Ho Lopolleloa Lefatšeng le Lecha la ho Loka

‘Ba tla iketla khotsong e khōlō.’—PESALEME EA 37:11.

 1, 2. (a) Topollo ea Jehova mehleng ea rōna e tla fapana joang le liketsahalo tsa topollo tsa mehleng ea boholo-holo? (b) Jehova o tla tlisa batho ba hae lefatšeng la mofuta ofe?

JEHOVA ke Molimo oa topollo. Mehleng ea boholo-holo, o ile a lopolla batho ba hae ka makhetlo a mangata. Liketsahalo tseo tsa topollo e ne e le tsa nakoana, hobane liketsahalong tseo, ha ho le e ’ngoe eo ho eona Jehova a ileng a liha likahlolo tsa hae ka ho sa feleng khahlanong le lefatše la Satane ka kakaretso. Empa mehleng ea rōna, Jehova o tla tloha a lopolla bahlanka ba hae ka tekanyo e khōlō ka ho fetisisa. Lekhetlong lena o tla felisa moneketsela o mong le o mong oa tsamaiso ea Satane lefatšeng lohle, ’me o tla kenya bahlanka ba hae lefatšeng le lecha la ho loka la ka ho sa feleng.—2 Petrose 2:9; 3:10-13.

² Jehova oa tšepisa: “Ho se ho se hokae, ’me molotsana o tla ba sieo . . . empa ba bonolo ba tla rua lefatše, ba iketle khotsong e kholo.” (Pesaleme ea 37:10, 11) Ka nako e kae? “Ba lokileng ba tla ja lefa la lefatše, ’me ba tla hlola ho lona ka ho sa feleng.” (Pesaleme ea 37:29; Matheu 5:5) Leha ho le joalo, pele seo se etsahala, lefatše lena le tla feta nakong ea matšoenyeho ao le e-song ho ka le feta ho ’ona.

“Matšoenyeho a Maholo”

 3. Jesu o ile a hlalosa “matšoenyeho a maholo” joang?

³ Lefatše lena le ile la kena “matsatsing a ho qetela” a lona ka 1914. (2 Timothea 3:1-5, 13) Hona joale e se e le lilemo tse 83 re keneletse nakong eo ’me re atamela bofelo ba eona ha, joalokaha Jesu a boletse esale pele, ho tla etsahala se latelang: “Ho tla ba le matšoenyeho a maholo ao a kang ’ona a e-s’o be teng ho tloha tšimolohong ea lefatše ho fihlela joale, che, leha e le hore a tla ba teng hape.” (Matheu 24:21) E, a fetang le Ntoa ea II ea Lefatše, moo ho ileng ha e-shoa ba limilione tse 50. Ke nako ea bohlokoa hakaakang e atamelang ka potlako!

 4. Kahlolo ea Molimo e oela “Babylona e Moholo” joang?

⁴ “Matšoenyeho a maholo” a tla tla ka tšohanyetso e makatsang, “ka hora e le ’ngoe.” (Tšenolo 18:10) Ho qhoma ha ’ona ho tla tšoauoa ka hore Molimo a ahlole bolumeli bohle ba bohata, boo Lentsoe la Molimo le bo bitsang “Babylona e Moholo.” (Tšenolo 17:1-6, 15) Tšobotsi e ka sehloohong ea Babylona ea boholo-holo e ne e le bolumeli ba bohata. Babylona ea kajeno e tšoana le molekane oa eona oa boholo-holo ’me e emela ’muso oa lefatše oa bolumeli ba bohata. E ikentse seotsoa ka ho sekisetsa le mekha ea lipolotiki. E tšehelitse lintoa tsa bona ’me e hlohonolofalitse mabotho ka mahlakoreng a loantšanang, ho feletseng ka ho bolaeana ha batho ba bolumeli bo le bong. (Matheu 26:51, 52; 1 Johanne 4:20, 21) E iphapanyelitse mekhoa e silafetseng ea batho ba e khomaretseng ’me e hlorisitse Bakreste ba ’nete.—Tšenolo 18:5, 24.

