Lithapelo Tse ka Bibeleng li Lokela ho Hlahlobisisoa
MOSALI ea tšoenyehileng, morena, le Mor’a Molimo ka boeena ba ile ba etsa lithapelo tseo hajoale re tlang ho li hlahlobisisa. Thapelo ka ’ngoe e ile ea susumetsoa ke maemo a sa tšoaneng. Leha ho le joalo, maemo a joalo a ka re ama kajeno. Re ka ithuta eng mehlaleng ee?
“Talimisisa Bohloko ba Lekhabunyane la Hao”
Na u loantšana le bothata bo phehellang? Kapa na u imetsoe ke ho tšoenyeha? Joale, u boemong bo tšoanang haholo le ba Anna pele a beleha ngoana oa hae oa letsibolo, Samuele. O ne a se na bana ’me a nyelisoa ke mosali e mong. Ha e le hantle, boemo ba Anna bo ile ba mo tšoenya le ho mo ama hoo a neng a sa je. (1 Samuele 1:2-8, 15, 16) O ile a ipiletsa ho Jehova ’me a etsa kōpo e tiileng e latelang:
“Jehova oa makhotla, ha u ka talimisisa bohloko ba lekhabunyane la hao, leha u ka nkhopola, u sa lebale lekhabunyane la hao, leha u ka fa lekhabunyane la hao ngoana e motona, ke tla mo neela Jehova ka litšiu tsohle tsa ho phela ha hae, ’me lehare ha le ka ke la ’meola hlooho.”—1 Samuele 1:11.
Hlokomela hore Anna ha aa ka a bua ka ho akaretsa feela. O ile a bua le Jehova ka kōpo e tobileng (ea ngoana e motona) ’me a phaella sena ka qeto e hlakileng ea (ho mo etsa hore a fumanehe bakeng sa tšebeletso ea Molimo). See se re bolella eng?
Ha u le mahlomoleng, e-ba ea tobileng thapelong ea hao. Ho sa tsotellehe hore na bothata ba hao ke bofe—hore na ke boemo ba hao ba lapeng, bolutu, kapa bophelo bo seng botle—rapela Jehova ka bona. Mo hlalosetse ka ho tobileng sebōpeho sa bothata ba hao le kamoo u ikutloang kateng. Mohlolohali ea bitsoang Louise o re: “Mantsiboea a mang le a mang ke beha mathata ’ohle a ka ho Jehova. Ka linako tse ling a ba mangata, empa ke a bolela ka ho hlakileng ka bomong.”
Ho bua le Jehova ka lipolelo tse hlakileng ho tlisa melemo. Ho etsa joalo ho re thusa ho ba le kutloisiso e hlakileng ka bothata ba rōna, boo joale bo ka ’nang ba bonahala bo sa tšose haholo. Ho etsa lithapelo tse tobileng ho re imolla matšoenyehong. Esita le pele thapelo ea hae e arabeloa, Anna o ile a ikutloa a kholisehile, ’me “sefahleho sa hae se se se se joalo ka hapele.” (1 Samuele 1:18) Ho feta moo, ho ba ba tobileng ho boetse ho etsa hore re falimehele ho hlokomela karabo thapelong ea rōna. Bernhard, Mokreste oa Jeremane, o re: “Ha ke etsa hore lithapelo tsa ka e be tse tobileng haholoanyane, likarabo e ba tse hlakileng haholoanyane.”
“’Na ke Mohlankanyana Feela”
Leha ho le joalo, motho a ka ’na a ba le ho ngongoreha ha mofuta o fapaneng haeba a amohela kabelo eo a ikutloang hore ha ea mo tšoanela. Na ka linako tse ling u apareloa ke tšabo ka boikarabelo boo u bo filoeng ke Jehova? Kapa na batho ba bang ba u talima u sa tšoanelehe bakeng sa kabelo ea hao? Salomone e mocha o ne a le boemong boo ha a ne a tlotsetsoa ho ba morena oa Iseraele. Banna ba bang ba hlaheletseng ba ne ba rata hore motho e mong a be teroneng. (1 Marena 1:5-7, 41-46; 2:13-22) Qalong ea puso ea hae, Salomone o ile a etsa kōpo ka thapelo:
“Jehova, Molimo oa ka, u beile mohlanka oa hao morena, . . . ’na ke mohlankanyana feela, ha ke tsebe le ho itsamaisa. . . . U nee ke hona mohlanka oa hao pelo e kelello ea ho ahlolela sechaba sa hao, ke tle ke tsebe ho khetha botle le bobe.”—1 Marena 3:7-9.
