Na U Phetha Sohle Seo U Tlamehang ho se Etsetsa Molimo?
“Molimo oa ’nete o tla tlisa mosebetsi oa mofuta o mong le o mong kahlolong kamanong le ntho e ’ngoe le e ’ngoe e patiloeng, ebang e ntle kapa e mpe.”—MOEKLESIA 12:14, NW.
1. Jehova o etselitse batho ba hae litokisetso life?
JEHOVA o tšehetsa ba lulang ba hopotse hore ke ’Mōpi oa bona e Moholo. Lentsoe la hae le bululetsoeng le ba fa tsebo e hlokahalang hore ba mo khahlise ka ho feletseng. Moea o halalelang oa Molimo oa ba tataisa ha ba etsa thato ea bomolimo ’me ba “beha litholoana mosebetsing o mong le o mong o molemo.” (Bakolose 1:9, 10) Ho feta moo, Jehova o lokisetsa lijo tsa moea le tataiso ea puso ea Molimo ka “lekhoba le tšepahalang le le masene.” (Matheu 24:45-47) Kahoo, ka litsela tse ngata batho ba Molimo ba na le tlhohonolofatso e tsoang leholimong ha ba ntse ba sebeletsa Jehova ’me ba phethahatsa mosebetsi oa bohlokoahali oa ho bolela litaba tse molemo tsa ’Muso.—Mareka 13:10.
2. Mabapi le ho sebeletsa Jehova, ho ka ’na ha hlaha lipotso life?
2 Bakreste ba ’nete ba thabela hore ebe ba tšoarehile mosebetsing o halalelang oo ba o etsetsang Jehova. Leha ho le joalo, ba bang ba ka ’na ba nyahama ’me ba nahana hore boiteko ba bona ke ba lefeela. Ka mohlala, ka linako tse ling Bakreste ba inehetseng ba ka ’na ba ipotsa hore na boiteko ba bona bo etsoang ka hloko na e hlile ke ba bohlokoa na. Ha hlooho ea lelapa e ntse e nahana ka thuto ea lelapa le ka mesebetsi e meng, ka tšoanelo ho ka ’na ha hlaha lipotso tse kang: ‘Na Jehova o hlile o khahloa ke seo re se etsang? Na re phetha sohle seo re tlamehang ho se etsetsa Molimo?’ Mantsoe a bohlale a ’mokelli a ka thusa ho araba lipotso tse joalo.
Na Sohle ke Lefeela?
3. Tumellanong le Moeklesia 12:8, lefeela le feletseng ke eng?
3 Ba bang ba ka ’na ba nahana hore mantsoe a monna ea bohlale hase khothatso ho mang kapa mang—e monyenyane kapa e moholo. “‘Lefeela la mafeela!’ ho boletse ’mokelli, ‘Ntho e ’ngoe le e ’ngoe ke lefeela.’” (Moeklesia 12:8, NW) Ha e le hantle, ke lefeela le feletseng hore bocheng motho a hlokomolohe ’Mōpi e Moholo, a tsofale a sa mo sebeletse le hore a bonahale ka botsofali feela hore o phetse halelele. Ho motho ea joalo, sohle e bile lefeela kapa booatla, le haeba a shoa a ruile kapa a tumme lefatšeng lena le rapaletseng matleng a ea khopo, Satane Diabolose.—1 Johanne 5:19.
4. Ke hobane’ng ha ho ke ke ha thoe ntho e ’ngoe le e ’ngoe ke lefeela?
4 Hase ntho e ’ngoe le e ’ngoe eo e leng lefeela ho ba behang matlotlo leholimong e le bahlanka ba tšepahalang ba Jehova. (Matheu 6:19, 20) Ba na le ho hongata hoo ba ho etsang mosebetsing o putsang oa Morena, ’me mesebetsi e joalo kannete hase lefeela. (1 Bakorinthe 15:58) Empa haeba re Bakreste ba inehetseng, na re tšoarehile mosebetsing oo Molimo a re abetseng oona matsatsing aa a ho qetela? (2 Timothea 3:1) Kapa na re phela bophelo bo fapaneng hanyenyane le ba baahelani ba rōna ka kakaretso? E ka ’na eaba ke litho tsa malumeli a fapa-fapaneng ’me mohlomong ba bile ba a chesehela haholo, ba ba teng kamehla libakeng tsa ’ona tsa borapeli ba bile ba leka ho etsa seo mofuta oa bona oa borapeli o se batlang ho bona. Ha e le hantle, hase baboleli ba molaetsa oa ’Muso. Ha ba na tsebo e nepahetseng ea hore ena ke ‘nako ea bofelo’ hape ha ba utloisise hore boemo bo potlakile matsatsing ana ao re phelang ho ’ona.—Daniele 12:4.
