Tloong Kopanong ea Setereke ea “Tšabo ea Bomolimo”
LINAKONG tsa boholo-holo tlas’a Molao oa Moshe ho ne ho hlokahala hore bahlanka ba Jehova ba bokane hammoho hararo ka selemo bakeng sa mekete e itseng. Tsena e ne e le liketsahalo tse thabisang le tse hahang moeeng.—Deuteronoma 16:16.
Kajeno bahlanka ba Jehova ka ho tšoanang ba bokana hammoho hararo ka selemo: bakeng sa kopano ea letsatsi le khethehileng, kopano ea potoloho ea matsatsi a mabeli, le kopano ea setereke ea matsatsi a mararo kapa a mane. Ka 1994, Lipaki tsa Jehova li tla bokana hammoho bakeng sa Kopano ea Setereke ea “Tšabo ea Bomolimo.”
Ha ho pelaelo eo Lentsoe la Molimo le e sieang mabapi le bohlokoa ba tšabo ea bomolimo. Le bua ka mofuta o joalo oa tšabo ka makhetlo a 200. Tšabo ea bomolimo ke tšireletso, joalokaha ho ka bonoa ho Liproverbia 16:6: “Ke ka ho tšaba Jehova batho ba phemang bobe.” Ho Pesaleme ea 111:10 re bolelloa hore tšabo ea bomolimo ke qalo ea bohlale!
Ho ka ’na ha boleloa hore ho na le likarolo tse peli tsa tšabo ea bomolimo. Ea pele, tšabo e joalo e susumetsoa ke lerato. Re tšaba ho utloisa Molimo bohloko ka lebaka la lerato la rōna le leholo ho eena. (Liproverbia 27:11) Joale hape, bohlale ka lehlakoreng la rōna bo tla re thusa ho kenya tšabo ea bomolimo ka ho rōna, kaha rea tseba hore Molimo ke “mollo o timeletsang” ho bohle ba etsang se fosahetseng.—Ba-Heberu 12:29.
Kopanong ea rōna ea Setereke ea “Tšabo ea Bomolimo,” re tla fumana thuto e ngata le khothatso bakeng sa hore re hōle tšabong ea bomolimo. Thuto e joalo e tla fetisoa ka lipuo, lipontšo, le tšoantšiso, esita le ho phetoa ha liphihlelo.
Joalokaha Baiseraele ba boholo-holo ba ile ba laeloa hore ba se ke ba tla likopanong tsa bona ba sa nka letho, le rōna re lokela ho batla ho nehela karolo ea rōna bakeng sa thabo le katleho ea likopano tsa rōna. (Deuteronoma 16:17) Re ka etsa sena ka ho bonahatsa tlhompho bakeng sa tafole ea Jehova. Joang? Ka ho fihla ka nako, ka ho mamela se buuoang sethaleng ka hloko, ka ho kopanela ’minong ka pelo eohle. Re ke ke ra buisana kapa ho solla nakong ea lenaneo. Hape re tla rata ho nehela ka hohle kamoo re ka khonang ka ho ithaopela ho etsa mesebetsi. Tlhophiso ea kopano e akarelletsa mafapha a mangata, ao kaofela ha ’ona a hlokang batho ba tla sebetsa ho ’ona. Hape re tla batla ho etsa menehelo ea chelete ho ea kamoo Jehova a re hlohonolofalitseng.
Mohlanka e mong le e mong oa Jehova a ke a etse litokisetso hona joale tsa ho ba teng ka matsatsi ’ohle a mararo a Kopano ea Setereke ea “Tšabo ea Bomolimo,” ho tloha ka pina e bulang ka Labohlano hoseng ho fihlela thapelong e koalang ka Sontaha motšehare oa mantsiboea.