 5. “Matšoenyeho a maholo” a qala joang?

⁵ “Matšoenyeho a maholo” a qala ha mekha ea lipolotiki ka tšohanyetso e hlasela “Babylona e Moholo.” E ‘tla hloea seotsoa ’me e tla se ripitla le ho se hlobolisa, ’me e tla ja kaofela likarolo tse linama tsa sona ’me e tla se chesa ka ho feletseng ka mollo.’ (Tšenolo 17:16) Ka mor’a moo, batšehetsi ba sona ba pele ba ‘tla lla le ho ikotla ka lebaka la ho se sarelloa.’ (Tšenolo 18:9-19) Empa ke khale bahlanka ba Jehova ba lebeletse sena, ’me ba tla hooa: “Rorisang Jah! . . . kaha o phethahalitse kahlolo holim’a seotsoa se seholo se ileng sa bolisa lefatše ka bohlola ba sona, ’me o phetelelitse mali a makhoba a hae letsohong la sona.”—Tšenolo 19:1, 2.

Bahlanka ba Molimo Baa Hlaseloa

 6, 7. Ke hobane’ng ha bahlanka ba Jehova ba ka ba sebete ha ba hlaseloa “matšoenyehong a maholo”?

⁶ Ha mekha ea lipolotiki e se e felisitse bolumeli ba bohata, e retelehela ho bahlanka ba Jehova. Satane, “Gogo, naheng ea Magogo” ka tsela ea boprofeta, o re: ‘Ke tla futuhela batho bano ba phelang ka khotso, ba ahileng ba iketlile.’ Kaha o nahana hore ba ka hlaseleha habonolo, o ba hlasela ka “sera se sengata . . . , joalo ka leru le khurumetsang lefatše.” (Ezekiele 38:2, 10-16) Batho ba Jehova baa tseba hore tlhaselo ena e tla hlōleha hobane ba tšepa Jehova.

⁷ Ha Faro le mabotho a hae ba ne ba ikutloa hore ba qabeletse bahlanka ba Molimo Leoatleng le Lefubelu, Jehova ka mohlolo o ile a pholosa sechaba sa hae ’me a timetsa mabotho a Egepeta. (Exoda 14:26-28) Nakong ea “matšoenyeho a maholo,” ha lichaba li ikutloa hore li qabeletse batho ba Jehova, o boetse o ba pholosa ka mohlolo: “Tsatsing leo . . . bohale bo tla tlala linko tsa ka. Ke rialo poulelong ea ka le chesehong ea khalefo ea ka.” (Ezekiele 38:18, 19) Tlhōrō ea “matšoenyeho a maholo” e tla be e atametse ka nako eo!

 8. Ke liketsahalo life tse phahametseng matla a tlhaho tse etsahalang pele Jehova a ahlola ba khopo, hona ka phello efe?

⁸ Mothating o itseng ka mor’a hore “matšoenyeho a maholo” a qale, empa pele Jehova a liha kahlolo ea hae lefatšeng lena lohle, liketsahalo tse phahametseng matla a tlhaho li tla etsahala. Hlokomela phello eo li tla ba le eona. “Joale pontšo ea Mora oa motho [Kreste] e tla bonahala leholimong, ’me joale meloko eohle ea lefatše e tla ikotla ka lebaka la ho lla, ’me e tla bona Mora oa motho a tla ka maru a leholimo ka matla le khanya e khōlō.” (Matheu 24:29, 30) “Ho tla ba le lipontšo letsatsing le khoeling le linaleling, . . . ha batho ba ilibana ke tšabo le tebello ea lintho tse tlang holim’a lefatše leo ho ahiloeng ho lona.”—Luka 21:25, 26.

“Topollo ea Lōna ea Atamela”

 9. Ke hobane’ng ha bahlanka ba Jehova ba ka ‘phahamisa lihlooho tsa bona’ ha liketsahalo tse phahametseng matla a tlhaho li etsahala?

