Ho Tlotlisa Molimo Lithabeng Tsa Philippines

Ho Tlotlisa Molimo Lithabeng Tsa Philippines

Haeba u nahana hore Philippines ke naha ea lihlekehleke tse ngata, u nepile. Empa e boetse ke naha ea lithaba tse makelebetloa. Ho Lipaki tsa Jehova, ho bolela litoropong le mabalane ebile ntho e batlang e le bonolo le e atlehang. Leha ho le joalo, boemo bo fapane ka lithabeng.

LITHABA tse ntle haholo tsa naha ena li fapane ka ho feletseng ha li bapisoa le mabōpo a leoatle a tletseng lehlabathe, mafika a k’horale, metsana ea batšoasi ba litlhapi le litoropo tse phetheselang tsa masabasabeng a sehlekehleke sena. Lithaba tsena e boetse ke tšitiso boboleling ba ‘litaba tse molemo’ tsa ’Muso oa Molimo.—Matheu 24:14.

Lihlekehleke tsa Philippines li mateanong a kokomohileng a matlapa a mabeli a maholo a ka tlas’a lefatše. Ho kokomoha ha lefatše sebakeng sena ho entse melollope ea lithaba lihlekehlekeng tse khōloanyane. Lihlekehleke tsa Philippines tse fetang 7 100 li koung e ka bophirimela ea Selikalikoe sa Mollo sa Pacific. Kahoo, li na le libaka tse ngata tse foqohang seretse se chesang, ’me le tsona li etsa hore naha e khabe ka lithaba. Matsaranka ana ke masirela a batho ba lulang lithabeng. Ho thata ho fihla ho bona hobane ke litsela tse seng kae feela tse loketseng likoloi.

Ho sa tsotellehe litšitiso tsena, Lipaki tsa Jehova lia hlokomela hore hoa hlokahala ho fihla ho “batho ba mefuta eohle.” (1 Timothea 2:4) Kahoo, Lipaki tsa Philippines li sebelitse tumellanong le moea oa Esaia 42:11, 12, ha e re: “Baahi ba lefika ba ke ba hooe ka thabo. Batho ba hoeletse haholo litlhōrōng tsa lithaba. Ba ke ba ise khanya ho Jehova, ’me ba bolele thoriso ea hae lihlekehlekeng.”

Boiteko bo matla ba ho pakela batho ba lithabeng bo qalile lilemong tse fetileng tse fetang 50. Ka mor’a Ntoa ea II ea Lefatše, baromuoa ba ile ba leka ho kenya moea oa tšebetso. Baahi ba bangata ba moo ba ile ba amohela ’nete ea Bibele, ’me ba thusa ho jala ’nete ena metsaneng e hare ho lithaba. Sena se ile sa tlisa katleho e khōlō. Ka mohlala, lithabeng tsa Cordillera Bohareng tsa Luzon ka leboea, ho na le bahoeletsi ba fetang 6 000 ba litaba tse molemo. Ba bangata ke matsoalloa a moo, ho akarelletsa Maibaloi, Maifugao le Makalinga.

Leha ho le joalo, ho sa ntsane ho e-na le libaka tseo ho leng thata ho fihla ho tsona lithabeng. Batho ba lulang moo ha baa lebaloa. Ba bang ho fihliloe joang ho bona, ’me ba arabetse joang?

Tumelo ea ’Nete e Nka Sebaka sa Neano

Sehlekehlekeng sa leboea sa Luzon, lithabeng tsa profinse ea Abra ke moo ho lulang Matinggiane. Mohlomong lebitso lena le simolohile lentsoeng la boholo-holo la Semalay tinggi, le bolelang “thaba.” Le loketse ka ho feletseng! Batho ba boetse ba ipitsa Maitneg ’me puo ea bona ba e bitsa Seitneg. Ba lumela ho molimo ea bitsoang Kabuniane, ’me bophelo ba bona ba letsatsi le letsatsi bo susumetsoa haholo ke litumela-khoela. Ka mohlala, ha motho ea rerang ho nka leeto a ka thimola, ke bomalimabe. O tlameha ho leta lihora tse itseng hore bomalimabe boo bo fete.

Ka 1572, Masepanishe a ile a tlisa Bok’hatholike, empa a ile a hlōleha ho ruta Matinggiane Bokreste ba ’nete. A ileng a sokolohela Bok’hatholikeng a ile a khomarela tumelo ea ’ona ho Kabuniane ’me a ’na a latela meetlo ea ’ona. Tsebo e nepahetseng ea Bibele e qalile ho fihla ho batho bana ka bo-1930 ha Lipaki tsa Jehova li qala ho jala molaetsa oa ’Muso lithabeng tseo. Matinggiane a mangata a tšepahalang a qalile ho tlotlisa Jehova “litlhōrōng tsa lithaba.”

Ka mohlala, Lingbaoan e ne e le ramorabe ea hlomphehang ha habo. E ne e le Motinggiane oa popota. “Ke ne ke latela lineano tsa Matinggiane ka botšepehi. Ha motho a ne a shoele, re ne re tantša ka mor’a lepato, ’me re letsa meropa. Hape re ne re hlaba liphoofolo. Re ne re lumela ho Kabuniane, ’me ke ne ke sa tsebe Molimo oa Bibele.” Sena o ne a se etsa empa e ne e le Mok’hatholike ka lebitso.