Salomone o ile a etsa hore thapelo ea hae e likolohe kamanong ea hae le Jehova, tokelong eo a neng a e filoe, le matleng a hae a ho phethahatsa kabelo eo. Ka tsela e tšoanang, neng le neng ha re fuoa boikarabelo boo re ikutloang hore bo ka ’nģane ho matla a rōna, re lokela ho kōpa Molimo ka tieo hore a re hlomelle ho etsa mosebetsi oo. Nahana ka liphihlelo tse latelang:
Eugene oa hlalosa: “Ha ke ne ke kōptjoa ho hlokomela boikarabelo bo eketsehileng ofising ea lekala ea Mokhatlo oa Watch Tower, ke ile ka ikutloa ke sa tšoanelehe ho hang. Ho ne ho e-na le ba bang ba neng ba tšoaneleha hamolemonyana ebile ba e-na le phihlelo e eketsehileng. Ha kea ka ka bo hlotha ka masiu a mabeli a latelang, ke ne ke qeta nako e ngata ke rapela, e leng ho ileng ha mpha matla le kholiseho e hlokahalang.”
Roy o ile a kōptjoa ho fana ka puo ea lepato ka mor’a lefu la tšohanyetso le le bohloko la motsoalle e mocha ea neng a tsebahala haholo. Ka sebele batho ba makholo ba ne ba tla ba teng. Roy o ile a etsa’ng? “Ke ka seoelo ke eeng ke rapele haholo joalo bakeng sa matla le bokhoni ba ho fumana mantsoe a loketseng ho hlalosa likhopolo tse hahang le ho fana ka matšeliso.”
Ha ’Mōpi a ntse a ‘potlakisa lintho’ ’me mokhatlo oa hae o hlophisitsoeng o atoloha, phello e bang teng ke hore ba eketsehileng ho bahlanka ba hae ba fuoa boikarabelo. (Esaia 60:22, NW) Haeba u kōptjoa ho ba le karolo e eketsehileng, kholiseha hore Jehova a ka koala sekheo sa khaello leha e le efe ea phihlelo, ea koetliso, kapa ea bokhoni eo u nang le eona. Atamela Molimo joalokaha Salomone a ile a etsa, ’me O tla u hlomella ho phethahatsa kabelo eo.
“Bohle ba Tle ba be Bang”
Boemo ba boraro bo hlahang kajeno ke ba ho kōptjoa ho emela sehlopha ka thapelo. Ha re kōptjoa ho etsa thapelo bakeng sa ba bang, ke eng seo re lokelang ho se rapella? Nahana ka thapelo ea Jesu e tlalehiloeng ho Johanne khaolo ea 17. O ile a etsa thapelo ena moo barutuoa ba hae ba leng teng bosiung ba hae ba ho qetela e le motho. O ile a tobisa likōpo tse tiileng tsa mofuta ofe ho Ntate oa hae oa leholimo?
Jesu o ile a hatisa lipakane tse tšoanang le tšepo e tšoanang ea ba neng ba le teng moo. O ile a bolela ho tlotlisoa ha lebitso la Jehova Molimo le ho tsebahatsoa ha ’Muso. Jesu o ile a hatisa bohlokoa ba kamano ea botho le Ntate le Mora, e thehiloeng tsebong ea Mangolo. O ile a bua ka ho ikarola lefatšeng, e leng se neng se tla hlomella balateli ba hae bakeng sa khanyetso. Hape Kreste o ile a kōpa Ntate oa hae ho sireletsa barutuoa le ho ba kopanya borapeling ba ’nete.
E, Jesu o ile a hatisa bonngoe. (Johanne 17:20, 21) Pejana bosiung bona boo, barutuoa ba ne ba ile ba ba le khang e bontšang ho se hōle moeeng. (Luka 22:24-27) Leha ho le joalo, ha a rapela, Kreste o ile a batla ho kopanya eseng ho ahlola. Ka tsela e tšoanang, lithapelo tsa lapeng le phuthehong li lokela ho hōlisa lerato le ho batla ho hlōla khohlano lipakeng tsa batho ka bomong. Ba emeloang ba lokela ho huleloa hammoho bonngoeng.—Pesaleme ea 133:1-3.
Bonngoe bona bo bontšoa ha ba mametseng ba re, “Amen,” kapa “Ha ho be joalo,” qetellong. Hore sena se etsahale, ba tlameha ho utloisisa le ho lumellana le ntho e ’ngoe le e ’ngoe e boletsoeng. Ka hona, e ne e tla ba ho sa lokelang, hore thapelong ho boleloe taba e sa tsejoeng ke ba bang ba leng teng. Ka mohlala, moholo ea emelang phutheho ka thapelo a ka ’na a batla hore Jehova a hlohonolofatse moena oa moea kapa khaitseli ea kulang haholo. Empa e ne e tla ba ho molemo ka ho fetisisa ha a ne a ka etsa joalo haeba karolo e khōlō ea bao a ba emelang ba tseba motho eo ’me ba utloile ka ho kula ha hae.
