“Le Hoja le sa ka la mo Bona le ka Mohla, Lea mo Rata”
“Le hoja le sa ka la mo bona le ka mohla, lea mo rata. Le hoja le sa mo talima hona joale, empa leha ho le joalo le sebelisa tumelo ho eena ’me le thaba haholo.”—1 PETROSE 1:8.
1. Le hoja kajeno ho se le ea mong lefatšeng ea kileng a bona Jesu, ke joang batho ba bang ba bolumeli ba lekang ka matla ho bontša borapeli ba bona ho eena?
HA HO le ea mong ea phelang lefatšeng kajeno ea kileng a bona Jesu Kreste. Empa, batho ba limilione ba bolela hore baa mo rata. Selemo ka seng ka la 9 January, Manila, Philippines, seemahale se boholo ba motho sa Jesu Kreste se nang le sefapano se huloa ho pholletsa le literata pontšong e ’nileng ea hlalosoa e le e khōlō ka ho fetisisa, e hlollang ka ho fetisisa ea bolumeli bo tloaelehileng naheng eo. Bongata bo nyakaletseng boa sutumetsana le ho qheshelana; batho ba bile ba hloana holimo ka boiteko bo matla haholo ba ho tšoara seemahale sena. Ba bangata ba leng teng bakeng sa ho keteka sena ba khahloa haholo ke mokoloko ona oa thabo. Empa, ha ho pelaelo hore ba bang ba bona ke batho ba ikutloang ba khahloa ke Jesu e le kannete. E le bopaki ba seo, ba ka ’na ba roala setšoantšo sa Kreste sefapanong kapa ba ea kerekeng kamehla. Leha ho le joalo, na borapeli bo joalo ba litšoantšo bo ka nkoa e le borapeli ba ’nete?
2, 3. (a) Ke bo-mang har’a balateli ba Jesu bao ha e le hantle ba ileng ba mo bona le ho mo utloa? (b) Ke bo-mang hape lekholong la pele la lilemo ba neng ba rata Jesu le ho lumela ho eena, le hoja ka bobona ba sa ka ba mo bona le ka mohla?
2 Lekholong la pele la lilemo, ho bile le ba likete tse ngata liprofinseng tsa Roma tsa Judea, Samaria, Perea le Galilea bao ka bobona ba hlileng ba bona le ho utloa Jesu Kreste. Ba ile ba mamela ha a ntse a hlalosa linnete tse thobang pelo ka ’Muso oa Molimo. E ne e le lipaki tse boneng ka mahlo tsa mehlolo eo a ileng a e etsa. Ba bang ho bona e ile ea e-ba barutuoa ba hae ba chesehang, ba neng ba kholisehile hore ke “Kreste, Mora oa Molimo ea phelang.” (Matheu 16:16) Leha ho le joalo, bao moapostola Petrose a ileng a ba ngolla lengolo la hae la pele le bululetsoeng ba ne ba se har’a bana.
3 Bao Petrose a neng a bua le bona ba ne ba le liprofinseng tsa Roma tsa Pontase, Galatia, Kapadosia, Asia le Bithynia—tseo kaofela li leng sebakeng sa Turkey ea kajeno. Petrose o ile a ba ngolla: “Le hoja le sa ka la mo bona le ka mohla, lea mo rata. Le hoja le sa mo talima hona joale, empa leha ho le joalo le sebelisa tumelo ho eena ’me le thaba haholo ka thabo e ke keng ea hlalosoa le e tlotlisitsoeng.” (1 Petrose 1:1, 8) Ho ne ho tlile joang hore ba tsebe Jesu Kreste ho fihlela ba mo rata le ho sebelisa tumelo ho eena?
4, 5. Batho bao, bao le ka mohla ba neng ba e-s’o bone Jesu, ba ile ba ithuta ka ho lekaneng joang ka eena e le hore ba ka mo rata le ho lumela ho eena?
4 Ka sebele, ba bang ba ne ba le Jerusalema ha moapostola Petrose a ne a pakela bongata bo tlileng moketeng oa Pentekonta ka 33 C.E. Ka mor’a mokete ona barutuoa ba bangata ba ile ba lula Jerusalema e le hore ba ka amohela litaelo tse eketsehileng ho baapostola. (Liketso 2:9, 41, 42; bapisa le 1 Petrose 1:1.) Maetong a boromuoa a nkoang khafetsa, moapostola Pauluse o ile a tsoela pele ka tšebeletso e bonahatsang cheseho le har’a batho ba neng ba lula sebakeng seo ho sona hamorao Petrose a ileng a romela lengolo la pele la Bibele le reheletsoeng ka eena.—Liketso 18:23; 19:10; Bagalata 1:1, 2.