Lipaki tsa Jehova li ile tsa tla bolela sebakeng seo. Li ile tsa kopana le Lingbaoan ’me tsa mo khothalletsa hore a bale Bibele. O hopola sena: “Ke Bibele e ileng ea nkholisa hore Jehova ke Molimo oa ’nete.” Ka mor’a moo Paki e ile ea ithuta Bibele le eena, ’me Lingbaoan o ile a etsa qeto ea ho sebeletsa Molimo oa ’nete. O ile a furalla litsela tsa hae tsa nako e fetileng, ho akarelletsa boemo ba hae e le ramorabe, e leng bohato bo ileng ba halefisa moprista oa moo le bao e neng e le metsoalle ea Lingbaoan. Leha ho le joalo, Lingbaoan o ne a ikemiselitse ho latela linnete tseo a li fumaneng Bibeleng. Hona joale o sebeletsa e le moholo oa phutheho.

Ka Matsatsi a Supileng le Masiu a Tšeletseng

Le hoja likarolong tse ling tsa Abra ba utloa litaba tse molemo hoo e ka bang kamehla, tse ling li tsoile tjaro ’me li fumana litaba tse molemo ka linako tse itseng. Ka nako e fetileng, ho ile ha etsoa boiteko ba ho fihla ho se seng sa libaka tsena. Sehlopha sa Lipaki tse 35 se ile sa tsoa ho ea bolela tšimong e sa abuoang Tineg, Abra, ’me sebaka sena se ne se sa eteloa ka lilemo tse 27.

Leetong lena la ho bolela le ileng la nka matsatsi a supileng ho ne ho tsamauoa ka maoto. Ipone u tšela marokho a entsoeng ka liropo linōkeng tse tebileng ’me u hloa mekoalaba nako e telele u kakatetse—e le hore feela u e’o bolela litaba tse molemo ho ba li utloang seoelo! Masiung a tšeletseng a leeto lena, a mane ho ile ha robaloa lepalapaleng.

Le hoja Lipaki tsa sehlopha sena sa bo-petsoa-majoeng li ne li nkile lijo, li ne li sitiloe ho nka tse lekanang leeto kaofela. Leha ho le joalo, sena ha ea ba bothata hobane batho ba ne ba thabela ho fana ka lijo bakeng sa lingoliloeng tsa Bibele. Lipaki li ile tsa fumana lijo tse ngata tse lengoang, tlhapi le nama ea khama. Le hoja likhoreletso li ne li le teng, sehlopha sena se itse: “Matšeliso bakeng sa boitelo bona e bile thabo eo re ileng ra e fumana.”

Matsatsing ana a supileng, Lipaki tsena li ile tsa paka metsaneng e leshome, tsa tsamaisa libuka tse 60, limakasine tse 186, libukana tse 50 le lipampitšana tse ngata. Li ile tsa bontša lihlopha tse 74 tsa batho hore na thuto ea Bibele e khannoa joang. Toropong ea Tineg, ba boholong le baahi ba bang ba tsebahalang ba ile ba kōpa hore ho tšoaroe seboka, ’me ho ile ha ba teng batho ba 78. Boholo ba ba bileng teng e ne e le matichere le mapolesa. Ho na le tšepo ea hore Matinggiane a eketsehileng a sa ntsane a tla ikopanya le ba ‘hooang’ le ba rorisang Jehova litlhōrōng tsa lithaba.

Ntho e Molemo ho Feta Khauta

Tlaase Philippines ka boroa ho na le lihlekehleke tseo Masepanishe a ileng a fumana khauta ho tsona. Ke hona moo ho tsoang lebitso la Mindoro, e leng khutsufatso ea Sepanishe ea mina de oro, kapa “morafo oa khauta.” Leha ho le joalo, hona joale ho fumanoa ntho e molemo ho feta khauta lihlekehlekeng tsena—e leng batho ba batlang ho sebeletsa Jehova, Molimo oa ’nete.

Matsoalloa a moo a ka bang 125 000 a bitsoang Mangyane a lula merung e hare-hare ea Mindoro. A phela bophelo bo bonolo, a mangata a itšehlile thajana, ’me a na le puo ea ’ona. Boholo ba ’ona a lumela hore motho ke moea le ’mele, a rapela melimo e mengata, ’me a lumela hore ho na le libōpuoa tsa batho ba moea tse ngata.

Ka linako tse ling, ha a haelloa ke lijo le lintho tse ling, Mangyane a mang a tla libakeng tse lebōpong ho ea batla mosebetsi. Ho bile joalo ka Pailing, ea tsoang lesikeng la Mangyane le bitsoang Batangane. O hōletse har’a batho ba habo merung ea lithaba, ’me o ne a tšehetsa litumelo tsa Batangane le mekhoa ea bona. Seaparo se tloaelehileng e ne e le lesela le tlangoang thekeng. Ka Setangane, barapeli ba bitsa chai ka ho bolaea khoho, ebe ba tlohela mali a eona a rothele ka har’a metsi, ha ba ntse ba rapela.

