Ho Lehlohonolo ba Tlotlisang Molimo
“Li tla inama ka pel’a hao, Jehova, li tlotlise lebitso la hao.”—PESALEME EA 86:9.
1. Ke hobane’ng ha re khona ho tlotlisa Molimo ka tsela e fetang eo lintho tse bōpiloeng tse sa pheleng li ka mo tlotlisang ka eona?
JEHOVA o lokela ho rorisoa ke pōpo eohle ea hae. Le hoja lintho tseo a li bōpileng tse sa pheleng li mo tlotlisa li ntse li khutsitse, rōna batho re na le matla a ho nahana, ho utloisisa, ho ananela le ho rapela. Ka hona, mopesaleme o bua le rōna ha a re: “Hooang ka tlhōlo ho Molimo, lōna batho bohle ba lefatše. Binelang khanya ea lebitso la hae lipina tsa thoriso. Etsang hore thoriso ea hae e be e khanyang.”—Pesaleme ea 66:1, 2.
2. Ke bo-mang ba mametseng taelo ea hore ba tlotlise lebitso la Molimo, hona hobane’ng?
2 Boholo ba batho bo hana ho ela Molimo hloko kapa ho mo tlotlisa. Leha ho le joalo, linaheng tse 235 Lipaki Tsa Jehova tse ka holimo ho limilione tse tšeletseng li bontša hore li bona ‘litšobotsi tse sa bonahaleng’ tsa Molimo ka lintho tseo a li entseng le hore li ‘utloile’ bopaki bo khutsitseng ba pōpo. (Baroma 1:20; Pesaleme ea 19:2, 3) Ka ho ithuta Bibele, li boetse li tsebile Jehova le ho mo rata. Pesaleme ea 86:9, 10 e ile ea bolela tjena esale pele: “Lichaba tsohle tseo u li entseng li tla tla, li tla inama ka pel’a hao, Jehova, li tlotlise lebitso la hao. Etsoe u moholo ’me u etsa lintho tse makatsang; u Molimo, uena u le mong.”
3. “Bongata bo boholo” bo ‘etsa tšebeletso e halalelang bosiu le motšehare’ joang?
3 Ka ho tšoanang Tšenolo 7:9, 15 e hlalosa “bongata bo boholo” ba barapeli bo “etsetsa [Molimo] tšebeletso e halalelang bosiu le motšehare ka tempeleng ea hae.” Hoo ha ho bolele hore Molimo o hlile o batla hore bahlanka ba hae ba mo rorise mocha-o-chele, empa barapeli ba hae ke litho tsa mokhatlo o hlophisitsoeng oa lefatše lohle. Kahoo ha e le bosiu linaheng tse ling, bahlanka ba Molimo ba ka lehlakoreng le leng la lefatše ba tšoarehile ka ho paka. Ka tsela eo ho ka boleloa hore bosiu le motšehare ho na le ba ntseng ba tlotlisa Jehova. Haufinyane “ntho e ’ngoe le e ’ngoe e phefumolohang” e tla phahamisa lentsoe e rorise Jehova. (Pesaleme ea 150:6) Empa hajoale re ka etsa’ng ho tlotlisa Molimo re le batho ka bomong? Ke mathata afe ao re ka ’nang ra thulana le ’ona? Hona ba tlotlisang Molimo ba tla fumana litlhohonolofatso life? Ho araba lipotso tsena, a re ke re hlahlobeng tlaleho e ’ngoe ka Bibeleng e buang ka moloko oa Baiseraele oa Gade.
Bothata ba Khale
4. Moloko oa Gade o ile oa thulana le bothata bofe?
4 Pele litho tsa sechaba sa Iseraele tsa moloko oa Gade li kena Naheng e Tšepisitsoeng, li ile tsa kōpa ho lula naheng e nang le makhulo a matle ka bochabela ho Jordane. (Numere 32:1-5) Ho lula moo ho ne ho tla bolela hore li ne li tla lokela ho hlōla mathata a tebileng. Meloko e ka bophirimela e ne e tla sireletsoa ke Phula ea Jordane—eo e neng e le mokoallo oa tlhaho, ha e hlaseloa ke lebotho la sesole. (Joshua 3:13-17) Leha ho le joalo, ha e bua ka libaka tse ka bochabela ho Jordane, The Historical Geography of the Holy Land, ea George Adam Smith, e re: “Kaofela ha tsona [li] namme joalokaha eka ha ho mokoallo oa letho, sehlabeng se seholo sa Arabia. Ka lebaka leo, haesale li pepeselitsoe tlhaselo ea bo-hloma-u-hlomole ba lapileng, bao ba bang ba bona ba neng ba li futuhela selemo le selemo ba batla lekhulo.”
