Tloha Sebakeng se Kotsi!
KE MOSEBETSI oa litsebi tsa ho foqoha ha seretse se chesang hore li hlahlobe le ho lekanyetsa bopaki, ebe joale li lemosa batho ka ho foqoha ho tlang ha seretse se chesang. (Hang ha Thaba ea Fugen e phatlohile, mapolesa a ile a tlameha ho tlosa batho sebakeng se kotsi.) Ka ho tšoanang, liithuti tsa Bibele li hlokomela pontšo ea “qetello ea tsamaiso ea lintho” ’me li lemosa ba bang ka kotsi e atamelang.—Matheu 24:3.
Hona khaolong ea Bibele e lemosang ka timetso e atamelang ea lefatše, re ka bala tlhaloso ena ea liketsahalo tse e etellang pele: “Sechaba se tla tsohela sechaba matla le ’muso o tla tsohela ’muso matla, ’me ho tla ba le likhaello tsa lijo le litšisinyeho tsa lefatše sebakeng se seng ka mor’a se seng. . . . Ho tla hlaha baprofeta ba bangata ba bohata ’me ba khelose ba bangata; ’me ka lebaka la ho eketseha ha ho se ee ka molao lerato la palo e khōlō le tla fola. . . . ’Me litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; ’me joale e ntan’o ba hona bofelo bo tla tla.”—Matheu 24:7-14.
Ha ho hlokahale hore re be bahlahlobisisi ba litaba hore re lemohe phethahatso ea kajeno ea boprofeta bona. Re ’nile ra bona ha bo phethahala, haholo-holo ho tloha ka 1914. Lekholong lena la lilemo ho bile le lintoa tse peli tsa lefatše, lintoa tsa lehae tse ngata, lintoa tsa libaka, le lintoa tsa merabe le tsa bolumeli. Ka lebaka la lintoa tseo, batho ba ’nile ba hlaseloa ke tlala, ho phaella bofutsaneng bo bakiloeng ke likoluoa tsa tlhaho. Litšisinyeho tsa lefatše li bolaile ba bangata. Ho hlahile lihlotšoana tsa borapeli tsa bokhelohi tse nang le baeta-pele ba belaetsang le balateli ba chesehang ka ho feteletseng. “Ho eketseha ha ho se ee ka molao” ho entse hore batho ba se ke ba hlola ba bontša lerato, ’me ha ho sa rena moea oa boahisani.
Karolo e ’ngoe ea pontšo ena ke mosebetsi oa boboleli lefatšeng lohle, ’me ka sebele oa phethoa. Khutlela sekoahelong sa makasine ena ’me u tla bona mantsoe ana, “O Tsebahatsa ’Muso oa Jehova,” ao e leng karolo ea sehlooho. Molula-Qhooa, o hatisoang ka lipuo tse 132 ’me ho abjoa e ka holimo ho limilione tse 22, ke sesebelisoa se ka sehloohong sa ba bolelang “litaba tsena tse molemo tsa ’muso” lefatšeng lohle leo ho ahiloeng ho lona. Litaba tseo tse molemo li akarelletsa molaetsa oa hore ’Mōpi oa bokahohle, Jehova Molimo, o hlomme ’Muso oa leholimo o tla felisa tsamaiso e khopo ea lintho ’me o tlise paradeise lefatšeng. Ka sebele, pontšo ea hore Molimo o se a le haufi le ho nka khato ea bonahala hona joale, e leng ho bontšang hore bophelo ba batho tsamaisong ena ea lintho bo kotsing.—Bapisa le 2 Timothea 3:1-5; 2 Petrose 3:3, 4; Tšenolo 6:1-8.
Letsatsi la Jehova le Susumetsang Tšabo
Ho tla etsahala eng ha nako ea Jehova ea ho liha kahlolo e fihlile? Mamela tlhaloso ea hae e hlakileng ea se tla etsahala ka nako eo: “Ke tla etsa mehlolo le leholimong le lefatšeng, mali, le mollo, le mouoane oa mosi. Letsatsi le tla fetoha lefifi, le khoeli e fetohe mali, ho e-so ho tle letsatsi la Jehova le leholo, le tšabehang.”—Joele 2:30, 31.
