Jehova, o ile a thusa Ruthe hore a be le karabelo ena e nang le kananelo?—Bapisa le Luka 6:40.

Mohlala oa Moapostola Pauluse

 9. Ke’ng e bontšang hore Pauluse e ne e le mohlala o motle oa kameho ea bana ba motho?

⁹ Joalokaha re bone, moapostola Pauluse o ne a e-na le kameho ea bana ba motho e khethehileng haholo ho Timothea. Empa hape o behile mohlala o babatsehang oa ho bontša kameho e mofuthu ea bana ba motho ho banab’abo ka kakaretso. O ile a bolella baholo ba Efese hore ‘ka lilemo tse tharo ha a ka a phetsa bosiu le motšehare ho eletsa e mong le e mong oa bona ka meokho.’ Na ke kameho e mofuthu ea bana ba motho? Ha ho pelaelo! ’Me ba ile ba ikutloa ka tsela e tšoanang ka Pauluse. Ha ba utloa hore ba ne ba ke ke ba hlola ba ’mona hape, “ba tšoaroa bohle ke ho lla haholo-holo; ba itihela molaleng oa Pauluse, ba mo aka.” (Liketso 20:31, 37) Na kameho ea bana ba motho e thehiloe kananelong? E! Kameho ea hae ea bana ba motho e boetse e bonoa mantsoeng a hae ho 2 Ba-Korinthe 6:11-13 (NW): “Bakorinthe, molomo oa rōna o le ahlametse, lipelo tsa rōna li atolohile. Ha lea petetsana ka hare ho rōna, empa le petetsane kamehong ea lōna e mofuthu. Kahoo, ka ho buseletsa—ke bua joaloka ho bana—le lōna, atolohang.”

10. Ke khaello efe ea kameho ea boena e ileng ea susumeletsa Pauluse ho bolela liteko tsa hae ho 2 Ba-Korinthe khaolo ea 11?

¹⁰ Ka ho hlakileng, Bakorinthe ba ne ba haelloa ke kananelo kamehong ea boena ea moapostola Pauluse. Kahoo, ba bang ba bona ba ile ba belaela: “Mangolo a hae a boima, a matla, empa ha a le teng ka seqō ke likobo feela, le puo ea hae ea nyeliseha.” (2 Ba-Korinthe 10:10, BPN) Ke ka lebaka leo Pauluse a ileng a bua ka ‘baapostola ba bona ba molemo ka ho fetisisa’ (NW) ’me a susumeletseha ho bolela liteko tseo a ’nileng a li mamella joalokaha li tlalehiloe ho 2 Ba-Korinthe 11:5, 22-33.

11. Ke bopaki bofe bo teng mabapi le kameho ea Pauluse ka Bakreste ba Thessalonika?

¹¹ Kameho e mofuthu ea Pauluse ho bao a ba sebeletsang e totobala ka ho khethehileng mantsoeng a hae ho 1 Ba-Thessalonika 2:8 (NW): “Ka baka la ho ba le kameho ka lōna, re ile ra thabela ho le neha eseng feela litaba tse molemo tsa Molimo, empa le tsona liphefumolohi tsa rōna, hobane le fetohile baratuoa ho rōna.” Ha e le hantle, o ne a e-na le kameho ka baena bana ba bacha hoo a neng a ke ke a hlola a leta halelele hore a ka utloa ka boiketlo ba bona—o ne a laba-labela ho tseba kamoo ba neng ba mamella mahloriso ka teng—hoo a ileng a romela Timothea, ea ileng a fana ka tlaleho e molemo e ileng ea khatholla Pauluse haholo. (1 Ba-Thessalonika 3:1, 2, 6, 7) Insight on the Scriptures e hlalosa sena hantle: “Tlamahano e haufi-ufi ea kameho ea bana ba motho e ne e le teng lipakeng tsa Pauluse le bao a neng a ba sebeletsa.”

Kananelo—Senotlolo se Isang Kamehong ea Bana ba Motho

12. Ke mabaka afe ao re nang le ’ona a hore re bontše kameho e mofuthu ho bana babo rōna?

¹² Ntle ho pelaelo, senotlolo se isang kamehong ea bana ba motho ke kananelo. Na bahlanka bohle ba inehetseng ba Jehova ha ba na litšoaneleho tseo re li ananelang, tse hōlisang kameho ea rōna, tse etsang hore re be motlotlo ka bona? Kaofela ha rōna re batla ’Muso oa Molimo le ho loka ha hae pele. Kaofela ha rōna re loana ka sebete khahlanong le lira tsa rōna tse tharo tse tloaelehileng: Satane le bademona ba hae, lefatše le khopo le tlas’a taolo ea Satane, le litšekamelo tseo re li futsitseng tsa boithati tsa nama ea boetsalibe. Na ka mehla ha rea lokela ho nka hore banab’abo rōna ba etsa sohle seo ba ka se khonang ka lebaka la maemo a bona? E mong le e mong ea lefatšeng mona o ka lehlakoreng la Jehova kapa ka lehlakoreng la Satane. Baena ba rōna le bo-khaitseli ba inehetseng ba ka lehlakoreng la Jehova, e, ka lehlakoreng la rōna, ’me ka hona ba lokeloa ke kameho ea rōna ea bana ba motho.