5. Haeba re amehile haholo ka ho phehella lintho tse tloaelehileng bophelong, re tla lokela ho etsa’ng?
5 Jesu Kreste o buile tjena ka linako tsa rōna tse mahlonoko: “Feela kamoo matsatsi a Noe a neng a le kateng, ho ba teng ha Mora oa motho ho tla ba joalo. Etsoe joalokaha matsatsing ao pele ho moroallo, ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe a ileng a kena ka arekeng ka lona; ’me ba se ke ba elelloa ho fihlela moroallo o tla ’me o ba hohola bohle, ho ba teng ha Mora oa motho ho tla ba joalo.” (Matheu 24:37-39) Ha li etsoa ka tekanyetso, ha ho letho le phoso ka ho ja le ho noa, ’me lenyalo ke tokisetso e simolotsoeng ke Molimo ka boeena. (Genese 2:20-24) Leha ho le joalo, haeba re lemoha hore re amehile haholo ka ho phehella lintho tse tloaelehileng tsa bophelo, ke hobane’ng ha re sa rapelle see? Jehova a ka re thusa hore re etelletse lithahasello tsa ’Muso pele, re etse se nepahetseng le hore re phethe seo re tlamehang ho mo etsetsa sona.—Matheu 6:33; Baroma 12:12; 2 Bakorinthe 13:7.
Boinehelo le Seo re Tlamehang ho se Etsetsa Molimo
6. Ke ka tsela efe ea bohlokoa ba bang ba kolobelitsoeng ba hlōlehang ho phetha seo ba tlamehang ho se etsetsa Molimo?
6 Bakreste ba bang ba kolobelitsoeng ho hlokahala hore ba rapele ka tieo hobane ha ba phelele tšebeletso eo ba ileng ba itlama ka eona ha ba inehela ho Molimo. Ke lilemo tse ngata joale ho kolobetsoa ba fetang 300 000 selemo le selemo, empa palo e akaretsang ea Lipaki tsa Jehova tse mafolofolo ha ea eketseha tumellanong le seo. Ba bang bao e bileng bahoeletsi ba ’Muso ba khaolitse ho bolela litaba tse molemo. Ha e le hantle, batho bohle ba lokela ho ba le karolo e nang le morero tšebeletsong ea Bokreste pele ba kolobetsoa. Ka tsela ena, ba tseba taelo ena eo Jesu a e fileng balateli bohle ba hae: “E-eang ’me le etse batho ba lichaba tsohle barutuoa, le ba kolobetsa ka lebitso la Ntate le la Mora le la moea o halalelang, le ba ruta ho boloka lintho tsohle tseo ke le laetseng tsona.” (Matheu 28:19, 20) Ntle leha ba e-na le mefokolo e meholo ka ho fetisisa ka lebaka la ho kula kapa mabaka a mang ao ba ke keng ba a laola, batho ba kolobelitsoeng ba seng ba sa sebeletse e le Lipaki tse mafolofolo tsa Molimo le Kreste ha ba phelele sohle seo ba tlamehang ho se etsetsa ’Mōpi oa rōna e Moholo.—Esaia 43:10-12.
