“Tloong ho ’na, . . . ’me ke Tla le Khatholla”

“Lisang Mohlape oa Molimo”

“Ka linako tsohle le re sekehela tsebe le ho re arolela mantsoe a tsoang Bibeleng a re khothatsang.”—Pamela.

“Rea leboha ka sohle seo le se etsang molemong oa rōna kaofela. Ka sebele, sena se re ama haholo.”—Robert.

PAMELA le Robert ba ile ba susumelletseha ho ngolla baholo ba Bakreste liphuthehong tsa habo bona tse fapaneng mantsoe ana a kananelo. Lefatšeng ka bophara, ba bang har’a bahlanka ba Molimo le bona ba tletse teboho ka lebaka la tšehetso le tlhokomelo tseo ba tsoelang pele ho li fumana ho ba “lisang mohlape oa Molimo.” (1 Petrose 5:2) Ka sebele, batho ba Jehova ba tletse teboho ka lebaka la lintho tse ngata tseo baholo ba ba etsetsang tsona le ka lebaka la mokhoa oo ba li etsang ka oona.

‘Ba na le ho Hongata Hoo ba ka ho Etsang’

Baholo ba Bakreste ba tšepetsoe boikarabelo bo bongata. (Luka 12:48) Ba lokisetsa lipuo bakeng sa liboka tsa phutheho ’me ba kopanela ho boleleng litaba tse molemo tsa ’Muso oa Molimo phatlalatsa. Mosebetsi oa bona o akarelletsa ho etsa maeto a bolisa ho balumeli-’moho le bona. Baholo ba tela nako bakeng sa ba hlokang tlhokomelo e khethehileng—ba hōlileng le ba hlokang—ba etsa tsena tsohle ba sa hlokomolohe boiketlo ba moea le ba nama ba malapa a bona. (Jobo 29:12-15; 1 Timothea 3:4, 5; 5:8) Baholo ba bang ba thusa ho haha Liholo Tsa ’Muso. Ba bang ba sebeletsa Likomiting Tsa Bohokahanyi le Lipetlele kapa e le litho tsa Lihlopha Tse Etelang Bakuli. Ba bangata ba bona ba etsa mosebetsi oa boithaopo likopanong tse nyenyane le tse khōlō. E, baholo ba ‘na le ho hongata hoo ba ka ho etsang mosebetsing oa Morena.’ (1 Bakorinthe 15:58) Hase ho makatsang hore ebe baholo ba sebetsang ka thata joalo ba ananeloa ka ho tebileng hakana ke ba behiloeng tlhokomelong ea bona!—1 Bathesalonika 5:12, 13.

Baholo bao khafetsa ba etelang Bakreste-’moho le bona malapeng kapa sebakeng leha e le sefe ho ba matlafatsa moeeng ke mohloli oa khothatso. Thomas ea hōtseng ho se na ntate ka lapeng, o re: “Ha e ne e se ka lebaka la tšehetso e lerato le khothatso tsa baholo, ha ke lumele hore kajeno nka be ke sebeletsa Jehova ke le mosebeletsi oa nako e tletseng.” Bacha ba bangata ba hōletseng malapeng a motsoali a le mong baa hlokomela hore tlhokomelo eo ba neng ba e fumana ho baholo e ba thusitse ho haha kamano ea botho le Molimo.

Ba hōlileng ka phuthehong le bona ba nka maeto a bolisa e le a bohlokoa haholo. Ka mor’a hore banyalani ba bang ba baromuoa ba lilemong tsa bo-80 ba eteloe ke baholo ba babeli, ba ile ba ngola: “Re rata ho le bolella kamoo re ananetseng ketelo ea lōna e thabisang haholo kateng. Ka mor’a hore le tsamaee, re ile ra boela ra bala mangolo ao le ileng la a tšohla le rōna. Re ke ke ra lebala mantsoe a lōna a khothatso.” Mohlolohali e mong ea lilemo li 70 o ile a ngolla baholo: “Ke ne ke ntse ke rapela Jehova ke kōpa thuso, ’me o ile a romela lōna barab’eso ba babeli lapeng ha ka. Ketelo ea lōna e bile tlhohonolofatso e tsoang ho Jehova!” Na u ruile molemo ketelong ea baholo ba phutheho ea heno morao-rao tjee? Ka sebele, kaofela ha rōna re ananela boiteko ba bona ba ho lisa mohlape o tlhokomelong ea bona!

