Lipaki Tsa Jehova Lefatšeng Lohle—Zambia
LITHOTA tse nammeng, tse matsika ka holim’a sehlaba se bolelele ba limithara tse 1 200—ena ke Zambia, naha e har’a mpa ea karolo e bohareng e ka boroa ho Afrika. Ka leboea-bochabela, Lithaba tsa Muchinga li phahame ka limithara tse 2 100. Nōka e khōlō ea Zambezi, e kiritlang ka tsela e hlollang ka holim’a Liphororo tsa Victoria tse tsebahalang haholo lefatšeng, e bōpa karolo e khōlō ea moeli o ka boroa oa naha ena e kopetsoeng hare ke linaha tse ling. Ho na le ho se tšoane ho hoholo har’a batho, ’me ho na le lihlopha tse fapaneng tsa merabe tse fetang 70. Ho buuoa lipuo tse robeli tse khōlō mona, empa ho na le tse ling tse ngata.
Ka 1911 puo e ’ngoe e fapaneng e ile ea qala ho ipha matla le ho pharalla Zambia. Baeti ba ile ba tlisa likopi tsa Studies in the Scriptures, ’me ho tloha ka nako eo ho ea pele Lipaki tsa Jehova li ’nile tsa etsa boiteko ba ho hasanya “puo e hloekileng” ea ’nete ea Bibele Zambia. (Sofonia 3:9, NW) Lintho tse hlahisang phephetso ka ho khethehileng ke litumelo tseo eseng tsa mangolo mabapi le boemo ba bafu. Ha batho ba ithuta ’nete ’me ba bona kamoo litumela-khoela li ba entseng makhoba, phello e ba ho lokoloha!—Johanne 8:32.
Ka mohlala, khaitseli e mong ea tšepahalang oa tlaleha: “Ha Malome a e-shoa ka tšohanyetso, ’Mè, eo e leng setho se matla sa Kereke e Kopaneng ea Zambia, o ile a tsieleha. Ka mor’a mokete oa lepato o nkang beke, ke ile ka khutlela motseng ho ea bona hore na o ntse a ea joang. Ha ke fihla, ke ile ka fumana monna-moholo e mong ka tlung, ’me eare ha a tsamaea, ka botsa Nkhono hore na ke mang. O ile a re ke makherenkhoa. ’Mè o ne a rerile ho mo hira hore a phetetse lefu la ngoan’abo e le hore moea oa hae o tle o tsebe ho phomola. O ne a lumela hore hajoale ‘o ntse o solla hohle feela,’ kamoo a ileng a bolela kateng.
“Nkhono o ile a hlalosa ka ho eketsehileng hore ho eta ha ka e ne e le lehlohonolo hobane lelapa le ne le batla chelete bakeng sa ho lefa makherenkhoa. O ile a nkōpa hore ke tlatsetse, empa ke ile ka hlalosa ka bohlale hore joaloka Mokreste, nke ke ka khona ho kopanela. Ke ile ka ’meela mabaka ka Pesaleme ea 146:4, e bontšang hore bafu ha ba nahane—kahoo ha ho na moea ‘o sollang hohle.’ Re ile ra boela ra nahana ka Ba-Roma 12:19, e bontšang hore phetetso ke ea Jehova eseng ea rōna. Ka mor’a moo, ke ile ka bolella ’Mè ka tšepo ea tsoho eo Jesu a buileng ka eona, joalokaha e tlalehiloe ho Johanne 5:28, 29. O ne a hloletsoe ke tumelo ea ka e matla litšepisong tsa Molimo. Kapele-pele o ile a qala ho ithuta le Paki ’me a hatela pele ka potlako. O ile a khaola maqhama ’ohle le bolumeli ba hae ba pele ’me a tšoantšetsa boinehelo ba hae ho Molimo ka kolobetso. Hona joale ke e mong oa Lipaki tsa Jehova.”
Khaitseli e mong oa tlaleha: “Ke ile ka ea lepatong la mosali oa Malome. Ha ke fihla, ke ile ka fumana Malome le Motsoala ba bolaoa ke tlala. Ba ne ba sa ja letho ho tloha letsatsing leo mosali oa Malome a shoeleng ka lona. Ha ke botsa lebaka, ba ile ba araba ka hore ho ea ka moetlo, ha ba lumelloe ho besa mollo hore ba phehe. Ke ile ka ithaopela ho pheha, empa litho tse ling tsa lelapa li ne li tšaba hore haeba ke tlōla moetlo ona oa bohetene, e mong le e mong o ne a tla hlanya!
“Ke ile ka hlalosa hore joaloka e mong oa Lipaki tsa Jehova, ke hlompha seo Bibele e se bolelang ho Levitike 18:30 ’me ha ke latele meetlo eo eseng ea Mangolo. Joale ke ile ka ba bontša bukana e lekanang le makasine ea Meea ea Bafu. Ha ke etsa joalo tsitsipano e ile ea fokotseha, eaba ke tsoela pele ho lokisetsa Malome lijo le batho ba bang kaofela. Beng ka mofu ba ile ba angoa ke sebete sa ka ’me ba lumela ho ithuta Bibele ka ho eketsehileng. Le bona e se e le bahoeletsi ba sa kolobetsoang, ’me lelapa lohle le tšepa ho kolobetsoa haufinyane.”
Re thaba hakaakang ha puo e hloekileng ea ’nete e felisa pherekano ea mashano a bolumeli, haholo-holo likhopolo tseo tse metseng ka metso tse etsang hore batho ba se nang molato e be makhoba! Ka tlhohonolofatso ea Jehova, puo e hloekileng ea ata Zambia, feela joalokaha e ata ho pholletsa le lefatše.—2 Ba-Korinthe 10:4.
[Lebokose le leqepheng la 9]
TLALEHO EA NAHA
Selemo sa Tšebeletso sa 1994
TLHŌRŌ EA BA PAKANG: 82 926
RATIO: Paki e le 1 ho 107
BA BILENG TENG SEHOPOTSONG: 363 372
KAROLELANO EA BAHOELETSI BA BO-PULA-MALIBOHO: 10 713
KAROLELANO EA LITHUTO TSA BIBELE: 108 948
PALO EA BA KOLOBELITSOENG: 3 552
PALO EA LIPHUTHEHO: 2 027
OFISI EA LEKALA: LUSAKA
[Setšoantšo se leqepheng la 9]
Mehaho ea lekala ea Watch Tower sebakeng se mathōkong a Lusaka
[Setšoantšo se leqepheng la 9]
Ho bolela Shimabala, ka boroa ho Lusaka