Na U sa Hopola?

Na u ananetse ho bala litokollo tsa morao tjee tsa Molula-Qhooa? Joale ak’u hlahlobe hore na u ka arabela lipotso tse latelang:

e hobane’ng ha polelo ea Pauluse e reng “manģosa a emeng bakeng sa Kreste” e le e tšoanelehang hakaale bakeng sa Bakreste ba tlotsitsoeng? (2 Bakorinthe 5:20)

Mehleng ea boholo-holo, manģosa a ne a ntšoa haholo-holo nakong ea ntoa ho bona hore na ntoa e ka qojoa. (Luka 14:31, 32) Kaha lefatše la moloko oa batho ba baetsalibe le arohile ho Molimo, o ntša manģosa a hae a tlotsitsoeng ho tsebisa batho ka litekanyetso tsa hae tsa poelano, ho ba kōpa ka tieo hore ba batle khotso le Molimo.—12/15, leqepheng la 18.

◻ Ke lintho life tse ’nè tse ileng tsa matlafatsa tumelo ea Abrahama?

Ea pele, o ile a bontša tumelo ea hae ho Jehova ka ho mamela ha Molimo a bua (Baheberu 11:8); ea bobeli, tumelo ea hae e ne e amana haufi-ufi le tšepo ea hae (Baroma 4:18); ea boraro, Abrahama o ne a bua hangata le Jehova; ’me ea bone, Jehova o ile a fa Abrahama tšehetso ha a latela tataiso ea Molimo. Lintho tse tšoanang li ka matlafatsa tumelo ea rōna kajeno.—1/1, leqepheng la 17 le la 18.

◻ Polelo “U se ke ua re kenya molekong” e bolela eng? (Matheu 6:13)

Re kōpa Molimo hore a se ke a lumella hore re hlōlehe ha re lekoa hore re se ke ra mo mamela. Jehova a ka re tataisa e le hore re se ke ra inehela le hore re se ke ra hlōloa ke Satane, “ea khopo.” (1 Bakorinthe 10:13)—1/15, leqepheng la 14.

◻ Motho o lokela ho etsa eng hore a fumane tšoarelo ea Molimo bakeng sa phoso eo a e entseng?

Ho ipolela ho Molimo ho lokela ho tsamaea le pako le ho beha “litholoana tse tšoanelang pako.” (Luka 3:8) Moea oa pako le takatso ea ho lokisa phoso li ka boela tsa susumelletsa motho hore a batle thuso ea moea ho baholo ba Bakreste. (Jakobo 5:13-15)—1/15, leqepheng la 19.

◻ Ke hobane’ng ha re lokela ho loanela ho ba ba ikokobelitseng?

Motho ea ikokobelitseng o na le mamello le tiisetso, ’me ha a inahane ho tlōlisa. Boikokobetso bo hohela metsoalle ea sebele e u ratang. Ho feta moo, bo tlisa tlhohonolofatso ea Jehova. (Liproverbia 22:4)—2/1, leqepheng la 7.

◻ Ke phapang efe ea bohlokoa e teng pakeng tsa lefu la Jesu le la Adama?

Adama o ne a tšoanela ho shoa, kaha ha aa ka a mamela ’Mōpi oa hae ka boomo. (Genese 2:16, 17) Ho fapana le hoo, Jesu o ne a sa tšoanela ho shoa ho hang, kaha “ha aa ka a etsa sebe.” (1 Petrose 2:22) Kahoo, ha Jesu a e-shoa, o ne a e-na le ho hong ho molemohali hoo Adama oa moetsalibe a neng a se na hona ha a e-shoa—tokelo ea bophelo bo phethahetseng ba botho. Ka hona, lefu la Jesu le ne le e-na le molemo oa sehlabelo ho rekolleng moloko oa batho.—2/15, leqepheng la 15 le la 16.

◻ Ponong ea Ezekiele ea boprofeta, motse o ne o emela eng?

Kaha motse oo o naheng e silafetseng (e sa halaleleng), e tlameha ebe ke ntho ea lefatšeng. Kahoo, ho bonahala motse o tšoantšetsa tsamaiso ea lefatšeng e ruisang bohle bao e tla ba mokhatlo o lokileng oa lefatše molemo.—3/1, leqepheng la 18.

◻ Ke hobane’ng ha Jesu a ile a hlatsoa maoto a barutuoa ba hae ha a keteka Paseka ka 33 C.E.?

Jesu o ne a sa qalise moetlo oa hore ho hlatsoanoe maoto. Ho e-na le hoo, o ne a thusa balateli ba hae hore ba be le boikutlo bo bocha—ba boikokobetso le ba ho ikemisetsa ho etsa mesebetsi ea boemo bo tlaase molemong oa barab’abo bona.—3/1, leqepheng la 30.

◻ Ha re ruta ba bang, ke eng seo e leng sa bohlokoa ho feta bokhoni ba tlhaho?

Ke litšoaneleho tseo re nang le tsona le mekhoa ea moea eo re e hlaoletseng eo liithuti li ka e etsisang. (Luka 6:40; 2 Petrose 3:11)—3/15, leqepheng la 11 le la 12.

◻ Libui tsa phatlalatsa li ka ntlafatsa ’malo oa tsona oa Mangolo joang?

Ka ho itlhakisa. E, ka ho balla holimo ka makhetlo ho fihlela li khona ho bala ha phollatsi. Haeba lik’hasete tsa Bibele li fumaneha, ke bohlale hore li mamele kamoo ’mali a hatellang lintlha le ho fetola molumo oa lentsoe kateng, ’me li hlokomele le kamoo mabitso le mantsoe a sa tloaelehang a bitsoang kateng.—3/15, leqepheng la 20.

◻ ‘Moea o khutlela ho Molimo’ joang ha motho a e-shoa? (Moeklesia 12:7, NW)

Kaha moea ke matla a bophelo, “o khutlela ho Molimo oa ’nete” ka kutloisiso ea hore tšepo leha e le efe ea bophelo ba ka moso bakeng sa motho eo, joale e se e itšetlehile ka ho feletseng ka Molimo. Ke Molimo feela ea ka khutlisetsang moea (spirit), kapa matla a bophelo, a etsa hore motho a boele a phele. (Pesaleme ea 104:30)—4/1, leqepheng la 17.