Re Lokela ho ba le Pono Efe ka Batho ha Letsatsi la Jehova le Ntse le Atamela?

“Jehova ha a liehe mabapi le tšepiso ea hae, . . . empa ha a le felle pelo hobane ha a lakatse hore leha e le mang a timetsoe empa o lakatsa hore bohle ba fihle pakong.”—2 PETROSE 3:9.

1, 2. (a) Jehova o na le pono efe ka batho kajeno? (b) Re ka ipotsa lipotso life?

BAHLANKA ba Jehova ba filoe mosebetsi oa hore ba “etse batho ba lichaba tsohle barutuoa.” (Matheu 28:19) Ha re ntse re etsa mosebetsi ona ebile re letetse “letsatsi le leholo la Jehova,” ho hlokahala hore re be le pono e tšoanang le ea hae ka batho. (Sofonia 1:14) Jehova o na le pono efe ka batho? Moapostola Petrose o re: “Jehova ha a liehe mabapi le tšepiso ea hae, joalokaha batho ba bang ba ho nka e le tieho, empa ha a le felle pelo hobane ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Pono ea Molimo ke hore motho ka mong o na le monyetla oa ho fihla pakong. Thato ea hae ke hore “batho ba mefuta eohle ba pholohe ’me ba fihle tsebong e nepahetseng ea ’nete.” (1 Timothea 2:4) Ha ho pelaelo hore Jehova oa thaba ha “ea khopo a furalla tsela ea hae ’me a lula a phela.”—Ezekiele 33:11.

² Na re na le pono e tšoanang le ea Jehova ka batho? Joaloka eena, na re nka hore batho ba morabe o mong le o mong le sechaba se seng le se seng e ka ba “linku tsa lekhulo la hae”? (Pesaleme ea 100:3; Liketso 10:34, 35) A re nahaneng ka mehlala e ’meli e bontšang bohlokoa ba ho ba le pono ea Molimo. Mehlaleng ena e ’meli, timetso e ne e le haufi, ’me bahlanka ba Jehova ba ne ba tsebisitsoe taba ena esale pele. Mehlala ena ke ea bohlokoa haholo ha re ntse re letetse letsatsi le leholo la Jehova.

Abrahama o ne a E-na le Pono e Tšoanang le ea Jehova

 3. Jehova o ne a e-na le pono efe ka baahi ba Sodoma le Gomora?

³ Mohlala oa pele ke oa mopatriareka ea tšepahalang Abrahama le metse e khopo ea Sodoma le Gomora. Eitse ha Jehova a utloa “mohoo oa pelaelo ka Sodoma le Gomora,” ha aa ka a potlakela ho timetsa metse eo le baahi bohle ba eona. O ile a etsa patlisiso pele. (Genese 18:20, 21) Mangeloi a mabeli a ile a romeloa Sodoma, ’me a ile a lula tlung ea monna ea lokileng ea bitsoang Lota. Bosiung boo mangeloi a fihlileng ka bona, “banna ba motse . . . ba pota-pota ntlo, ho tloha ho moshanyana ho ea ho monna-moholo, batho bohle e le mokhopi o le mong,” ba lakatsa ho kopanela liphate le mangeloi. Ho hlakile hore boitšoaro bona bo hlabisang lihlong ba baahi ba motse bo ne bo bontša hore o lokela ho timetsoa. Leha ho le joalo, mangeloi a ile a re ho Lota: “Na ho na le motho e mong eo u nang le eena moo? Mokhoenyana le bara ba hao le barali ba hao le bohle bao e leng ba hao motseng, u ba ntše sebakeng sena!” Jehova o ile a bula tsela ea ho pholosa baahi ba bang ba motse ona, empa qetellong, Lota le barali ba hae ba babeli ke bona feela ba ileng ba pholoha timetso.—Genese 19:4, 5, 12, 16, 23-26.

4, 5. Ke hobane’ng ha Abrahama a ile a etsa kōpo e tiileng bakeng sa baahi ba Sodoma, hona na pono ea hae e ne e tšoana le ea Jehova?

