Baboleli ba ’Muso Baa Tlaleha

Ho Finyella Mefuta Eohle ka ’Nete

MOAPOSTOLA PAULUSE e ne e le ’moleli ea chesehang oa ’Muso oa Molimo. Ha aa ka a lumella khanyetso ho mo sitisa thōmong ea hae ea ho bolela “litaba tse molemo.” (1 Bakorinthe 9:16; Liketso 13:50-52) Pauluse o ile a khothalletsa ba bang ho latela mohlala oa hae.—1 Bakorinthe 11:1.

Lipaki tsa Jehova li tsejoa lefatšeng ka bophara ka boiteko ba tsona bo tiileng ba ho bolela. Ka sebele, li bua le ba bang ha ‘nako e tšoanela’ le ha ‘nako e le likhathatso’ ho phethahatsa mosebetsi o laetsoeng ke Molimo oa ho ‘etsa barutuoa.’ (2 Timothea 4:2; Matheu 28:19, 20) Esita le linaheng tseo ho tsona li thulanang le khanyetso, ba pelo li tšepahalang ba finyelloa ka molaetsa oa bohlokoa ka ho fetisisa o mabapi le ’Muso oa Molimo, joalokaha liphihlelo tse latelang li bontša.

◻ Sehleke-hlekeng se seng, Pacific ka bophirimela, moo mosebetsi oa Lipaki tsa Jehova o thibetsoeng, moshemane e mong ea lilemo li 12 o ile a iphumana a pota-potiloe ke metsoalle e mebe sekolong. Bongata ba liithuti-’moho le eena li ne li tsuba lisakerete joalo-joalo, li bala libuka tsa bootsoa, li tšoenya matichere ’me li loana. Boemo bo ile ba mpefala hoo moshemane a ileng a kōpa ntate oa hae hore na a ka ea sekolong se seng. Leha ho le joalo, ntate o ile a behela mora mabaka khahlanong le maikutlo a joalo, kaha o ne a ikutloa hore boitšoaro ba liithuti likolong tse ling tse haufi le moo e ne e ke ke ea e-ba bo fapaneng le ba seo. Leha ho le joalo, o ne a tla thusa mora joang?

Ntate o ile a hopola hore o na le buka e ’ngoe ea bacha ka tlung. E ne e le mpho e tsoang ho e mong oa beng ka eena eo e neng e le e mong oa Lipaki tsa Jehova. Kahoo o ile a batla buka eo, ’me hoba a e fumane, o ile a e fetisetsa ho mora. E ne e e-na le sehlooho se reng Lipotso Bacha Baa Botsa—Likarabo tse Sebetsang.a Moshemane enoa o ile a fumana khaolo e reng “Nka Hlōla Khatello ea Lithaka Joang?” e le e molemo ka ho khetheha. Hase feela hore e ile ea mo ruta bohlokoa ba ho boloka boitlhompho empa e ile ea boela ea mo ruta kamoo a ka latolelang ba bang kateng ka masene ha ba leka ho mo hatella hore a latele tsela ea booatla. Ka ho sebelisa melao-motheo ea Mangolo e fumanoang bukeng eo, mohlankanyana enoa o ile a ithuta kamoo a ka sebetsanang ka katleho kateng le khatello ea lithaka.

Ha a hlokomela sena le liphetoho tse ling tse ntle ho mora, ntate o ile a etsa qeto ea ho bala buka eo. A khahliloe ke keletso e molemo e fanoeng bukeng eo, ntate o ile a kōpa thuto ea lehae ea Bibele ho Lipaki tsa Jehova. Hamorao, litho tse ling tsa lelapa li ile tsa kopanela le eena thutong. Phello? Hona joale moshemane, moen’ae, ntat’ae le batsoali ba ntat’ae ke Lipaki tsa Jehova.

◻ Hona naheng eo, Lipaki tsa Jehova tse peli li ile tsa koalloa chankaneng ka lebaka la ho mamela ha tsona ka tieo melao-motheo ea Bibele. Leha ho le joalo, ha lia ka tsa lumella boemo ba tsona ho li thibela ho bua ka sebete ka ’Muso oa Molimo. Li ile tsa atamela ofisiri ea chankana ’me tsa fumana tumello ea ho etsa mokete oa sehopotso oa Lijo tsa Shoalane tsa Morena moo. Li ile tsa thaba hakaakang ha batšoaruoa ba bang ba 14 ba bontša thahasello Bibeleng ’me ba kopanela le Lipaki tsena ketsahalong ena ea bohlokoa! Ka mor’a hore ba lokolloe, ba bang ba bona ba ile ba tsoela pele ho ithuta Bibele le ho kopanela le Lipaki tsa Jehova.

Linaheng tse fetang 25, Lipaki tsa Jehova lia sotleha ka lebaka la lithibelo kapa mefuta e meng e sa tšoaneng ea khanyetso kapa tlhoriso. Leha ho le joalo, ho tšoana le baapostola, li tsoela pele li “sa khaotse ho ruta le ho bolela litaba tse molemo mabapi le Kreste, Jesu.”—Liketso 5:42.

[Mongolo o botlaaseng ba leqephe]