U ’ne U Tsamaee le Molimo

“Le ’ne le tsamaee ka moea ’me ha le na ho phetha takatso ea nama ho hang.”—BAGALATA 5:16.

 1. (a) Enoke o ile a tsamaea le Molimo har’a maemo afe hona ka nako e kae? (b) Noe o ile a tsamaea le Molimo ka nako e kae, ’me o ne a e-na le boikarabelo bofe bo boima?

BIBELE e re bolella hore Enoke o ile a “’na a tsamaea le Molimo oa ’nete.” Ho sa tsotellehe puo e hlohlontšang litsebe le boitšoaro bo bontšang ho se tšabe Molimo tsa batho ba mo pota-potileng, o ile a phehella ho tsamaea le Molimo ho fihlela a e-shoa a le lilemo li 365. (Genese 5:23, 24, NW; Jude 14, 15) Noe le eena o ile a “tsamaea le Molimo.” O ile a etsa sena a ntse a hōlisa bana ba hae, a sebetsana ka katleho le lefatše le tlas’a tšusumetso ea mangeloi a marabele le bana ba ’ona ba mabifi, a bile a ntse a hlokomela makolopetso ’ohle a amehang kahong ea areka e khōlōhali, e neng e le khōlō ho feta sekepe leha e le sefe sa mehleng ea boholo-holo. O ile a tsoela pele ho tsamaea le Molimo ka mor’a Moroallo, esita leha Babele ho ne ho boetse ho e-na le borabele khahlanong le Jehova. Ka sebele, Noe o ile a ’na a tsamaea le Molimo ho fihlela lefung la hae ha a le lilemo li 950.—Genese 6:9; 9:29.

 2. Ho boleloa’ng ka ho “tsamaea le Molimo”?

² Ha Bibele e re banna bana ba tumelo ba ne ba “tsamaea” le Molimo, e sebelisa lentsoe lena ka tsela ea tšoantšetso. E bolela hore Enoke le Noe ba ile ba itšoara ka tsela e neng e fana ka bopaki ba tumelo e matla ho Molimo. Ba ile ba etsa seo Jehova a ba laetseng sona ’me ba lumellanya bophelo ba bona le seo ba neng ba se tseba ka eena litšebelisanong tsa hae le moloko oa batho. (Bapisa le 2 Likronike 7:17.) Ha baa ka ba lumellana ka pelong feela le seo Molimo a neng a se bua le ho se etsa empa ba ile ba sebetsa tumellanong le ntho e ’ngoe le e ’ngoe eo a neng a e hloka—eseng karolo e itseng ea eona feela empa kaofela ha eona ho isa moo ba ka khonang joaloka batho ba sa phethahalang. Ka mohlala, Noe o ne a etsa seo Molimo a neng a mo laela sona hantle. (Genese 6:22) Noe o ne a sa fetele ka nģ’ane ho lintho tseo a li laetsoeng, ’me o ne a sa salle morao ka ho se tsotelle. Joaloka ea neng a thabela botsoalle bo haufi-ufi le Jehova, o ne a ikutloa a lokolohile ho rapela Molimo le ho amohela tataiso ea bomolimo, o ne a tsamaea le Molimo. Na u etsa joalo?

Tsela ea Bophelo e Tsitsitseng

 3. Ke’ng seo e hlileng e leng sa bohlokoa ho bahlanka bohle ba Molimo ba inehetseng le ho kolobetsoa?

³ Hoa thabisa ho bona batho ba qala ho tsamaea le Molimo. Ha ba nka mehato e tiileng tumellanong le thato ea Jehova, ba fana ka bopaki ba tumelo, eo ntle ho eona ho seng ea ka thabisang Molimo. (Baheberu 11:6) Re thaba hakaakang hore ebe selemo ka seng, ka karolelano lilemong tse hlano tse fetileng, batho ba fetang 330 000 ba inehetse ho Jehova ’me ba itlhahisitse bakeng sa kolobetso ea metsing! Empa hape ke habohlokoa ho bona, le ho rōna bohle hore re ’ne re tsamaee le Molimo.—Matheu 24:13; Tšenolo 2:10.