⁴ Leha ho le joalo, a re khutleleng nakong ea ha Jehova a senola morero oa hae oa ho hlahloba metse ea Sodoma le Gomora. Ke nakong ena moo Abrahama a ileng a kōpa ka tieo a re: “A re re ho na le batho ba lokileng ba mashome a mahlano ka har’a motse. Joale, na u tla ba felisa ’me u se ke ua tšoarela sebaka seo ka lebaka la ba lokileng ba mashome a mahlano ba ka har’a sona? Ha ho utloahale hore u etse ka mokhoa ona, u bolaee motho ea lokileng le ea khopo hoo ho tlang ho etsahala ho motho ea lokileng joalokaha ho etsahala ho ea khopo! Ha ho utloahale bakeng sa hao. Na Moahloli oa lefatše lohle a ke ke a etsa se nepahetseng?” Ka makhetlo a mabeli Abrahama o ile a sebelisa poleloana e reng “ha ho utloahale bakeng sa hao.” Ka tsebo eo Abrahama a neng a e-na le eona, Jehova o ne a ke ke a timetsa motho ea lokileng le motho ea khopo. Ha Jehova a bolela hore a ke ke a timetsa Sodoma haeba ho e-na le “batho ba lokileng ba mashome a mahlano ka har’a motse” oo, Abrahama o ile a tsoela pele ho fokotsa palo ho fihlela e fihla ho ba leshome feela.—Genese 18:22-33.

⁵ Na Jehova a ka be a ile a mamela likōpo tsa Abrahama haeba li ne li sa lumellane le kamoo Eena a neng a bona lintho kateng? Ho hlakile hore o ne a ke ke a etsa joalo. Kaha Abrahama e ne e le “motsoalle oa Jehova,” ho hlakile hore o ne a tseba pono ea Jehova ebile a e-na le eona. (Jakobo 2:23) Ha Jehova a rera ho nka khato ka Sodoma le Gomora, o ne a ikemiselitse ho mamela likōpo tsa Abrahama. Hobane’ng? Hobane Ntat’a rōna oa leholimo “ha a lakatse hore leha e le mang a timetsoe empa o lakatsa hore bohle ba fihle pakong.”

Pono ea Jonase ka Batho e ne e Fapane ka ho Feletseng

 6. Batho ba Ninive ba ile ba nka khato efe ka phatlalatso ea Jonase?

⁶ Joale, a re nahaneng ka mohlala oa bobeli, e leng oa Jonase. Mohlaleng ona ho ne ho tlil’o timetsoa motse oa Ninive. Moprofeta Jonase o ile a bolelloa hore a phatlalatse hore bobe bo motseng oo ‘bo nyolohetse ka pel’a Jehova.’ (Jonase 1:2) Motse oa Ninive le mathōko a oona o ne o le moholo, ‘o na le sebaka se ka tsamauoang matsatsi a mararo.’ Qetellong Jonase o ile a latela taelo ’me a kena Ninive, eaba oa phatlalatsa o re: “Ho setse matsatsi a mashome a mane feela, ’me Ninive e tla lihuoa.” Ha ba utloa seo, “batho ba Ninive ba qala ho beha tumelo ho Molimo, eaba ba phatlalatsa hore ho itingoe lijo ’me ho aparoe lesela la mokotla.” Esita le morena oa Ninive o ile a baka.—Jonase 3:1-6.

 7. Jehova o ile a ba le pono efe ka boikutlo bo fetohileng ba Baninive?

⁷ Bohato boo bo ne bo fapane hakaakang le ba motse oa Sodoma! Jehova o ile a ba le pono efe ka Baninive ba bakileng? Jonase 3:10 e re: “Molimo oa ’nete a ikutloa a soabile ka lebaka la tlokotsi eo a neng a buile hore o tla ba bakela eona; ’me ha aa ka a e baka.” Jehova o ile “a ikutloa a soabile” ka kutloisiso ea hore o ile a fetola tsela ea ho tšoara Baninive hobane ba ile ba fetola litsela tsa bona. Melao ea Molimo ha ea ka ea fetoha, empa Jehova o ile a fetola qeto ea hae ha a bona hore Baninive ba bakile.—Malakia 3:6.