Letsatsi leo, le tšosang le le timetsang ho feta ho foqoha leha e le hofe ha seretse se chesang sebakeng se itseng kapa tšisinyeho ea lefatše, le haufi. Moprofeta Sofonia o re: “Letsatsi la Jehova le leholo le atametse, le atametse, le bile le akofa ka ho fetisisa. . . . Ka mollo oa poulelo ea hae, lefatše lohle le tla chesoa, hobane o tla felisa, a be a timeletse baahi bohle ba lefatše ka sehlōhō.” Le hoja “leha e le silefera ea bona, leha e le khauta ea bona, li ke ke tsa tseba ho ba namolela tsatsing la khalefo ea Jehova,” ho na le mokhoa oa ho pholoha letsatsi leo le susumetsang tšabo.—Sofonia 1:14-18.
Ha Sofonia a bontša hore na seo se ka etsahala joang, o re: “Ha ho e-so ho tle holim’a lōna ho tuka ha bohale ba Jehova, ha le e-so ho tle ho lōna, tsatsi la bohale ba Jehova! Batlang Jehova, baikokobetsi bohle ba lefatše, . . . batlang ho loka, le batle boikokobetso; ekaba le ka tšoha le patoa tsatsing la bohale ba Jehova.” (Sofonia 2:2, 3) Re ka sireletseha ka ho ‘batla Jehova, ho batla ho loka le boikokobetso.’ Kajeno ke bo-mang ba batlang Jehova?
Ha ho pelaelo hore u amahanya lebitso “Jehova” le Lipaki tsa Jehova ka lebaka la mosebetsi oa tsona oa ho bolela. E ka ’na eaba u fumane makasine ena ho e mong oa tsona. Li tsejoa e le baahi ba itšoereng hantle, ba phelang ka botšepehi. Li leka ka matla ho apara “botho bo bocha” bo akarelletsang ho hlaolela boikokobetso. (Bakolose 3:8-10) Lia lumela hore sena se etsoa ke hore li rutoa ke mokhatlo o hlophisitsoeng oa Jehova o bonahalang, oo lefatšeng lohle o emeloang ke liphutheho tsa Lipaki tsa Jehova sebakeng ka seng. E, u ka sireletseha ka ho ba ka har’a ‘mokhatlo oa bara ba motho’ oa Lipaki tsa Jehova lefatšeng lohle.—1 Petrose 5:9.
Itšireletse Hona Joale
Hore re sireletsehe ka ho batla Jehova, re lokela ho ba metsoalle ea hae. See se akarelletsa eng? Bibele ea arabela: “Na ha le tsebe hore botsoalle le lefatše ke bora ho Molimo? Ka hona, mang kapa mang ea batlang ho ba motsoalle oa lefatše o iketsa sera sa Molimo.” (Jakobo 4:4) Hore re be metsoalle ea Molimo, re tlameha ho tlosa boikutlo leha e le bofe ba ho amana le lefatše lena le khopo la hona joale le khetholloang ka boikutlo ba borabele khahlanong le Molimo.
Bibele ea re eletsa: “Le se ke la ba ba ratang leha e le lefatše kapa lintho tse lefatšeng. Haeba leha e le mang a rata lefatše, lerato la Ntate ha le eo ho eena; hobane ntho e ’ngoe le e ’ngoe e lefatšeng—takatso ea nama le takatso ea mahlo le pontšo ea mponeng ea mokhoa oa motho oa boipheliso—ha e simolohe ho Ntate, empa e simoloha lefatšeng. Ho feta moo, lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.” (1 Johanne 2:15-17) Batho ba bangata kajeno ba susumetsoa ke litakatso tsa nama—takatso e sa laoleheng ea likamano tsa botona le botšehali, ho lelekisa chelete ka meharo le tšebeliso e mpe ea matla. Empa, e le hore motho a be ka lehlakoreng la Jehova, o lokela ho hlōla litakatso tse joalo.—Bakolose 3:5-8.
E ka ’na eaba u balile koranta ena nako le nako, ’me u ka ’na ua lumellana le tsela eo e sebelisang boprofeta ba Bibele ka eona. Leha ho le joalo, u ka ’na ua ba lesisitheho ho nka bohato bo tsoelang pele ba ho kopanela le Lipaki tsa Jehova. Leha ho le joalo, haeba re tobane le tlokotsi, na ho utloa temoso feela ho lekane? Joalokaha re ka bona tabeng ea ha Thaba ea Fugen e ne e phatloha, ho hlokahala hore re nke khato ha re utloa temoso. Hopola hore bonyane batlalehi ba litaba le ba nkang lifoto ba ka bang 15 ba ile ba lahleheloa ke bophelo moo ba batlang ho fumana boitsebiso bo thahasellisang, bo nakong. Ha e le hantle, e mong oa ba nkang lifoto o ile a shoa a ntse a behile monoana oa hae konopong ea k’hamera ea hae e tobetsoang ha ho nkuoa setšoantšo. Setsebi sa ho foqotha ha seretse se chesang—se neng se kile sa re, “Haeba ka letsatsi le leng ke tlameha ho shoa, ke batla hore ke shoe ke le haufi-ufi le moo seretse se chesang se foqohang teng”—se ile sa fela sa shoa joalokaha se ne se lakalitse. Kaofela ha bona ba ne ba inehetse mosebetsing le lipakaneng tsa bona. Leha ho le joalo, ba ile ba lefa ka bophelo ba bona—phello ea ho hlokomoloha temoso.
