Moloko oa Batho o Hloka Tsebo ea Molimo

“U tla tseba ho tšaba Jehova, u fihlele tsebo ea Molimo.”—LIPROVERBIA 2:5.

1. Ke hobane’ng ha ho ka boleloa hore pelo ea motho ke mosebetsi o tsoileng matsoho oa boqapi ba bomolimo?

LIPELO tsa batho tse ka bang 5 600 000 000 lia otla hona joale lefatšeng. Letsatsi le leng le le leng, pelo ea hao e otla ka makhetlo a 100 000 ’me e pompa lilithara tsa mali tse ka bang 7 600 ho pholletsa le tsamaiso ea methapo ea pelo e lik’hilomithara li 100 000. Ha ho mosifa o mong o sebetsang ka thata ho feta mosebetsi ona o tsoileng matsoho oa boqapi ba bomolimo.

2. U ka hlalosa pelo ea tšoantšetso joang?

² Hape ho na le lipelo tsa tšoantšetso tse 5 600 000 000 tse sebetsang lefatšeng. Ka pelong ea tšoantšetso ho na le maikutlo a rōna, litšusumetso tsa rōna le litakatso tsa rōna. Ke setsi sa menahano ea rōna, kutloisiso ea rōna le thato ea rōna. Pelo ea tšoantšetso e ka ikhohomosa kapa ea ikokobetsa, ea tepella kapa ea thaba, ea e-ba lefifing kapa ea e-ba leseling.—Nehemia 2:2, NW; Liproverbia 16:5; Mattheu 11:29; Liketso 14:17; 2 Ba-Korinthe 4:6; Ba-Efese 1:16-18.

3, 4. Lipelo li finyelloa joang ka litaba tse molemo?

³ Jehova Molimo o khona ho bona se ka pelong ea motho. Liproverbia 17:3 e re: “Silefera se qhibilisoa pitseng ea lesehla, khauta e belisoa seboping; empa ea lekang lipelo ke Jehova.” Leha ho le joalo, ho e-na le ho bona feela se ka pelong ka ’ngoe le ho liha kahlolo, Jehova o sebelisa Lipaki tsa hae ho finyella lipelo tsa batho ka litaba tse molemo. Sena se tumellanong le mantsoe a moapostola Pauluse: “Mang le mang ea rapelang lebitso la Morena, o tla bolokeha. Empa ba tla rapela joang eo ba sa kang ba lumela ho eena? ’Me ba tla lumela joang ho eo ba sa kang ba utloa litaba tsa hae? ’Me ba tla utloa joang, ha ’moleli a le sieo? ’Me ba tla bolela joang, ha ba sa rongoe? Joalo ka ha ho ngoliloe, ho thoe: Maoto a ba bolelang Evangeli ea khotso a matle hakakang, maoto a ba bolelang Evangeli ea taba tse molemo!”—Ba-Roma 10:13-15.

⁴ Jehova o ile a thabisoa ke hore a romele Lipaki tsa hae ho isa lipheletsong tsa lefatše ho ‘bolela Evangeli ea litaba tse molemo’ le ho fumana ba nang le lipelo tse arabelang hamolemo. Hona joale re ka holimo ho 5 000 000—e leng karo-karolelano ea Paki e le ’ngoe ho batho ba ka bang 1 200 lefatšeng. Ha ho bonolo ho finyella batho ba likete tsa limilione lefatšeng ka litaba tse molemo. Empa Molimo o tsamaisa mosebetsi ona ka Jesu Kreste ’me o hula ba lipelo li tšepahalang. Kahoo, boprofeta bo tlalehiloeng ho Esaia 60:22 bo ipaka ho ba ’nete: “E monyenyane ho bona o tla ata ho isa seketeng, ea nyatsehang a fetohe sechaba se sengata. ’Na Jehova, ke tla phakisa ke etse hoo ka nako ea teng.”

