Ho Phela le ho Bolela Tikolohong e Haufi le Sebaka se Foqohang Seretse se Chesang

“KE PHIHLELO e tšosang. E ka tšoana hantle le bofelo ba lefatše boo Bibele e buang ka bona. Re lokela ho lula re falimehile ’me re be boemong bo botle ka pel’a Jehova Molimo nako e ’ngoe le e ’ngoe.” Ao ke mantsoe a Víctor eo e leng e mong oa Lipaki tsa Jehova, ha a ne a fana ka phihlelo ea hae ea ho lula haufi haholo le Popocatépetl e foqohang seretse se chesang, e tloaetseng ho bitsoa Popo, Mexico.

Sebaka sena se sheshang, se foqohang seretse se chesang, ho ’nile ha buuoa ka sona litabeng tsa machaba ho tloha ka 1994.a Ba boholong ba ’nile ba etsa qeto ea hore ntho e ’ngoe le e ’ngoe e tikolohong ea lik’hilomithara tse 30 ho tloha mokoting oo seretse se chesang se foqohang ho oona, e sebakeng se kotsi-kotsi. Karolo e ka boroa ho sebaka seo se foqohang seretse se chesang e kotsing le ho feta hobane mokoti oa sona o sekametse ka teng ’me ho na le likhohlo tse ngata tse tebileng tseo seretse se chesang se ka tšolohang le teng ha se tsoa mokoting oo.

Ha ho pelaelo hore ba bangata baa ipotsa hore na ho tla etsahala eng ka Mexico City haeba sebaka seo se ka ba le ho foqoha ho hoholo ha seretse se chesang. Na motse oo o kotsing? Joale ho boetse ho na le batho bohle ba seterekeng sa Morelos, karolong e ka boroa ho sebaka seo se foqohang seretse se chesang. Na le bohle ba sebakeng seo ba kotsing? ’Me ho joang ho lula tikolohong e haufi le sebaka se foqohang seretse se chesang, ho sa tsejoe se ka etsahalang letsatsing leha e le lefe?

Tšokelo ea ho Foqoha ha Seretse se Chesang

Setsi sa khoebo Mexico City se lik’hilomithara tse ka bang 70 ka leboea-bophirimela ho Popocatépetl, le hoja ho e-na le metse e meng e bohaufi ba lik’hilomithara tse 40. Ha e le hantle, motse-moholo ka kakaretso, ’moho le baahi ba oona ba limilione tse 20, o sebakeng se seng kotsing. Leha ho le joalo, ho itšetlehile ka lehlakore leo moea o fokelang ho lona, sebaka sena se ka ameha haeba ho tsoa molora o mongata ha seretse se chesang se foqoha.

Hangata liphello tsa molora oa seretse se chesang li ba mpe haholo lehlakoreng le ka bochabela ho sebaka se foqohang seretse se chesang. Tikoloho ena e akarelletsa motse oa Puebla le metse e meng e mengata e menyenyane le litoropo, ka batho ba ka bang 200 000 ba lulang sebakeng seo se kotsi-kotsi. Ka Sontaha sa la 11 May, 1997, sebaka se foqohang seretse se chesang se ile sa butsoella moeeng lithane tsa molora ’me sa o hasanya hohle sebakeng sena, oa ba oa fihla le seterekeng sa Veracruz se bohōle ba lik’hilomithara tse ka holimo ho 300, ka bochabela. Sebakeng se ka boroa ho se foqohang seretse se chesang, seterekeng sa Morelos, ho na le metse e mengata le litoropo tseo baahi bohle ba tsona ba ka bang 40 000 e ka ’nang eaba le bona ba kotsing e khōlō.

Lipaki tsa Jehova li phela ka har’a maemo ana le ho sebetsa ho ’ona. Mexico City, ho na le tse ka holimo ho 90 000 liphuthehong tse ka bang 1700. Lekala la Mokhatlo oa Watch Tower le sebakeng se ka thōko ho Mexico City, ka leboea-bochabela, lik’hilomithara tse ka bang 100 ho tloha sebakeng se foqohang seretse se chesang. Ho na le baithaopi ba ka holimo ho 800 ba sebetsang lekaleng lena, ntle ho baithaopi ba 500 ba sebetsang mosebetsing o moholo oa kaho. Kaofela ha bona ba thōko ho sebaka se kotsi.