5. Jakobo o ile a khothalletsa litloholo tsa Gade hore li etse’ng ha li hlaseloa?
5 Moloko oa Gade o ne o tla hlōla khatello eo e sa eeng moriting joang? Makholo a lilemo pejana, ha moholo-holo oa oona Jakobo a ne a profeta a le makhatheng a lefu o ile a re: “Ha e le Gade, o tla futuheloa ke sehlopha sa bafutuhi, empa o tla futuhela karolo e ka morao-rao.” (Genese 49:19) Ha a habanngoa feela mantsoe ao a ka bonahala a tepeletsa. Empa, ha e le hantle e ne e le taelo ea hore Bagade ba itoanele. Jakobo o ile a ba tiisetsa hore ha ba ka etsa joalo, bafutuhi ba ne ba tla khutlela morao ba hlabiloe ke lihlong, Bagade ba ba behile merebele.
Mathata ao re Thulanang le ’Ona Borapeling ba Rōna Kajeno
6, 7. Boemo ba Bakreste kajeno bo tšoana le ba moloko oa Gade joang?
6 Joaloka moloko oa Gade, kajeno Bakreste ba pepeselitsoe likhatello le meroalo ea tsamaiso ea Satane; ha ho letho le re sireletsang ka mohlolo hore re se ke ra loana le tsona. (Jobo 1:10-12) Ba bangata ba rōna ba tlameha ho tobana le likhatello tsa ho kena sekolo, ho iphelisa le ho hōlisa bana. Hape ha rea lokela ho hlokomoloha likhatello tsa botho kapa tse hlahang ka hare ho motho ka boeena. Ba bang ba tlameha ho mamella “moutloa nameng” o tlang ka sebōpeho sa kholofalo kapa ho kula ho tebileng. (2 Bakorinthe 12:7-10) Ba bang ba hlaseloa ke maikutlo a hore hase ba bohlokoa. “Matsatsi a tlokotsi” a botsofali a ka ’na a sitisa Bakreste ba hōlileng ho sebeletsa Jehova ka mafolofolo joaloka pele.—Moeklesia 12:1.
7 Moapostola Pauluse o boetse o re hopotsa hore “re loana . . . le makhotla a moea a khopo a leng libakeng tsa leholimo.” (Baefese 6:12) Ka linako tsohle re pepeselitsoe “moea oa lefatše,” moea oa borabele le boitšoaro bo litšila tse hlohlelletsoang ke Satane le bademona ba hae. (1 Bakorinthe 2:12; Baefese 2:2, 3) Joaloka Lota ea tšabang Molimo, kajeno re ka ’na ra utloisoa bohloko ke lintho tse litšila tseo batho ba re pota-potileng ba li buang le tseo ba li etsang. (2 Petrose 2:7) Re boetse re pepeselitsoe tlhaselo e tobileng ea Satane. Satane o loantša masala a batlotsuoa “ba bolokang litaelo tsa Molimo ’me ba e-na le mosebetsi oa ho paka ka Jesu.” (Tšenolo 12:17) “Linku tse ling” tsa Jesu le tsona Satane o li hlasela ka lithibelo le mahloriso.—Johanne 10:16.
Na re Lokela ho Inehela Kapa re Lokela ho Itoanela?
8. Re lokela ho etsa’ng ha Satane a re hlasela, hona hobane’ng?
8 Re lokela ho etsa’ng ha Satane a re hlasela? Joaloka moloko oa boholo-holo oa Gade, re lokela ho ba matla moeeng ’me re itoanele ka tsela e tumellanong le litaelo tsa Molimo. Ka masoabi, ba bang ba qalile ho inehela likhatellong tsa bophelo, ba hlokomoloha boikarabelo ba bona ba moea. (Matheu 13:20-22) Ha Paki e ’ngoe e hlalosa hore na ke hobane’ng ha lenane la ba bang teng libokeng le le tlaase phuthehong ea habo eona e ile ea re: “Ka sebele barab’abo rōna baa khathala. Ba imetsoe.” Ke ’nete hore kajeno batho ba na le mabaka a mangata a ho khathala. Ka hona, ho bonolo ho talima borapeli ba Molimo e le khatello e ’ngoe, e le mokhoka-khoale. Empa na eo ke pono e utloahalang—kapa e nepahetseng?