5. Tsebo ke’ng, hona ho ka thoe’ng ka bohlale ba lefatše?

⁵ Nako eo ke eona ena, ’me ho hlakile hore—batho ba likete tsa limilione lefatšeng ba hloka tsebo. Ha e le hantle, tsebo ke ho tloaelana le linnete tse fumanoeng ka phihlelo, ho hlokomela kapa ho ithuta. Lefatše le bokeletse tsebo e ngata. Ho se ho entsoe tsoelo-pele likarolong tse kang ea lipalangoang, tlhokomelo ea bophelo ba ’mele le ea puisano. Empa na ehlile ke tsebo ea lefatše eo moloko oa batho o e hlokang? Le hanyenyane! Lintoa, khatello, maloetse le lefu li tsoela pele ho hlasela moloko oa batho. Bohlale ba lefatše hangata bo ’nile ba ipaka bo sa tšepahale.

6. Mabapi le mali, tsebo ea Molimo e fapana joang le bohlale ba lefatše?

⁶ Ka mohlala: Makholong a mabeli a lilemo a fetileng, ho ntša mali ka morero oa ho phekola lefu le itseng ho ne ho tloaelehile. George Washington, mopresidente oa pele oa United States, o ile a ntšoa mali khafetsa lihoreng tsa ho qetela tsa bophelo ba hae. Mothating o mong, o ile a re: “Ntloheleng ke ichoelle ka khotso; nke ke ka phela nako e telele.” O ne a nepile, hobane o ile a shoa hona letsatsing leo—la la 14 December, 1799. Ho e-na le hore ho hatisoe haholo taba ea ho ntša mali, kajeno ho hatisoa haholo taba ea ho tšela mali ’meleng oa motho. Mekhoa ena ka bobeli e ’nile ea e-ba le mathata a mangata a bolaeang. Leha ho le joalo, nakong ena eohle, Lentsoe la Molimo le ’nile la re: “Tela . . . mali.” (Liketso 15:29) Kamehla tsebo ea Molimo e nepahetse, ea tšepahala, e nakong.

7. Tsebo ea Mangolo e fapana joang le bohlale ba lefatše tabeng ea ho hōlisa bana?

⁷ Hlokomela mohlala o mong oa bohlale ba lefatše bo sa tšepahaleng. Ka nako e telele litsebi tsa kelello li ’nile tsa buella ho hōlisa bana ka ho ba lumella ho etsa ntho e ’ngoe le e ’ngoe, empa e mong oa babuelli ba taba ena hamorao o ile a lumela hore ba ne ba fositse. German Philological Association e kile ea re ho lumella ntho e ’ngoe le e ’ngoe “bonyane ho ikarabella ka tsela e sa tobang mathateng ao hona joale re nang le ’ona ka bacha.” Bohlale ba lefatše bo ka ’na ba ea pele le morao joalokaha eka bo fokoa ke moea, empa tsebo e nepahetseng ea Mangolo e ’nile ea e-ba e sa sisinyeheng. Bibele e fana ka keletso e leka-lekaneng mabapi le koetliso ea bana. Liproverbia 29:17 e re: “Laea mora oa hao, o tla u fa phomolo, a nyakalatse moea oa hao.” Taeo e joalo e lokela ho fanoa ka lerato, hobane Pauluse o ile a ngola: “Bontat’a bana, le se ke la halefisa bana ba lōna; le mpe le ba hōlise ka ho ba laea le ka ho ba rutela Moreneng.”—Ba-Efese 6:4.

“Tsebo ea Molimo”

8, 9. U ka hlalosa joang seo Liproverbia 2:1-6 e se buang ka tsebo eo moloko oa batho o hlileng o e hlokang?

