Ba Ile ba Etsa Thato Ea Jehova

Mohlala oa ho Itela le ho Tšepahala

HO MOLEMI e mocha lilemong ea bitsoang Elisha, se ileng sa qala e le letsatsi le tloaelehileng la ho lema se ile sa fella ka ho ba letsatsi la bohlokoahali bophelong ba hae. Ha a ntse a sebetsa tšimong, a sa lebella, Elisha o ile a eteloa ke Elija, moprofeta oa Iseraele ea hlaheletseng. E ka ’na eaba Elisha o ile a ipotsa: ‘Ebe o batla’ng ho ’na?’ Ha aa ka a tlameha ho letela karabo ka nako e telele. Elija o ile a akhela seaparo sa hae sa tšebeletso holim’a Elisha, a bontša hore ka letsatsi le leng Elisha e ne e tla ba mohlahlami oa hae. Elisha ha aa ka a nka pitso ena habobebe. Hang-hang, o ile a siea tšimo ea hae hore e be mohlanka oa Elija.—1 Marena 19:19-21.

Hoo e ka bang lilemo tse tšeletseng hamorao, ho ile ha tla nako ea hore Elija a tsamaee. Ho ’nile ha thoe tlaleho ea ho tsamaea ha hae ke “e ’ngoe ea lipale tse ipiletsang ka ho fetisisa” ka Mangolong a Seheberu.

Elija o Lokisetsa ho Tsamaea

Elija o ne a lakatsa ho etela Bethele, Jeriko le Jordane ka lekhetlo la ho qetela. Sena se ne se tla hloka hore a tsamaee ka maoto lik’hilomithara tse ngata, karolo e ’ngoe ea leeto o ne a tla e tsamaea libakeng tse lithaba tseo ho leng thata ho tsamaea ho tsona. Sebakeng ka seng seo ba neng ba phomola ho sona leetong lena, Elija o ne a khothalletsa Elisha ho sala ho sona. Empa Elisha o ile a tsitlallela ho ba le mong’a hae ho fihlela qetellong.—2 Marena 2:1, 2, 4, 6.

Ha ba le Bethele le Jeriko, ‘bara ba baprofeta’ ba ile ba atamela Elisha.a Ba ile ba mo botsa: “Ana ua tseba hobane Jehova o ea tlosa mong a hao ho uena kajeno na?” O ile a araba: “E, kea tseba; khutsang.”—2 Marena 2:3, 5.

Ka mor’a moo Elija le Elisha ba ile ba ea Nōkeng ea Jordane. Ha ba fihla Jordane, Elija o ile a etsa mohlolo ha bara ba baprofeta ba 50 ba ntse ba shebeletse ba le thōkoana. ‘Elija a nka kobo ea hae, a e tšopha, a phutla metsi, a arohana ka lehare, ’me ba tšela ba babeli moo ho omileng.’—2 Marena 2:8.

Hang ha ba tšetse, Elija o ile a re ho Elisha: “Kōpa see nka u etsetsang sona, ke e-so ho tlosoe ho uena.” Elisha o ile a kōpa “karolo tse peli” tsa moea oa Elija—ke hore, karolo tse peli tseo ka tloaelo e neng e tla ba tse loketseng mora oa letsibolo. Ka sebele, Elisha o ne a hlomphile Elija joalokaha mora oa letsibolo a ne a ka hlompha ntate oa hae. Ho feta moo, o ne a tlotsitsoe hore e be mohlahlami oa Elija e le moprofeta oa Jehova Iseraeleng. Ka hona kōpo ea hae e ne e se ea boithati leha e le e sa lokelang. Leha ho le joalo, ka ho tseba hore ke Jehova feela ea neng a ka fana ka seo a se kōpang, Elija o ile a araba ka boikokobetso: “U kōpile ntho e thata.” Joale o ile a eketsa: “Ha u ka mpona ha ke tlosoa ho uena, ho tla ba joalo ho uena; ha u sa mpone, ho ke ke ha e-ba joalo.”—2 Marena 2:9, 10; Deuteronoma 21:17.

Ha ho pelaelo hore Elisha o ne a ikemiselitse ho ba haufi-ufi le mong’a hae ho feta leha e le neng. Joale ha hlaha “koloi ea mollo le lipere tsa mollo.” Hantle feela ka pel’a mahlo a Elisha a bontšang ho tšoha, Elija o ile a nyolleloa holimo ka sefefo—ka mohlolo a isoa sebakeng se seng.b Elisha o ile a nka seaparo sa Elija sa tšebeletso ’me a khutlela lebōpong la Nōka ea Jordane. O ile a phutla metsi, a re: ‘O kae Jehova, Molimo oa Elija?’ Metsi a ile a arohana, a fana ka bopaki bo hlakileng ba hore Elisha o ne a tšehelitsoe ke Molimo e le mohlahlami oa Elija.—2 Marena 2:11-14.

Seo re Ithutang Sona

Ha a memeloa ho etsa tšebeletso e khethehileng le Elija, hang-hang Elisha o ile a siea tšimo ea hae ho ea sebeletsa moprofeta oa Iseraele ea hlaheletseng. Ka sebele, mesebetsi ea hae e meng e ne e le tlaase, hobane o ile a tsebahala e le ea ‘neng a tšella Elija metsi matsohong.’c (2 Marena 3:11) Leha ho le joalo, Elisha o ile a talima mosebetsi oa hae e le tokelo, ’me ka botšepehi o ile a ba haufi-ufi lehlakoreng la Elija.

Bahlanka ba Molimo ba bangata kajeno ba bontša moea o tšoanang oa boitelo. Ba bang ba siile “masimo” a bona, lintho tseo ba neng ba iphelisa ka tsona, bakeng sa ho ea bolela litaba tse molemo libakeng tse hōle kapa ho ea sebeletsa e le litho tsa lelapa la Bethele. Ba bang ba ile linaheng lisele ho ea sebetsa mererong ea Mokhatlo ea kaho. Ba bang ba amohetse seo ho neng ho ka ’na ha thoe ke mesebetsi e tlaase. Empa, ha ho motho ea sebeletsang Jehova ka thata ea etsang tšebeletso eo e seng ea bohlokoa. Jehova o ananela bohle ba mo sebeletsang ka ho rata, ’me o tla hlohonolofatsa moea oa bona oa ho itela.—Mareka 10:29, 30.

Elisha o ile a khomarela Elija ho isa qetellong. O ile a hana ho furalla moprofeta ea hōlileng esita leha a fuoa monyetla o joalo. Ha ho pelaelo hore kamano e haufi-ufi eo a neng a e hlaoletse le Elija e ile ea etsa hore lerato le joalo le tšepehang e be le thabisang. Kajeno, bahlanka ba Molimo ba leka ka matla ho matlafatsa kamano ea bona le Molimo le ho ba haufi-ufi le balumeli-’moho le bona. Tlamo e haufi ea bonngoe e tla hlohonolofatsoa, hobane Bibele e re ka Jehova: “Ea tšepahalang u tla mo sebetsa ka botšepehi.”—2 Samuele 22:26, NW.

[Mongolo o botlaaseng ba leqephe]