Lipaki tsa Jehova Lefatšeng Lohle—Nigeria

NIGERIA e kenelletse mothinyeng oa karolo e ka tlaase ea moo Afrika e pharallelang ka bophirimela. E lutse Koung ea Guinea, e hantle feela ka holimo ho equator ’me e na le baahi ba fetang limilione tse 88.a

Nakong ea lilemo tse peli tse fetileng tsa tšebeletso, ofisi ea lekala la Nigeria ea Mokhatlo oa Watch Tower e ile ea lebisa tlhokomelo e khethehileng ho bacha. Phuputso liphuthehong tsa Lipaki tsa Jehova e ile ea bontša hore karolo ea 80 lekholong ea ba ileng ba qalisa boboleli ba litaba tse molemo Nigeria ka 1992 e ne e le ba lipakeng tsa lilemo tse 10 le 20. Karolo ea 63 lekholong ea ba ileng ba kolobetsoa selemong seo, e bile sehlopha sa ba lilemong tseo.

Bacha ba Hahamalla ho Bula Maliboho

Bacha ba bangata ba kenela mosebetsi oa nako e tletseng oa boboleli e le bo-pula-maliboho. Pula-maliboho ea bitsoang Hannah o re: “Ha ke se ke le haufi le ho qeta sekolong, ke ile ka etela ba neng ba tlile Sekolong sa Tšebeletso sa Bopula-maliboho, moo ke ileng ka kopana le bo-khaitseli ba babeli ba hōlileng. Ke ile ka nahana, ‘haeba bao ba babeli ba ka bula maliboho, ’na nka sitoa ke eng?’

“Kahoo ka mor’a hore ke qete sekolong, ke ile ka ba pula-maliboho. Likhoeli tse tharo hamorao ke ile ka kopana le Josephine ea lilemo li 26, eo e neng e le morapeli oa juju. O ile a re: ‘Lōna Lipaki tsa Jehova le batho ba babe. Ha le keteke Keresemese kapa hona ho sebelisa lithatho.’ Ke ile ka araba ka hore haeba a ne a ka ntumella ho ithuta Bibele le eena, o ne a tla ithuta hore na ke hobane’ng ha re sa etse lintho tseo. O ile a ’memela hore ke khutle hape. Kapele o ile a qalisa ho ba teng libokeng le ho etsa liphetoho tse ngata bophelong ba hae. Ka December 1990 o ile a kolobetsoa. Ho tloha ka August 1991, Josephine e ’nile ea e-ba pula-maliboho. Ha a ne a le Sekolong sa Tšebeletso sa Bopula-maliboho selemong se fetileng, o ile a ntsebisa ba neng ba le sehlopheng se le seng le eena ke le ’mè oa hae oa moea!”

Video le Holo ea ’Muso

E ’ngoe ea likhatiso tsa video tsa Mokhatlo e ile ea thusa phutheho e nyenyane ho fumana setša bakeng sa Holo ea ’Muso. Ha ba batla ho reka setša baena ba bane ba ile ba atamela Onojie, ’musi oa sebaka seo oa moetlo. O ile a ba sehela setša ka linaira tse 20 000 (R3 500). Phutheho e ne e ke ke ea khona ho lefa chelete e kaalo hobane ho ne ho e-na le bahoeletsi ba 17 feela bakeng sa ho tšehetsa morero oo ka lichelete. Onojie o ile a re o ne a tla nahana ka setša se seng.

Likhoeli hamorao, e mong oa baholo ba phutheho o ile a etela moo Onojie a lulang teng. Onojie o ne a shebelletse khatiso ea video ea tlhomamiso ea hae. Moholo o ile a re: “Ke na le video eo ke ratang hore u e bone. E bitsoa Jehovah’s Witnesses—The Organization Behind the Name.”

Hamorao moholo o ile a botsa Onojie seo a neng a se nahana mabapi le video eo. Onojie o ile a re: “Ke ile ka shebella filimi eo ka makhetlo a mahlano.” Moholo o ile a hopotsa Onojie ka Liholo tsa ’Muso tseo a li boneng videong ’me a hlalosa hore phutheho ea sebakeng seo e ne e batla ho haha ntho e tšoanang. Joale a botsa hore na ebe phutheho e ne e ka reka setša se sehelaneng moeli le se senyenyane seo e seng e ntse e e-na le sona. Onojie a arabela: “Ke ile ka nahana ka se tšoanang phirimaneng e fetileng ka mor’a ho shebella video eo.” Kapele ka mor’a moo, a lekanya sebaka sa bophara ba limithara tse tšeletseng pel’a setša sa phutheho. A re: “Le ka fumana hakana. Ha e le bolelele, le ka nka haholo kamoo le ka hlokang. Lokisang litokomane, ’me ’na ke tla li saena.”

[Mongolo o botlaaseng ba leqephe]

[Lebokose le leqepheng la 9]

BOITSEBISO BO AMANG NAHA

Selemo sa Tšebeletso sa 1993

TLHŌRŌ EA BA FANANG KA BOPAKI: 174 582

KAROLELANO: Paki e le 1 ho 507

BA BILENG TENG SEHOPOTSONG: 473 245

KAROLELANO EA BAHOELETSI BA BO-PULA-MALIBOHO: 19 777

KAROLELANO EA LITHUTO TSA BIBELE: 242 028

PALO EA BA KOLOBELITSOENG: 8 888

PALO EA LIPHUTHEHO: 3 289

OFISI EA LEKALA: BENIN CITY, EDO STATE