 4. Le hoja ba ile ba bontša tumelo e itseng, ke hobane’ng ha Baiseraele ba bangata ba ileng ba tloha Egepeta ba sa ka ba kena Naheng e Tšepisitsoeng?

⁴ Mehleng ea Moshe, ho ne ho hloka lelapa la Moiseraele tumelo hore le keteke Paseka Egepeta le ho foka mali likoseneng tsa menyako le mosehlelong o holim’a menyako ea matlo a bona. (Exoda 12:1-28) Leha ho le joalo, tumelo ea ba bangata e ile ea thekesela ha ba bona lebotho la ntoa la Faro le atametse haufi ka mor’a bona Leoatleng le Lefubelu. (Exoda 14:9-12) Pesaleme ea 106:12 e bontša hore ha ba se ba tšetse mobung o omileng ba sireletsehile ’me ba bona metsi a bilohang a timetsa lebotho la ntoa la Egepeta, ba ile ba boela ba “lumela mantsoe a [Jehova].” Leha ho le joalo, ka mor’a nako e seng kae ba le lefeelleng, Baiseraele ba ile ba qala ho belaela ka metsi a nooang, lijo le bolebeli. Tlaleho e fosahetseng ea lihloela tse 10 ho tse 12 tse neng li tsoa Naheng e Tšepisitsoeng e ile ea ba tšosa. Tlas’a maemo ao, joalokaha Pesaleme ea 106:24 e bolela, “ha ba ka ba lumela lipallo tsa [Molimo].” Ba ne ba batla ho khutlela Egepeta. (Numere 14:1-4) Tumelo efe kapa efe eo ba neng ba e-na le eona e ne e totobala feela ha ba bona lipontšo tse itseng tse fetang tse tloaelehileng tsa matla a bomolimo. Ha baa ka ba tsoela pele ho tsamaea le Molimo. Ka lebaka leo, Baiseraele bao ha baa ka ba kena Naheng e Tšepisitsoeng.—Pesaleme ea 95:10, 11.

 5. Bakorinthe ba Bobeli 13:5 le Liproverbia 3:5, 6 li amana joang le ho tsamaea le Molimo?

⁵ Bibele ea re eletsa: “Le ’ne le inonye hore na le tumelong, le ’ne le leke seo lōna ka bolōna le leng sona.” (2 Bakorinthe 13:5) Ho ba “tumelong” ho bolela ho khomarela litumelong tsa Bokreste. Sena ke sa bohlokoahali e le hore re ka atleha ho tsamaeeng le Molimo ka matsatsi ’ohle a bophelo ba rōna. E le hore re ka tsamaea le Molimo, re lokela ho boela re sebelisa tumelo, re tšepe Jehova ka ho feletseng. (Liproverbia 3:5, 6) Ho na le maraba a mangata le lifi tse ka tšoasang ba hlōlehang ho etsa joalo. Tse ling tsa tsona ke life?

Qoba Leraba la ho Itšepa

 6. Bakreste bohle ba tseba eng ka bohlola le bofebe, ’me ba ikutloa joang ka libe tsee?

⁶ E mong le e mong ea ithutileng Bibele, a nehetse bophelo ba hae ho Jehova, ’me a kolobelitsoe o tseba hore Lentsoe la Molimo le nyatsa bohlola le bofebe. (1 Bathesalonika 4:1-3; Baheberu 13:4) Ba joalo ba lumela hore sena se nepahetse. Ba rera ho phela tumellanong le sona. Empa, boitšoaro bo bobe ba botona le botšehali e ntse e e-ba le leng la maraba a Satane a atlehang ka ho fetisisa. Hobane’ng?