Seterekeng sa Morelos, ho na le liphutheho tse ka bang 50 tsa Lipaki tsa Jehova tse nang le bahoeletsi ba ’Muso ba ka holimo ho 2000. Tse ling tsa liphutheho tsena, tse sebakeng sa Tetela del Volcán le Hueyapan, li haufi le mokoti oo seretse se foqohang ho oona ka lik’hilomithara tse ka bang 20. Ho phaella moo, ho ea ka bochabela seterekeng sa Puebla, ho na le liphutheho tse nang le bahoeletsi ba ka bang 600 ba phelang hoo e ka bang lik’hilomithara tse 20 ho ea ho tse 30 haufi le sebaka sena se foqohang seretse se chesang. Ka sebele, e ka ’na eaba liphutheho tsena li kotsing e khōlō.

Lipaki Tsa Jehova li Lula li le Mafolofolo

Ho sa tsotellehe tšokelo eo e lulang e le teng, Lipaki tsa Jehova ha lia emisa mosebetsi oa tsona oa ho bolela sebakeng sena. Li boetse li tsamaisana le kemiso ea tsona ea liboka tsa Bokreste, tse li fang boikutlo ba bonngoe le tšepo tlas’a maemo ana a sa rateheng. (Baheberu 10:24, 25) Tlaleho e tsoang phuthehong e ’ngoe ea tsona ea bolela: “Ho bile le phetoho e ikhethang mokhoeng oo batho ba arabelang ka oona mabapi le litaba tse molemo tsa ’Muso. Ka mohlala, motsaneng o mong o monyenyane, batho ba 18 ba sa tsoa amohela thuto ea lehae ea Bibele.”

Phutheho e ’ngoe e haufi le sebaka se foqohang seretse se chesang ka lik’hilomithara tse 20 ea tlaleha: “Keketseho e bile e ikhethang. Phutheho ena e thehiloe ka November 1996. Likhoeling tse tšeletseng tse latelang, batho ba 10 ba ile ba tšoaneleha bakeng sa ho kopanela tšebeletsong ea tšimo. Bahoeletsi ba bang ba lula hoo e ka bang lik’hilomithara tse 20 feela ho tloha mokoting oo seretse se foqohang ho oona. Ho tšoaroa liboka tsa Bokreste moo, ’me ho ba le batho ba ka bang 40 ho tsona.”

Magdalena ea lulang San Agustín Ixtahuixtla, Puebla, lik’hilomithara tse ka bang 25 feela ho tloha sebakeng se foqohang seretse se chesang, o ’nile a lula a le mafolofolo ho khanneng lithuto tsa Bibele. O pheta se ileng sa etsahala ka mor’a hore ho be le ho foqoha ho hong ho hoholo ha seretse se chesang.

“Re ile ra hlokomelisoa hore re lokela ho tloha mahaeng a rōna, e leng hoo re ileng ra ho etsa ho se ho ntse ho tšoloha molora. Ho sa tsotellehe boemo boo bo neng bo potlakile, ke ile ka nahana ka lelapa la ha Dorado leo ke neng ke ithuta Bibele le lona. ’Na hammoho le bara ba bang babo rōna re ile ra ea lelapeng la Dorado ho ea ba thusa hore ba balehele sebakeng se sireletsehileng. Motseng o haufi oa Puebla, komiti ea liphallelo ea Lipaki tsa Jehova e ne e se e entse litokisetso. Lelapa leo la Dorado le ile la hlolloa haholo ke tsela eo kaofela ha rōna re neng re tšoeroe ka eona. Re ne re e-na le bolulo libakeng tse fapaneng tseo re neng re ile ra li lokisetsoa esale pele ke barab’abo rōna ba Bakreste. Le hoja re ne re le hōle le mahae a rōna, ha ho seo re neng re se hloka. Lelapa lena le ne le kile la e-ba teng libokeng tse ling Holong ea ’Muso, empa le ile la makatsoa ke lerato leo le ileng la le bontšoa ke barab’abo rōna ba neng ba qala ho le bona. Libeke tse ’maloa ka mor’a hore re khutlele malapeng a rōna, lelapa lena le ile la qala ho tla libokeng tsohle kamehla. Ka potlako, le ile la tšoaneleha ho ba bahoeletsi ba litaba tse molemo. Bobeli ba bona ba kolobelitsoe hona joale. Ba ’nile ba sebeletsa e le bo-pula-maliboho ba thusang ka likhoeli tse ’maloa ’me ba rera ho kenela tšebeletso ea bopula-maliboho ba kamehla.”