9. Ho jara joko ea Kreste ho tlisa khatholoho joang?
9 Nahana ka seo Jesu a ileng a se bolella bongata mehleng ea hae, boo ka ho tšoanang bo neng bo sohlokiloe ke likhatello tsa bophelo: “Tloong ho ’na, lōna bohle ba sehlang le ba imetsoeng, ’me ke tla le khatholla.” Na Jesu o ne a bolela hore motho o ne a tla khatholoha ka hore a fokotse tšebeletso ea hae ho Molimo? Ho fapana le hoo, Jesu o ile a re: “Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela meea ea lōna khatholoho.” Joko ke foreimi ea lepolanka kapa ea tšepe e etsang hore motho kapa phoofolo a khone ho jara moroalo o boima. Joale, ke hobane’ng ha motho leha e le ofe a ne a ka batla ho jara joko e joalo? Na re se re ntse re sa ‘imeloa’? Ho joalo, empa taba e ngotsoeng ea Segerike e ka boela ea baleha tjena: “Kenang le ’na tlas’a joko ea ka.” Ak’u nahane: Jesu o ithaopela ho re thusa ho jara mojaro oa rōna. Ha ho hlokahale hore re o jare ka matla a rōna.—Matheu 9:36; 11:28, 29, mongolo o botlaaseng ba leqephe ho NW; 2 Bakorinthe 4:7.
10. Boiteko ba rōna ba ho tlotlisa Molimo bo tlisa liphello life?
10 Ha re jara joko ea ho ba barutuoa, re loantša Satane. Jakobo 4:7 ea tšepisa: “Le hanyetse Diabolose, ’me o tla le balehela.” Sena ha se bolele hore ho bonolo ho etsa joalo. Ho sebeletsa Molimo ho hloka boiteko bo boholo. (Luka 13:24) Empa Pesalemeng ea 126:5 Bibele e fana ka tšepiso ena: “Ba jalang peō ka meokho ba tla kotula ka mohoo oa thabo.” E, ha re rapele Molimo ea hlokang teboho. Ke “moputsi oa ba mo batlang ka tieo,” ebile o hlohonolofatsa ba mo tlotlisang.—Baheberu 11:6.
Ho Tlotlisa Molimo re le Baboleli ba ’Muso
11. Tšebeletso ea tšimo e re sireletsa litlhaselong tsa Satane joang?
11 Jesu o ile a fana ka taelo e reng: “Ka hona e-eang ’me le etse batho ba lichaba tsohle barutuoa.” Mosebetsi oa boboleli ke eona tsela e ka sehloohong ea ho nyehela “sehlabelo sa thoriso” ho Molimo. (Matheu 28:19; Baheberu 13:15) Ho etsa hore ‘maoto a rōna a roale lihlomo tsa litaba tse molemo tsa khotso’ ke karolo ea bohlokoahali ea ‘lihlomo tsa rōna tse feletseng tsa ntoa’—e leng tsona tse re sireletsang litlhaselong tsa Satane. (Baefese 6:11-15) Ho rorisa Molimo tšebeletsong ea tšimo ke tsela e babatsehang ea ho matlafatsa tumelo ea rōna. (2 Bakorinthe 4:13) Ho re thusa ho tlosa likelello tsa rōna mehopolong e fosahetseng. (Bafilipi 4:8) Ho kopanela tšebeletsong ea tšimo ho re fa monyetla oa ho thabela botsoalle bo hahang le barapeli-’moho le rōna.
12, 13. Ho kopanela kamehla tšebeletsong ea tšimo ho ka tsoela malapa molemo joang? Fana ka mohlala.
12 Hape mosebetsi oa boboleli e ka ba mosebetsi o molemo oa lelapa. Ho hlakile hore bana ba hloka boikhathollo bo itekanetseng. Leha ho le joalo, ha ho hlokahale hore nako eo le e qetang le le lelapa tšebeletsong ea tšimo e be bosula. Batsoali ba ka etsa hore e be e thabisang haholoanyane ka ho koetlisa bana ba bona hore ba atlehe tšebeletsong. Na ka tloaelo bana ha ba thabele lintho tseo ba li etsang hantle? Ha ba bontša ho leka-lekana, ba sa qobelle bana hore ba etse se ka holimo ho matla a bona, batsoali ba ka ba thusa hore ba fumane thabo tšebeletsong.—Genese 33:13, 14.