⁸ Le hoja Pauluse e ne e le motho ea rutehileng, o ile a re: ‘Ekare ha e mong har’a lōna a itekanya hoba o bohlale lefatšeng lena, a ke a fetohe lehlanya, hore a tle a fetohe ea bohlale. Hobane bohlale ba lefatše lena ke bohlanya pel’a Molimo.’ (1 Ba-Korinthe 3:18, 19) Ke Molimo feela ea ka fanang ka tsebo eo moloko oa batho o hlileng o e hlokang. Mabapi le eona, Liproverbia 2:1-6 e re: ‘Mora oa ka, etlere ha u amohela litaba tsa ka, ’me u ipolokela melao ea me ka ho uena, u e sekehela tsebe, ’me u lebisa pelo ea hao kutloisisong, ke re, ha u ka bitsa masene, ua hoeletsa kutloisiso, ua e batla joalo ka silefera, ua e rafa joalo ka matlotlo a patiloeng mobung; ke moo u tla tseba ho tšaba Jehova, u fihlele tsebo ea Molimo; hobane Jehova ke eena ea fanang ka bohlale; tsebo le kutloisiso li tsoa molomong oa hae.’

⁹ Ba susumetsoang ke lipelo tse ntle ba ela hloko bohlale ka ho sebelisa tsebo eo Molimo a fanang ka eona ka tsela e molemo. Ba sekamisetsa lipelo tsa bona kutloisisong, ka hloko ba seka-seka linnete tseo ba ithutang tsona. Ha e le hantle, ba hoeletsa kutloisiso kapa matla a ho bona kamoo mahlakore a taba e itseng a amanang kateng. Ba pelo li lokileng ba sebetsa joalokaha eka ba cheka silivera le ho batla matlotlo a patiloeng. Empa ke letlotlo le lekaakang le fumanoang ke ba nang le lipelo tse arabelang hamolemo? Ke “tsebo ea Molimo.” Ke’ng seo? Ha e behoa habonolo feela, ke tsebo e fumanoang ka Lentsoeng la Molimo, Bibele.

10. Re tlameha ho etsa’ng e le hore re thabele bophelo bo botle ba moea?

¹⁰ Tsebo ea Molimo ea utloahala, e tsitsitse, e fana ka bophelo. E tlatsetsa bophelong bo botle ba moea. Pauluse o ile a phehella Timothea: “U ’ne u tšoare mohlala oa mantsoe a phelisang hantle ao u a utloileng ho ’na ka tumelo le lerato tse mabapi le Kreste Jesu.” (2 Timothea 1:13, NW) Puo e na le mohlala oa mantsoe. Ka ho tšoanang, ‘puo e hloekileng’ ea ’nete ea Mangolo e na le “mohlala oa mantsoe a phelisang hantle,” o theiloeng haholo-holo sehloohong sa Bibele sa ho tlosa qoso bobusing ba Jehova ka ’Muso. (Sofonia 3:9, NW) Ho hlokahala hore re boloke mohlala ona oa mantsoe a phelisang hantle ka kelellong le ka pelong. Re tlameha ho sebelisa Bibele bophelong re be re sebelise ka ho feletseng litokisetso tsa moea tseo Molimo a li lokisetsang ka “mohlanka ea khabane, ea bohlale,” e le hore re ka qoba lefu la pelo ea tšoantšetso re be re lule re phela hantle moeeng. (Mattheu 24:45-47; Tite 2:2) Kamehla a re ke re hopoleng hore, e le hore re ka ba le bophelo bo botle ba moea, re hloka tsebo ea Molimo.

11. Ke mabaka afe a mang ao ka ’ona moloko oa batho o hlokang tsebo ea Molimo?

¹¹ Hlokomela mabaka a mang ao ka ’ona ho hlokahalang hore batho ba likete tsa limilione lefatšeng ba be le tsebo ea Molimo. Na kaofela ha bona baa tseba hore lefatše le batho li bile teng joang? Che, ha ba tsebe. Na moloko ’ohle oa batho o tseba Molimo oa ’nete le Mora oa hae? Na bohle ba tseba litseko tseo Satane a li phahamisitseng mabapi le bobusi ba bomolimo le botšepehi ba batho? Re boetse re re che. Na batho ka kakaretso baa tseba hore na ke hobane’ng ha re tsofala re bile re e-shoa? Le ena re tlameha ho e araba ka che. Na baahi bohle ba lefatše ba hlokomela hore hona joale ’Muso oa Molimo oa busa le hore re phela mehleng ea qetello? Na ba tseba meea e khopo? Na batho bohle ba na le tsebo e ka tšeptjoang mabapi le kamoo ba ka bang le bophelo ba lelapa bo thabileng kateng? ’Me na matšoele aa tseba hore bophelo bo thabileng Paradeiseng ke morero oa ’Mōpi oa rōna bakeng sa moloko oa batho o utloang? Karabo ea lipotso tsena le eona ke che. Joale ho hlakile hore moloko oa batho o hloka tsebo ea Molimo.

