E Bile ea Hauhetsoeng Haholo ke Jehova

“LUMELA, mohauheloa; Morena o na le uena!” A tumeliso e tsotehang! Sebui hase e mong haese Gabriele. O bua le moroetsana ea pelo e ikokobelitseng—Maria, morali oa monna ea bitsoang Heli. Selemo ke sa 3 B.C.E., ’me sebaka ke motse oa Nazaretha.—Luka 1:26-28.

Maria o tšepisane lenyalo le Josefa oa ’metli. Ho ea ka molao le moetlo oa Sejode, o talingoa e se ntse e le mosali oa hae. (Mattheu 1:18) Joaloka eena, Josefa ke motho oa boemo bo tlaase bophelong. Joale, ke hobane’ng ha lengeloi le mo lumelisa ka hore ke ea hauhetsoeng haholo?

Tokelo ea Hae e Babatsehang

Gabriele oa phaella: “Maria, se tšohe, hobane u bone mohau ho Molimo. Bona, u tla emola, ’me u tla tsoala mora, ’me u tla mo rea lebitso la Jesu. O tla ba moholo, ’me o tla bitsoa Mora oa Ea holimo-limo; Morena Molimo o tla mo nea terone ea Davida ntat’ae. O tla busa ntlo ea Jakobo ka ho sa feleng, ’me borena ba hae ha bo ka ke ba e-ba le bofelo.”—Luka 1:29-33.

A hloletsoe a bile a tsielehile, Maria oa botsa: “Taba eo e tla etsahala joang, athe ha ke tsebe monna?” Gabriele oa araba: “Moea o Halalelang o tla theohela holim’a hao, ’me matla a Ea holimo-limo a tla u khurumetsa; ka baka leo, ho halalelang ho tla tsoaloa ke uena ho tla bitsoa Mor’a Molimo.” E le ho tlosa pelaelo leha e le efe lengeloi lea phaella: “Bona, Elisabetha, motsoal’ao, le eena o emere mora botsofaling ba hae; khoeli ena e se e le ea botšelela ea ea neng a bitsoa nyopa. Hobane ha ho letho le ke keng la etsoa ke Molimo.”—Luka 1:34-37.

Hang-hang Maria o amohela tokelo ena e babatsehang ea tšebeletso. Ka boithatelo, empa e le ka boikokobetso, oa arabela: “Bona, ke lekhabunyane la Morena, a nke ke etsoe ka polelo ea hao!” Ka mor’a tseo, Gabriele a tloha. Maria o potlakela motseng o tikolohong ea lithaba oa Juda. Ha a fihla lelapeng la moprista Zakaria le mosali oa hae, Elizabetha, o fumana maemo a le joalokaha lengeloi le a hlalositse hantle. Ke thabo e kaakang e tlalang pelong ea Maria! Molomo oa hae o ntša mantsoe a thoriso a eang ho Jehova.—Luka 1:38-55.

E ba Mosali oa Josefa

Moroetsana o lokela ho fana ka ’mele oa botho oa Jesu, hobane tsoalo e joalo e boletsoe esale pele. (Esaia 7:14; Mattheu 1:22, 23) Empa ke hobane’ng ha ho ne ho hlokahala moroetsana ea lebelelitsoeng? E le hore ho ne ho ka fumaneha ntate oa moholisi ea ka fanang ka tokelo ea molao ho ngoana bakeng sa terone ea Morena Davida. Ka bobeli Josefa le Maria ke ba leloko la Juda ’me ke litloholo tsa Morena Davida. Ka hona litokelo tsa bojalefa ba Jesu li tla tiea ka ho imenneng. (Mattheu 1:2-16; Luka 3:23-33) Ke ka lebaka lena hamorao lengeloi le tiisetsang Josefa hore a se be leqe ho nka Maria joaloka mosali oa hae oa molao, le hoja a imme.—Mattheu 1:19-25.a

Molao-taelo oa lekhetho o ileng oa ntšoa ke Augustus Caesar o tlama Josefa le Maria ho ingolisa Bethlehema. Ha ba le moo, o tsoala mora oa hae oa letsibolo. Balisa ba tla ho tla bona lesea, ’me ba rorisa Ntate oa lona, Jehova. Ka mor’a matsatsi a 40 a ho itlhoekisa ho ea ka Molao oa Moshe, Maria o ea tempeleng Jerusalema ho ea etsa poelano bakeng sa libe tsa hae. (Levitike 12:1-8; Luka 2:22-24) E, kaha o ne a sa emoloa a se na sekoli, ’me ka hona a sa lokoloha thohakong ea sebe, ho se phethahale ha hae ho futsitsoeng ho tlameha ho koaheloa ka mahlabelo a poelano.—Pesaleme ea 51:5.