 7. Mahoatateng a Moabe, banna ba Baiseraele ba ile ba ameha joang boitšoarong boo ba neng ba tseba hore bo fosahetse?

⁷ Taba ea pele, ba amehang boitšoarong bo bobe joalo e ka ’na eaba ba ne ba sa rera ho etsa seo. Mohlomong ho ne ho le joalo tabeng ea Baiseraele Mahoatateng a Moabe. Ho banna ba Baiseraele ba neng ba khathetse ke bophelo lefeelleng, basali ba Moabe le ba Midiane ba neng ba ba hohela e ka ’na eaba pele ba ne ba bonahala ba e-na le botsoalle kapa ba amohela baeti ka mofuthu. Empa ho ile ha etsahala eng ha Baiseraele ba amohela memo ea ho ba metsoalle ea batho ba neng ba sebeletsa Baale ba sa sebeletse Jehova, batho ba neng ba lumella bana ba bona ba banana (esita le ba malapa a hlaheletseng) ho ba le likamano tsa botona le botšehali le banna ba sa ba nyalang? Ha banna ba tsoang kampong ea Baiseraele ba qala ho talima botsoalle bo joalo e le bo lakatsehang, ba ile ba hoheloa hore ba etse lintho tseo ba neng ba tseba hore li fosahetse, ’me sena sa lebisa lefung la bona.—Numere 22:1; 25:1-15; 31:16; Tšenolo 2:14.

 8. Mehleng ea rōna, ke’ng se ka lebisang Mokreste boitšoarong bo bobe ba botona le botšehali?

⁸ Ke’ng se ka etsang hore motho a oele lerabeng le tšoanang mehleng ea rōna? Le hoja e ka ’na eaba o tseba ho teba ha boitšoaro bo bobe ba botona le botšehali, haeba hape a sa utloisise kotsi ea ho itšepa, a ka ’na a itumella ho oela boemong boo ho bona khoheli ea ho etsa bobe e ka ’nang ea imela monahano oa hae.—Liproverbia 7:6-9, 21, 22; 14:16.

 9. Ke litemoso life tsa Mangolo tse ka re sireletsang boitšoarong bo bobe?

⁹ Ka tsela e tobileng Lentsoe la Molimo le re lemosa hore re se ke ra khelohela ho nahaneng hore re matla hoo litloaelano tse mpe li ke keng tsa re senya. Seo se akarelletsa ho shebella mananeo a thelevishene a bontšang bophelo ba batho ba itšoereng hampe le ho bala limakasine tse tsosang litakatso tsa boitšoaro bo bobe. (1 Bakorinthe 10:11, 12; 15:33) Esita le botsoalle pakeng tsa balumeli-’moho maemong a fosahetseng bo ka lebisa mathateng a tebileng. Khoheli e pakeng tsa batho ba bong bo sa tšoaneng e matla. Ka lebaka leo, ka kameho e lerato mokhatlo o hlophisitsoeng oa Jehova o lemositse ka ho ba mong le ho ba moo ho siretseng le motho oa bong bo sa tšoaneng le ba rōna eo re sa nyalanang le eena kapa eo e seng setho sa lelapa. E le hore re ka tsoela pele ho tsamaea le Molimo, ho hlokahala hore re qobe leraba la ho itšepa ’me re ele hloko keletso e lemosang eo a re fang eona.—Pesaleme ea 85:8.

U se ke Ua Lumella Hore ho Tšaba Batho ho U Laole

10. Ke ka tsela efe ho “tšaba batho” e leng leraba?

¹⁰ Kotsi e ’ngoe e qolloa ho Liproverbia 29:25, e reng: “Ho tšaba batho ho isa [lerabeng, NW].” Hangata leraba la setsomi le akarelletsa sekhoketsane se tieang molaleng ha se huloa kapa lithapo tse harelang maoto a phoofolo. (Jobo 18:8-11) Ka ho tšoanang ho tšaba batho ho ka sitisa motho hore a be le matla a ho bua ka bolokolohi le ho itšoara ka tsela e thabisang Molimo. Takatso ea ho khahlisa ba bang ke ntho e tloaelehileng, ’me ho se natse seo batho ba bang ba se nahanang hase Bokreste. Empa ho hlokahala ho leka-lekana. Ha kameho ka hore na batho ba bang ba ka arabela joang e etsa hore motho a etse seo Molimo a se hanelang kapa a lese ho etsa seo Lentsoe la Molimo le se laelang, motho eo o tšoasitsoe.