12. Re ka rapela Molimo “ka moea le ka ’nete” joang?

¹² Hape moloko oa batho o hloka tsebo ea Molimo ka lebaka la seo Jesu a se buileng thapelong bosiung ba ho qetela ba bophelo ba hae lefatšeng. E tlameha ebe baapostola ba hae ba ile ba ameha maikutlo ka ho teba ha ba mo utloa a re: “’Me bophelo bo sa feleng, ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Johanne 17:3) Ho sebelisa tsebo e joalo ke eona feela tsela ea ho sebeletsa Molimo ka tsela e amohelehang. Jesu o itse: “Molimo ke Moea: ba o rapelang e ka khona ba rapele ka moea le ka ’nete.” (Johanne 4:24) Re rapela Molimo “ka moea” ha re susumetsoa ke lipelo tse tletseng tumelo le lerato. Re mo rapela “ka ’nete” joang? Ka ho ithuta Lentsoe la hae le ka ho mo etsetsa tšebeletso ea borapeli ho latela ’nete ea hae e senotsoeng—“tsebo ea Molimo.”

13. Ke ketsahalo efe e tlalehiloeng ho Liketso 16:25-34, ’me re ka ithuta eng ho eona?

¹³ Batho ba likete ba qala ho sebeletsa Jehova selemo le selemo. Empa, na batho ba thahasellang ba lokela ho khanneloa lithuto tsa Bibele ka nako e telele, kapa na ho ka khoneha hore ba pelo li tšepahalang ba fihle boemong ba ho kolobetsoa kapelenyana? Ha e le hantle, hlokomela se ileng sa etsahala tabeng ea molebeli oa teronko le ba ntlo ea hae bao ho buuoang ka bona ho Liketso 16:25-34. Pauluse le Silase ba ne ba kentsoe teronkong Filippi, empa har’a mp’a bosiu, tšisinyeho ea lefatše e khōlō e ile ea bula mamati a teronko. Molebeli oa teronko ka ho nahana hore batšoaruoa bohle ba balehile le hore kotlo ea hae e ne e tla ba boima, o ne a le mothating oa ho ipolaea ha Pauluse a mo bolella hore ba ntse ba le teng kaofela. Pauluse le Silase ba ile ba “’molella lentsoe la Morena, le bohle ba neng ba le ka tlung ea hae.” Molebeli eo oa teronko le lelapa la hae e ne e le Balichaba ba neng ba sa tsebe Mangolo a Halalelang. Empa, bosiung boo bo le bong, e ile ea e-ba balumeli. Ho feta moo, “a kolobetsoa kapele, eena le ba ntlo ea hae kaofela.” Maemo ao e ne e le a sa tloaelehang, empa ba bacha ’neteng ba ne ba rutoa linnete tsa motheo ebe ba ithuta lintho tse ling libokeng tsa phutheho. Ntho e tšoanang le eo e lokela ho etsahala kajeno.

Kotulo e Khōlō!

14. Ke hobane’ng ha ho hlokahala hore ho khannoe lithuto tsa Bibele tse atlehang tse eketsehileng ka nako e khutšoanyane?

¹⁴ Ho ne ho tla ba molemo haeba Lipaki tsa Jehova li ne li ka khanna lithuto tsa Bibele tse tsoelang pele tse eketsehileng ka nako e khutšoanyane. Ka sebele sena sea hlokahala. Ka mohlala, linaheng tsa Europe Bochabela, batho ba tlameha ho ba lethathamong la ba letetseng ho khanneloa lithuto tsa Bibele. Ho joalo le libakeng tse ling. Motseng o mong Dominican Republic, Lipaki tse hlano li ne li kōptjoa ke batho ba bangata haholo hoo li neng li ke ke tsa khona ho khanna lithuto tsohle. Li ile tsa etsa’ng? Li ile tsa khothaletsa ba thahasellang ho kopanela libokeng Holong ea ’Muso ’me ba be lethathamong la ba letetseng ho khanneloa lithuto tsa Bibele. Boemo bo tšoanang bo teng libakeng tse ngata ho pota lefatše.