 8. Ke hobane’ng ha Jonase a ile a halefa?

⁸ Ha Jonase a hlokomela hore Ninive ha e na ho timetsoa, na o ile a bona lintho ka leihlo la Jehova? Che, hobane re bolelloa se latelang: “Leha ho le joalo, ho Jonase e ne e le ho sa khahliseng ho hang, ’me a tuka ke bohale.” Jonase o ile a etsa eng hape? Tlaleho e re: “A rapela Jehova a re: ‘Oho! Jehova, na see hase sona seo ke neng ke tšoenyehile ka sona, ha ke sa ntse ke le naheng ea heso? Ke ka lebaka leo ke ileng ka tsoela pele ’me ka balehela Tarshishe; etsoe ke ne ke tseba hore u Molimo ea mosa le ea mohau, ea liehang ho halefa le ea tletseng mosa o lerato, le ea ikutloang a soabile ka lebaka la tlokotsi.’” (Jonase 4:1, 2) Jonase o ne a tseba litšobotsi tsa Jehova. Leha ho le joalo, nakong ena, moprofeta enoa o ile a halefa ’me ha aa ka a ba le pono ea Molimo ka baahi ba Ninive ba bakileng.

9, 10. (a) Jehova o ile a ruta Jonase thuto efe? (b) Ke hobane’ng ha re nahana hore qetellong Jonase o ile a ba le pono ea Jehova ka Baninive?

⁹ Jonase o ile a tsoela ka ntle ho Ninive, a haha lephephe eaba o lula moriting oa lona “ho fihlela a ka bona se neng se tla etsahalla motse oo.” Jehova o ile a melisa semela sa mohope hore se etsetse Jonase moriti. Letsatsing le latelang, semela sena se ile sa pona. Ha Jonase a halefa ka lebaka la sona, Jehova o ile a re: “U ile ua utloela semela sa mohope bohloko . . . Na ha kea tšoanela ho utloela Ninive motse o moholo bohloko, oo ho oona ho nang le batho ba fetang likete tse lekholo le mashome a mabeli bao ho hang ba sa tsebeng phapang pakeng tsa letsoho la bona le letona le letsoho la bona le letšehali, ho phaella liphoofolong tse ngata tse ruuoang?” (Jonase 4:5-11) Jonase o ile a ithuta thuto ea bohlokoa hakaakang ka pono ea Jehova ka batho!

¹⁰ Ha hoa tlalehoa hore na Jonase o ile a re’ng ha Molimo a bolela hore o ne a tla utloela batho ba Ninive bohloko. Leha ho le joalo, ho hlakile hore moprofeta enoa o ile a fetola pono ea hae ka Baninive ba bakileng. Re bolela joalo hobane Jehova o ile a mo sebelisa hore a ngole tlaleho ena e bululetsoeng.

U na le Boikutlo Bofe?

11. Ho hlakile hore Abrahama o ne a ka ba le pono efe ka batho ba phelang kajeno?

¹¹ Kajeno, re haufi le timetso e ’ngoe—ho timetsoa ha tsamaiso e khopo ea lintho ea hona joale letsatsing le leholo la Jehova. (Luka 17:26-30; Bagalata 1:4; 2 Petrose 3:10) Abrahama o ne a tla ba le pono efe ka batho ba phelang lefatšeng lee le haufi le ho timetsoa? Ho hlakile hore o ne a tla ameha ka ba e-s’o utloe ‘litaba tse molemo tsa ’muso.’ (Matheu 24:14) Abrahama o ile a kōpa Molimo a sa khaotse mabapi le bao e ka ’nang eaba e ne e le batho ba lokileng ba Sodoma. Na le rōna re amehile ka batho ba ka ’nang ba furalla litsela tsa lefatše le taolong ea Satane haeba ba ka fuoa monyetla oa ho baka le ho sebeletsa Molimo?—1 Johanne 5:19; Tšenolo 18:2-4.