5 Ke hobane’ng ha batho bao, bao le ka mohla ba neng ba e-s’o bone Jesu, ba ne ba khahluoe ke eena hakaalo? Mehleng ea rōna, ke hobane’ng ha ba limilione tse eketsehileng, ho pota lefatše, ba mo rata ka ho teba?
Lintho Tseo ba Ileng ba li Utloa
6. (a) Haeba u ne u ile ua utloa ha Petrose a ne a paka ka Jesu ka Pentekonta ea 33 C.E., u ka be u ile ua ithuta eng? (b) See se ile sa ama ba ka bang 3000 joang ba neng ba le teng?
6 Haeba u ne u le Jerusalema ha Petrose a ne a bua le bongata boo bo neng bo le moketeng ka 33 C.E., u ka be u ithutile eng ka Jesu? Ha ho pelaelo hore mehlolo eo a ileng a e etsa e ile ea bontša hore o ne a romiloe ke Molimo. Hore, le hoja batho ba baetsalibe ba ne ba bolaile Jesu, o ne a se a se ka lebitleng empa o ne a tsositsoe joale a se a phahamiselitsoe leholimong ka letsohong le letona la Molimo. Hore ka sebele Jesu e ne e le Kreste, Mesia eo baprofeta ba neng ba ngotse ka eena. Hore ka Jesu Kreste, moea o halalelang o ne o tšolletsoe holim’a balateli ba hae hoo hang-hang ba ileng ba khona ho pakela batho ba lichaba tse ngata ka lintho tse hlollang tseo Molimo a neng a li etsa ka Mora oa hae. Lipelo tsa ba bangata ba ileng ba utloa Petrose ketsahalong eo li ile tsa ameha ka ho teba, ’me ba ka bang 3000 ba ile ba kolobetsoa e le barutuoa ba Bakreste. (Liketso 2:14-42) Haeba u ne u le teng, na u ka be u nkile bohato bo joalo bo tiileng?
7. (a) Haeba u ne u le Antioke ha moapostola Pauluse a ne a bolela moo, u ka be u ithutile eng? (b) Ke hobane’ng ha ba bang ka har’a bongata e ile ea e-ba balumeli ’me ba abela ba bang litaba tse molemo?
7 Haeba u ne u le har’a ba neng ba le teng ha moapostola Pauluse a ne a ruta Antioke profinseng ea Roma ea Galatia, ke’ng hape eo u ka beng u ithutile eona ka Jesu? U ka be u utloile ha Pauluse a hlalosa hore ho ahloleloa lefu ha Jesu ke babusi ba Jerusalema ho ne ho boletsoe esale pele ke baprofeta. U ka be u boetse u utloile bopaki ba tsoho ea Jesu ba lipaki tse boneng ka mahlo. Ka sebele u ka be u khahliloe ke tlhaloso ea Pauluse ea hore ka ho tsosa Jesu bafung, Jehova o ile a tiisa hore ka sebele enoa ke Mora oa Molimo. ’Me na pelo ea hao e ka be e sa ka ea thobeha ha u ntse u ithuta hore tšoarelo ea libe eo tumelo ho Jesu e entseng hore e khonehe e ne e ka lebisa bophelong bo sa feleng? (Liketso 13:16-41, 46, 47; Baroma 1:4) Ha ba hlokomela se boleloang ke seo ba neng ba se utloa, ba bang Antioke e ile ea e-ba barutuoa, bao ka mafolo-folo ba neng ba abela ba bang litaba tse molemo, le hoja ho etsa joalo ho ne ho bolela hore ba ne ba tla talimana le mahloriso a matla.—Liketso 13:42, 43, 48-52; 14:1-7, 21-23.
8. Haeba u ne u le teng sebokeng sa phutheho ea Efese ha ho ne ho amoheloa lengolo la Pauluse le neng le e-ea ho eona, u ka be u ile ua ithuta eng?
