Malapa a Tšepahalang a Akofisa Keketseho Sri Lanka

E ’NILE ea tsebahala e le Ceylon ho fihlela ka 1972, Sri Lanka ke sehleke-hleke se ratehang se nang le lifate tsa lipalema tse entseng mekoloko mabōpong a leoatle, mokoloko oa lithaba, le mahoatata a manyenyane. Ka lihlabeng, Adam’s Peak e bolelele ba limithara tse 2 243, ke sebaka se halalelang sa malumeli a mane a maholo.a Haufi le moo, ke World’s End, mohohlo o entseng selomo se lepellang ho theosetsa tlaase ho feta limithara tse 1 500. Sebaka seo se neha Sri Lanka ponahalo e hlollang haholo.

Baahi ba limilione tse 18 ba Sri Lanka ba na le semelo se thahasellisang. Ho tloha lekholong la bohlano la lilemo B.C.E., batho ba buang puo ea Indo-European ba neng ba e-tsoa ka leboea ho India ba ile ba aha sehleke-hlekeng sena. Ke Masinhalese, ao hona joale a etsang karolo ea boraro ea baahi. Kahoo, haesale ho tloha lekholong la bo12 la lilemo, ho ile ha e-ba le tšubuhlellano ea Matamil a tsoang ka boroa ho India; bana hona joale boholo ba bona bo phela ka leboea le ka bochabela sehleke-hlekeng sena. Mapotoketsi, Madache le Manyesemane ka ho tšoanang a ’nile a etsa liphetoho le tšusumetso ea nako e telele ho tloha mehleng ea likolone. Ho phaella moo, bahoebi ba tsamaeang ka likepe ba e-tsoa lihloahloeng tsa Arabia le Malay ba ile ba lula har’a batho ba sebakeng seo. Ho boetse ho na le metsana e ka thōko ea Maeurope, Mapersia, Machaena, le ba bang.

Ntle le ho tsoakana ha merabe, puo le bolumeli Sri Lanka li bontša semelo sa eona se fapaneng. Lipuo tse khōlō sehleke-hlekeng ke Sinhalese, Setamil le Senyesemane. Batho ba bangata ba Sri Lanka bonyane ba bua tse peli tsa lipuo tsena tse tharo. Semelo sa merabe le sona se phetha karolo e khōlō bolumeling ba batho. Masinhalese a mangata ke Mabuddha, ha Matamil a mangata e le Mahindu. Ba amanang le Maarabia kapa batho ba Malay hangata ba khomarela Bomosleme, ’me ba nang le semelo sa Europe ka kakaretso ke litho tsa likereke tsa Bokreste-’mōtoana, K’hatholike kapa Boprostanta.

Ho Tobana le Phephetso

Sena sohle se tlisa phephetso e khōlō ho Lipaki tsa Jehova Sri Lanka. Tsona li sebetsa ka thata ho phetha taelo ea Jesu: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle.” (Mattheu 24:14) Ka ntle le hore ba lokele ho sebetsana le lipuo tse ’maloa, bahoeletsi ba litaba tse molemo ba ka ’na ba bua le Mabuddha, Mahindu, litho tsa likereke tsa Bokreste-’mōtoana, hammoho le ba latolang boteng ba Molimo—bana bohle e le nakong ea lihora tse seng kae feela tsa boboleli.

E le hore ba sebetse ka tsela e behang litholoana baboleli ba tlameha ho nka limakasine tsa Molula-Qhooa le Tsoha! le lingoliloeng tse ling tsa Bibele ka Setamil, Sinhalese le Senyesemane. Ba matla ka ho lekaneng ba bile ba nka le Libibele ka lipuo tseo. Haufinyane bahoeletsi ba ile ba nyakalla ha libukana tse lekanang le makasine Na Ruri Molimo oa re Tsotella? le Our Problems—Who Will Help Us Solve Them? le pampitšana Na Lefatše Lena le Tla Pholoha? li ne li lokolloa kopanong ka lipuo tse tharo ka nako e le ’ngoe. Sena se ile sa bolela ho ba le lisebelisoa tse eketsehileng tšebeletsong.