12. Ke hobane’ng ha ho le bonolo ho ba le boikutlo bo kang ba Jonase ka batho bao re kopanang le bona ha re le tšimong, ’me re ka etsa joang ka see?

¹² Ke hantle ho labalabela hore bokhopo bo fele. (Habakuke 1:2, 3) Leha ho le joalo, ho bonolo haholo ho ba le boikutlo bo kang ba Jonase, e leng ho se tsotelle batho ba ka ’nang ba baka. Sena se etsahala haholo haeba kamehla re kopana le batho ba sa thabeleng litaba tse molemo, ba tletseng lehloeo, kapa ba mabifi haeba re ba tlisetsa molaetsa oa ’Muso malapeng a bona. Re ka ’na ra hlokomoloha bao e leng hona Jehova a tla ba ntša tsamaisong ena e khopo ea lintho. (Baroma 2:4) Haeba ha re itlhahloba re hlokomela hore re na le boikutlo bo kang boo Jonase a neng a e-na le bona pele ka baahi ba Ninive, re ka rapella hore re be le pono e tšoanang le ea Jehova.

13. Ke hobane’ng ha re ka re Jehova o amehile ka batho kajeno?

¹³ Jehova o amehile ka batho ba sa mo sebeletseng hona joale, ’me o mamela likōpo tse matla tsa batho ba hae ba inehetseng. (Matheu 10:11) Ka mohlala, ha a araba lithapelo tsa bona, “o tla etsa hore ba etsetsoe toka.” (Luka 18:7, 8) Ho feta moo, ka nako ea hae, Jehova o tla phethahatsa litšepiso tsohle tsa hae le merero eohle ea hae. (Habakuke 2:3) Sena se tla akarelletsa ho tlosa bobe bohle lefatšeng, feela joalokaha a ile a timetsa Ninive ka mor’a hore baahi ba eona ba khutlele liketsong tse khopo.—Nahume 3:5-7.

14. Re lokela ho etsa eng ha re ntse re letetse letsatsi le leholo la Jehova?

¹⁴ Ho fihlela tsamaiso ee e khopo ea lintho e tlosoa letsatsing le leholo la Jehova, na re tla leta ka mamello, re tšoarehile ka matla ho etsa thato ea hae? Ha re tsebe hore na re tla etsa mosebetsi oa boboleli ho fella kae pele letsatsi la Jehova le fihla, empa seo re se tsebang ke hore litaba tse molemo tsa ’Muso li tla boleloa lefatšeng lohle leo ho ahiloeng ho lona ho fihlela Molimo a khotsofala pele bofelo bo fihla. ’Me ka sebele re lokela ho ameha ka “lintho tse lakatsehang” tseo e leng hona li tla tlisoa ha Jehova a ntse a tsoela pele ho tlatsa ntlo ea hae ka khanya.—Hagai 2:7.

Pono ea Rōna e Senoloa ke Liketso

15. Ke eng se ka eketsang kananelo ea rōna bakeng sa mosebetsi oa ho bolela?

¹⁵ Mohlomong re phela tikolohong eo ho eona batho ba sa rateng mosebetsi oa rōna oa boboleli ’me maemo a rōna ha a re lumelle ho fallela moo ho hlokahalang bahoeletsi ba ’Muso ba eketsehileng. A re re mohlomong ho ka fumanoa ba leshome tšimong ea rōna pele bofelo bo fihla. Na re nahana hore re lokela ho itšoenya ka ho batla batho bao ba leshome? Jesu o ile a “hauhela” bongata “hobane bo ne bo sohlokehile ’me bo qhalakane joaloka linku tse se nang molisa.” (Matheu 9:36) Ha re ithuta Bibele hape re bala ka hloko lihlooho tsa Molula-Qhooa le Tsoha!, re ka utloisisa mahlomola a lefatše lena haholoanyane. ’Me sena se ka eketsa kananelo ea rōna ea hore hoa hlokahala hore re bolele litaba tse molemo. Ho feta moo, ha re sebelisa ka kananelo lingoliloeng tse thehiloeng Bibeleng tse lokisetsoang ke “lekhoba le tšepahalang le le masene,” re ka bolela ka mokhoa o kholisang haholoanyane tšimong e sebetsoang khafetsa.—Matheu 24:45-47; 2 Timothea 3:14-17.