8 Ho thoe’ng haeba u ne u kopanela le phutheho ea Bokreste ea Efese, profinseng ea Roma ea Asia, ha ho ne ho amoheloa lengolo la Pauluse le bululetsoeng le eang ho barutuoa ba moo? U ka be u ithutile eng ho lona mabapi le karolo ea Jesu morerong oa Molimo? Lengolong leo Pauluse o ile a hlalosa hore ka Kreste lintho tsohle tse leholimong le lefatšeng li ne li tla khutlisetsoa tumellanong le Molimo, hore mpho ea Molimo ka Kreste e ne e atolohela ho batho ba lichaba tsohle, hore batho ka bomong ba neng ba shoele mahlong a Molimo ka lebaka la litšito tsa bona ba ne ba phelisoa ka tumelo ho Kreste, le hore ka lebaka la tokisetso ena, ho ne ho boetse ho khoneha hore batho e be bara ba Molimo ba ratoang.—Baefese 1:1, 5-10; 2:4, 5, 11-13.
9. (a) U ka thusoa ke eng ho lemoha haeba uena ka bouena u utloisisa moelelo oa seo Pauluse a ileng a se ngolla Baefese? (b) Barab’abo rōna ba liprofinseng tsa Roma bao Petrose a buileng ka bona ba ile ba angoa joang ke seo ba neng ba ithuta sona ka Jesu?
9 Na kananelo bakeng sa sena sohle e ka be e tebisitse lerato la hao bakeng sa Mora oa Molimo? Na lerato le joalo le ka be le susumelitse bophelo ba hao ba letsatsi le letsatsi, joalokaha moapostola Pauluse a ile a khothalletsa khaolong ea 4 ho isa ho ea 6 ho Baefese? Na kananelo e joalo e ka be e u susumelelitse ho hlahloba ka hloko lintho tse tlang pele bophelong ba hao? Ka lebaka la ho rata Molimo le ho leboha Mora oa hae, na u ka be u entse liphetoho tse hlokahalang e le hore ho etsoa ha thato ea Molimo e ka ba ntho eo ka sebele e leng ka sehloohong bophelong ba hao? (Baefese 5:15-17) Mabapi le tsela eo ka eona Bakreste ba Asia, Galatia le liprofinseng tse ling tsa Roma ba neng ba angoa ke seo ba neng ba ithuta sona, moapostola Petrose o ile a ba ngolla: “Le hoja le sa ka la bona [Jesu Kreste] le ka mohla, lea mo rata. . . . Le sebelisa tumelo ho eena ’me le thaba haholo ka thabo e ke keng ea hlalosoa le e tlotlisitsoeng.”—1 Petrose 1:8.
10. (a) Ke’ng seo ntle ho pelaelo se ileng sa tlatsetsa leratong la ho rata Jesu la Bakreste ba pele? (b) Le rōna re ka rua molemo joang?
10 Ho ne ho e-na le ho hong hape hoo ntle ho pelaelo ho ileng ha tlatsetsa leratong la ho rata Mora oa Molimo leo Bakreste bao ba pele bao Petrose a neng a bua le bona ba neng ba le latsoa. E ne e le eng? Nakong eo Petrose a neng a ngola lengolo la hae la pele, bonyane Likosepele tse peli—Matheu le Luka—li ne li se li ntse li ajoa. Bakreste ba lekholong la pele la lilemo bao le ka mohla ba neng ba e-s’o bone Jesu ba ne ba ka bala litlaleho tsena tsa Kosepele. Le rōna re ka ho etsa. Likosepele hase litlaleho tse iqapeloang; li na le matšoao ’ohle a histori e tšepahalang ka ho fetisisa. Litlalehong tseo tse bululetsoeng, re fumana ho hongata ho tebisang lerato la rōna bakeng sa Mora oa Molimo.
Moea oo a Neng a o Bontša
11, 12. Ke eng e teng moeeng oo Jesu a ileng a o bontša batho ba bang e etsang hore u mo rate?
11 Tlalehong eo e ngotsoeng ea bophelo ba Jesu, re ithuta kamoo a neng a tšoara batho ba bang kateng. Moea oo a neng a o bontša o ama lipelo tsa batho esita le hona joale, lilemong tse ka holimo ho 1960 ka mor’a hore a shoe. E mong le e mong ea phelang o hateletsoe ke liphello tsa sebe. Ba limilione tse ngata ke liphofu tsa ho hloka toka, ba loana le ho kula kapa ka mabaka a mang ba ikutloa ba hateletsoe ke ho sareloa. Ho bohle ba joalo, Jesu o re: “Tloong ho ’na, lōna bohle ba sehlang le ba imetsoeng, ’me ka sebele ke tla le khatholla. Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela lisoule tsa lōna khatholoho. Etsoe joko ea ka e mosa le mojaro oa ka o bobebe.”—Matheu 11:28-30.