13 Ho phaella moo, lelapa le rorisang Molimo hammoho le theha maqhama a matla. Nahana ka morali e mong oabo rōna eo monna oa hae ea sa lumelang a ileng a mo siea le bana ba bahlano. O ile a thulana le bothata ba ho tlameha ho sebetsa le ho hlokomela bana ba hae ka lintho tse bonahalang. Na o ile a imeloa hoo a ileng a hlokomoloha lintho tsa bohlokoa tsa moea tseo bana ba hae ba li hlokang? O re: “Ke ne ke ithuta Bibele le likhatiso tsa Bibele ka mafolofolo ke bile ke leka ho sebelisa seo ke se balang. Kamehla ke ne ke e-ea le bana libokeng le tšebeletsong ea ntlo le ntlo. Boiteko ba ka bo ile ba e-ba le liphello life? Bana bao ba bahlano kaofela ba kolobelitsoe.” Ho kopanela ka botlalo tšebeletsong ho ka u thusa ka ho tšoanang boitekong ba hao ba ho hōlisa bana ba hao “ka taeo le kelello e laoloang ke Jehova.”—Baefese 6:4.
14. (a) Bana ba ka tlotlisa Molimo joang sekolong? (b) Ke eng e ka thusang bacha hore ba se ke ba hlajoa ke “lihlong ka litaba tse molemo”?
14 Bana, haeba le lula naheng eo ho eona molao o le lumellang, na le tlotlisa Molimo ka ho paka sekolong, kapa le lumella ho tšaba batho ho le sitisa? (Liproverbia 29:25) Paki e ’ngoe e lilemo li 13 ea Puerto Rico ea ngola: “Ha ho mohla nkileng ka ba lihlong ho paka sekolong hobane kea tseba hore ena ke ’nete. Kamehla ke phahamisa letsoho ka tlelaseng ebe ke bolela seo ke ithutileng sona Bibeleng. Haeba ke se ka tlelaseng, ke ea laebrari ke e’o bala buka ea Bacha Baa Botsa.”a Na Jehova o hlohonolofalitse boiteko ba hae? Oa tlaleha: “Ka linako tse ling liithuti-’moho le ’na li mpotsa lipotso li be li kōpe buka eo.” Haeba u ’nile ua tsilatsila ntlheng ena, mohlomong ho hlokahala hore u ipakele “thato ea Molimo e molemo le e amohelehang le e phethahetseng” ka hore u be mafolofolo thutong ea botho. (Baroma 12:2) Ha u kholisehile hore seo u ithutileng sona ke ’nete, le ka mohla u ke ke ua hlajoa ke “lihlong ka litaba tse molemo.”—Baroma 1:16.
‘Monyako o Bulehileng’ oa Tšebeletso
15, 16. “Monyako o moholo o isang tšebetsong” oo Bakreste ba bang ba keneng ka oona ke ofe, hona ba fumane litlhohonolofatso life?
15 Moapostola Pauluse o ile a ngola a re o buletsoe “monyako o moholo o isang tšebetsong.” (1 Bakorinthe 16:9) Na ebe maemo a hao a ka u lumella hore u kene ka monyako o isang tšebetsong e eketsehileng? Ho kopanela tšebeletsong ea bopula-maliboho ba kamehla kapa bo thusang ho akarelletsa ho nehelana ka lihora tse 70 kapa tse 50 khoeli le khoeli mosebetsing oa boboleli. Ka ho hlakileng, bo-pula-maliboho ba ananeloa ke Bakreste-’moho le bona ka lebaka la tšebeletso ea bona e tšepahalang. Empa hore ebe ba qeta nako e eketsehileng tšebeletsong ha ho etse hore ba ikutloe ba phahametse bara le barali babo bona. Ho fapana le hoo, ba hlaolela boikutlo bo ileng ba khothalletsoa ke Jesu: “Re makhoba a se nang molemo. Seo re se entseng ke seo re neng re tšoanela hore ebe re se entse.”—Luka 17:10.