⁹ Nakong eona eo, boprofeta ba Luka 21:28 boa sebetsa. Jesu o itse: “Ha lintho tsena li qala ho etsahala, le eme tsoee! ’me le phahamise lihlooho, hobane topollo ea lōna ea atamela.” Lira tsa Molimo li tla be li thothomela ke tšabo hobane li tla tseba hore liketsahalo tse phahametseng matla a tlhaho tse etsahalang li tsoa ho Jehova. Empa bahlanka ba Jehova ba tla thaba hobane ba tla tseba hore topollo ea bona ea atamela.

10. Lentsoe la Molimo le hlalosa tlhōrō ea “matšoenyeho a maholo” joang?

¹⁰ Joale Jehova o ripitla tsamaiso ea Satane: “Ke tla . . . tsekisa [Gogo] ke tšoere lefu la seoa le mali; ke tla mo nesetsa lipula tsa likhohola le majoe a sefako, le mollo le sebabole, ke li nesetse le makhotla a hae . . . ’Me ba tla tseba hoba ke ’na Jehova.” (Ezekiele 38:22, 23) Mesaletsa eohle ea tsamaiso ea Satane ea felisoa. Mokhatlo oohle oa batho ba hlokomolohang Molimo o felisoa ka ho feletseng. Eo ke tlhōrō ea Armagedone ea “matšoenyeho a maholo.”—Jeremia 25:31-33; 2 Bathesalonika 1:6-8; Tšenolo 16:14, 16; 19:11-21.

11. Ke hobane’ng ha bahlanka ba Jehova ba lopolloa “matšoenyehong a maholo”?

¹¹ Ba tla lopolloa “matšoenyehong a maholo” e tla ba barapeli ba Jehova ba limilione lefatšeng ka bophara. Bana ba etsa “bongata bo boholo” bo tsoileng “lichabeng tsohle le melokong eohle le lihlopheng tsohle tsa batho le malemeng ’ohle.” Ke hobane’ng ha ba lopolloa ka tsela e susumetsang tšabo joalo? Hobane ba etsetsa Jehova “tšebeletso e halalelang motšehare le bosiu.” Ka hona ba pholoha bofelo ba lefatše lena ’me ba kenngoa lefatšeng le lecha la ho loka. (Tšenolo 7:9-15) Kahoo, ba paka phethahatso ea tšepiso ea Jehova: “U itšepise ka Jehova, u tiee litseleng tsa hae, ’me o tla u holisa, u tle u je lefa la lefatše; u tla bona le tšenyeho ea ba babe.”—Pesaleme ea 37:34.

Lefatše le Lecha

12. Baphonyohi ba Armagedone ba ka lebella eng?

¹² Eo e tla ba nako e thabisang hakaakang—ea ho felisoa ha bokhopo le ea meso ea mehla e khanyang ka ho fetisisa historing eohle ea batho! (Tšenolo 20:1-4) Baphonyohi ba Armagedone ba tla leboha Jehova hakaakang hore ebe ba kene lefatšeng le lecha, mokhoeng oa bophelo o khanyang, o hloekileng, oo Molimo a o lokiselitseng, lefatšeng le lecha, lefatšeng le tla beng le fetotsoe paradeise! (Luka 23:43) ’Me ba ke ke ba hlola ba e-shoa le ka mohla! (Johanne 11:26) Ka sebele, ho tloha nakong eo ho ea pele, ba tla ba le tebello e tsotehang, e hlollang ea ho phela hafeela Jehova a ntse a phela!