Martha, moroetsana ea lilemo li 20 ea lulang lik’hilomithara tse 21 ho tloha mokoting oo seretse se chesang se foqohang ho oona, ha aa ka a lumella bokooa hore bo mo sitise ho sebelisa ha molemo monyetla o mong le o mong oa ho bolela. O ile a ithuta ’nete lilemong tse tharo tse fetileng ha sebaka seo se ne se boetse se foqoha seretse se chesang. Ho e-na le hore a sebelise setulo sa likooa, se ka mo sokolisang sebakeng se moepa seo a lulang ho sona, o palama tonki bakeng sa ho kopanela mosebetsing oa ho bolela. O boetse o palama tonki ha a e-ea libokeng. Kaha Martha o itšetlehile ka thuso ea barali babo rōna phuthehong bakeng sa ho palama le ho theoha tonki, o leboha Jehova ka ho teba ka hore ebe ke karolo ea mokhatlo o lerato oa bara ba motho. Khoeli e ’ngoe le e ’ngoe o qeta lihora tse ka holimo ho 15 tšebeletsong.

Libakeng tsena tse ka thōko, hangata Lipaki tsa Jehova li tobana le khatello e hlahang ho baahisani ba tsona ea hore li kopanele le bona ho ketekeng matsatsi a phomolo ea bolumeli. Tulcingo, motse o sebakeng se ka bang lik’hilomithara tse 20 haufi le sebaka se foqohang seretse se chesang, monna e mong o ile a fuoa mosebetsi oa hore a etele Lipaki bakeng sa ho bokella koleke ea mekete eo. Barab’abo rōna ba ile ba mo hlalosetsa ka mamello hore na ke hobane’ng ha ba ke ke ba kopanela matsatsing a joalo a phomolo ea bolumeli. Monna eo o ne a pheheletse boitekong ba hae ba ho fumana chelete ho barab’abo rōna hoo a ileng a qala ho kopanela le bona, a tseba tse ling tsa lintho tseo ba li lumelang. O ile a thabela ho fumana likarabo tsa lipotso tsa hae Bibeleng ea hae ea K’hatholike. Eena, ’moho le mosali oa hae le morali oa bona, ba ’nile ba kopanela libokeng kamehla selemo sohle ’me o boletse takatso ea hae ea ho ba mohoeletsi oa litaba tse molemo.

U ka ba ea Itokisitseng Joang?

Litsebi tsa ho foqoha ha seretse se chesang li tsoela pele ka litlhahlobo tsa tsona ’me li fana ka litlaleho tse molaong ka tšokelo ea Popocatépetl, empa ha ho se hlileng se tsebang hore na ho tla etsahala eng, hona neng. Ho latela mecha ea litaba le batho ba lulang haufi le moo, seretse se chesang se ka ’na sa foqoha neng kapa neng. Tšokelo ena ke ea sebele. Ke ’nete hore ba boholong ba amehile haholo ’me ba batla ho etsa ntho e ’ngoe le e ’ngoe eo ba ka e khonang ho itokisetsa boemo ba tšohanyetso. Empa hoa utloahala hore ba lokela ho ba hlokolosi tabeng ea ho fana ka temoso, kaha ha ba batle ho etsa hore letšoele le falle haeba ho se kotsi e tlohang e etsahala. Joale, ke eng seo motho a lokelang ho se etsa?