Hape, hlokomela hore Jesu ha aa ka a thathamisa litlhoko tsa setho ka seng sa sehlopha. Ho etsa joalo ho ne ho tla akareletsa ho bolela litaba tsa botho tse tsejoang ke batho ba itseng feela. Lithahasello tsa botho ke litaba tse loketseng thapelo e etsoang lekunutung, e leng e ka atolosoang le e ka amang metsoalle e haufi-ufi ho ea kamoo motho a lakatsang kateng.
Motho o lokela ho itokisetsa ho emela phutheho e khōlō ea barapeli ka thapelo joang? Mokreste e mong ea nang le phihlelo oa hlalosa: “Ke nahana esale pele seo ke lokelang ho se lebohela, likōpo tseo baena ba ka ’nang ba e-ba le tsona, le hore na ke likōpo life tse tiileng tseo nka li bolelang bakeng sa bona. Ke beha likhopolo tsa ka ka tlhophiso kelellong, ho akareletsa le lipolelo tsa thoriso. Pele ke etsa thapelo phatlalatsa, ke etsa thapelo ke khutsitse, ke kōpa thuso bakeng sa ho emela baena ka mokhoa o hlomphehang.”
Ho sa tsotellehe hore na maemo a hao ke afe, ho ka etsahala hore ebe u tla fumana thapelo ka Bibeleng e ileng ea etsoa ke motho e mong ea neng a le boemong bo tšoanang le ba hao. Lithapelo tse fapa-fapaneng tse ka Mangolong ke bopaki ba mosa o lerato oa Molimo. Ho bala lithapelo tsena le ho thuisa ka tsona ho tla u thusa ho ntlafatsa lithapelo tsa hao.
[Lebokose le leqepheng la 5]
LITHAPELO TSE HLAHELETSENG KA BIBELENG
Bahlanka ba Jehova ba entse lithapelo tlas’a maemo a mangata-ngata. Maemong a latelang, na u ka ikamahanya le bo le bong kapa a eketsehileng?
Na u hloka tataiso e tsoang ho Molimo, joaloka Eliezere?—Genese 24:12-14.
Na u atameloa ke kotsi, joaloka Jakobo?—Genese 32:9-12.
Na u batla ho tseba Molimo hamolemonyana, joaloka Moshe?—Exoda 33:12-17.
Na u tobane le bahanyetsi, joaloka Elia?—1 Marena 18:36, 37.
Na u thatafalloa ke ho bolela, joalokaha ho ne ho thatafaletse Jeremia?—Jeremia 20:7-12.
Na ho hlokahala hore u ipolele libe le ho batla tšoarelo, joaloka Daniele?—Daniele 9:3-19.
Na u tobane le tlhoriso, joaloka barutuoa ba Jesu?—Liketso 4:24-31.
Sheba le Mattheu 6:9-13; Johanne 17:1-26; Ba-Filippi 4:6, 7; Jakobo 5:16.
[Lebokose le leqepheng la 6]
SE KA RAPELLOANG HA HO LOANTŠANOA LE TLOAELO E METSENG KA METSO
Na u loantšana le bofokoli bo ntseng bo hlahella hape? Lithapelo tse tlalehiloeng ka Bibeleng li ka ba le molemo joang? Ithute ka Davida, ea ileng a rapela ka linako tse sa tšoaneng mabapi le bofokoli ba hae.
Davida o ile a bina: “Molimo, u ntlhohlotse, u lekole pelo ea ka; u nteke, u tsebe mehopolo ea ka.” (Pesaleme ea 139:23, 24) E ne e le takatso ea Davida hore Jehova Molimo a hlahlobe litakatso, maikutlo, kapa merero e sa lokelang. Ka mantsoe a mang, Davida o ile a sebelisa thuso ea Jehova ho qoba sebe.
Empa bofokoli ba Davida bo ile ba mo hlōla, ’me o ile a etsa sebe se seholo. Le mona, thapelo e ile ea mo thusa—lekhetlong lena bakeng sa ho tsosolosa kamano ea hae le Molimo. Ho ea ka Pesaleme ea 51:2, Davida o ile a kōpa ka tieo: “Ntlhatsoe, u be u ntlhatsoisise bokhopo ba ka, u mphekole sebe sa ka!”
Le rōna ka boikokobetso re ka rapella thuso ea Jehova e le hore re thibele litšekamelo tse fosahetseng. Sena se tla re matlafaletsa ho hlōla bofokoli bo metseng ka metso ’me se ka re thusa ho qoba sebe. Haeba re khutlela ketsong hape, re lokela ho atamela Jehova hape ka kōpo e tiileng hore a re thuse ho tsoela pele re loana.
[Litšoantšo tse leqepheng la 7]
Lithapelo tse etsoang bakeng sa sehlopha li lokela ho hatisa tšepo ea Mangolo le lipakane tsa moea tse tšoanang le tsa ba bang