13. Jesu o qalisa bocha mosebetsi oa ho phekola oo a ileng a o qalisa lefatšeng joang?

¹³ Jesu, eo Jehova a mo khethileng e le Morena oa leholimo, o tla ikarabella litlhohonolofatsong tseo ba lopolotsoeng ba tla li thabela. Ha a le lefatšeng, o ile a tutubolla mahlo a lifofu, a bula litsebe tsa lithōlō a ba a phekola “mofuta o mong le o mong oa lefu le mofuta o mong le o mong oa mefokolo.” (Matheu 9:35; 15:30, 31) Lefatšeng le lecha, o tla qalisa mosebetsi oo oa ho phekola empa ka tekanyo ea lefatše lohle. Joaloka Moemeli oa Molimo, o tla phethahatsa tšepiso ena: “[Molimo] o tla hlakola meokho eohle mahlong a bona, ’me lefu ha le sa tla hlola le e-ba teng, leha e le ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.” (Tšenolo 21:4) Ha ho sa tla hlola ho hlokahala hore lingaka li be teng kapa basebetsi ba bongaka!—Esaia 25:8; 33:24.

14. Bahlanka ba Jehova ba seng ba shoele ba tla lopolloa joang?

¹⁴ Ba bang ba tla lopolloa e tla ba bahlanka bao bohle ba Molimo ba tšepahalang ba shoeleng nakong e fetileng. Lefatšeng le lecha, ba tla lopolloa litleneng tsa lebitla. Jehova oa tiisa: “Ho tla ba le tsoho ea ba lokileng hammoho le ba sa lokang.” (Liketso 24:15) Mohlomong, “ba lokileng” ba tla tsosoa pejana ’me ba tlatsetse ho atoloseng Paradeise. E tla ba ho hlollang hakaakang hore baphonyohi ba Armagedone ba utloe liphihlelo tsa ba shoeleng ba tšepahala ba khale-khale, bao joale ba tla beng ba khutletse bophelong!—Johanne 5:28, 29.

15. Hlalosa a mang a maemo a tla latsuoa lefatšeng le lecha.

¹⁵ Bohle ba tla beng ba phela ka nako eo ba tla latsoa seo mopesaleme a ileng a se bolela ka Jehova: “U fuparolla seatla sa hao, u kholisa tse utloang kaofela.” (Pesaleme ea 145:16) Ha ho sa tla hlola ho e-ba le tlala: Lefatše le tla tsosolosetsoa kamanong e leka-lekaneng pakeng tsa batho le tikoloho ea bona ’me le tla beha haholo. (Pesaleme ea 72:16) Ha ho sa tla ba le batho ba hlokang mahae: “Ba tla haha matlo, ba lule ho ’ona,” ’me e mong le e mong o tla lula “ka tlas’a feie ea hae le ka tlas’a morara oa hae, ho se ea ba tšosang.” (Esaia 65:21, 22; Mikea 4:4) Ha ho sa tla hlola ho e-ba le tšabo: Ha ho na ho ba le ntoa, pefo kapa tlōlo ea molao. (Pesaleme ea 46:8, 9; Liproverbia 2:22) “Lefatše kaofela le phomotse, le na le khotso, ho hlajoa lipina tsa nyakallo.”—Esaia 14:7.

16. Ke hobane’ng ha ho loka ho tla tlala lefatše le lecha?

¹⁶ Lefatšeng le lecha, likhopolo tsa Satane tse hasoang ke mecha ea litaba li tla be li tlositsoe. Ho e-na le hoo, “batho ba lefatše ba ithuta ho loka.” (Esaia 26:9; 54:13) Ka thuto ea moea e molemo ea selemo le selemo, “lefatše le tla tlala tsebo ea Jehova, joalo ka ha metsi a aparetse leoatle.” (Esaia 11:9) Mehopolo le liketso tse hahang li tla tlala hohle molokong oa batho. (Bafilippi 4:8) Nahana, mokhatlo oa batho oa lefatše ka bophara o lokolohileng tlōlong ea molao, boiphahamisong, mohonong—lerato la bara ba motho lefatšeng lohle moo tholoana ea moea oa Molimo e hlahisoang ke bohle. Ka sebele, le hona joale litšoaneleho tse joalo li hlaoleloa ke bongata bo boholo.—Bagalata 5:22, 23.

Ka Nako e Telele Hakaale Hobane’ng?

