Lentsoe la Molimo le Etsa “Mehlolo”
JOALOKAHA HO BOLETSE THÉRÈSE HÉON
Ka letsatsi le leng ka 1965, ke ile ka kena mohahong oa khoebo ’me ka nehelana ka likopi tsa limakasine tsa Molula-Qhooa le Tsoha! ho bahoebi. Ha ke reteleha nakong eo ke tlohang, ke ile ka utloa lerata la ho phatloha. Kulo e ile ea otla fatše pel’a maoto a ka. E mong oa bahoebi o ile a bua a soka: “Ke oona mokhoa oa ho sebetsana le Lipaki tsa Jehova.”
PHIHLELO eo e ile ea ntšosa—empa e seng ka ho lekaneng hore ke tlohele tšebeletso ea nako e tletseng. Linnete tsa Bibele tseo ke neng ke ithutile tsona li ne li le bohlokoa haholo hore nka lumella ntho leha e le efe ho etsa hore ke tlohele tšebeletso ea ka. A nke ke hlalose hore na ke hobane’ng ha ke rialo.
Ka mor’a hore ke tsoaloe ka July 1918, batsoali ba ka ba ile ba lula Cap-de-la-Madeleine, motse o monyenyane o Quebec, Canada, o tsejoang e le The Place of Miracles (Tulo ea Mehlolo). Baeti ba ne ba e-tla ka bongata bo boholo mona ho tla fana ka tlotliso sebakeng se halalelang sa Moroetsana Maria. Le hoja mehlolo eo ho tiisoang hore ke ea Maria e ke ke ea pakoa, Lentsoe la Molimo le entse hoo e ka bang mohlolo bophelong ba batho ba bangata kaha motse o se o atolohile ho ba toropo ea baahi ba ka holimo ho 30 000.
Ha ke le lilemo tse ka bang 20, Ntate o ile a hlokomela thahasello ea ka litabeng tsa bolumeli ’me a mpha Bibele ea hae. Ha ke qala ho e bala, ke ile ka haroha letsoalo ha ke ithuta ho Exoda khaolo ea 20 hore borapeli ba litšoantšo bo nyatsuoa pepenene. Ka potlako ke ile ka felloa ke tšepo lithutong tsa Kereke e K’hatholike ’me ka emisa ho ea ’Miseng. Ke ne ke sa batle ho rapela liemahale. Ke ntse ke hopola ha Ntate a re: “Thérèse, athe ha u ee kerekeng?” Eba kea arabela: “Che, ke bala Bibele.”
Ho bala Bibele ho ile ha tsoela pele e le karolo ea bophelo ba ka esita le ka mor’a hore ke nyaloe ka September 1938. Kaha hangata monna oa ka, Rosaire, o ne a sebetsa bosiu, ke ile ka ho fetola tloaelo ho bala Bibele nakong eo a leng mosebetsing. Ka potlako ke ile ka fihlela qeto ea hore e tlameha ebe Molimo o na le batho, ’me ke ile ka qalella ho ba batla.
Ho Batla ha ka Batho ba Molimo
Ka lebaka la seo ke neng ke ile ka ithuta sona kerekeng, ha ke sa le monyenyane, ke ne ke tšaba ho robala ka lebaka la ho tšaba ho tsoha liheleng. E le ho loantša tšabo eo, ke ne ke tloaetse ho ipolella hore Molimo ea lerato a ke ke a lumella ntho e tšabehang joalo hore e etsahale. Ka kholiseho, ke ile ka lula ke bala Bibele, ke batla ’nete. Ke ne ke tšoana le leqhalaha la Moethiopia le neng le bala empa le sa utloisise.—Liketso 8:26-39.
Khaitseli ea ka André le mosali oa hae, ba neng ba lula foleteng e le ’ngoe le rōna empa mokatong o ka tlaase, ba ile ba qalella ho ithuta Bibele le Lipaki tsa Jehova hoo e ka bang ka 1957. Ke ile ka bolella ngoetsi’eso hore e kokote siling e le ho ntemosa nakong eo Lipaki li tlileng mohahong oa rōna ho tla bolela. Ka tsela eo, ke ne ke sa tl’o arabela. Ka letsatsi le leng e ile ea hlōleha ho ntemosa.
Letsatsing leo ke ile ka bula monyako ’me ka kopana le Kay Munday oa pula-maliboho, joalokaha basebeletsi ba nako e tletseng ba Lipaki tsa Jehova ba bitsoa. O ile a bua le ’na ka lebitso la Molimo, a hlalosa hore Molimo o na le lebitso la hae la botho, Jehova. Ka mor’a hore a tsamaee, ke ile ka hlahloba Bibele ea ka ho tiisa hore seo a se buileng ka sebele se tšehetsoa ke litemana tsa Bibele. Patlisiso eo ea ka e ile ea nthabisa haholo.—Exoda 6:3, Douay Version, mongolong o botlaaseng ba leqephe; Matheu 6:9, 10; Johanne 17:6.