16. Re ka eketsa katleho ea tšebeletso eo re e etsang joang?

¹⁶ Kameho ea rōna ka bao e leng hona ba ka ’nang ba nka khato ka molaetsa o phelisang oa Bibele e re susumelletsa ho nahana ka linako le litsela tse sa tšoaneng tseo ka tsona re ka kenyelletsang taba ho beng ba matlo ha re le tšimong. Na ha re fihla matlong re fumana batho ba bangata ba le sieo malapeng? Haeba ho joalo, re ka ’na ra eketsa katleho ea tšebeletso eo re e etsang ka ho fetola linako le libaka tsa mosebetsi oa rōna oa bopaki. Batšoasi ba litlhapi ba tšoasa ka nako eo li tšoasehang. Na re ka etsa se tšoanang mosebetsing oa rōna oa ho tšoasa ha moea? (Mareka 1:16-18) Moo molao o lumelang, ke hobane’ng ha u sa leke ho paka mantsiboea le ho paka ka thelefono? Ba bang ba fumane hore libaka tseo ho ka ‘tšoasoang’ haholo ho tsona ke moo ho pakoang likoloi, kapa moo ho palameloang likoloi teng, moo ho tšeloang peterole le mabenkeleng. Hore re na le boikutlo bo kang ba Abrahama ka batho, ho boetse ho bonahala ha re sebelisa menyetla ea ho paka ka mokhoa o sa reroang.

17. Re ka khothatsa baromuoa le ba bang ba sebeletsang linaheng lisele ka litsela life?

¹⁷ Ba bangata ha ba e-s’o utloe molaetsa oa ’Muso. Ho phaella boboleling ba rōna, na re ka bontša ho ameha ka batho ba joalo leha re ntse re le malapeng a rōna? Na re tseba baromuoa kapa bo-pula-maliboho ba sebeletsang linaheng lisele? Haeba rea ba tseba, re ka ’na ra ba ngolla ho bontša hore re ananela mosebetsi oa bona. Seo se ka bontša joang hore re ameha ka batho bohle? Mangolo a rōna a khothatsang le a babatsang a ka matlafatsa baromuoa bao hore ba lule likabelong tsa bona, kahoo ba thusa batho ba bangata ka ho eketsehileng hore ba tsebe ’nete. (Baahloli 11:40) Hape re ka rapella baromuoa le ba lapetseng ’nete ba linaheng tse ling. (Baefese 6:18-20) Tsela e ’ngoe ea ho bontša kameho ke ka ho ntša menehelo bakeng sa mosebetsi oa lefatše ka bophara oa Lipaki Tsa Jehova.—2 Bakorinthe 8:13, 14; 9:6, 7.

Na U ka Falla?

18. Bakreste ba bang ba entse eng ho ntšetsa pele lithahasello tse amanang le ’Muso naheng eo ba lulang ho eona?

¹⁸ Ba falletseng libakeng tseo ho hlokahalang baboleli ba eketsehileng ba ’Muso ho tsona, ba hlohonolofalitsoe ka lebaka la boitelo ba bona. Leha ho le joalo, Lipaki tse ling tsa Jehova li ithutile puo e ’ngoe li ntse li le linaheng tsa habo tsona e le hore li thuse batho ba tsoang linaheng lisele ho ithuta Bibele. Boiteko bo joalo bo bile le moputso o moholo. Ka mohlala, Lipaki tse supileng tse thusang batho ba Machaena motseng o mong oa Texas, U.S.A., li ile tsa amohela batho ba 114 moketeng oa Lijo Tsa Shoalane Tsa Morena ka 2001. Ba thusang lihlopha tsa mofuta ona ba hlokomela hore masimo a bona a loketse kotulo.—Matheu 9:37, 38.