7. Ke hobane’ng ha re lokela ho kopana kamehla bakeng sa borapeli?
7 Baiseraele ba boholo-holo e ne e le sechaba se inehetseng ho Molimo, le se tlas’a selekane sa Molao ’me ho ne ho e-na le seo batho ba sona ba tlamehang ho se etsetsa Jehova. Ka mohlala, ba batona bohle ba ne ba lokela ho bokana meketeng e meraro ea selemo le selemo, ’me monna eo ka boomo a neng a sa boloke Paseka o ne a “tlosoa” ka ho bolaoa. (Numere 9:13; Levitike 23:1-43; Deuteronoma 16:16) E le hore Baiseraele ba phethe seo ba neng ba tlameha ho se etsetsa Molimo e le batho ba hae ba inehetseng, ba ne ba tšoanela ho bokana bakeng sa borapeli. (Deuteronoma 31:10-13) Ha ho letho Molaong le neng le re, ‘Etsa seo haeba ho theosetsa.’ Ho ba seng ba inehetse ho Jehova, sena ka sebele se matlafatsa mantsoe ana a Pauluse: “A re nahanelaneng hore re susumeletsane leratong le mesebetsing e metle, re sa tlohele ho bokana ha rōna hammoho, joalokaha ba bang ba e-na le tloaelo eo, empa re khothatsana, ’me haholoanyane joalo kaha le bona letsatsi le ntse le atamela.” (Baheberu 10:24, 25) E, ho bokana kamehla le barapeli ba bang ke karolo ea seo Mokreste ea inehetseng a tlamehang ho se etsetsa Molimo.
Hlahloba Liqeto Tsa Hao ka Hloko!
8. Ke hobane’ng ha mocha ea inehetseng a lokela ho nahanisisa ka tšebeletso ea hae e halalelang le ho e rapella?
8 E ka ’na eaba u mocha ea inehetseng ho Jehova. U tla ba lehlohonolo haholo haeba u etelletsa lithahasello tsa ’Muso pele bophelong. (Liproverbia 10:22) Ka ho rapela le ka ho lokisetsa ka hloko, ho ka etsahala hore u sebelise lilemo tsa bocha ba hao tšebeletsong e ’ngoe e itseng ea nako e tletseng—e leng tsela e ntle ea ho bontša hore u hopola ’Mōpi oa hao e Moholo. Ho seng joalo, thahasello ea lintho tse bonahalang e ka ’na ea qala ho nka boholo ba nako ea hao le tlhokomelo. Joaloka mang le mang, u ka ’na ua kena lenyalong u sa le monyenyane ’me ua kena likolotong hore u fumane lintho tse bonahalang. Mosebetsi o lefang haholo o ka ’na oa nka boholo ba nako ea hao le matla. Haeba u e-na le bana, u tla tlameha ho jara boikarabelo ba lelapa ka lilemo tse telele. (1 Timothea 5:8) E ka ’na eaba ha ua lebala ’Mōpi oa hao e Moholo, empa ke bohlale ho hlokomela hore ho lokisetsa ha hao esale pele, kapa ho se lokisetse esale pele, ho ka rala motheo oa hore na u tla phela joang ha u se u le moholo. Ha u se u hōlile, u ka ’na ua hetla morao ’me ua lakatsa eka bonyane ha u ne u le lilemong tse bohareng u ka be u ile ua sebelisa nako eo ka botlalo haholoanyane tšebeletsong ea ’Mōpi oa rōna e Moholo. Ke hobane’ng ha u sa nahanisise ka litebello tsa hao le ho li rapella esale hona joale, e le hore u tle u khotsofatsoe ke tšebeletso e halalelang eo u e etsetsang Jehova lilemong tsa bocha?
9. Ke eng e ka ’nang ea etsahalla ea seng a hōlile ’me a kile a jara boikarabelo bo boima ka phuthehong?
9 Nahana ka boemo bo bong—bona ke ba monna ea kileng a sebetsa e le molisa oa “mohlape oa Molimo.” (1 Petrose 5:2, 3) Ka lebaka le leng le itseng, o ile a khetha ho itlhlohlolla boikarabelo boo. Ke ’nete hore hona joale o hōlile, ’me ho ka ’na ha e-ba thatanyana hore a tsoele pele tšebeletsong ea Molimo. Empa na ho ka etsahala hore a hahamalle boikarabelo ba puso ea Molimo hape? Monna ea joalo a ka tlisetsa ba bang khothatso e kaakang haeba a ka tseba ho jara boikarabelo bo eketsehileng ka phuthehong! Ebile kaha ha ho motho ea iphelelang, metsoalle le baratuoa ba tla thaba haeba a ka tseba ho eketsa tšebeletso ea hae, tlotlisong ea Molimo. (Baroma 14:7, 8) Ntho ea bohlokoahali ke hore Jehova a ke ke a lebala seo motho leha e le ofe a se etsang tšebeletsong ea hae. (Baheberu 6:10-12) Kahoo, ebe ke eng e ka re thusang ho hopola ’Mōpi oa rōna e Moholo?