12 Jesu o ile a bontša kameho e bontšang ho nahanela mafutsana, ba lapileng le ba hlomohileng. Ha maemo a ne a etsa hore ho hlokahale, o ne a bile a fepa le batho ba bangata haholo ka mohlolo. (Luka 9:12-17) O ile a ba lokolla lineanong tse etsang batho makhoba. O ile a boela a haha tumelo ea bona litokisetsong tsa Molimo tsa ho felisa khatello ea lipolotiki le ea moruo. Jesu ha aa ka a hatella moea oa ba neng ba se ba ntse ba hateletsoe. Ka bonolo le ka lerato, o ile a hlasimolla ba bonolo ka bohlale. O ne a khatholla ba neng ba tšoana le mahlaka a tletleraneng a neng a kobehile le ba neng ba tšoana le khoele ea lebone ea folakse e kunkelang e haufi le ho tima. Ho theosa ho tla fihlela kajeno, lebitso la hae le fana ka tšepo, esita le ka lipelong tsa bao le ka mohla ba e-song ho mo bone.—Matheu 12:15-21; 15:3-10.
13. Ke hobane’ng ha tsela eo Jesu a neng a tšoara baetsalibe ka eona e ipiletsa ho batho?
13 Jesu ha aa ka a lumella liphoso, empa o ile a bontša kutloisiso mabapi le batho ba neng ba entse liphoso bophelong empa ba bontša pako ’me ba retelehela ho eena bakeng sa thuso. (Luka 7:36-50) O ne a ee a lule fatše ’me a je le batho ba neng ba nyeliseha sechabeng haeba a ne a ikutloa hore sena se ne se tla bula monyetla oa hore a ba thuse moeeng. (Matheu 9:9-13) Ka lebaka la moea oo a neng a o bontša, batho ba limilione ba maemong a tšoanang le ao, bao le ka mohla ba e-song ho bone Jesu ba susumeletsehile ho mo tseba ’me ba lumetse ho eena.
14. Ke’ng se ipiletsang ho uena mabapi le tsela eo ka eona Jesu a neng a thusa batho ba neng ba kula, ba holofetse kapa ba shoetsoe?
14 Tsela eo ka eona Jesu a neng a sebelisana le batho ba neng ba kula kapa ba holofetse e fana ka bopaki ba mofuthu oa hae le qenehelo esita le matla a hae a ho ba lokolla. Kahoo, ha monna ea neng a kula a tletse lepera a mo atamela ’me a kōpa thuso ka tieo, Jesu ha aa ka a nyarosoa ke seo a neng a se bona. ’Me ha aa ka a bolella monna eo hore, le hoja a ne a mo utloela bohloko, boemo boo bo ne bo se bo le bobe haholo ’me ha ho letho le neng le ka etsoa ho thusa. Monna eo o ile a kōpa ka tieo: “Morena, haeba feela u batla, u ka ntlhoekisa.” Ntle ho tika-tiko, Jesu o ile a otlolla letsoho ’me a ama monna ea nang le lepera, a re: “Kea batla. Hloeka.” (Matheu 8:2, 3) Ketsahalong e ’ngoe mosali e mong o ne a batla ho folisoa ka hore ka sekhukhu a ame mophetho o litjellane oa seaparo sa hae. Jesu o ile a sebetsana le eena ka tsela e mosa le e khothatsang. (Luka 8:43-48) ’Me ha a ne a teana le mokoloko oa ba eang phupung, o ile a hauhela mohlolohali ea saretsoeng eo mora oa hae ea mong a neng a shoele. Le hoja Jesu a ne a ile a hana ho sebelisa matla ao a a fuoeng ke Molimo hore a itokisetse lijo ka mohlolo, o ile a a sebelisa ka bolokolohi ho tsosa monna eo ea shoeleng ’me a mo khutlisetsa ho ’mè oa hae.—Luka 4:2-4; 7:11-16.