Ba bangata kajeno ba utloa molaetsa o mabapi le qeto ea Molimo ea ho timetsa tsamaiso ena e khopo ea lintho, ’me ho isa bohōleng bo itseng ba lemoha bonnete ba temoso ena. Ba ka ’na ba ipehela lebaka lena, ‘Eona ho ka ’na ha etsahala hore e tle qetellong, empa eseng kajeno.’ Hore lintho li tsamaee ka tsela e lumellanang le maemo a bona, ba chechisetsa letsatsi la Jehova morao e le hore ba se ke ba faposoa ho seo bona ba se bonang e le sa bohlokoa hona joale.
Baruke o ne a e-na le bothata bo joalo. E le mongoli oa moprofeta oa boholo-holo, Jeremia, ka sebete Baruke o ile a lemosa Baiseraele ka timetso ea Jerusalema e neng e atametse. Leha ho le joalo, ka lekhetlo le leng o ile a khathala ke thōmo ea hae. Ha a le boemong boo, Jehova o ile a mo khalemela: “Empa ha e le uena, u ntse u ipatlela lintho tse khōlō. U se ke ua ’na ua li batla.” Ebang e ne e le leruo, bophahamo kapa tšireletseho ea lintho tse bonahalang, Baruke o ne a sa lokela ho “ipatlela lintho tse khōlō.” O ne a lokela ho thahasella ntho e le ’ngoe, ho etsa thato ea Molimo le ho thusa batho ho ema ka lehlakoreng la Hae. Ka lebaka leo, o ne a tla fumana ‘moea oa hae e le thepa e hapuoeng.’ (Jeremia 45:1-5, NW) Ka ho tšoanang, ho e-na le ho “ipatlela lintho tse khōlō,” re lokela ho batla Jehova, e leng se ka re lebisang ho bolokoeng ha bophelo ba rōna.
Thabeng ea Fugen, mapolesa le bo-ralitima-mollo ba baithaopi ba fetang 12 ba ne ba theohetse ha serete se chesang ka mokhoa o ke keng oa lekanngoa se ba koahela. Ba ne ba leka ho thusa le ho sireletsa batho ba kotsing. Ba ne ba le joaloka banna le basali ba nang le boikemisetso bo botle, ba ikakhetseng ka setotsoana ntlafatsong ea lefatše lena. Le hoja sepheo sa bona e ne e le sa bohlokoa, “se khopamisitsoeng se ke ke sa otlolloa.” (Moeklesia 1:15, NW) Tsamaiso ena ea lintho e khopameng e ke ke ea otlolloa. Na hoa utloahala ho iketsa “motsoalle oa lefatše” ka ho leka ho sireletsa tsamaiso ea lefatše lohle eo Molimo a ikemiselitseng ho e timetsa?
Ha U se U Balehile, Lulella Thōko
Ho baleha tsamaisong e leng kotsing ke ntho e ’ngoe, empa ke ntho e ’ngoe hape ho lula tšireletsong ea ‘mokhatlo oohle oa bara ba motho.’ (1 Petrose 2:17) A re se keng ra lebala lihoai tseo, ka mor’a hore li tlohe, li ileng tsa khutla ho tla lekola masimo a tsona a pel’a Thaba ea Fugen. Ho ka etsahala hore ebe li ne li labalabela ho khutlela bophelong “bo tloaelehileng” boo li neng li bo phela. Empa ua hlokomela hore qeto ea tsona ea ho khutlela morao e bile booatla. Mohlomong e ne e se lekhetlo la tsona la pele la ho leka ho tšela moeli o neng o behiloe. E ka ’na eaba li ne li ile tsa tšelela sebakeng se kotsi ka nakoana e itseng feela, eaba ha ho etsahale letho. Lekhetlong le latelang, e ka ’na eaba li ile tsa lula nako e teletsana, ’me ha ’na ha se ke ha e-ba le letho le etsahalang. Mohlomong ka potlako li ile tsa tloaela ho tšela moeli o behiloeng oa tšireletso ’me tsa ba le sebete sa ho hanella sebakeng se kotsi.
