‘Le se ke la Korotla’

“Le ’ne le etse lintho tsohle le sa korotle.”—BAFILIPI 2:14.

1, 2. Ke keletso efe eo moapostola Pauluse a ileng a e fa Bakreste ba Filipi le ba Korinthe, hona hobane’ng?

LENGOLONG la hae le bululetsoeng ke Molimo le neng le e-ea phuthehong ea Bokreste ea lekholong la pele la lilemo e Filipi, moapostola Pauluse o ile a babatsa phutheho eo haholo. O ile a babatsa balumeli-’moho le eena ba motseng oo ka moea oa bona oa ho fana ka seatla se bulehileng le oa cheseho, ’me a bolela hore o thabela mesebetsi ea bona e metle. Leha ho le joalo, Pauluse o ile a ba hopotsa hore ba ‘’ne ba etse lintho tsohle ba sa korotle.’ (Bafilipi 2:14) Ke hobane’ng ha moapostola a ile a ba eletsa joalo?

² Pauluse o ne a tseba hore na ho korotla ho ka baka eng. Lilemo tse ’maloa pejana ho moo, o ne a ile a hopotsa phutheho ea Korinthe hore ho korotla ho ka ba kotsi. Pauluse o ile a hlalosa hore ha Baiseraele ba ntse ba le lefeelleng, ba ne ba ile ba halefisa Jehova ka makhetlo a mangata. Joang? Ka ho lakatsa lintho tse kotsi, ka ho rapela litšoantšo le ho etsa bohlola, ka ho leka Jehova, le ka ho korotla. Pauluse o ile a khothatsa Bakorinthe hore ba ithute mehlaleng ena. O ile a ngola a re: “Hape le se ke la ba bakorotli, feela joalokaha ba bang ba bona ba ile ba korotla, hore feela ba timetsoe ke motimetsi.”—1 Bakorinthe 10:6-11.

 3. Ke hobane’ng ha kajeno re amehile ka taba ee ea ho korotla?

³ Kaha re bahlanka ba Jehova ba mehleng ea kajeno, re bontša moea o tšoanang le oa phutheho ea Filipi. Re chesehela mesebetsi e metle, ebile re na le lerato har’a rōna. (Johanne 13:34, 35) Leha ho le joalo, ha re nahana ka kotsi eo ho korotla ho ileng ha e baka har’a batho ba Molimo nakong e fetileng, re na le lebaka le utloahalang la ho mamela keletso ena: “Le ’ne le etse lintho tsohle le sa korotle.” A re qaleng ka ho hlahloba mehlala ea ho korotla e boletsoeng ka Mangolong. Joale re tla tšohla lintho tse ling tseo re ka li etsang ho thibela hore ho korotla ho re bakele kotsi kajeno.

Phutheho e Mpe e Korotlela Jehova

 4. Baiseraele ba ile ba korotla ka tsela efe ha ba le lefeelleng?

⁴ Lentsoe la Seheberu le bolelang ‘ho korotla, ho honotha, ho belaela kapa ho luma-luma’ le sebelisitsoe ka Bibeleng mabapi le lintho tse etsahetseng ha Baiseraele ba ne ba le lefeelleng ka lilemo tse 40. Ka linako tse ling, Baiseraele ba ne ba sa khotsofalle maemo a bona bophelong ’me ba ne ba bontša sena ka ho korotla. Ka mohlala, libeke tse ’maloa feela ka mor’a hore ba lopolloe bokhobeng ba Egepeta, “phutheho eohle ea bara ba Iseraele ea qala ho korotlela Moshe le Arone.” Baiseraele ba ne ba belaela ka lijo, ba re: “Hoja ra bolaoa ke letsoho la Jehova naheng ea Egepeta ha re ne re lutse pel’a lipitsa tsa nama, ha re ne re ja bohobe ho fihlela re khotše, hobane le re tlisitse lefeelleng lena hore phutheho ena eohle e bolaoe ke tlala.”—Exoda 16:1-3.

 5. Ha Baiseraele ba ne ba belaela, ha e le hantle ba ne ba korotlela mang?

⁵ Ho fapana le seo Baiseraele ba neng ba se bua, Jehova o ile a ba hlokomela ka seo ba neng ba se hloka ha ba le lefeelleng, ka lerato a ba fa lijo le metsi. Ho ne ho se mohla Baiseraele ba neng ba le kotsing ea ho bolaoa ke tlala ha ba le lefeelleng. Leha ho le joalo, ba tletse moea oa ho se khotsofale, ba ile ba feteletsa boemo boo ba neng ba le ho bona ’me ba qala ho korotla. Le hoja lipelaelo tsa bona li ne li tobisitsoe ho Moshe le Arone, Jehova o ne a nka hore ho se khotsofale hoo ha bona ho tobisitsoe ho Eena. Moshe o ile a re ho Baiseraele: “Jehova o utloile ho mo korotlela ha lōna. ’Me re eng? Ha le korotlele rōna, empa le korotlela Jehova.”—Exoda 16:4-8.