Ha Maria le Josefa ba ntse ba le tempeleng, Simeone ea hōlileng le moprofeta ea hōlileng oa mosali Anna ba ba le tokelo ea ho bona Mora oa Molimo. Maria ha a hape tlhokomelo ea ba bangata. (Luka 2:25-38) Hamorao, Linohe tsa Linaleli li ile tsa khumamela Jesu eseng eena.—Mattheu 2:1-12.

Ka mor’a ho balehela Egepeta le ho lula teng ho fihlela Heroda ea khopo a e-shoa, batsoali ba Jesu ba ile ba khutla ’me ba tsitsa motsaneng oa Nazaretha. (Mattheu 2:13-23; Luka 2:39) Ke hona teng moo Josefa le Maria ba ileng ba hōlisetsa Jesu tlas’a maemo a lelapa le tšabang Molimo.

Maria o ne a E-na le Bana ba Bang

Ka mor’a nako, Maria le Josefa ba ile ba etsa hore Jesu a be le baena le bo-khaitseli ba nama. Ha tšebeletso ea Jesu e mo tlisa motseng oa habo oa Nazaretha, metsoalle ea hae ea bongoaneng e ile ea mo tseba. Baa botsa: “Na enoa hase mora oa ’metli na? Ha re re, ’m’ae ke ea bitsoang Maria? Le banab’abo na hase Jakobo, le Josefa, le Simone, le Juda na? Bo khaitselie le bona na ha ba moo ho rōna kaofela ha bona?” (Mattheu 13:55, 56) Batho ba Nazaretha ba ne ba bolela lelapa la nama la Josefa le Maria, ho akarelletsa bara le barali ba hae bao ba ba tsebang e le baena le bo-khaitseli ba Jesu ba nama.

Baena le bo-khaitseli bana hase bo-motsoal’a Jesu. Hase barutuoa ba hae, leha e le hore ke baena le bo-khaitseli ba hae ba moea, hobane Johanne 2:12 e khetholla ka ho hlakileng lipakeng tsa lihlopha tsena tse peli ka ho bolela hore: “Ba theohela Kapernauma, e le eena [Jesu] le ’m’ae, le banab’abo, le barutuoa ba hae.” Lilemo hamorao Jerusalema, moapostola Pauluse o ile a bona Kefase, kapa Petrose ’me a phaella: “Ha kea ka ka bona baapostola ba bang; ke bone Jakobo feela, ngoan’abo Morena.” (Ba-Galata 1:19, The Jerusalem Bible) Ho feta mona, polelo e reng Josefa “ha aa ka a kena likobong tsa [Maria] ho fihlela a beleha mora” e bontša hore ntate oa Jesu oa mohōlisi o ile a ba le likamano tsa botona le botšehali le Maria hamorao ’me e ile ea e-ba ntate oa bana ba bang ba Maria. (Mattheu 1:25, Bibele Phetolelo e Ncha) Ka lebaka leo, Luka 2:7 e bitsa Jesu mora oa hae oa “letsibolo.”

’Mè ea Tšabang Molimo

Joaloka ’mè ea tšabang Molimo, Maria o sebelisana le Josefa bakeng sa ho laea bana ba hae ka ho loka. (Liproverbia 22:6) Hore Maria ke seithuti se khothetseng sa Mangolo ho bonoa tlhalosong ea hae e enneng ka tsela ea moea ha a lumelisoa ke Elizabetha. Ka nako eo ’mè oa Jesu o pheta-pheta mehopolo ea pina ea Anna ’me o bontša tsebo ea lipesaleme, ea histori le mangolo a boprofeta, le libuka tsa Moshe. (Genese 30:13; 1 Samuele 2:1-10; Liproverbia 31:28; Malakia 3:12; Luka 1:46-55) Maria o ile a kenya liketsahalo tsa boprofeta le lipolelo kelellong, ’me a li boloka ka pelong ea hae, le ho li thuisa kelellong ea hae. Ka hona o hlomelletsoe hamolemo ho nka karolo ho faneng ka thupelo ea botsoali ho mohlankanyana enoa Jesu.—Luka 2:19, 33.