Haesale Lipaki li sebetsa ka thata ho tloha ka 1912, ha Charles Taze Russell, eo e neng e le mopresidente oa Mokhatlo oa Liithuti tsa Bibele tsa Machaba ka nako eo a ne a etela Ceylon ka nako e khutšoaane. Leha ho le joalo, khōlo e hlokomelehang, e ile ea lokela ho letela ho fihla ha baithuti ba Sekolo sa Bibele sa Gileade sa Watchtower ka 1947. Ho tloha ka nako eo, bahoeletsi ba Sri Lanka ba ile ba thabela liphello tse molemo mosebetsing oa bona oa ho bolela. Ka 1994, ka karolelano bahoeletsi ba ’Muso ba 1 866 ba ile ba khanna lithuto tsa lehae tsa Bibele tse 2 551, khoeli le khoeli. ’Me ba bileng teng Sehopotsong ba 6 930 e ne e le hoo e batlang e le palo ea bahoeletsi ka makhetlo a mane liphuthehong tsohle. Ke tlhohonolofatso e babatsehang hakaakang!

Ha ho bapisoa le linaha tse ling, tsoelo-pele ea Sri Lanka e ka ’na ea bonahala e lieha. Lebaka le leng ho bonahala e le litlamahano tse matla tsa lelapa. Leha ho le joalo, lintho li ka ’na tsa tsamaea ka tsela e ’ngoe hape. Ha molaoli oa lebotho la ntoa la Moroma Kornele a ne a nka bohato ba ho emela ’nete, lelapa la hae le ile la ema le eena. (Liketso 10:1, 2, 24, 44) Buka ea Liketso e boetse e bua ka malapa a matla a Bakreste, ho akareletsa la Lydia, la Krispo le la molebeli oa teronko oa Pauluse le Silase.—Liketso 16:14, 15, 32-34; 18:8.

Ka sebele litlamahano tse matla tsa lelapa li ka ’na tsa sebeletsa se molemo moo ho nang le tlhophiso e molemo le ho tiisetsa ka botšepehi. A ntse a hopotse mantsoe a Esaia 60:22, moromuoa oa khale Ray Matthews o-oa hlokomela: “Ho bonahala e ka hona joale Jehova o potlakisa lintho ka nako e loketseng, eseng feela ho batho ka bomong empa hape le ho malapa.”

Lelapa le Hlophisitsoeng le Tlisa Thoriso

Ka sebele kajeno ho na le malapa a tšepahalang joalo Sri Lanka. Ka mohlala, ho na le lelapa le hlophisehileng hantle la ha Sinnappa le phelang Kotahena, sebakeng sa Colombo, motseng o moholo oa Sri Lanka. Le hoja hlooho ea lelapa, Marian, e se khale hakaalo a shoele, mosali oa hae, Annamma, le ba 12 ho bana ba bona ba 15, ba hlahlamanang ho tloha lilemong tse 13 ho isa ho tse 33, ba tsoela pele ba sebeletsa Jehova e le lelapa. Nakong ea ha phihlelo ena e ngoloa, ba robeli ba bana bana ba ne ba se ba kolobelitsoe, ’me ba bararo ba bona ba ne ba se ba le tšebeletsong ea nako e tletseng, ba sebeletsa e le bo-pula-maliboho ba kamehla. Ba bang ba bararo ba ne ba ngolisetsa bopula-maliboho bo thusang nako le nako. Har’a ba banyenyane lelapeng leo ho na le ba bane bao e leng bahoeletsi ba sa kolobetsoang. Ho phaella moo, ba bane ho litloholo le hoja ba sa ntse ba le banyenyane haholo, ba ne ba ithuta Bibele le ho ba teng libokeng tsa Bokreste Phuthehong ea Lipaki tsa Jehova ea Colombo North.

Annamma o ile a utloa litaba tse molemo tsa ’Muso ka 1978 ha a ne a amohela kopi ea Molula-Qhooa. Ho ile ha qalisoa thuto ea Bibele, ’me ka mor’a ho qeta thuso ea ho ithuta Bibele ea ’Nete e Isang Bophelong bo sa Feleng, Annamma o ile a nehela bophelo ba hae ho Jehova Molimo ’me a kolobetsoa, kahoo a qalisa ho beha mohlala bakeng sa ba bangata ba lelapa la hae.

Joaloka monna oa lebotho la ntoa Kornele, Annamma o na le tlhophiso e ntle lelapeng la hae. Annamma o-oa hopola: “Re ne re lokela ho hlophisetsa liboka tsa Bokreste le likopano—re se re sa re letho ka sekolo. Liaparo e ne e le bothata empa ka tlhohonolofatso ea Jehova re ne re khona ho ithokela liaparo tse ncha bakeng sa kopano ka ’ngoe. Lelapa lohle le ne le fihla le apere hantle ’me le fepehile hantle—’me hape le e-na le pososelo e khōlō.”