13. Ke Hobane’ng ha re lokela ho ba le kameho e mofuthu ho baholo?

¹³ Ho thoe’ng ka ho ananela baholo ba rōna? Na ha rea lokela ho ba motlotlo ka ho khetheha ka bona ka lebaka la tsela eo ba sebetsang ka thata ka eona lithahasellong tsa phutheho? Joaloka rōna bohle, ba lokela ho iphelisa hammoho le malapa a bona. Ba boetse ba na le boikarabelo bo tšoanang le ba rōna kaofela ba ho etsa thuto ea botho, ho ba teng libokeng tsa phutheho, le ho kopanela tšebeletsong ea tšimo. Ho phaella moo, ba na le boikarabelo ba ho lokisetsa likarolo tsa lenaneo la liboka, ho fana ka lipuo tsa phatlalatsa, le ho hlokomela mathata a hlahang ka phuthehong, ao ka linako tse ling a nkang lihora tse ngata tsa litaba tsa boahloli. Kannete, re batla ho “tšoara banna ba mofuta oo ka hlompho.”—Ba-Filippi 2:29, NW.

Ho Bontša Kameho ea Bana ba Motho

14. Ke mangolo afe a re laelang ho bontša kameho ea bana ba motho?

¹⁴ E le hore re thabise Jehova, re tlameha ho bontša boikutlo bo mofuthu ba kameho ea bana ba motho ho balumeli-’moho le rōna, joalokaha Jesu Kreste le Pauluse ba entse. Rea bala: “Ka [kameho ea bana ba motho] le be le kameho e mofuthu e mong ho e mong.” (Ba-Roma 12:10, Kingdom Interlinear) “Mabapi le [kameho ea bana ba motho], ha ho hlokahale re le ngolle, kaha lōna ka bolōna le rutoa ke Molimo ho ratana.” (1 Ba-Thessalonika 4:9, Int) ‘[Kameho ea rōna ea bana ba motho] ha e ke e tsoele pele.’ (Ba-Heberu 13:1, Int) Ruri Ntate oa rōna oa leholimo oa thaba ha re bontša kameho ea bana ba motho ho bana ba hae ba lefatšeng!

15. Ke litsela life tse ling tsa ho bontša kameho ea bana ba motho?

¹⁵ Mehleng ea baapostola Bakreste ba ne ba tloaetse ho lumelisana ka “kako e halalelang” kapa “kako ea lerato.” (Ba-Roma 16:16; 1 Petrose 5:14) Ka sebele ke pontšo ea kameho ea bana ba motho! Kajeno, likarolong tse ngata tsa lefatše, pontšo e loketseng haholoanyane e ne e tla ba pososelo ea sebele ea botsoalle le ho lumelisana ka matsoho ho tiileng. Linaheng tsa Latin, joaloka Mexico, ho na le mofuta oa ho lumelisa batho ka ho ba kōpa, ka sebele ke pontšo ea kameho. Kameho ena e mofuthu ea baena bana e ka ’na ea e-ba le leng la mabaka a tlatselitseng keketsehong e khōlō e etsahalang linaheng tsa bona.

16. Re na le menyetla efe ea ho bontša kameho ea bana ba motho Liholong tsa rōna tsa ’Muso?

¹⁶ Ha re kena ka Holong ea ’Muso, na re etsa boiteko bo khethehileng ba ho bontša kameho ea bana ba motho? Ho tla hlokahala hore re be le mantsoe a khothatsang ao re ka a buang, haholo-holo ho ba bonahalang ba tepelletse maikutlong. Re bolelloa hore re “tšelise ba pelo li tepelletseng.” (1 Ba-Thessalonika 5:14) Ka sebele eo ke tsela e ’ngoe eo re ka buisanang ka kameho e mofuthu ea bana ba motho. Tsela e ’ngoe e molemo ke ho bontša kananelo bakeng sa puo e monate ea phatlalatsa, karolo ea lenaneo e nehelanoeng hantle, boiteko bo botle bo entsoeng ke sebui sa seithuti Sekolong sa Tšebeletso sa Puso ea Molimo, joalo-joalo.