Jesu ea lilemo li 12 ea rutiloeng hantle o bonahatsa tsebo ea Mangolo e makatsang banna ba rutehileng tempeleng. Ka lebaka la hobane a ile a arohana le batsoali ba hae nakong eo ea Paseka, ’mè oa hae o re: “Ngoan’a ka, u re etselitse’ng joalo? U ka bona, ntat’ao le ’na, re ne re u batla re tšohile haholo.” Jesu a araba a re: “Le ne le mpatlela’ng? Na le ne le sa tsebe hoba ke tšoanetse ho ba teng litabeng tsa Ntate na?” Ha a sitoa ho utloisisa se boleloang ke karabo ena, Maria o e boloka pelong ea hae. Ha a khutlela Nazaretha, Jesu o ile a “’na a hōla hlalefong, le boemong, le molemong, pel’a Molimo le batho.”—Luka 2:42-52.

Maria e le Morutuoa oa Jesu

Ke ho loketseng hakaakang hore ebe Maria o ile a qetella e le morutuoa oa Jesu ea inehetseng! O ikokobelitse ’me ha a na takatso ea ho hlahella ho sa tsotellehe kabelo ea hae e ikhethileng eo a e filoeng ke Molimo. Maria o tseba Mangolo. Haeba u a phenya-phenya ka bouena, u ke ke ua mo fumana a hlalosoa e le ea nang le selika-likoe sa khanya se mo potolohileng, a lutse teroneng e le “’mè-mofumahali” ’me a itlhatsoa khanyeng e tsoang ho Kreste. Ho e-na le hoo, u tla mo fumana a le hōle ka morao-rao, a le moo a sa hlahellang.—Mattheu 13:53-56; Johanne 2:12.

Jesu o ile a thibela e sa le pele lintho leha e le life tse joaloka ho rapela Maria har’a balateli ba hae. Ka nako e ’ngoe ha a ntse a bua, “mosali e mong har’a letšoele o ile a hoeletsa, ‘ho lehlohonolo pōpelo e u tsoetseng le matsoele a u anyesitseng!’ O ile a arabela: ‘Ho e-na le hoo, ho lehlohonolo ba utloang lentsoe la Molimo le ba le bolokang.’” (Luka 11:27, 28, The New American Bible, e fetoletsoeng ke litho tsa Catholic Biblical Association of America) Ha ba le moketeng oa lenyalo, Jesu o ile a bolella Maria: “Mosali, taba ea ka le uena ke efe? Nako ea ka ha e e-so ho tle.” (Johanne 2:4) Liphetolelo tse ling li baleha tjena: “Tlohela taba matsohong a ka.” (Weymouth) “Se ke ua leka ho ntaela.” (An American Translation) E, Jesu o ne a hlompha ’mè oa hae, empa ha aa ka a mo rapela.

Litokelo tsa ka ho sa Feleng

Maria o ile a thabela litokelo tse kaakang! O ile a tsoala Jesu. Kahoo e ile ea e-ba ’mè a ba a koetlisa ngoana enoa e monyenyane. Qetellong o ile a bontša tumelo, ’me a fetoha morutuoa oa Kreste le khaitseli ea hae ea moea. Ha re qetella ho bona Maria ka Mangolong, re mo bona a le kamoreng e ka holimo Jerusalema. O moo hammoho le baapostola ba Jesu, bara ba bang ba hae, le basali ba bang ba tšepahalang—bao kaofela e leng barapeli ba Jehova.—Liketso 1:13, 14.

Qetellong, Maria a shoa ’me ’mele oa hae oa khutlela lerōleng. Joaloka balateli ba bang ba pele ba tlotsitsoeng ba mora oa hae ea ratoang, o ile a robala lefung ho fihlela nakong e loketseng ea hore Molimo a mo tsose joaloka sebōpuoa sa moea se nang le bophelo ba ho se shoe leholimong. (1 Ba-Korinthe 15:44, 50; 2 Timothea 4:8) E tlameha ebe “mohauheloa” eo o thabile hakaakang hona joale ka pel’a boteng ba Jehova Molimo le Jesu Kreste!

[Mongolo o botlaaseng ba leqephe]

[Setšoantšo se leqepheng la 31]

Maria e bile ea hauhetsoeng haholo e le ’mè oa Jesu