Baboleli ba ’Muso Baa Tlaleha

Mesebetsi e Metle e Tlotlisang Jehova

THUTONG ea hae ea Thabeng, Jesu o ile a re ho barutuoa ba hae: “Leseli la lōna a le khanye ka pel’a batho, e le hore ba ka bona mesebetsi ea lōna e metle ’me ba tlotlisa Ntate oa lōna ea leng maholimong.” (Matheu 5:16) Ka ho tšoanang, Bakreste ba ’nete kajeno ba kopanela ‘mesebetsing e metle’ e tlotlisang Jehova.

Mesebetsi ee e metle ke efe? E akarelletsa ho boleloa ha litaba tse molemo, empa boitšoaro ba rōna bo behang mohlala bo boetse bo phetha karolo ea bohlokoa. Hangata se khahlang batho pele phuthehong ea Bokreste ke boitšoaro ba rōna bo botle. Liphihlelo tse latelang li bontša kamoo Lipaki tsa Jehova Martinique li ‘khantšang leseli la tsona ka pel’a batho.’

◻ Ha a ntse a etsa mosebetsi oa ho bolela ka ntlo le ntlo, e mong oa Lipaki tsa Jehova o ile a etela mosali oa Mok’hatholike. Ka lilemo tse 25 mosali enoa o ne a lutse le monna eo a sa nyalanang le eena. O ne a tloaelane le lithuto tsa Lipaki tsa Jehova, kaha lilemo tse ka bang tse supileng pele ho moo, o ne a ile a fumana buka ea U ka Phela ka ho sa Feleng Paradeiseng Lefatšeng.a Mosali eo o ile a bolella Paki: “Ho na le malumeli a mangata haholo. Ha ke tsebe hore na ke lumele bofe har’a moluba-lube ona oohle.” Paki e ile ea mo hlalosetsa hore ’nete e ka fumanoa feela ka Bibeleng le hore e le hore a e fumane, o tšoanela ho ithuta Mangolo ka hloko ’me a rapele Molimo bakeng sa moea oa hae le tataiso.

Le hoja a ne a thahasella ho ithuta Bibele, ka nako e itseng mosali eo o ile a hana limemo tsa ho ea libokeng tsa Bokreste Holong ea ’Muso ea Lipaki tsa Jehova. Lebaka? O ne a le lihlong ka ho fetisisa. Leha ho le joalo, ka mor’a hore a fumane memo ea ho ea Sehopotsong sa lefu la Kreste, o ile a hlōla lihlong tsa hae ’me a ea.

Se ileng sa mo khahla haholo libokeng ke moea oa lerato o neng o le Holong ea ’Muso. O ne a e-s’o ka a ba le botsoalle ba ’nete joalo kerekeng ea hae! Ka mor’a seboka seo, o ile a qala ho ba teng libokeng tsohle tse tšoaroang ke Lipaki tsa moo, ’me kapele a nyalana le monna eo e sa leng a lula le eena. Hona joale ke setho se kolobelitsoeng sa phutheho.

◻ Mesebetsi e metle ea Paki e ’ngoe e ile ea hlahisa litholoana tse ntle. E ne e e-na le boemo ba boikarabelo ofising. Ka mor’a hore ho hiroe monna ea neng a e-tsoa sehleke-hlekeng sa Réunion, ba bang ba basebetsi ba ile ba qala ho mo soma ka lebaka la bokhutšoanyane ba hae. O ile a fetoha sesomo. Empa ka ho fapaneng, kamehla Paki e ne e le mosa ’me e hlompha monna eo. Kapele monna eo o ile a botsa hore na ke hobane’ng ha Paki eo e fapane le ba bang.

Paki e ile ea hlalosa hore boitšoaro ba eona bo nang le tlhompho e ne e le ka lebaka la melao-motheo ea Bibele eo e neng e ithutile eona ho Lipaki tsa Jehova. E ile eaba ea ’montša seo Mangolo a se bolelang ka merero ea Molimo le ka tšepo ea lefatše le lecha. Monna eo o ile a amohela thuto ea Bibele, a qala ho ba teng libokeng tsa Bokreste, ’me a nyalana le mosali eo a neng a ntse a itulela le eena feela.

Hamorao monna eo o ile a khutlela Réunion. Nakong e fetileng, o ne a ile a ba le mathata le beng ka eena, haholo-holo ba lelapa labo mosali oa hae. Empa hona joale ba ile ba khahloa haholo ke boitšoaro ba hae bo botle ba Bokreste. Monna eo o ile a kolobetsoa ’me hona joale ke mohlanka ea sebeletsang. Litho tse ’maloa tsa lelapa, ho kopanyelletsa mosali oa hae le barali ba bona ba babeli, le bona ba sebeletsa phuthehong ea Bokreste e le bahoeletsi ba litaba tse molemo tsa ’Muso oa Molimo.

[Mongolo o botlaaseng ba leqephe]