Keteka Sehopotso ka ho Tšoanelehang

ENE e le ka la 14 Nisane, 33 C.E., ha Jesu a theha Sehopotso.a Re ka kholiseha ka letsatsi lena kaha o ne a sa tsoa qeta ho keteka Paseka le baapostola ba hae ba 12. Ka mor’a hore a leleke moeki Judase, Jesu o ile “a nka bohobe, a kōpa tlhohonolofatso, a bo qhetsola eaba o ba fa bona, ’me o re: ‘Bo nkeng, sena se bolela ’mele oa ka.’ ’Me ha a nka senoelo, a leboha ’me a ba fa sona, ’me kaofela ba noa ho sona. Eaba o re ho bona: ‘Sena se bolela “mali a selekane” a ka, ao ka sebele a tlang ho tšolloa molemong oa ba bangata.’”—Mareka 14:22-24.

Ka lebaka la bohlokoa ba lefu la hae, Jesu o ile a laela barutuoa ba hae hore ba le hopole. (Luka 22:19; 1 Bakorinthe 11:23-26) Sa hae e ne e le sona feela sehlabelo se ka lopollang batho thohakong ea sebe se futsitsoeng le lefu. (Baroma 5:12; 6:23) Bohobe le veine tseo a li sebelisitseng li ne li tšoantšetsa ’mele o phethahetseng oa hae le mali a hae. Re tseba letsatsi la pele leo mokete o thehiloeng ka lona, re ka keteka ketsahalo eo selemo le selemo ka letsatsi le lumellanang le leo, joalokaha ho ne ho etsoa ka Paseka ea Bajuda. Empa re tlameha ho etsa joalo ka ho tšoanelehang. Hobane’ng?

Moapostola Pauluse o ile a re ba jang litšoantšetso tsa bohobe le veine ba ne ba ‘ntse ba phatlalatsa lefu la Morena, ho fihlela a fihla.’ (1 Bakorinthe 11:26) Ka hona, mokete o ne o tla lebisa tlhokomelo lefung la Jesu le ho seo le se bolelang ho batho. Ketsahalo eo e ne e tla ba e tebileng, nako ea ho nahanisisa ka molemo oa Molimo le ka kananelo eo re lokelang ho ba le eona ka Jehova le Mora oa hae. (Baroma 5:8; Tite 2:14; 1 Johanne 4:9, 10) Ka hona, Pauluse o ile a lemosa: “Ka lebaka leo mang kapa mang ea jang bohobe bona kapa ea noang senoelo sa Morena ka ho sa tšoaneleheng o tla ba molato mabapi le ’mele le mali tsa Morena.”—1 Bakorinthe 11:27.

Ka ho Tšoanelehang—Joang?

Ka ho hlakileng, Molimo a ke ke a khahloa haeba re silafatsa ketsahalo ena ka ho kopanela mekhoeng e belaetsang kapa ka ho amohela meetlo ea bohetene. (Jakobo 1:27; 4:3, 4) Sena se tla qhelela thōko liketsahalo tse tloaelehileng nakong ea Easter. Ka ho latela taelo ea Jesu ea ho ‘’na re etsa sena ho mo hopola,’ re tla batla ho keteka Sehopotso ka tsela eo a ileng a se theha ka eona. (Luka 22:19; 1 Bakorinthe 11:24, 25) Sena se tla qhelela ka thōko metjeea e ’nileng ea faselletsoa moketeng ona ke likereke tsa Bokreste-’mōtoana. New Catholic Encyclopedia ea lumela hore “’Misa oa kajeno o fapane hōle le mokete o itekanetseng o neng o lateloa ke Kreste le Baapostola ba Hae.” ’Me ka ho keteka ’Misa khafetsa, esita le letsatsi le leng le le leng, Bokreste-’mōtoana bo khelohile ho seo Jesu a neng a se rerile ’me bo se fetotse ketsahalo e tloaelehileng.

Pauluse o ile a ngolla Bakreste ba Korinthe ka taba ea ho ja ka ho sa tšoaneleheng kaha ho ne ho hlahile bothata phuthehong eo mabapi le Lijo tsa Shoalane tsa Morena. Ba bang ba ne ba sa hlomphe ho halalela ha tsona. Ba ne ba e-tla le lijo tsa bona tsa mantsiboea ’me ba li ja pele kapa nakong ea seboka. Hangata ba ne ba e-ja le ho noa ka ho tlōlisa. Sena se ne se etsa hore ba otsele ’me se thotofatsa likelello tsa bona. Ka ho se be ba falimehileng kelellong le moeeng, ba ne ba “sa lemohe ’mele” ’me ka hona ba e-ba “molato mabapi le ’mele le mali tsa Morena.” Ho sa le joalo, ba neng ba sa ka ba e-ja lijo tsa mantsiboea ba ne ba lapa ’me ba boetse ba sitiseha. Hoo e ka bang e mong le e mong oa bona o ne a se boemong ba ho ja litšoantšetso ka kananelo le ka temoho e feletseng mabapi le botebo ba ketsahalo eo—hore mokete oo e ne e le ho ikhopotsa lefu la Morena. Sena se ile sa fella ka hore ba ahloloe, kaha ba ne ba sa bontše tlhompho, ba bile ba o nyelisa.—1 Bakorinthe 11:27-34.