Ha Kay a e-tla hape, re ile ra tšohla thuto ea motheo ea K’hatholike ea Boraro-bo-bong, e bolelang hore Molimo ke batho ba bararo Molimong a le mong. Hamorao ke ile ka hlahloba Bibele ea ka ka hloko ho ikhotsofatsa hore ha e rute Boraro-bo-bong. (Liketso 17:11) Ho ithuta ha ka ho ile ha tiisa hore Jesu o ne a se moholo joaloka Molimo. O bōpiloe. O bile le qalo, athe ha hoa ba joalo ka Jehova. (Pesaleme ea 90:1, 2; Johanne 14:28; Bakolose 1:15-17; Tšenolo 3:14) Ke khotsofetse ke seo ke neng ke ithuta sona, ke ile ka thabela ho tsoela pele ka puisano ea Bibele.
Ka letsatsi le leng ka 1958, nakong ea sefefo se nang le lehloa sa November, Kay o ile a ’memela ho ba teng kopanong ea potoloho e neng e tla tšoaroa mantsiboeeng ’ona ao holong e hiriloeng. Ke ile ka amohela memo ’me ka thabela lenaneo. Ka mor’a moo, moqoqong oa ka le Paki e ileng ea nkatamela, ke ile ka botsa: “Na Mokreste oa ’nete o lokela ho ruta ka ntlo le ntlo?”
O ile a re: “E, litaba tse molemo li tlameha ho boleloa, ’me Bibele e senola hore ho etela batho malapeng a bona ke mokhoa o bohlokoa oa ho ruta.”—Liketso 20:20.
Karabo ea hae e ile ea nthabisa hakaakang! E ile ea nkholisa hore ke fumane batho ba Molimo. Haeba a ne a ile a re “Che, ha ho hlokahale,” ke ne ke tla ipotsa hore na ke fela ke fumane ’nete, kaha ke ne ke tseba seo Bibele e se bolelang mabapi le ho ruta ka ntlo le ntlo. Ho tloha ka nako eo ho ea pele, ke ile ka etsa khatelo-pele ea moea ka potlako.
Ka mor’a kopano eo ea potoloho, ke ile ka qala ho kopanela libokeng tsa Lipaki tsa Jehova tse neng li tšoareloa toropong e haufinyane ea Trois-Rivières. Kay le eo a neng a bula maliboho le eena, Florence Bowman, e ne e le bona feela Lipaki tse neng li lula Cap-de-la-Madeleine ka nako eo. Ka letsatsi le leng ke ile ka re: “Ke tla tsamaea le lōna ho ea ruta hosasane.” Ba ile ba thabela hore ke tsamaee le bona.
Ho Bolela Motseng oa Heso
Ke ne ke nahanne hore e mong le e mong o tla amohela molaetsa oa Bibele, empa ka potlako ke ile ka ithuta hore ha ho joalo. Ha Kay le Florence ba abeloa sebakeng se seng, e ne e le ’na ke le mong toropong ena ea neng a bolela linnete tsa Bibele ka ntlo le ntlo. Ke sa tšabe, ke ile ka tsoela pele ke bolela ke le mong ka lilemo tse ka bang peli ho fihlela ke kolobetsoa ka la 8 June, 1963. Letsatsing lona leo, ke ile ka ngolisa tšebeletso ea bopula-maliboho boo ka nako eo bo neng bo bitsoa ba phomolo.
Ke ile ka tsoela pele ke le pula-maliboho ea phomolo ka selemo se le seng. Joale Delvina Saint-Laurent o ile a ntšepisa hore o tla tla Cap-de-la-Madeleine ho tla sebetsa le ’na hanngoe ka beke haeba ke ne nka ba pula-maliboho ea kamehla. Kahoo, ke ile ka tlatsa foromo ea kōpo ea ka ea bopula-maliboho. Leha ho le joalo, ka masoabi, Delvina o ile a shoa libeke tse peli pele ke qala tšebeletso ea ka ea nako e tletseng. Ke ne ke tla etsa joang? Ha e le hantle, ke ne ke tlatsitse foromo ea kōpo ’me ke ne ke sa batle ho e koenehela. Ka hona, ke ile ka qala mosebetsi oa ka oa tšebeletso ea nako e tletseng ka October 1964. Ka lilemo tse hlahlamang tse ’ne, ke ile ka ea ka ntlo le ntlo ke le mong.
Mak’hatholike a khothetseng a Cap-de-la-Madeleine hangata a ne a na le bora. A mang a ile a bitsa mapolesa ka morero oa ho nthibela ho bolela. Ka letsatsi le leng, mohoebi e mong o ile a leka ho ntšosa ka ho thunya maotong a ka joalokaha ke boletse qalong. Ha e le hantle, sena se ile sa tsosa mofere-fere o moholo toropong. Seteishene sa sebakeng seo sa thelevishene se ile sa e bitsa tlhaselo khahlanong le Lipaki tsa Jehova. Ketsahalo eo eohle e ile ea fella ka bopaki bo molemo. Ho sa lebelloa, lilemo tse leshome hamorao, mong ka mohoebi ea ileng a nthunya o ile a fetoha Paki ka boeena.