15. Ho bala litlaleho tse mabapi le Jesu le ho thuisa ka tsona ho u ama joang?
15 Ha re ntse re bala litlaleho tsena ’me re thuisa ka moea oo Jesu a ileng a o bontša, lerato la rōna ho enoa ea tetseng bophelo ba hae ba botho e le hore re ka phela ka ho sa feleng, lea teba. Le hoja re e-s’o mo bone le ka mohla, re ikutloa re khahloa ke eena, ’me re batla ho latela mehato ea hae.—1 Petrose 2:21.
Ho Itšetleha ha Hae ka Molimo ho Bontšang Boikokobetso
16. Jesu o ile a lebisa tlhokomelo e ka sehloohong ho mang, ’me o ile a re khothalletsa ho etsa eng?
16 Ka holimo ho tsohle, Jesu o ile a lebisa tlhokomelo ea hae le ea rōna ho Ntate oa hae oa leholimo, Jehova Molimo. O ile a tsebahatsa taelo e khōlō ka ho fetisisa Molaong, a re: “U rate Jehova Molimo oa hao ka pelo ea hao eohle le ka soule ea hao eohle le ka kelello ea hao eohle.” (Matheu 22:36, 37) O ile a eletsa barutuoa ba hae: “E-bang le tumelo ho Molimo.” (Mareka 11:22) Ha ba ne ba talimane le teko e tebileng ea tumelo ea bona, o ile a ba phehella: “Le rapele ka ho tsoelang pele.”—Matheu 26:41.
17, 18. (a) Jesu o ile a bonahatsa ho itšetleha ha hae ka Ntate oa hae ho bontšang boikokobetso joang? (b) Ke hobane’ng ha seo a ileng a se etsa e le sa bohlokoa hakaale ho rōna?
17 Jesu ka boeena o ile a beha mohlala. Thapelo e ne e le karolo ea bohlokoa ea bophelo ba hae. (Matheu 14:23; Luka 9:28; 18:1) Ha nako ea hore a khethe baapostola ba hae e fihla, Jesu ha aa ka a itšetleha feela ka kahlolo ea hae ka boeena, le hoja pejana mangeloi ’ohle leholimong a ne a le tlas’a bookameli ba hae. Ka boikokobetso o ile a qeta bosiu bohle a rapela Ntate oa hae. (Luka 6:12, 13) Ha a ne a talimane le ho tšoaroa le lefu le bohloko, Jesu o ile a boela a retelehela ho Ntate oa hae, a rapela ka tieo. Ha aa ka a ba le pono ea hore o ne a tseba Satane hantle ’me o ne a ka sebetsana habonolo le eng kapa eng eo motho eo ea khopo a neng a ka ’na a e etsa. Jesu o ne a hlokomela hore na ho bohlokoa hakae hore a se ke a hlōleha. Ho hlōleha ho ne ho tla tlisetsa Ntate oa hae thohako e kaakang! ’Me e ne e tla ba tahlehelo e kaakang ho moloko oa batho, oo litebello tsa oona tsa bophelo li neng li itšetlehile ka sehlabelo seo Jesu a neng a tla fana ka sona!
18 Jesu o ile a rapela khafetsa—ha a ne a e-na le baapostola ba hae kamoreng e ka holimo Jerusalema ’me a rapela esita le ka tieo haholoanyane serapeng sa Gethsemane. (Matheu 26:36-44; Johanne 17:1-26; Baheberu 5:7) Ha a ne a utloa bohloko thupeng ea tlhokofatso, ha aa ka a rohaka ba neng ba mo soma. Ho e-na le hoo, o ile a rapella ba neng ba etsa lintho ka ho hloka tsebo: “Ntate, u ba tšoarele, kaha ha ba tsebe seo ba se etsang.” (Luka 23:34) O ile a tsepamisa kelello ea hae ho Ntate oa hae, “a ipeha ho ea ahlolang ka ho loka.” Mantsoe a ho qetela ao a ileng a a bua thupeng ea tlhokofatso e ne e le thapelo e eang ho Ntate oa hae. (1 Petrose 2:23; Luka 23:46) Re ananela hakaakang hore ebe, ka ho itšetleha ka Jehova ka botlalo, Jesu ka botšepehi o ile a phetha kabelo eo Ntate oa hae a neng a mo tšepetse eona! Le hoja le ka mohla re e-s’o bone Jesu Kreste, re mo rata ka ho teba hakaakang bakeng sa seo a ileng a se etsa!