Bana ba hopola tlhophiso ea lelapa labo bona ka kameho e lerato. Ho thusa lelapa lohle hore le be teng libokeng tsa Bokreste, ka kakaretso ba baholoanyane ba ne ba fuoa boikarabelo bo khethehileng. Ka mohlala, Mangala o ne a hlatsoa liaparo, ’me Winnifreda a li otlolla ka tšepe e chesang. Winnifreda, eo hape a neng a thusa ba banyenyane ho apara, o re: “Bohle ba ne ba shebahala hantle e le kannete ha ba tloha lapeng.”

Lijo tsa moea li ne li hlophisoa hantle ka ho tšoanang. Morali e mong, Pushpam, eo hona joale e leng pula-maliboho ea kamehla, o-oa hopola: “Letsatsi ka leng, lelapa labo rōna le ne le thabela ho bala Bibele le ho hlahloba temana ea letsatsi ea Bibele hammoho.” Annamma o-oa phaella: “Ngoana e mong le e mong o na le kopi ea Bibele, Molula-Qhooa, le likhatiso tse ling. Ke mamela litlhaloso tsohle tsa bona ka hloko libokeng. Ha ho hlokahala, ke boetse ke fana ka khothatso le tokiso ha re se re le hae. Bosiu re kopana bakeng sa ho phetha letsatsi ka thapelo ea lelapa.”

Bana ba baholoanyane ke ba bohlokoahali bakeng sa ho thusa Annamma ho fa bohle ba lelapa thuto e molemo ea Bokreste. Leha ho le joalo, kemiso ea bona e maphatha-phate ha e thibele takatso ea bona ea ho arolelana litaba tse molemo le ba bang kantle ho lelapa. Ka kakaretso, litho tse fapa-fapaneng tsa lelapa li khanna lithuto tsa lehae tsa Bibele tse 57 bathong ba tikolohong ea lona. Mokhoenyana, Rajan, o-oa hlalosa: “Lelapa le khanna lithuto tsa Bibele tse hatelang pele. Mosali oa ka, Pushpam, o se a bile le phihlelo ea ho bona se seng sa liithuti tsa hae se nehela bophelo ba sona ho Jehova.”

Ho ile ha tsosa mofere-fere Kotahena ha lelapa le leholo joalo le tsoa Kerekeng ea Roma e K’hatholike. Le hoja moruti ka boeena ho se mohla a kileng a etela lelapa ho fumana hore na ke hobane’ng ha ba tsoile kereke, o ile a kōpa balumeli ba kereke eo ho batlisisa. Ho ile ha tšoaroa lipuisano tse ’maloa, haholo-holo ka thuto ea Boraro-bo-bong. Kamehla Annamma o ’nile a itšetleha ka Jehova le Bibele ho sireletsa tumelo ea hae. Lengolo leo a neng a le rata haholo lipuisanong tsena ke Johanne 17:3.

Lelapa la Sinnappa le bontšitse ka ho hlakileng hore tlhophiso e ntle le boiteko ba kamehla li ka tlisa liphello tse khotsofatsang. Ka boiteko ba bona bo chesehang, moloko o mocha oa baboleli ba ’Muso o-oa hōla, sena sohle se rorisa Jehova.

Khanyetso e Kopanya Lelapa Borapeling ba ’Nete

Lelapa la ha Ratnam le lula lik’hilomithara tse seng kae ha u theosa ka ’mila ho tloha ha Sinnappa, Narhenpitya, sebakeng se seng sa Colombo. Le bona pele ba ne ba kena Roma e K’hatholike. Ka 1982, Lipaki li ne li le tšebeletsong ea ntlo le ntlo ha li kopana le Balendran, monna oa morali e moholo, Fatima. Thuto ea Bibele e ile ea qalisoa le lelapa lohle. Kapele bana ba bona ba bararo ba ile ba botsa Nkhono Ignasiamal lebitso la Molimo. Ha bana ba fana ka karabo e reng “Jehova,” ba ile ba tsosa thahasello ea Nkhono, ’me ho ile ha qalisoa thuto ea Bibele le eena. Hamorao, barali ba hae ba babeli Jeevakala le Stella, ba ile ba kopanela thutong, ’me ka 1988 ba ile ba kolobetsoa ka boraro ba bona.