17. Ke hobane’ng ha Jehova a letile nako e telele hakaale pele a felisa bokhopo?

¹⁷ Leha ho le joalo, ke hobane’ng ha Jehova a ile a leta ka nako e telele hakaale hore a tlose bokhopo ’me a lopollele batho ba hae lefatšeng le lecha? Nahana ka se neng se lokela ho finyelloa. Ntho ea bohlokoa ka ho fetisisa ke ho tlosoa ha qoso bobusing ba Jehova, tokelong ea hae ea ho busa. Ka ho lumella hore ho fete nako e lekaneng, o bontšitse ka ho feletseng hore puso ea motho e ka thōko ho bobusi ba hae e hlōlehile ka ho fetisisa. (Jeremia 10:23) Ka hona Jehova joale o na le lebaka le utloahalang la ho nkela puso ea motho sebaka ka puso ea ’Muso oa hae oa leholimo tlas’a Kreste.—Daniele 2:44; Matheu 6:9, 10.

18. Litloholo tsa Abrahama li ne li tla ja naha ea Kanana lefa neng?

¹⁸ Se etsahetseng makholong ana ’ohle a lilemo se tšoana le se ileng sa etsahala mehleng ea Abrahama. Jehova o ile a bolella Abrahama hore litloholo tsa hae li ne li tla ja naha ea Kanana lefa—empa eseng pele ho lilemo tse makholo a mane “hobane ho fihlela moo, bokhopo joa ba-Amore bo [ne] bo e-so ho [phethahale, NW].” (Genese 12:1-5; 15:13-16) Mona lentsoe “ba-Amore” (moloko o ka sehloohong) mohlomong le emela batho ba Kanana ka kakaretso. Ka hona makholo a lilemo a ka bang mane a ne a tla feta pele Jehova a ka nolofalletsa batho ba hae ho hapa Kanana. Ho sa le joalo Jehova o ile a lumella lichaba tsa Kanana ho atisa meloko ea tsona. Ka phello efe?

19, 20. Bakanana ba ile ba hlahisa lichaba tsa mofuta ofe?

¹⁹ Bible Handbook ea Henry H. Halley, e bontša hore Megido, baepolli ba lintho tsa khale ba ile ba fumana lithako tsa tempele ea Ashtarothe, molimotsana eo e neng e le mosali oa Baale. Oa ngola: “Mehato e seng mekae feela ho tloha tempeleng ena ho ne ho e-na le setša sa mabitla, moo ho ileng ha fumanoa linkho tse ngata tsa letsopa, tse tšetseng mesaletsa ea bana ba neng ba ile ba etsoa mahlabelo tempeleng ena . . . Baprofeta ba Baale le Ashtarothe e ne e le babolai ba amohelehang ba bana ba banyenyane.” “Mokhoa o mong o tšabehang e ne e le [seo] ba neng ba se bitsa ‘mahlabelo a motheo.’ Ha ntlo e ne e lokela ho hahuoa, ngoana o ne a ee a etsoe sehlabelo, ’me ’mele oa hae o hahelloe leboteng.”

²⁰ Halley o re: “Borapeli ba Baale, Ashtarothe le melimo e meng ea Bakanana bo ne bo akarelletsa meketjana e lerata eo ho e etsa ho senyang chelete e ngata; litempele tsa bona e ne e le litsi tsa bobe. . . . Bakanana ba ne ba etsa tšebeletso ea borapeli ka ho lemalla boitšoaro bo bobe, . . . le ka hore hamorao ba bolaee bana ba bona ba matsibolo ka sehlōhō, e le sehlabelo melimong eona ena. Ho bonahala hore, ka tekanyo e khōlō, naha ea Kanana e ne e fetohile e batlang e tšoana le Sodoma le Gomora sechabeng sohle. . . . Na mokhoa oa bophelo o litšila tse nyonyehang le o sehlōhō joalo o ne o e-na le tokelo leha e le efe ea ho ba teng haleletsana? . . . Baepolli ba lintho tsa khale ba epollang lithakong tsa metse ea Kanana ba makatsoa ke hore ebe Molimo ha aa ka a ba timetsa kapele ho feta kamoo A ileng a etsa kateng.”—Bapisa le 1 Marena 21:25, 26.