11. (a) Ke’ng se sireletsang motho ho lumelleng hore ho tšaba batho ho mo laole? (b) Ke joang Jehova a thusitseng bahlanka ba hae ba neng ba loantšana le ho tšaba batho?

¹¹ Tšireletso lerabeng le joalo ha e fumanoe sebōpehong sa motho sa tlhaho, empa e fumanoa ka ho ‘tšepa Jehova.’ (Liproverbia 29:25b) Ka ho tšepa Molimo, esita le motho ea lihlong ka tlhaho a ka ipaka a le sebete a bile a tiile. Hafeela re pota-potiloe ke likhatello tsa tsamaiso ena ea bosatane ea lintho, ho tla hlokahala hore re itebele tabeng ea ho tšaba batho ho tšoasang. Le hoja moprofeta Elija a ne a e-na le tlaleho e ntle ea tšebeletso e bontšang sebete, ha Jezebele a ne a mo tšosa ka hore o tla mo bolaea, o ile a baleha ka lebaka la tšabo. (1 Marena 19:2-18) Tlas’a khatello, moapostola Petrose ka lebaka la tšabo o ile a latola hore o tseba Jesu Kreste, ’me lilemo hamorao o ile a lumella tšabo ho etsa hore a itšoare ka tsela e khahlanong le tumelo. (Mareka 14:66-71; Bagalata 2:11, 12) Leha ho le joalo, Elija le Petrose ba ile ba amohela thuso ea moea ’me, ba ntse ba tšepile Jehova, ba tsoela pele ho sebeletsa Molimo ka tsela e amohelehang.

12. Ke mehlala efe ea kajeno e bontšang kamoo batho ba ’nileng ba thusoa kateng ho qoba ho lumella tšabo ho ba tlohelisa ho thabisa Molimo?

¹² Mehleng ea rōna bahlanka ba Jehova ba bangata le bona ba ithutile tsela ea ho hlōla tšabo e tšoasang. Guyana, mocha oa Paki o ile a lumela: “Ntoa ea ho hana khatello ea lithaka e matla sekolong.” Empa o ile a eketsa: “Tumelo ea ka ho Jehova le eona e matla.” Ha mosuoe oa hae a ne a mo soma ka pel’a tlelase eohle ka lebaka la tumelo ea hae, o ile a rapela Jehova a khutsitse. Hamorao, ka masene o ile a pakela mosuoe enoa lekunutung. Ha a ne a etela motseng oa habo Benin, mohlankana e mong ea neng a ithuta seo Jehova a se hlokang o ile a ikemisetsa ho lahla setšoantšo se rapeloang seo ntate oa hae a neng a mo etselitse sona. Mohlankana enoa o ne a tseba hore setšoantšo sena se ne se sa phele, ’me o ne a sa se tšabe, empa o ne a boetse a lemoha hore batho ba motsana oo ba halefileng ba ka ’na ba batla ho mo bolaea. O ile a rapela Jehova, joale bosiu o ile a nka setšoantšo sena se rapeloang, a ea le sona ka morung ’me a se lahla. (Bapisa le Baahloli 6:27-31.) Ha mosali e mong oa Dominican Republic a ne a qala ho sebeletsa Jehova, monna oa hae o ne a batla hore a khethe pakeng tsa hae le Jehova. Monna enoa o ile a mo tšosa ka hore o tla mo hlala. Na tšabo e ne e tla etsa hore a furalle tumelo ea hae? O ile a araba: “Haeba ho ne ho ameha ho se tšepahale boitšoarong, ke ne ke tla hlajoa ke lihlong, empa nke ke ka hlajoa ke lihlong ka lebaka la ho sebeletsa Jehova Molimo!” O ile a ’na a tsamaea le Molimo, ’me ka mor’a nako e itseng monna oa hae o ile a kopanela le eena ho etseng thato ea Jehova. Ka ho tšepa Ntate oa rōna oa leholimo ka ho feletseng, le rōna re ka qoba ho lumella tšabo ea motho ho re etsa hore re tlohele ho etsa seo re tsebang hore se tla thabisa Jehova.