Ho Hlokahala Temoho

Ba bang ba jele litšoantšetso tsa Sehopotso le hoja, ba hlokometse hamorao hore ba ne ba sa tšoanela hore ebe ba entse joalo. Ba jang litšoantšetso tsa Sehopotso ka tšoanelo ba khethiloe ke Molimo ’me ba na le bopaki ba moea oa Molimo tabeng eo. (Baroma 8:15-17; 2 Bakorinthe 1:21, 22) Hase qeto ea bona ea botho kapa boikemisetso ba bona tse ba etsang ba tšoanelehang. Molimo o lekanyelitse palo ea ba tla busa le Kreste maholimong ho ba 144 000, palo e batlang e fokola haholo ha e bapisoa le bohle ba ruang molemo thekollong ea Kreste. (Tšenolo 14:1, 3) Ho khethoa ha bona ho qalile nakong ea Jesu, ka lebaka leo, kajeno ke ba ’maloa feela ba jang. ’Me ha lefu le ntse le feta ka ba bang ba bona, palo eo e lokela ho fokotseha.

Ke hobane’ng ha e mong a ka ’na a ja litšoantšetso tseo ka phoso? E ka ’na eaba ka lebaka la pono eo a neng a e-na le eona pele ea bolumeli—hore bohle ba tšepahalang ba ea leholimong. Kapa e ka ’na eaba ka lebaka la takatso e matla ea bophahamo kapa boithati—boikutlo ba hore eena o tšoaneleha ho feta ba bang—le ho lakatsa ho hlahella. Mohlomong ke liphello tsa maikutlo a matla a bakiloeng ke mathata a tebileng kapa tlokotsi e etsang hore motho a lahleheloe ke thahasello ea ho phela lefatšeng. Hape e ka ’na eaba ka lebaka la botsoalle bo haufi le motho ea nang le pitso ea leholimo. Kaofela ha rōna re tlameha ho hopola hore qeto ke ea Molimo feela, e seng ea rōna. (Baroma 9:16) Ka hona, haeba motho, “ka mor’a ho hlahlobisisa,” a fumana hore ka sebele o ne a sa tšoanela hore ebe o jele litšoantšetso, joale o lokela ho tlohela.—1 Bakorinthe 11:28.

Tšepo eo Molimo a e behileng ka pel’a batho ba bangata ke ea bophelo bo sa feleng paradeiseng lefatšeng. Ke tlhohonolofatso e khōlō eo re ka e lebellang, ’me e le eo re ka arabelang ho eona habonolo. (Genese 1:28; Pesaleme ea 37:9, 11) Ke mona lefatšeng moo ba tšepahalang ba tlang ho kopanngoa le baratuoa ba bona ba tsositsoeng ’me ba kopane le ba lokileng ba boholo-holo, ba kang Abrahama, Sara, Moshe, Rahaba, Davida le Johanne Mokolobetsi—bao kaofela ha bona ba shoeleng pele Jesu a bula tsela e eang bophelong ba leholimo.—Matheu 11:11; bapisa le 1 Bakorinthe 15:20-23.

Ba nang le tšepo ea lefatšeng ba keteka Lijo tsa Shoalane tsa Morena ka ho tšoanelehang ka ho ba teng le ho mamela ka tlhompho, le hoja ba sa je bohobe le ho noa veine. Le bona ba rua molemo sehlabelong sa Kreste, se ba nolofalletsang ho ba le boemo bo amohelehang ho Molimo. (Tšenolo 7:14, 15) Ha ba mametse puo e fanoang, kutloisiso e feletseng ea bona bakeng sa lintho tse halalelang ea matlafatsoa, ’me takatso ea bona ea ho lula bonngoeng le batho ba Molimo hohle ea hōla.

Selemong sena, ka Labobeli la la 2 April, ka mor’a hore letsatsi le likele, Sehopotso se tla ketekoa liphuthehong tsohle tse fetang 78 000 tsa Lipaki tsa Jehova, lefatšeng ka bophara. Na u tla ba teng?

[Mongolo o botlaaseng ba leqephe]

[Setšoantšo se leqepheng la 8]

Lipaki tsa Jehova li keteka Sehopotso hanngoe ka selemo