16 Bopula-maliboho bo hloka ho itaea, ho ba motho ea hlophisehileng, le ho ikemisetsa ho intša sehlabelo. Empa litlhohonolofatso li tšoaneloa ke boiteko boo. Mocha e mong oa pula-maliboho ea bitsoang Tamika o re: “Ho khona ho tšoara Lentsoe la Molimo ka nepo ke tlhohonolofatso ea sebele. Ha u bula maliboho, u sebelisa Bibele haholo. Joale ha ke e-ea ka ntlo le ntlo ke khona ho nahana ka mangolo a loketseng mong’a ntlo ka mong.” (2 Timothea 2:15) Pula-maliboho e mong ea bitsoang Mica o re: “Ho bona kamoo ’nete e amang bophelo ba batho kateng ke tlhohonolofatso e ’ngoe e hlollang.” Ka ho tšoanang, mocha e mong ea bitsoang Matthew o bua ka thabo ea “ho bona motho a kena ’neteng. Ha ho thabo e kang ena.”
17. Mokreste e mong o ile a hlōla maikutlo a fosahetseng ka bopula-maliboho joang?
17 Na u ka nahana ka ho kenela bopula-maliboho? Mohlomong u rata ho etsa joalo empa u ikutloa u sa tšoanelehe. Morali e mong oabo rōna e mocha lilemong ea bitsoang Kenyatte o re: “Ke ne ke e-na le maikutlo a fosahetseng ka bopula-maliboho. Ke ne ke nahana hore nke ke ka khona. Ke ne ke sa tsebe ho lokisetsa linehelano kapa ho beha mabaka ka Mangolo.” Leha ho le joalo, baholo ba ile ba nkabela morali’abo rōna ea hōlileng moeeng oa pula-maliboho hore ke sebetse le eena. Kenyatte oa hopola: “Ke ile ka thabela ho sebetsa le eena. Seo se ile sa etsa hore ke batle ho ba pula-maliboho.” Ha u ka fumana khothatso le koetliso e itseng, mohlomong le uena u tla batla ho ba pula-maliboho.
18. Ba kenelang tšebeletso ea boromuoa ba ka fumana litlhohonolofatso life?
18 Bopula-maliboho bo ka bula monyako oa ho finyella litokelo tse ling tsa tšebeletso. Ka mohlala, banyalani ba bang ba ka ’na ba tšoanelehela ho koetlisetsoa boromuoa e le hore ba romeloe naheng esele ho ea bolela. Baromuoa ba tlameha ho itloaetsa naha e ncha, mohlomong puo e ncha, setso sesele le lijo tse ncha. Empa mathata a joalo e ba a sa reng letho ha a bapisoa le litlhohonolofatso tseo ba li fumanang. Mildred, moromuoa e mong oa Mexico eo e seng e le khale a li bona, o re: “Le ka mohla ha kea ka ka ikoahlaea ka qeto eo ke e entseng ea ho ba moromuoa. Haesale e le takatso ea ka ho tloha ha ke sa le ngoananyana.” O thabetse litlhohonolofatso life? “Naheng ea heso ho ne ho le thata ho fumana thuto ea Bibele. Mona teng ka linako tse ling batho ba bane bao ke ithutang le bona ba ’nile ba qala ho ea tšebeletsong ea tšimo ka nako e le ’ngoe!”
19, 20. Ba bangata ba fumane litlhohonolofatso joang tšebeletsong ea Bethele, ho sebeletseng linaheng tse ling, le Sekolong sa ho Koetlisetsoa Bosebeletsi?
19 Ba leng tšebeletsong ea Bethele liofising tsa makala tsa Lipaki Tsa Jehova le bona ba fumana litlhohonolofatso tse ngata. Ha Sven, e leng mor’abo rōna e mocha lilemong ea sebeletsang Jeremane, a bua ka mosebetsi oa hae Bethele o re: “Ke ikutloa hore ke etsa ntho e nang le molemo o sa feleng. Nka be ke sebelisitse bokhoni ba ka lefatšeng. Empa hoo ho ne ho tla tšoana le ho kenya chelete bankeng e makhatheng a ho oa.” Ke ’nete hore ho sebeletsa joaloka moithaopi ea sa lefuoeng ho hloka ho intša sehlabelo. Empa Sven o re: “Ha u chaisa, ua tseba hore sohle seo u se entseng letsatsing leo u ne u se etsetsa Jehova. ’Me seo se etsa hore u be le boikutlo bo ‘thabisang ka ho fetisisa.’”