Qoba ho Nyenyefatsa Keletso

13. Ho 1 Timothea 6:9, re lemosoa ka leraba lefe?

¹³ Le hoja maraba a mang a sebelisoang ke litsomi a reretsoe ho tšoasa phoofolo efe kapa efe e lekang ho feta sebakeng se itseng, maraba a mang a hohela liphoofolo ka ntho e sebelisoang ho cheha e ipiletsang ka mokhoa o thetsang. Ho batho ba bangata, maruo a joalo. (Matheu 13:22) Ho 1 Timothea 6:8, 9, Bibele e re khothalletsa hore re khotsofalle lintho tsa ho phela le liaparo. Ebe ea lemosa: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong.”

14. (a) Ke’ng se ka ’nang sa thibela motho ho nka ka ho teba keletso ea ho khotsofalla lintho tsa ho phela le liaparo? (b) Tlhaloso e fosahetseng ea maruo e ka etsa hore motho a nyenyefatse temoso e ho 1 Timothea 6:9 joang? (c) Ke ka tsela efe “takatso ea mahlo” e ka foufaletsang ba bang leraba le ba letetseng?

¹⁴ Ho sa tsotellehe temoso ena, ba bangata baa tšoasoa kahobane ba sa sebelise keletso ena ho bona. Hobane’ng? Na ho ka etsahala hore ebe boikhohomoso bo ba susumelletsa hore ba tsitlallele ho khomarela mokhoa oa bophelo o hlokang se fetang lintho “tsa ho phela le liaparo” tseo Bibele e re phehellang hore re li khotsofalle? Na mohlomong ba nyenyefatsa temoso ea Bibele hobane ba hlalosa maruo ho latela seo batho ba ruileng haholo ba nang le sona? Bibele e mpa e bapisa boikemisetso ba ho rua le ho khotsofalla lintho tsa ho phela le liaparo. (Bapisa le Baheberu 13:5.) Na “takatso ea mahlo”—takatso ea ho ba le lintho tseo ba li bonang, esita le ka ho tela lipakane tsa moea—e etsa hore ba qhelele lithahasello tsa borapeli ba ’nete ka thōko? (1 Johanne 2:15-17; Haggai 1:2-8) Ba thabile hakaakang bao ka sebele ba elang hloko keletso ea Bibele ’me ba tsamaea le Molimo ka ho etsa tšebeletso ea Jehova ntho e ka sehloohong eo ba amehileng ka eona bophelong ba bona!

Ho Sebetsana ka Katleho le Matšoenyeho a Bophelo

15. Ke maemo afe ao ka ho utloahalang a bakelang batho ba Jehova ba bangata matšoenyeho, ’me re lokela ho falimehela leraba lefe ha re le tlas’a khatello e joalo?

¹⁵ Se tloaelehileng ho feta boikemisetso ba ho rua ke ho ameha haholo ka ho fumana litlhoko tsa bophelo. Bongata ba bahlanka ba Jehova ba phela ka matlotlo a seng makae feela. Ba sebetsa ka thata ka lihora tse ngata e le hore ba ka fumana esita le liaparo tse hlokahalang, sebaka seo lelapa la bona le robalang ho sona bosiu le bonyane lijo tse itseng bakeng sa letsatsi. Ba bang ba loana le mathata a bakoang ke ho kula kapa ho hōla ha bona kapa ha litho tsa lelapa. Ho ne ho tla ba bonolo hakaakang ho lumella maemo a joalo ho sitisa lithahasello tsa moea bophelong ba bona!—Matheu 13:22.