Lithuso Tsa ho Hopola ’Mōpi oa Rōna e Moholo
10. Ke hobane’ng ha ’mokelli a ne a le boemong bo molemohali ba ho fana ka tataiso tabeng ea ho hopola ’Mōpi oa rōna e Moholo?
10 ’Mokelli o ne a le boemong bo botle ba ho fana ka tataiso ea ho hopola ’Mōpi oa rōna e Moholo. Jehova o ne a ile a araba lithapelo tsa hae tse tsoang pelong ka ho mo neha bohlale bo sa tloaelehang. (1 Marena 3:6-12) Solomone o ile a hlahlobisisa litaba tsohle tsa batho. Ho feta moo, Molimo o ile a mo bululela hore a ngole seo a se fumaneng e le hore ba bang ba ka rua molemo. O ngotse: “’Me ntle le taba ea hore ’mokelli o ne a le bohlale, o ile a boela a ruta batho tsebo a sa khaotse, ’me a nahanisisa le ho hlahlobisisa, e le hore a ka hlophisa maele a mangata ka tatellano. ’Mokelli o ile a batla ho fumana mantsoe a thabisang le ho ngoloa ha mantsoe a nepahetseng a ’nete.”—Moeklesia 12:9, 10, NW.
11. Ke hobane’ng ha re lokela ho amohela keletso e bohlale ea Solomone?
11 Phetolelo ea Segerike ea Septuagint e baleha tjena: “’Me ho feta moo, kaha ’moleli o ne a le bohlale, kaha o rutile batho bohlale; e le hore tsebe e ka natefeloa ke lipapiso, ’moleli o ile a batlisisa hore a fumane mantsoe a thabisang le hore a ngole lintho tse nepahetseng—e leng mantsoe a ’nete.” (The Septuagint Bible, e fetoletsoeng ke Charles Thomson) Solomone o ile a leka ho finyella lipelo tsa babali ba hae ka mantsoe a monate le litaba tse thahasellisang kannete le tsa bohlokoa. Kaha mantsoe a hae a fumanoang ka Mangolong o a ngotse ka pululelo ea moea o halalelang, re ka amohela seo a se fumaneng le keletso ea hae e bohlale re sa qeaqee.—2 Timothea 3:16, 17.
12. U ne u tla beha seo Solomone a se buileng se tlalehiloeng ho Moeklesia 12:11, 12 joang ka mantsoe a hao?
12 Esita leha ho ne ho se na mekhoa ea kajeno ea khatiso, ho ne ho e-na le libuka tse ngata mehleng ea Solomone. Batho ba ne ba lokela ho ba le maikutlo afe ka lingoliloeng tse joalo? O itse: “Mantsoe a ba bohlale a joaloka litsenene tsa likhomo, ’me ba inehellang ho bokelleng lipolelo ba joalo feela ka lipekere tse khokhothetsoeng; ba fanoe ba tsoa ho molisa a le mong. Mabapi le ntho leha e le efe ntle ho tsena, mora oa ka, u lemohe: Ho etsoa ha libuka tse ngata ha ho na bofelo, ’me ho inehela haholo ho tsona ho tepelletsa ’mele.”—Moeklesia 12:11, 12, NW.
13. Mantsoe a ba nang le bohlale ba bomolimo a ka tšoana le litsenene tsa likhomo joang, ’me ke bo-mang ba tšoanang le “lipekere tse khokhothetsoeng”?
13 Mantsoe a ba nang le bohlale ba bomolimo a tšoana le litsenene tsa likhomo. Joang? A hlaba babali kapa bamameli hore ba tsoele pele tumellanong le mantsoe a bohlale ao ba a balang kapa ba a utloang. Ho feta moo, ba inehetseng ho “bokelleng lipolelo,” kapa lipolelo tse bohlale le tsa bohlokoa kannete, ba tšoana le “lipekere tse khokhothetsoeng,” kapa tse tiileng. Ho ka ’na ha e-ba joalo hobane mantsoe a matle a batho ba joalo a bonahatsa bohlale ba Jehova ’me ka lebaka leo a ka sebeletsa ho tsitsisa le ho tšehetsa babali kapa bamameli. Haeba u motsoali ea tšabang Molimo, na u ke ke ua iteka ka hohle hore u kenye ka botebo bohlale bo joalo kelellong le pelong ea ngoana oa hao?—Deuteronoma 6:4-9.