15, 16. Ho lokiselitsoe eng bakeng sa ho jala tsebo ea Molimo ka potlako e khōloanyane, ’me lintlha tse ling tse mabapi le eona ke life?

¹⁵ Libaka tse khōlōhali—masimo a maholo bakeng sa kotulo—a bulehela batho ba Molimo. Le hoja Jehova, “Morena oa kotulo,” a ntse a romela basebetsi ba eketsehileng, ho ntse ho e-na le ho hongata ho lokelang ho etsoa. (Mattheu 9:37, 38) Ka lebaka leo, e le hore tsebo ea Molimo e ka jaloa ka potlako e khōloanyane, “mohlanka ea khabane” o lokiselitse ntho e ’ngoe eo ka bokhutšoanyane e fanang ka tsebo e tobileng e le hore liithuti tsa Bibele li ka tsoela pele moeeng thutong ka ’ngoe. Ke buka e ncha e ka ithutoang lithutong tsa mahae tsa Bibele ka potlako—mohlomong ka likhoeli tse seng kae. ’Me e ka kenngoa habobebe mekotlaneng ea rōna ea libuka, kapa esita le ka lipokothong! Batho ba makholo a likete ba neng ba bokane Kopanong ea Setereke ea Lipaki tsa Jehova ea “Barorisi ba Thabileng” ba ile ba thabela ho fumana buka ena e ncha e maqephe a 192 e nang le sehlooho se reng Tsebo e Isang Bophelong bo sa Feleng.

¹⁶ Bangoli linaheng tse sa tšoaneng ba ile ba lokisetsa boitsebiso bo ileng ba qetelloa ka hloko bakeng sa buka ea Tsebo. Ka lebaka leo e lokela ho ipiletsa lichabeng tsohle. Empa na ho tla nka nako e telele pele buka ee e ncha e lokolloa ka lipuo tsa batho ba leng likarolong tsohle tsa lefatše? Che, hobane buka ena e maqephe a 192 e ka fetoleloa ka potlako e khōloanyane ho feta libuka tse khōloanyane. Ka October 1995, Komiti e Ngolang ea Sehlopha se Busang e ne e se e fane ka tumello ea hore buka ena e fetoleloe ho tloha Senyesemaneng ho ea lipuong tse ka holimo ho 130.

17. Ke lintlha life tse lokelang ho etsa hore ho sebelisa buka ea Tsebo ho be bonolo?

¹⁷ Lintlha tse tobileng khaolong ka ’ngoe ea buka ena ea Tsebo li lokela ho nolofaletsa liithuti ho etsa tsoelo-pele e potlakileng ea moea. Buka ena e beha linnete tsa Mangolo ka tsela e hahang. Ha e bue haholo ka lithuto tsa bohata. Puo e hlakileng le litlhaloso tse utloahalang li lokela ho etsa hore ho be bonolo ho sebelisa buka ena bakeng sa ho khanna lithuto tsa Bibele le ho thusa batho ho fumana tsebo ea Molimo. Ntle le mangolo a qotsitsoeng, ho na le litemana tsa Bibele tse bontšitsoeng tseo seithuti se ka li balang ha se lokisetsa puisano. Litemana tsena li ka baloa nakong ea thuto ha nako e lumela, le hoja ho ke ke ha e-ba bohlale ho kenyeletsa boitsebiso bo eketsehileng bo ka etsang hore lintlha tse khōlō li se ke tsa hlaka. Ho e-na le hoo, ba khannang lithuto tsa Bibele ba lokela ho leka ho lemoha le ho fetisetsa ho seithuti seo buka ena e se totobatsang sehloohong ka seng. Sena se bolela hore ea khannang thuto o tlameha ho khothalla ho ithuta, e le hore mehopolo ea sehlooho e ka hlaka haholoanyane ka kelellong ea hae.