Ka nako e tšoanang, Balendran le Fatima ba ne ba arolelana ’nete le e mong oa banab’abo Fatima, Mallika, le monna oa hae, Yognathan. Ka 1987 banyalani bana ba ile ba kolobetsoa, ’me ba ile ba jala lerato le hōlang la Jehova ka ho bana ba bona ba banyenyane. Pushpa, e mong oa banab’abo Fatima, o ile a latela ho kena ’neteng. O ile a inehela ’me a kolobetsoa ka 1990. Ha ba le Tokyo, monna oa hae, Eka, o ne a sebeletsa phuthehong ea Senyesemane, ’me Pushpa o ne a thusa mora oa bona e monyenyane, Alfred, hore a hōlisetsoe tseleng ea Jehova.

Ho fihlela joale, ba bane ho bana ba leshome ba lelapa la ha Ratnam ba emetse borapeli ba ’nete. Hoa thabisa hore ba bang ba bararo ba tsoela pele hantle lithutong tsa bona tsa Bibele. Ho litloholo tse 11, ngoananyana a le mong, Pradeepa, o se a kolobelitsoe. Ba bang ba ba banyenyane ba supileng ba ntse ba rupeloa kamehla ka thuto ea lehae ea Bibele. Ho phaella moo, kakaretso ea lithuto tsa lehae tsa Bibele tse 24 e khanneloa batho ba thahasellang tikolohong eo.

Sena sohle ha sea ka sa etsahala habonolo feela. Qalong ho ne ho e-na le khanyetso ea lelapa. Ntate oa lelapa leo, Muthupillai le bara ba baholoanyane ba ne ba hanyetsa haholo hore leha e le mang oa lelapa la bona a ka ba teng libokeng Holong ea ’Muso kapa ho kopanela mosebetsing oa boboleli ba phatlalatsa. Le hoja taba e ’ngoe e ne e le ho ameha ka tšireletseho ea botho, Muthupillai o-oa phaella: “Ke ne ke hlile ke inehetse haholo ‘bahalaleling’ ’me ke ne ke sa lumelle lelapa la ka hore le ka tsoa Kerekeng e K’hatholike.” Leha ho le joalo, hona joale, o lumela hore ba rapela Molimo oa ’nete hobane o bona melemo eo tumelo ea bona e ba tliselitseng eona.

Ka mohlala, ka nako e ’ngoe mong’a ntlo eo ba lulang ho eona oa Mobuddha o ile a leka ho ba leleka setšeng sa hae ka ho ba betsa ka litlhare. Bosiung bo bong o ile a beha litholoana tsa lime tse “sebelitsoeng ka boloi” ho potoloha ntlo. Tšabo e ile ea aparela baahisani ba lumelang khoela, bao kaofela ha bona ba neng ba lebeletse hore ketsahalo e sa thabiseng e tla hlahela lelapa la Ratnam. Leha ho le joalo, ha Ignasiamal a fumana sena, eena le bana ba hae ba ile ba tlosa litholoana tseo kantle ho tšabo kapa ho tlakasela—’me ha ho letho le lebe le ileng la ba hlahela. Ketso ea bona e se nang tšabo e ile ea e-ba bopaki bo boholo sebakeng seo, ea etsa hore batho ba ba hlomphe haholo. Stella o ile a khona ho qalisa lithuto tsa lehae tsa Bibele tse peli malapeng a haufi. A khothalitsoe ke sena, ngoetsi, Nazeera le eena o ile a amohela thuto ea Bibele.

Ha a hetla morao litlhohonolofatsong tse tlileng lelapeng la hae, Ignasiamal o-oa hlokomela: “Ke thabile haholo ho bona khōlo ea moea ka har’a lelapa. Jehova o re hlohonolofalitse hobane khanyetso e kokobetse, ’me bonngoe ba lelapa la rōna bo ile ba hōla.”

Malapa ana a maholo a ipakile e le tlhohonolofatso e khōlō hakaakang. A kopantse mantsoe a ’ona ho a malapa a manyenyane, malapa a nang le motsoali a le mong, le Bakreste ba masoha ba ntseng ba ikitlaetsa ka matla ho akofisa boboleli ba litaba tse molemo tsa ’Muso “naheng ena e phatsimang ke botle,” e leng seo lebitso Sri Lanka le se bolelang. Hammoho le Bakreste-’moho le tsona lefatšeng ka bophara, Lipaki tsa Sri Lanka li lebelletse ka thabo ho tsosolosoeng ha Paradeise, eo botle ba eona bo seng bo ntse bo tšoelima ka linako tse ling esita le hona joale mabōpong le lithabeng tse ratehang tsa Sri Lanka.

[Mongolo o botlaaseng ba leqephe]

[Litšoantšo tse leqepheng la 24, 25]

Ba bangata Sri Lanka ba arabela boboleling ba Bakreste le ho ruta ha bona