14. (a) Ke libuka tsa mofuta ofe tseo ho “inehela haholo” ho tsona ho seng molemo? (b) Ke lingoliloeng life tseo re lokelang ho li ela hloko ka ho fetisisa, hona hobane’ng?
14 Leha ho le joalo, ke hobane’ng ha Solomone a ile a bua tjee ka libuka? Ha ho bapisoa le Lentsoe la Jehova, libuka tse se nang palo tsa lefatše lena li na le monahano oa motho feela tjee. Monahano ona boholo ba oona o bonahatsa khopolo ea Satane Diabolose. (2 Bakorinthe 4:4) Kahoo, ‘ho inehela haholo’ litabeng tse joalo tsa lefatše ho hlahisa molemo o monyenyane oa nako e telele. Ha e le hantle, boholo ba tsona li ka ba kotsi moeeng. Joaloka Solomone, re ke re nahaneng ka botebo ka seo Lentsoe la Molimo le se bolelang ka bophelo. Sena se tla matlafatsa tumelo ea rōna le ho re atametsa haholoanyane ho Jehova. Tlhokomelo e feteletseng e lebisoang libukeng tse ling kapa mehloling e meng ea thuto e ka re qeta matla. Haholo haeba lingoliloeng tse joalo li ngotsoe ka monahano oa bolefatše o hananang le bohlale ba bomolimo, ha li molemo ebile li senya tumelo ho Molimo le merero ea hae. Kahoo, a re hopoleng hore lingoliloeng tse molemohali tsa mehleng ea Solomone le ea rōna ke tse bonahatsang bohlale ba “molisa a le mong,” e leng Jehova Molimo. O lokiselitse libuka tse 66 tsa Mangolo a Halalelang, ’me ke tsona tseo re lokelang ho li ela hloko ka ho fetisisa. Bibele le lingoliloeng tse thusang tsa “lekhoba le tšepahalang” li re nolofalletsa ho fumana “tsebo ea Molimo.”—Liproverbia 2:1-6.
Sohle Seo re Tlamehang ho se Etsetsa Molimo
15. (a) U ka beha mantsoe a Solomone ka ‘sohle seo motho a tlamehang ho se etsa’ joang? (b) Re lokela ho etsa’ng e le hore re phethe seo re tlamehang ho se etsetsa Molimo?
15 Ha ’mokelli, Solomone, a akaretsa patlisiso eohle ea hae, o re: “Qetello ea taba, ha ntho e ’ngoe le e ’ngoe e se e utloiloe, ke ena: Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa. Etsoe Molimo oa ’nete o tla tlisa mosebetsi oa mofuta o mong le o mong kahlolong kamanong le ntho e ’ngoe le e ’ngoe e patiloeng, ebang e ntle kapa e mpe.” (Moeklesia 12:13, 14, NW) Tšabo e molemo ea ’Mōpi oa rōna e Moholo kapa tlhompho ea borapeli, e tla re sireletsa, ’me re tšepa hore e tla sireletsa le malapa a rōna, hore re se ke ra phehella tsela ea bophelo e booatla e ka tlisetsang rōna le baratuoa ba rōna khathatso e khōlō le masoabi. Tšabo e molemo ea Molimo e hloekile ’me ke eona tšimoloho ea bohlale le tsebo. (Pesaleme ea 19:9; Liproverbia 1:7) Haeba re e-na le temohisiso e thehiloeng Lentsoeng le bululetsoeng la Molimo ’me re sebelisa keletso ea lona linthong tsohle, re tla be re phetha ‘sohle seo re tlamehang ho se etsetsa’ Molimo. Che, hase taba ea ho etsa letoto la lintho tsohle tseo re tlamehang ho li etsa. Ho e-na le hoo, se hlokahalang ke hore re batle tataiso ka Mangolong ha re rarolla mathata a bophelo le hore ka linako tsohle re etse lintho ka tsela ea Molimo.