17. Moholo e mong o ile a hapa kameho ea bana ba motho ea phutheho joang?

¹⁷ Ho thoe’ng ka ho memela ba fapa-fapaneng malapeng a rōna bakeng sa lijo kapa mohlomong lijong tse bobebe tse jeoang lipakeng tsa linako tsa ho ja ka mor’a liboka haeba nako e sa le teng? Na ha rea lokela ho etsa hore keletso ea Jesu e ho Luka 14:12-14 e re buse? Ka lekhetlo le leng eo e neng e le moromuoa o kile a khetheloa ho ba molebeli ea okamelang phuthehong eo ba bang bohle e neng e le ba morabe osele. O ile a lemoha ho haella ha kameho ea bana ba motho, kahoo a etsa moralo oa ho lokisa boemo boo. Joang? Sontaha se seng le se seng o ile a memela lijong lelapa ka leng leo a neng a e-s’o le meme. Ha selemo se fela, bohle ba ne ba ’montša kameho e mofuthu ea bana ba motho.

18. Ke joang re ka bontšang kameho ea bana ba motho ho baena le bo-khaitseli ba rōna ba kulang?

¹⁸ Ha moena kapa khaitseli a kula, a le hae kapa sepetlele kameho ea bana ba motho e tla re susumelletsa ho etsa hore a tsebe hore rea mo tsotella. Kapa ho thoe’ng ka ba lulang mahaeng a maqheku le liqhoala? Ke hobane’ng ha re sa ba etele, re sa ba letsetse mohala, kapa ho ba romella karete e bontšang maikutlo a mofuthu ka bona?

19, 20. Re ka bontša joang hore kameho ea rōna ea bana ba motho e atolohile?

¹⁹ Ha re fana ka lipontšo tse joalo tsa kameho ea bana ba motho, re ka ipotsa, ‘Na kameho ea ka ea bana ba motho e ea ka tšobotsi? Na lintho tse kang lebala la letlalo, thuto, kapa lintho tse bonahalang li susumetsa ho bontša ha ka kameho ea bana ba motho? Na ho hlokahala hore ke atolohe kamehong ea ka ea bana ba motho, joalokaha moapostola Pauluse a ile a phehella Bakreste ba Korinthe ho ho etsa?’ Kameho ea bana ba motho e tla re etsa hore re talime bana babo rōna ka tsela e molemo, re ananele botle ba bona. Hape kameho ea bana ba motho e tla re thusa ho thabela ha bana babo rōna ba hatela pele moeeng ho e-na le hore re ba honohele.

²⁰ Hape kameho ea bana ba motho e lokela ho re etsa hore re falimehele ho thusa bana babo rōna tšebeletsong. E lokela ho ba kamoo e ’ngoe ea lipina tsa rōna (Pina 92) e e behang ka teng:

“Thusang ba fokolang ka rato,

Ho bolela ba se na tšabo.

Le se hlokomolohe bacha,

Le ba thuseng hore ba be matla.”

21. Re ka lebella karabo efe ha re bontša kameho ea bana ba motho?

²¹ Kahoo re se lebale hore ha re bontša kameho ea bana ba motho, molao-motheo oo Jesu a buileng ka oona Thutong ea hae ea Thabeng oa sebetsa: “Fanang, ’me le tla fuoa; le tla feloa sefubeng ka tekanyo e kholo, e hlohliloeng, e katiloeng, e tšolohang; hobane tekanyo eo le lekanyang ka eona, le tla lekanngoa ka eona le lōna.” (Luka 6:38) Re ithuisa molemo ha re bontša kameho ea bana ba motho, re bontša tlhompho ho bao e leng bahlanka ba Jehova joalokaha le rōna re le bona. Kannete ho thabile ba bonahatsang kameho ea bana ba motho ka thabo!

[Mongolo o botlaaseng ba leqephe]

U ne U Tla Araba Joang?

◻ Ke mantsoe afe a Segerike a sebetsanang le maikutlo a rōna, ’me a khetholleha joang?

◻ Senotlolo se isang kamehong ea bana ba motho ke sefe?

◻ Ke mehlala efe ea Mangolo eo re nang le eona ea kameho ea bana ba motho e khethehileng?

◻ Ke hobane’ng ha re lokela ho ba le kameho e mofuthu ho bana babo rōna le ho baholo?

[Setšoantšo se leqepheng la 15]

Moapostola Petrose o ile a phehella baena ba hae hore ba ekeletse kameho ea bana ba motho tumelong ea bona le litšoanelehong tse ling tsa Bokreste