Ho Bontša Lerato la Rōna ho Eena
19. Ha re bontša lerato ho Jesu, re ne re tla qoba mekhoa efe e le e sa lokelang ho hang?
19 Re ka fana joang ka bopaki ba hore lerato leo re buang ka lona le feta mantsoe feela tjee? Kaha Ntate oa hae, eo Jesu a neng a mo rata, o ne a hanela ho etsoa ha litšoantšo le ho li rapela, ka sebele re ne re ke ke ra isa tlhompho ho Jesu ka ho roala litšoantšo tse joalo ketaneng ea molaleng kapa ra li jara ho theosa le literata. (Exoda 20:4, 5; Johanne 4:24) E ne e ke ke eaba re hlompha Jesu haeba re ne re ea litšebeletsong tsa bolumeli, esita le ho etsa seo ka makhetlo-khetlo ka beke, haeba re ne re sa phele tumellanong le lithuto tsa hae beke kaofela. Jesu o itse: “Ea nang le litaelo tsa ka ’me a li boloka, eo ke eena ea nthatang. Ea nthatang le eena o tla ratoa ke Ntate.”—Johanne 14:21, 23; 15:10.
20. Ke lintho life tse ling tse tla bontša hore na re rata Jesu e le kannete?
20 O ile a re fa litaelo life? Ea pele ke ea ho rapela Molimo oa ’nete, Jehova, eena feela. (Matheu 4:10; Johanne 17:3) Ka lebaka la karolo ea hae morerong oa Molimo, Jesu o ile a boela a ruta hore re tlameha ho sebelisa tumelo ho eena e le Mora oa Molimo le hore re tlameha ho e bontša ka ho qoba mesebetsi e khopo le ka ho tsamaea leseling. (Johanne 3:16-21) O ile a re eletsa hore re batle ’Muso oa Molimo pele le ho loka ha hae, re eteletse oona ka pele ho ho ameha ha rōna ka litlhokahalo tsa nama. (Matheu 6:31-33) O ile a laela hore re ratane joalokaha a re ratile. (Johanne 13:34; 1 Petrose 1:22) ’Me o ile a re laela ho ba lipaki tsa morero oa Molimo, joalokaha le eena e ne e le eona. (Matheu 24:14; 28:19, 20; Tšenolo 3:14) Le hoja le ka mohla li e-s’o bone Jesu, Lipaki tsa Jehova tse ka bang limilione tse hlano kajeno li susumetsoa ke lerato la ’nete ho eena hore li boloke litaelo tseo. Hore ebe ka botsona ha li e-s’o bone Jesu ho hang ha ho fokolise boikemisetso ba tsona ba ho ba tse mamelang. Li hopola seo Morena oa tsona a ileng a se bolella moapostola Thomase: “Kahobane u mpone na u lumetse? Ho thaba ba sa boneng ’me leha ho le joalo ba lumela.”—Johanne 20:29.
21. Re rua molemo joang ka ho ba teng Sehopotsong sa lefu la Kreste se tla tšoaroa selemong see ka Sontaha sa la 23 March?
21 Ho tšeptjoa hore u tla ba har’a bao lefatšeng lohle ba tla bokana Liholong tsa ’Muso tsa Lipaki tsa Jehova ka mor’a hore letsatsi le likele ka Sontaha sa la 23 March, 1997, ho hopola pontšo e khōlō ka ho fetisisa ea lerato la Molimo ho moloko oa batho le ho ikhopotsa lefu la Mora oa hae ea tšepahalang ka ho sa sekisetseng, Jesu Kreste. Se buuoang le ho etsoa ketsahalong eo se lokela ho tebisa lerato bakeng sa Jehova le Mora oa hae ’me ka tsela eo se eketse takatso ea ho boloka litaelo tsa Molimo.—1 Johanne 5:3.
U ne U Tla Araba Joang?
◻ Ba neng ba ngoletsoe buka ea pele ea Petrose ba ile ba tseba Jesu joang le ho mo rata?
◻ U khahloa ke lintho life tse ling tseo Bakreste ba pele ba ileng ba li utloa?
◻ Ke eng e teng moeeng oo Jesu a neng a o bontša e tebisang lerato la hao ho eena?
◻ Ke hobane’ng ha ho itšetleha ha Jesu ka Molimo ho bontšang boikokobetso e le habohlokoa hakaale ho rōna?
◻ Re ka bontša lerato la rōna ho Jesu Kreste joang?
[Litšoantšo tse leqepheng la 16, 17]
Re ikutloa re khahloa ke Jesu ka lebaka la moea oo a neng a o bontša