16. Jehova o re thusa joang hore re sebetsane ka katleho le likhatello tsa bophelo?

¹⁶ Ka lerato, Jehova o re bolella ka phomolo e tla thabeloa tlas’a ’Muso oa Bomesia. (Pesaleme ea 72:1-4, 16; Esaia 25:7, 8) O boetse o re thusa ho sebetsana ka katleho le likhatello tsa bophelo hona joale ka ho re eletsa mabapi le kamoo re ka hlophisang lintho tsa bohlokoa. (Matheu 4:4; 6:25-34) Ka tlaleho ea kamoo a ileng a thusa bahlanka ba hae linakong tse fetileng, Jehova oa re kholisa. (Jeremia 37:21; Jakobo 5:11) O re matlafatsa ka tsebo ea hore, ho sa tsotellehe mahlomola leha e le afe a re tlelang, lerato la hae bakeng sa bahlanka ba hae ba tšepahalang le lula le tsitsitse. (Baroma 8:35-39) Ho ba tšepang Jehova, o re: “Ha nka ke ka u tlohela leha e le hore ka mokhoa leha e le ofe nka u furalla.”—Baheberu 13:5.

17. Fana ka mehlala ea kamoo batho ba mahlomoleng a feteletseng ba ’nileng ba khona ho tsoela pele ho tsamaea le Molimo.

¹⁷ Ba matlafalitsoe ke tsebo ena, Bakreste ba ’nete ba tsoela pele ho tsamaea le Molimo ho e-na le ho khelohela mekhoeng ea lefatše. Filosofi ea lefatše e tloaelehileng har’a mafutsana linaheng tse ngata ke hore ho nka lintho tsa motho ea nang le tse ngata e le hore u fepe lelapa la hao hase ho utsoa. Empa ba tsamaeang ka tumelo ba hana pono eo. Ba nka ho amoheloa ke Molimo e le habohlokoa ho feta lintho tsohle tse ling ’me ba lebeletse hore a putse boitšoaro ba bona bo bontšang botšepehi. (Liproverbia 30:8, 9; 1 Bakorinthe 10:13; Baheberu 13:18) Mohlolohali e mong oa India o ile a hlokomela hore ho ikemisetsa ho sebetsa hammoho le tsebo ea mosebetsi li ile tsa mo thusa ho sebetsana le maemo ka katleho. Ho e-na le ho hlonamela boemo boo a neng a le ho bona bophelong, o ile a lemoha hore ha a etelletsa ’Muso oa Molimo le ho loka ha Hae pele bophelong ba hae, Jehova o ne a tla hlohonolofatsa boiteko ba hae ba ho fumana lintho tse hlokahalang bakeng sa hae le mora oa hae. (Matheu 6:33, 34) Ba likete tse ngata ho pota lefatše ba bontša hore, ho sa tsotellehe mahlomola ao ba ka ’nang ba thulana le ’ona, Jehova ke setšabelo sa bona le qhobosheane ea bona. (Pesaleme ea 91:2) Na ke ’nete ka uena?

18. Senotlolo sa ho qoba maraba a lefatše la Satane ke sefe?

¹⁸ Hafeela re ntse re phela tsamaisong ena ea lintho, ho tla ba le maraba ao re lokelang ho a qoba. (1 Johanne 5:19) Bibele ea a qolla ’me e re bontša kamoo re ka a qobang kateng. Bao ka sebele ba ratang Jehova ’me ba e-na le tšabo e loketseng ea ho mo halefisa ba ka sebetsana ka katleho le maraba a joalo. Haeba ba ‘ntse ba tsamaea ka moea,’ ba ke ke ba inehela mekhoeng ea lefatše. (Bagalata 5:16-25) Bakeng sa bohle bao ka sebele ba phelang tumellanong le kamano ea bona le Jehova, ho na le tebello e hlollang ea ho tsamaea le Molimo, ho thabela botsoalle bo haufi-ufi le eena ka ho sa feleng.—Pesaleme ea 25:14.

U ka Hlalosa Joang?

◻ Ho itšepa e ka ba leraba joang?

◻ Ke’ng se ka re sireletsang hore re se ke ra laoloa ke ho tšaba batho?

◻ Ke’ng se ka ’nang sa etsa hore re hlōlehe ho sebelisa keletso e mabapi le kotsi ea ho hahamalla maruo?

◻ Ke’ng se ka re nolofalletsang ho qoba leraba la matšoenyeho a bophelo?

[Setšoantšo se leqepheng la 16, 17]

Ba bangata ba tsoela pele ho tsamaea le Molimo bophelong bohle