20 Barab’abo rōna ba bang ba ’nile ba thabela tlhohonolofatso ea ho sebeletsa naheng e ’ngoe, ho sebetsa kahong ea makala linaheng lisele. Banyalani ba bang ba sebelelitseng likabelong tse robeli linaheng lisele ba ile ba ngola: “Barab’abo rōna ba mosa haholo mona. Lipelo tsa rōna li tla utloa bohloko ha re lokela ho tsamaea—e tla be e le lekhetlo la borobeli li ‘utloa bohloko.’ Re bile le phihlelo e babatsehang hakaakang!” Ka lehlakoreng le leng hape ho na le Sekolo sa ho Koetlisetsoa Bosebeletsi. Se fa barab’abo rōna ba masoha ba tšoanelehang koetliso ea moea. Mor’abo rōna e mong ea fumaneng koetliso ho sona o ile a ngola a re: “Ke hloka mantsoe a ka hlalosang kamoo ke le lebohang kateng ka sekolo se babatsehang hakaalo. Ke mokhatlo ofe o mong o ka etsang boiteko bo bokaalo ba ho koetlisa?”
21. Ke eng seo Bakreste bohle ba lokelang ho loanela ho se etsa tšebeletsong ea bona ho Molimo?
21 E, menyako e mengata ea tšebetso e bulehile. Ke ’nete hore boholo ba rōna ha re khone ho sebeletsa Bethele kapa naheng esele. Jesu ka boeena o ile a lumela hore Bakreste ba ne ba ke ke ba hlahisa “litholoana” tse lekanang ka lebaka la maemo a sa tšoaneng. (Matheu 13:23) Ka hona, joaloka Bakreste re lokela ho loanela ho sebelisa boemo ba rōna ka tsela e molemo ka ho fetisisa—ho kopanela tšebeletsong ea Jehova ka hohle kamoo maemo a rōna a re lumellang. Ha re etsa joalo, re tlotlisa Jehova ’me re ka kholiseha hore o thaba haholo. Nahana ka Ethel, e leng morali’abo rōna ea hōlileng ea lulang lehaeng la batho ba hlokang tlhokomelo. Kamehla o pakela batho bao a lulang le bona lehaeng lena ebile o kopanela ho pakeng ka thelefono. Ho sa tsotellehe mefokolo ea hae, o phetha tšebeletso ea hae ka moea oohle.—Matheu 22:37.
22. (a) Litsela tse eketsehileng tseo ka tsona re ka tlotlisang Molimo ke life? (b) Ke nako efe e babatsehang eo re tla e thabela?
22 Leha ho le joalo, hopola hore boboleli e mpa feela e le e ’ngoe ea litsela tseo re tlotlisang Jehova ka tsona. Ka ho beha mohlala ka boitšoaro le boitlhopho ba rōna ha re le moo re sebetsang teng, sekolong le lapeng, re thabisa pelo ea Jehova. (Liproverbia 27:11) Liproverbia 28:20 e fana ka tšepiso e reng: “Motho oa liketso tse tšepahalang o tla fumana litlhohonolofatso tse ngata.” Ka hona, re lokela ho ‘jala haholo’ tšebeletsong ea rōna ho Molimo, re tseba hore re tla kotula litlhohonolofatso tse ngata. (2 Bakorinthe 9:6) Ha re etsa joalo, re tla ba le tokelo ea ho phela nakong eo e babatsehang eo ka eona “ntho e ’ngoe le e ’ngoe e phefumolohang” e tla tlotlisa Jehova joalokaha a tšoanela ho tlotlisoa haholo!—Pesaleme ea 150:6.
[Mongolo o botlaaseng ba leqephe]
a Buka ea Lipotso Bacha Baa Botsa—Likarabo tse Sebetsang e hatisoa ke Lipaki Tsa Jehova.
Na U sa Hopola?
• Batho ba Molimo ba sebeletsa Jehova “bosiu le motšehare” joang?
• Moloko oa Gade o ile oa thulana le bothata bofe, hona seo se fa Bakreste thuto efe kajeno?
• Tšebeletso ea tšimo e re sireletsa litlhaselong tsa Satane joang?
• Ke ‘monyako ofe o bulehileng’ oo ba bang ba keneng ka oona, ’me ba thabetse litlhohonolofatso life?
[Setšoantšo se leqepheng la 15]
Joalokaha Bagade ba ile ba loantša lihlopha tsa bafutuhi, Bakreste ba tlameha ho loantša litlhaselo tsa Satane
[Setšoantšo se leqepheng la 17]
Re thabela botsoalle bo hahang tšebeletsong ea tšimo
[Setšoantšo se leqepheng la 18]
Bopula-maliboho bo ka bula monyako oa ho finyella litokelo tse ling tsa tšebeletso, tse akarelletsang:
1. Ho sebeletsa linaheng tse ling
2. Tšebeletso ea Bethele
3. Tšebeletso ea boromuoa