19. Ho khothalletsoa hore u etse eng haeba u lohotha ho fallela naheng esele ho ea ntšetsa pele mosebetsi oa ho bolela ka ’Muso moo?

¹⁹ Mohlomong uena le lelapa la hao le ikutloa hore le boemong ba ho fallela sebakeng se hlokang bahoeletsi ba ’Muso ba eketsehileng. Ha ho le joalo, pele ho tsohle, ntho e bohlale ke ho ‘bala litšenyehelo.’ (Luka 14:28) Sena se hlokahala haholo haeba motho a lohotha ho fallela naheng esele. Ke hantle hore bohle ba nahanang ho etsa joalo ba ipotse lipotso tse kang: ‘Na ke tla tseba ho hlokomela lelapa la ka? Na ke tla fumana tumello ea ho kena naheng eo? Na ke se ke ntse ke bua puo ea naha eo, kapa na ke ikemiselitse ho ithuta eona? Na ke nahanne ka boemo ba moo ba mocheso le mohatsela? Na e hlile nka ba “thuso e matlafatsang” eseng mokhoka-khoale ho balumeli-’moho le ’na naheng eo?’ (Bakolose 4:10, 11) E le hore u tsebe hore na tlhokahalo e khōlō hakae naheng eo u nahanang ho fallela ho eona, kamehla ke hantle hore u ngolle ofisi ea lekala ea Lipaki Tsa Jehova e laolang mosebetsi oa boboleli sebakeng seo.a

20. Mokreste e mong e monyenyane o ile a itella balumeli-’moho le eena le batho ba bang joang naheng esele?

²⁰ Mokreste e mong ea ’nileng a kenya letsoho kahong ea Liholo Tsa ’Muso Japane o ile a tseba hore ho hlokahala basebetsi ba nang le bokhoni ba tla haha sebaka sa borapeli Paraguay. Kahobane ke lesooa ebile hape o na le matla a bocha, o ile a fallela naheng eo ’me a sebetsa ka likhoeli tse robeli e le eena feela ea sebetsang ka nako eohle mosebetsing oo. Ha a ntse a le moo, o ile a ithuta Sepanishe a ba a khanna lithuto tsa mahae tsa Bibele. O ne a bona hore ho hlokahala baboleli ba ’Muso naheng eo. Le hoja a ile a khutlela Japane, kapele feela o ile a menahana le mehlala a khutlela Paraguay le ho thusa ho bokella batho ka Holong ea ’Muso eo a e hahileng.

21. Kameho ea rōna e khōlō le pono e lokela ho ba efe ha re ntse re letetse letsatsi le leholo la Jehova?

²¹ Molimo o tla etsa bonnete ba hore mosebetsi oa ho paka o phethoa ka botlalo, tumellanong le thato ea hae. Kajeno, o potlakisa mosebetsi oa ho qetela oa kotulo ea moea. (Esaia 60:22) Joale, ha re ntse re letetse letsatsi la Jehova, a re cheseheleng mosebetsi oa kotulo ’me re be le pono eo Molimo a nang le eona ka batho.

[Mongolo o botlaaseng ba leqephe]

Na Ua Hopola?

• Ha re ntse re letetse letsatsi la Jehova, re lokela ho ba le pono efe ka batho?

• Pono ea Abrahama e ne e le efe ka batho ba lokileng bao e neng e ka ’na eaba ba lula Sodoma?

• Jonase o ne a e-na le pono efe ka batho ba bakileng ba Ninive?

• Re ka bontša joang hore re na le pono e tšoanang le ea Jehova ka batho ba e-s’o utloe litaba tse molemo?

[Setšoantšo se leqepheng la 16]

Abrahama o ile a ba le pono eo Jehova a nang le eona ka batho

[Setšoantšo se leqepheng la 17]

Jonase o ile a ba le pono ea Jehova ka Baninive ba bakileng

[Litšoantšo tse leqepheng la 18]

Ho ameha ka batho ho re susumelletsa ho nahana ka linako le litsela tse sa tšoaneng tsa ho bolela litaba tse molemo