Pailing ha a sa latela lineano tseo. Hobane’ng? Ha a fihla mabalane, o ile a fumana mosebetsi malapeng a Lipaki tsa Jehova. Malapeng ana, le leng le ile la sebelisa boemo bona hamolemo ho tsebisa Pailing ’nete ea Bibele. O ile a arabela hantle ’me a hlokomela molemo oa ho ithuta ka merero ea Jehova bakeng sa motho le lefatše. Le ile la lokisetsa hore a ee sekolong sa mathomo, le hore a ithute Bibele. Pailing o ile a kolobetsoa e le e mong oa Lipaki tsa Jehova ha a le lilemo li 24. Ha a le lilemo li 30, o ne a etsa selemo sa bobeli sekolong se phahameng, ’me o ile a fetola sekolo tšimo eo a bolelang ho eona. Hona joale ba mo bitsa Rolando (lebitso la mabalane).

Ha u kopana le Rolando, u tla bona Paki e apereng hantle e bososelang e sebeletsang e le ’moleli oa nako e tletseng le eo e leng mohlanka ea sebeletsang phuthehong e ’ngoe ea Mindoro. Rolando o sa tsoa khutlela lithabeng, eseng ho ea kopanela le Batangane lineanong tsa bona, empa ho ea ba bolella linnete tse phelisang tse ka Bibeleng.

Ho Chesehela ho Fumana Holo ea ’Muso

Profinse ea Bukidnon—e bolelang “Batho ba Lithabeng” ka Secebuano—e sehlekehlekeng se ka boroa sa Mindanao. Ke sebaka sa lithaba, likhohlo, liphula tse nang le linōka le lihlaba. Mobu o nonneng o atlehisa chai ea liphaenapole, poone, kofi, raese le libanana. Ke moo ho lulang merabe ea lithabeng ea Matalaandige le Mahigaonone. Le bona batho bana ho hlokahala hore ba ithute ka Jehova. Haufinyane tjena, haufi le toropo ea Talakag, monyetla ona o ile oa buleha ka tsela e thabisang haholo.

Lipaki tse neng li hloa mekoalaba li ile tsa fumana moea o batang empa kamohelo e le e mofuthu. Batho ba moo ba ne ba bolela hore ba lumela ho Molimo ea matla ’ohle, Ntate, empa ba ne ba sa tsebe lebitso la hae. Kaha boholo ba nako ba lula merung, ba ne ba qala ho kopana le Lipaki tsa Jehova. Ba ile ba tsebisoa lebitso la Molimo hammoho le morero oa hae o hlollang mabapi le ’Muso. Batho bana ba ile ba thaba, ’me ho ile ha etsoa qeto ea hore motse oa bona o tla eteloa hape.

Ho ile ha latela maeto a mangata. Ka lebaka leo, batho ba moo ba ile ba fana ka setša bakeng sa “ntlo” ea Lipaki tsa Jehova. Ka thabo Lipaki li ile tsa amohela mpho eo. Setša sena se ne se le tlhōrōng ea leralla le phahameng ka ho fetisisa sebakeng seo, se okametse ’mila. Ho ile ha hahuoa ka lehong, lehlaka le makala a sefate sa palema. Mohaho ona o ile oa phethoa ka likhoeli tse tharo le matsatsi a leshome. Letšoao le reng “Holo ea ’Muso ea Lipaki tsa Jehova” le ne le bonahala hantle ka pel’a mohaho. Hoa makatsa hore Holo ea ’Muso e ile ea hahuoa pele ho thehoa phutheho!

Ka mor’a moo, moholo e mong oa phutheho eo e bileng e leng mosebeletsi oa nako e tletseng, o ile a fallela moo, ’me mohlanka e mong ea sebeletsang le eena o ile a etsa joalo. Ba ile ba sebetsa hammoho le Lipaki tse tsoang libakeng tse haufi ka pakane ea ho theha phutheho. E ile ea fela ea thehoa ka August, 1998. Phutheho ena e nyenyane e sebelisa Holo ena ea ’Muso ka botlalo hona joale, e thusa batho ba lithabeng ho ithuta linnete tsa Bibele.

Ke ’nete hore Philippines Jehova o sebelisitse ka matla bahlanka ba hae ba ikemiselitseng ho jala ’nete ea ’Muso esita le lithabeng tseo ho leng thata ho fihla ho tsona. Re hopotsoa Esaia 52:7, e reng: “A khahleha hakaakang lithabeng maoto a ea tlisang litaba tse molemo.”

[Limmapa tse leqepheng la 11]

(Ha u batla ho bona boitsebiso bo hlophisitsoeng hantle, sheba sengoliloeng)

ABRA

MINDORO

BUKIDNON

[Tlhaloso ea Moo Setšoantšo se Nkiloeng Teng]

[Litšoantšo tse leqepheng la 10]

Ho bolela ka lithabeng ho akarelletsa ho tsamaea nako e telele moo ho leng matsaranka

[Litšoantšo tse leqepheng la 10]

Kolobetso molapong oa lithabeng