Balisa ba Etsisang Molimo le Kreste

Jehova ke Molisa ea lerato. (Pesaleme ea 23:1-4; Jeremia 31:10; 1 Petrose 2:25) Jesu Kreste le eena ke Molisa ea hlahelletseng oa moea. Ha e le hantle, o bitsoa “molisa ea khabane,” “molisa e moholo” le “molisa ea ka sehloohong.” (Johanne 10:11; Baheberu 13:20; 1 Petrose 5:4) Jesu o ile a sebetsana joang le ba neng ba batla ho ba barutuoa ba hae? O ile a ba fa memo e mofuthu: “Tloong ho ’na, lōna bohle ba sehlang le ba imetsoeng, ’me ke tla le khatholla.”—Matheu 11:28.

Ka ho tšoanang, baholo kajeno ba ikitlaelletsa ho ba mohloli oa khatholoho le tšireletso ho mohlape. Banna ba joalo e “ba sebaka sa ho ipatela moea le sebaka sa ho ipatela pula e nang ka sefefo, joaloka melapo ea metsi naheng e se nang metsi, joaloka moriti oa lefika le leholo naheng e phophothehileng.” (Esaia 32:2) Basireletsi ba mofuta o joalo ba tlisa khatholoho, ba hlomphuoa ke mohlape le ho amoheloa ke Molimo.—Bafilipi 2:29; 1 Timothea 5:17.

Tšehetso ea Bohlokoa e Tsoang ho Basali ba Bona

Batho ba Molimo ba ananela baholo ba Bakreste le tšehetso e lerato eo banna bana ba e fumanang ho basali ba bona. Hore e be ba tšehetsang, hangata ho hlokahala hore basali ba joalo ba itele. Ka nako e ’ngoe, ba lula lapeng ha banna ba bona ba hlokometse litaba tsa phutheho kapa ha ba etsa maeto a bolisa. Ka linako tse ling, merero ea botho e entsoeng ka hloko ea fetoloa ka lebaka la bothata ba tšohanyetso bo hlahang ka phuthehong. Michelle o re: “Ho ntse ho le joalo, ha ke bona kamoo monna oa ka a tšoarehileng kateng ka ho lokisetsa liboka kapa ho etsa maeto a bolisa, kea hopola hore o etsa mosebetsi oa Jehova, ’me ke leka hore ke be ea tšehetsang kamoo nka khonang.”

Cheryl, eo le eena a nyetsoeng ke moholo, o re: “Kea tseba hore bara le barali babo rōna ka phuthehong ba hloka baholo bao ba ka buang le bona, ’me ke batla hore ba ikutloe ba lokolohile hore ba ka tla ho monna oa ka ka nako leha e le efe ha ba mo hloka.” Basali ba tšehetsang, ba joaloka Michelle le Cheryl, ba itela ka ho rata e le hore banna ba bona ba ka hlokomela linku tsa Molimo. Basali ba baholo baa ananeloa ka lebaka la moea oa bona oa ho tšehetsa.

Leha ho le joalo, moholo ea maphathaphathe ha aa lokela ho hlokomoloha bomoea le litlhoko tse ling tsa mosali oa hae le bana ba hae. Moholo ea nyetseng e lokela ho ba “eo ho seng seo a qosoang ka sona, monna oa mosali a le mong, ea nang le bana ba lumelang ba sa qosoeng ka ho inehella litakatso tsa nama kapa ho se laolehe.” (Tite 1:6) O lokela ho hlokomela lelapa la hae ka mokhoa oa bomolimo kamoo Mangolo a laelang balebeli ba Bakreste kateng.—1 Timothea 3:1-7.

Ho moholo ea phathahaneng, mosali ea tšehetsang ke letlotlo la bohlokoahali! Ke kamoo baholo ba nyetseng ba nahanisisang ba ikutloang kateng. Ho joalo feela kaha Bibele e re: “Na motho o fumane mosali ea molemo? O fumane ntho e molemo.” (Liproverbia 18:22) Ka mantsoe le ka liketso, baholo ba joalo ba bontša basali ba bona kananelo e tlohang botebong ba pelo. Ho phaella ho etseng thapelo e tiileng le ho ithuteng ho thabisang ba le ’moho, banyalani bana ba Bakreste ba behella ka thōko nako ea ho thabela lintho tse kang ho tsamaea lebōpong la leoatle, ho thapolla maoto har’a lifate, kapa ho itsamaela serapeng sa lifate le lipalesa. E, baholo ba fumana thabo ka ho fa basali ba bona tlhokomelo e lerato.—1 Petrose 3:7.

Baholo bao ka ho hloka boithati ba lisang mohlape oa Molimo ke mohloli oa khatholoho ea moea ho batho ba Jehova. Ruri ke “limpho tseo e leng banna,” ke tlhohonolofatso ho phutheho!—Baefese 4:8, 11-13.