“Mehlolo” e Entsoeng ke Lentsoe la Molimo
Ha lilemo li ntse li feta, ke bone ha lerako la khanyetso ea linnete tsa Bibele le heleha butle-butle Cap-de-la-Madeleine. Hoo e ka bang ka 1968, Lipaki tse ling li ile tsa fallela koano, ’me baahi ba mona ba qala ho arabela linneteng tsa Bibele. Maqalong a bo-1970, ha e le hantle ho ile ha e-ba le keketseho e khōlō palong ea lithuto tsa Bibele. Ho ile ha fihla boemong boo ke ileng ka tlameha ho kōpa Lipaki tse ling hore li tsamaise lithuto tse ’maloa tsa Bibele tseo ke neng ke li khanna e le hore nka tsoela pele ke e-ba le karolo e itseng tšebeletsong ea ntlo le ntlo.
Ka letsatsi le leng mosali e mong e mocha o ile a amohela ho ’na thuso ea ho ithuta Bibele, ’Nete e Isang Bophelong bo sa Feleng. Mohlankana oa hae ea neng a lula le eena ka nako eo o ne a bitsoa André, senokoane se neng se bonahala se le mabifi se bile se le manganga, ea ileng a kenella moqoqong. Puisano le André e ile ea tsosa thahasello ea hae, ’me thuto ea Bibele e ile ea qalisoa. Hang ka mor’a moo o ile a qala ho bua le metsoalle ea hae ka seo a neng a ithuta sona.
Ka nako e ’ngoe ke ne ke ithuta Bibele le litsotsi tse ’ne, tseo e ’ngoe ea tsona e neng e sa bue haholo, feela e ne e mamela ka hloko. Lebitso la eona e ne e le Pierre. Mesong e meng, hoo e neng e ka ba ka hora ea bobeli, ’na le monna oa ka re ile ra utloa ho kokotoa monyako. Bona ketsahalo ena ka leihlo la moea: Litsotsi tse ’ne li ne li eme moo li e-na le lipotso tseo li tlil’o mpotsa tsona. Ka lehlohonolo, ho ne ho se mohla Rosaire a neng a tletleba ka maeto a joalo a etsoang ka nako esele.
Qalong banna bao ba bane ba ne ba kopanela libokeng. Leha ho le joalo, ke André le Pierre feela ba ileng ba phehella. Ba ile ba lumellanya bophelo ba bona le litekanyetso tsa Molimo ’me ba kolobetsoa. Ka lilemo tse ka holimo ho 20 hona joale, banna bana bobeli ba bona ba sebelelitse Jehova ka botšepehi. Ha ba qala ho ithuta, ba ne ba tsebahala haholo ka mosebetsi oa bona oa bonokoane ’me ba ne ba beiloe leihlo ke mapolesa. Ka linako tse ling mapolesa a ne a e-tla a ba batla ka mor’a thuto ea rōna ea Bibele kapa nakong ea liboka tsa phutheho. Ke thabile hore ebe ke bolelletse “mefuta eohle ea batho,” ’me ka bona ka ho toba tsela eo ka eona Lentsoe la Molimo le ka hlahisang liphetoho tseo ka sebele ho bonahalang e le mohlolo.—1 Timothea 2:4.
Haeba ke ne ke ile ka bolelloa qalong hore ho tla ba le Holo ea ’Muso Cap-de-la-Madeleine le hore e ne e tla tlala batho ba Jehova, nka be ke sa ka ka kholoa. Se nthabisang, phutheho eane e nyenyane e motseng o haufinyane oa Trois-Rivières e hōlile ho isa ho liphutheho tse tšeletseng tse atlehileng tse kopanelang Liholong tsa ’Muso tse tharo, ho kopanyelletsa le e Cap-de-la-Madeleine.
’Na ka bonna ke bile le thabo ea ho thusa batho ba ka bang 30 hore ba finyelle boemong ba boinehelo le kolobetso. Joale ke le lilemo li 78, ka sebele nka re ke thabetse hore ebe ke ile ka nehela bophelo ba ka ho Jehova. Leha ho le joalo, ke lokela ho lumela hore ke ile ka ba le linako tsa ho nyahama. Ho loantša linako tse joalo ka katleho, ka linako tsohle ke phetla Bibele ea ka ’me ke bale tse ling tsa litemana tse nkhathollang haholo. Ha nke ke nahana ho qeta letsatsi ke sa bala Lentsoe la Molimo. Ka ho khetheha Johanne 15:7 ea khothatsa ha e re: “Haeba le lula kopanong le ’na le lipolelo tsa ka li lula ho lōna, le kōpe eng kapa eng eo le e lakatsang ’me e tla le etsahalla.”
Ke tšepile ho tla bona Rosaire lefatšeng le lecha le haufi haholo. (2 Petrose 3:13; Tšenolo 21:3, 4) Pelenyana ho lefu la hae ka 1975, o ne a tsoela pele hantle a lebile kolobetsong. Hajoale, ke ikemiselitse ho phehella tšebeletsong ea nako e tletseng le ho tsoela pele ke thabela mosebetsi oa Jehova.