Jesu Kreste o ile a bua ka boemo bo tšoanang bo neng bo tla etsahala nakong ea “qetello ea tsamaiso ea lintho.” O ile a re: “Joalokaha matsatsing ao pele ho moroallo, ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe a ileng a kena ka arekeng ka lona; ’me ba se ke ba elelloa ho fihlela moroallo o tla ’me o ba hohola bohle, ho ba teng ha Mora oa motho ho tla ba joalo.”—Matheu 24:3, 38, 39.
Hlokomela hore Jesu o ile a bua ka ho ja, ho noa le ho kena lenyalong. Ha ho le e ’ngoe ea lintho tsena e fosahetseng mahlong a Jehova. Joale ho phoso e ne e le eng? Batho ba mehleng ea Noe ‘ha baa ka ba elelloa,’ ba phela bophelo bo likolohang kemisong e tloaelehileng. Nakong ea boemo bo kotsi ba tšohanyetso, motho a ke ke a phela bophelo “bo tloaelehileng.” Hang ha u balehile, kapa u ikarotse lefatšeng la hona joale le ahlotsoeng, u lokela ho loantša tšusumetso leha e le efe ea ho khutlela morao ho ea sebelisa monyetla oa ho khoahlapisa ntho leha e le efe eo u ka e fumanang ho lona. (1 Bakorinthe 7:31) U ka ’na ua khona ho lelerela ka ntle ho sebaka se sireletsehileng moeeng ua ba ua khutla u sa lemala, ho bile ho se le ea mong ea lemohileng. Leha ho le joalo, seo se ka ’na sa u betefatsa ’me sa etsa hore u khutlele lefatšeng hape, u hanelle ho lona nako e teletsana. Ka potlako, u ka ba le boikutlo bona: “Bofelo bo ke ke ba tla kajeno.”
Hape, nahana ka baqhobi ba bararo ba litekesi ba ileng ba lahleheloa ke bophelo ba bona moo ba emetseng batlalehi ba litaba le ba nkang lifoto ha seretse se chesang se tšoloha ho theosa le thaba. Ba bang kajeno ba ka ’na ba latela ba bang ba itetileng sebete ho khutlela lefatšeng. Ho sa tsotellehe hore na lebaka ke lefe, ho hlakile hore ha ho hlokahale hore re ipehe kotsing ea ho qekoa hore re khutlele sebakeng se kotsi.
Bohle ba shoetseng Thabeng ea Fugen e ileng ea phatloha ba ne ba tšetse moeli oa tšireletso ’me ba ea sebakeng se kotsi. Le hoja ba ne ba lebeletse hore thaba eo e tla phatloha ka letsatsi le leng, ha ho motho ea neng a nahana hore e tla ba letsatsing leo. Ka ho hlokomela pontšo ea bofelo ba tsamaiso ena ea lintho, ba bangata ba lebeletse hore letsatsi la Jehova le tle ka nako e itseng empa mohlomong eseng ka potlako. Ba bang ba bile ba nahana hore letsatsi leo le ke ke la tla “kajeno.” Boikutlo bo joalo ka sebele bo kotsi.
Moapostola Petrose o lemositse: “Letsatsi la Jehova le tla tla joaloka lesholu.” Re tšoanela ho falimeha, ‘re lete ’me re lule re hopolela haufi ho ba teng ha letsatsi la Jehova,’ re etse ‘sohle se matleng a rōna hore qetellong a re fumane re se na letheba ebile re se na sekoli ’me re le khotsong.’ (2 Petrose 3:10-14) Ka mor’a timetso ea tsamaiso ea hona joale e khopo ea lintho, ho larile lefatše la paradeise tlas’a ’Muso oa Molimo. E se eka le ka mohla re ke ke ra khalla ho iteta sefuba ho ea sebakeng se kotsi ka lebaka leha e le lefe leo likelello tsa rōna li ka le qapang, kaha letsatsi leo re tšelang moeli ka lona re khutlela lefatšeng, e ka ’na eaba ke lona letsatsi la Jehova.
Itšireletse har’a batho ba Jehova ’me u lule le bona.
[Litšoantšo tse leqepheng la 7]
Itšireletse har’a batho ba Jehova ’me u lule le bona
[Tlhaloso ea Moo Setšoantšo se Nkiloeng Teng e leqepheng la 4]
Iwasa/Sipa Press