21. Ke ho tšoana hofe ho leng teng pakeng tsa boemo ba Bakanana le ba mehleng ea rōna?

²¹ Bokhopo ba Baamore bo ne bo ‘phethahetse.’ Ka hona joale Jehova o ne a e-na le mabaka a utloahalang a ho ba felisa ka ho feletseng. Se tšoanang ke ’nete kajeno. Lefatše lena le tletse pefo, boitšoaro bo bobe le ho khesa molao oa Molimo. ’Me kaha ka nepo re nyahamisitsoe ke mahlabelo ana a bana a tšosang Kanana ea boholo-holo, ho thoe’ng ka sehlabelo sa bacha ba limilione tse mashome lintoeng tsa lefatše lee, se sebe hōle ho feta ntho leha e le efe ea Kanana? Ka sebele, hona joale Jehova o na le mabaka a utloahalang a ho felisa tsamaiso ena e khopo.

Ho Finyella Ntho e ’Ngoe Hape

22. Mamello ea Jehova e finyella eng mehleng ea rōna?

²² Mamello ea Jehova matsatsing ana a ho qetela e finyella ntho e ’ngoe hape. O lumella nako ea ho bokella le ho ruta bongata bo boholo, boo palo ea bona e seng e le ka holimo ho limilione tse hlano. Tlas’a tataiso ea Jehova, bo entsoe mokhatlo o hlophisitsoeng o tsoelang pele. Banna, basali le bacha ba rupeletsoe ho ruta ba bang linnete tsa Bibele. Ka liboka tsa bona le lingoliloeng tsa Bibele, ba ithuta litsela tsa Molimo tse lerato. (Johanne 13:34, 35; Bakolose 3:14; Baheberu 10:24, 25) Ho phaella moo, ba ntlafatsa tsebo kahong, lielektronikeng, khatisong le likarolong tse ling bakeng sa ho tšehetsa ho boleloa ha ‘litaba tse molemo.’ (Matheu 24:14) Ho ka etsahala hore thuto e joalo le tsebo ea ho haha li tla sebelisoa ka ho pharaletseng lefatšeng le lecha.

23. Ke hobane’ng ha ho phela nakong ee e le tokelo?

²³ E, kajeno Jehova o lokisetsa bahlanka ba hae hore ba fete “matšoenyeho a maholo” ba kene lefatšeng le lecha la ho loka. Joale moo ha ba sa tla tlameha ho loana le Satane le lefatše la hae le khopo, ha ho sa tla ba ho kula, masoabi le lefu. Ka cheseho e khōlō le thabo, batho ba Molimo ba tla tsoela pele ka mosebetsi o thabisang oa ho haha paradeise, moo letsatsi le leng le le leng e tla ba la ‘khotso e khōlō.’ Re na le tokelo e kaakang hore ebe re phela tlhōrōng ena ea mehla, re tseba Jehova le ho mo sebeletsa le ho hlokomela hore haufinyane re tla ‘phahamisa lihlooho tsa rōna hobane topollo ea rōna e atametse’!—Luka 21:28; Pesaleme ea 146:5.

Lipotso Tsa Tlhahlobo

◻ “Matšoenyeho a maholo” ke eng, hona a qala joang?

◻ Ke hobane’ng ha tlhaselo ea Gogo ho bahlanka ba Jehova e tla hlōleha?

◻ “Matšoenyeho a maholo” a fela joang?

◻ Lefatše le lecha le tla fana ka melemo efe e hlollang?

◻ Ke hobane’ng ha Jehova a ile a leta halelele hakaale pele a felisa tsamaiso ee?

[Setšoantšo se leqepheng la 16]

Lefatše lohle le tla fetoloa paradeise