16. Tabeng ea kahlolo, Jehova o tla etsa’ng?
16 Re lokela ho lemoha hore ha ho letho leo ’Mōpi oa rōna e Moholo a sa le boneng. (Liproverbia 15:3) O “tla tlisa mosebetsi oa mofuta o mong le o mong kahlolong.” E, Ea Holimo-limo o tla ahlola lintho tsohle, ho akarelletsa le tse patehileng mahlong a batho. Ho lemoha linnete tse joalo ho ka sebeletsa e le tšusumetso ea ho boloka litaelo tsa Molimo. Empa tšusumetso e ka sehloohong e lokela ho ba ho rata Ntat’a rōna oa leholimo, hobane moapostola Johanne o ile a ngola, a re: “Se boleloang ke lerato la Molimo ke sena, hore re boloke litaelo tsa hae; ’me leha ho le joalo litaelo tsa hae ha li boima.” (1 Johanne 5:3) Kaha litaelo tsa Molimo li lokiselitsoe ho ntšetsa pele boiketlo ba rōna ba ka ho sa feleng, ka sebele hase feela hore ho loketse empa hape ke bohlale kannete hore re li boloke. Sena ha se boima ho ba ratang ’Mōpi e Moholo. Ba batla ho phetha seo ba tlamehang ho mo etsetsa sona.
Phetha Sohle Seo U Tlamehang ho se Etsa
17. Re tla etsa’ng haeba re hlile re batla ho phetha sohle seo re tlamehang ho se etsetsa Molimo?
17 Haeba re bohlale ’me kannete re lakatsa ho phetha sohle seo re tlamehang ho se etsetsa Molimo, ntle ho ho boloka litaelo tsa hae, re tla ba le tšabo e nang le tlhompho ea hore re se ke ra mo halefisa. Ka sebele, “ho tšaba Jehova ke tšimoloho ea bohlale,” ’me ba bolokang litaelo tsa hae “ba na le temohisiso e molemo.” (Pesaleme ea 111:10, NW; Liproverbia 1:7) Kahoo, a re etseng ka bohlale ’me re mamele Jehova linthong tsohle. Sena se hlokahala haholo hona joale, hobane Morena Jesu Kreste o teng, ’me letsatsi la kahlolo e etsoang ke eena e le Moahloli ea khethiloeng ke Molimo le haufi.—Matheu 24:3; 25:31, 32.
18. Phello e tla ba efe haeba re phetha sohle seo re tlamehang ho se etsetsa Jehova Molimo?
18 Hona joale Molimo o behile e mong le e mong oa rōna leihlo. Na re sekametse linthong tsa moea, kapa re lumelletse litšusumetso tsa lefatše hore li fokolise kamano ea rōna le Molimo? (1 Bakorinthe 2:10-16; 1 Johanne 2:15-17) Ebang re bacha kapa re hōlile, a re etseng sohle se matleng a rōna hore re khahlise ’Mōpi oa rōna e Moholo. Haeba re mamela Jehova ’me re boloka litaelo tsa hae, re tla hana lintho tse se nang molemo tsa lefatše lena la khale le fetang. Joale re ka ba le tšepo ea bophelo bo sa feleng tsamaisong e ncha ea lintho e tšepisitsoeng ke Molimo. (2 Petrose 3:13) Ke litebello tse khahlehang hakaakang ho bohle ba phethahatsang sohle seo ba tlamehang ho se etsetsa Molimo!
U ka Araba Joang?
◻ Ke hobane’ng ha u ka re hase ntho e ’ngoe le e ’ngoe eo e leng lefeela?
◻ Ke hobane’ng ha Mokreste e mocha a lokela ho nahanisisa ka tšebeletso ea hae e halalelang le ho e rapella?
◻ Ke libuka tsa mofuta ofe tseo ho ke keng ha e-ba molemo ho “inehela haholo” ho tsona?
◻ ‘Sohle seo motho a tlamehang ho se etsa’ ke eng?
[Setšoantšo se leqepheng la 20]
Hase ntho e ’ngoe le e ’ngoe eo e leng lefeela ho ba sebeletsang Jehova
[Setšoantšo se leqepheng la 23]
Ho fapana le libuka tse ngata tsa lefatše lena, Lentsoe la Molimo lea hlabolla ebile le molemo