18. Ho etsoa litlhahiso life mabapi le tšebeliso ea buka ea Tsebo?

¹⁸ Buka ea Tsebo e Isang Bophelong bo sa Feleng e ka potlakisa mosebetsi oa ho etsa barutuoa joang? Buka ena e maqephe a 192 e ka ithutoa ka nako e khutšoanyane ha ho bapisoa, ’me ba nang “le tšekamelo e nepahetseng bakeng sa bophelo bo sa feleng” ba lokela hore ba khone ho ithuta ho lekaneng ka eona hore ba inehele ho Jehova ’me ba kolobetsoe. (Liketso 13:48, NW) Ka hona ha re sebeliseng buka ea Tsebo hamolemo tšebeletsong. Haeba seithuti sa Bibele se se se ithutile karolo e khōlō ea buka e ’ngoe, ho ka ba molemo hore se e qete. Ho seng joalo, ho etsoa tlhahiso ea hore liithuti tsa Bibele li fetele bukeng ea Tsebo. Ka mor’a hore li qete buka ena e ncha, ha ho etsoe tlhahiso ea hore liithuti tseo li khanneloe thuto ka buka ea bobeli. Ba amohelang ’nete ba ka etsa hore tsebo ea bona e phethehe ka ho ba teng libokeng tsa Lipaki tsa Jehova esita le ka hore ba ipalle Bibele le libuka tse sa tšoaneng tsa Bokreste.—2 Johanne 1.

19. Pele re khanna lithuto tsa Bibele ka buka ea Tsebo, ke hobane’ng ha ho le molemo ho hlahloba maqephe a 175 ho ea ho 218 a buka ea Ho Hlophisetsoa ho Phetha Tšebeletso ea Rōna?

¹⁹ Buka ea Tsebo e ngotsoe ka morero oa ho thusa motho ho araba lipotso tsohle tseo baholo ba li hlahlobang le bahoeletsi ba sa kolobetsoang ba batlang ho kolobetsoa e le Lipaki tsa Jehova. Ka hona, pele u fetisetsa liithuti tsa hao tsa Bibele tsa hona joale bukeng ena e ncha, ho khothaletsoa hore u qete lihora tse seng kae u hlahloba lipotso tse maqepheng a 175 ho ea ho 218 a buka Ho Hlophisetsoa ho Phetha Tšebeletso ea Rōna.a Sena se tla u thusa ho hatisa likarabo tsa lipotso tse joalo nakong ea lithuto tsa Bibele bukeng ea Tsebo.

20. U lokisetsa ho etsa eng ka buka ea Tsebo e Isang Bophelong bo sa Feleng?

²⁰ Hohle batho ba lokela ho utloa litaba tsena tse molemo. E, moloko oa batho o hloka tsebo ea Molimo, ’me Jehova o na le Lipaki tsa hae bakeng sa ho e tsebahatsa. Hona joale re na le buka e ncha eo Ntate oa rōna oa leholimo ea lerato a e lokiselitseng ka mohlanka ea khabane ea bohlale. Na u tla e sebelisa ho ruta ’nete le ho tlisa tlhompho lebitsong la Jehova le halalelang? Ka sebele Jehova o tla u hlohonolofatsa ha u ntse u leka kahohle ho abela ba bangata tsebo e isang bophelong bo sa feleng.

[Mongolo o botlaaseng ba leqephe]

U ne U Tla Araba Joang?

◻ U ka hlalosa pelo ea tšoantšetso joang?

◻ Tsebo ea Molimo ke eng?

◻ Ke hobane’ng ha moloko oa batho o hloka tsebo ea Molimo?

◻ Ke buka efe e ncha e fumanehang, hona u lokisetsa ho e sebelisa joang?

[Setšoantšo se leqepheng la 10]

Ho na le mabaka a mangata ao ka ’ona batho ba likete tsa limilione lefatšeng ba hlokang tsebo ea Molimo