Maele a Bibele a re: “Motho ea pelo-keletsi o bonela kotsi pele, ’me oa itšireletsa; empa ea leebelo eena o ea pele, ’me o oela tsietsing.” (Liproverbia 22:3) Kahoo, tsela e bohlale ke ho nka mehato e hlokahalang bakeng sa ho etsa bonnete ba hore motho o sireletsehile nakong ena ea ha monyetla o sa bulehile, ho e-na le ‘ho ea pele’ joalokaha eka ha ho letho le tla ke le etsahale, ho ntse ho emetsoe ho bona se tla etsahala ha kotsi eo e tšabehang ea tlhaho e fela e etsahala. Ke kamoo Lipaki tsa Jehova tse sebakeng sena li ikutloang kateng tabeng ena.

Haufinyane tjena, baemeli ba tsoang ofising ea lekala ea Mokhatlo oa Watch Tower ba ile ba kopana Puebla le balebeli ba tsamaeang, bao e leng bona ba sebelisanang haufi-ufi le liphutheho tse seterekeng se kotsing. Ho ile ha etsoa litokisetso tsa hore balebeli ba tsamaeang le litho tsa komiti ea liphallelo ba etele lelapa le leng le le leng le lulang lik’hilomithara tse 25 haufi le mokoti oo seretse se chesang se foqohang ho oona. Malapa ana a ile a thusoa hore a nahanele ho falla sebakeng seo se kotsi pele ho ka qhoma boemo bo tšabehang ba tšohanyetso. Ho ile ha lokisetsoa lipalangoang le libaka tsa bolulo e le hore batho ba 1500 ba ka fallela motseng oa Puebla. Malapa a mang a ile a ea lula le beng ka ’ona metseng e meng.

Temoso ka Tekanyo e Khōloanyane

Ho ntša ha Popocatépetl mosi, mollo le melumo, ke litemoso tse hlakileng tsa hore seretse se chesang se haufi le ho foqoha. Bohle ba ratang ho pholoha ba lokela ho mamela litemoso tse fanoang ke ba boholong ’me ba nke khato e loketseng. Lipaki tsa Jehova tse sebakeng se haufi le sena se foqohang seretse se chesang li lula li falimehile ho etsa bonnete ba hore li sireletsehile le ho thusa ba bang hore ba bone kotsi ’me ba etse ho itseng ka eona pele ba siuoa ke nako.

Lipaki tsa Jehova li boetse li falimehela liketsahalo tsa lefatše haholoanyane ho ea kamoo boprofeta ba Bibele bo li boletseng. Lintoa, litšisinyeho tsa lefatše, litlala, mafu le bokebekoa li na le seo li se bolelang, joalokaha lintho tse etsahalang sebakeng sena se foqohang seretse se chesang ho na le seo li se bolelang. Ke karolo ea pontšo e nang le likarolo tse ngata eo Jesu Kreste a ileng a bua ka eona esale pele e le e neng e tla tšoaea “qetello ea tsamaiso [ena] ea lintho.” Le hoja ho se ea tsebang hantle hore na bofelo boo bo tla tla neng, ha ho pelaelo hore boa tla le hore bo haufi haholo.—Matheu 24:3, 7-14, 32-39.

Se hlokahalang hona joale ka potlako ke hore hohle moo batho ba leng hona teng, ba lokela ho nka ka botebo temoso ena ea Jesu: “Ikeleng hloko hore lipelo tsa lōna le ka mohla e se ke ea e-ba tse imeloang ke ho ja ho tlōla le ho noa haholo le matšoenyeho a bophelo, ’me ka tšohanyetso letsatsi leo la e-ba holim’a lōna hang-hang.” (Luka 21:34) Ho hlakile hore bona ke bohato bo molemo bo ka nkoang. Feela joalokaha lipontšo tsa hore seretse se chesang se tla foqoha li sa lokela ho nkoa habobebe, ha rea lokela ho hlokomoloha ho atamela ha Mor’a motho Jesu Kreste ea ileng a eletsa: “Ka lebaka lena le lōna ipakeng le le ba itokisitseng, hobane ka hora eo le sa nahaneng hore ke eona, Mora oa motho oa tla.”—Matheu 24:44.

[Mongolo o botlaaseng ba leqephe]

[Setšoantšo se leqepheng la 23]

Martha (ea palameng tonki) le ba bang ba fana ka bopaki sebakeng se haufi le Popocatépetl