6, 7. Joalokaha ho bontšitsoe ho Numere 14:1-3, boikutlo ba Baiseraele bo ne bo fetohile joang?

⁶ Nakoana ka mor’a moo, Baiseraele ba ile ba korotla hape. Moshe o ile a romela banna ba 12 ho ea hloela Naha e Tšepisitsoeng. Ba leshome ba bona ba ile ba tlisa tlaleho e mpe. Liphello ea e-ba life? “Bara bohle ba Iseraele ba qala ho korotlela Moshe le Arone, ’me phutheho eohle ea qala ho re khahlanong le bona: ‘Hoja ra shoella naheng ea Egepeta, kapa hoja ra shoella lefeelleng lena! Ke hobane’ng ha Jehova a re tlisa naheng ee [ea Kanana] hore re tl’o oa ka sabole? Basali ba rōna le bana ba rōna ba banyenyane ba tla fetoha se tlatlapuoeng. Na ha ho molemo hore re khutlele Egepeta?’”—Numere 14:1-3.

⁷ Boikutlo ba Baiseraele bo ne bo fetohile hakaakang! Kananelo eo ba neng ba e-na le eona qalong ha ba ne ba lokolloa Egepeta le ha ba lopolloa Leoatleng le Lefubelu e ne e ile ea ba susumetsa hore ba rorise Jehova. (Exoda 15:1-21) Leha ho le joalo, ha batho ba Molimo ba tobane le maemo a sa thabiseng a lefeelleng ebile ba tšohile Bakanana, kananelo eo ba neng ba e-na le eona e ile ea nkeloa sebaka ke moea oa ho se khotsofale. Ho e-na le hore ba lebohe Molimo ka tokoloho ea bona, ba ile ba mo beha molato ka seo ka phoso ba neng ba nka hore ke tahlehelo. Kahoo ho korotla e ne e le pontšo ea ho hloka kananelo ka litokisetso tsa Jehova. Hase feela a ileng a re: “Phutheho ena e mpe e tla ntšetsa pele ho korotla hona hoo e ho etsang khahlanong le ’na halelele hakae?”—Numere 14:27; 21:5.

Ho Korotla Lekholong la Pele la Lilemo

8, 9. Bolela mehlala ea ho korotla e tlalehiloeng ka Mangolong a Segerike a Bakreste.

⁸ Mehlala e boletsoeng ka holimo ea ho korotla e ne e ama lihlopha tsa batho bao ho totobetseng hore ba ne ba bolela phatlalatsa hore ha baa khotsofala. Leha ho le joalo, ha Jesu Kreste a ne a le Jerusalema Moketeng oa Maphephe ka 32 C.E., “ho ne ho e-na le menyenyetsi e mengata ka eena har’a bongata.” (Johanne 7:12, 13, 32) Ba ne ba mo seba, ba bang ba re ke motho ea molemo, ba bang bona ba re ha a molemo.

⁹ Ketsahalong e ’ngoe, Jesu le barutuoa ba hae e ne e le baeti lapeng ha Levi, kapa Matheu, eo e neng e le ’mokelli oa lekhetho. “Bafarisi le bangoli ba bona ba qala ho korotla ho barutuoa ba hae, ba re: ‘Ke hobane’ng ha le ja ’me le noa le babokelli ba lekhetho le baetsalibe?’” (Luka 5:27-30) Hamorao ha a le Galilea, “Bajuda ba qala ho korotlela [Jesu] kahobane a itse: ‘Ke ’na bohobe bo theohileng leholimong.’” Esita le balateli ba bang ba Jesu ba ile ba khopisoa ke seo a se buileng ’me ba qala ho korotla.—Johanne 6:41, 60, 61.

10, 11. Ke hobane’ng ha Bajuda ba buang Segerike ba ile ba korotla, hona baholo ba Bakreste ba ka rua molemo joang mokhoeng oo pelaelo eo e ileng ea sebetsoa ka oona?

¹⁰ Ho ile ha e-ba le phello e ntle ka mor’a ho korotla ho ileng ha etsahala nakoana ka mor’a Pentekonta ea 33 C.E. Nakong eo, barutuoa ba bangata ba neng ba sa tsoa sokoloha ba tsoang linaheng tse ka ntle ho Iseraele ba ne ba ntse ba thabela kamohelo e mofuthu ea baeti ea balumeli-’moho le bona ba Judea, empa ho ile ha hlaha mathata mabapi le ho arolelana se neng se le teng. Tlaleho e re: “Ha tsoha ho korotla har’a Bajuda ba buang Segerike khahlanong le Bajuda ba buang Seheberu, hobane bahlolohali ba bona ba ne ba hlokomolohuoa kabong ea letsatsi le leng le le leng.”—Liketso 6:1.

¹¹ Bakorotli bana ba ne ba sa tšoane le Baiseraele ha ba le lefeelleng. Bajuda ba buang Segerike ba ne ba sa korotlisoe ke boithati. Ba ile ba bua ka ho hlōleha ho hlokomela litlhoko tsa bahlolohali ba bang. Ho feta moo, bakorotli bao ha baa ka ba baka meferefere le ho belaela khahlanong le Jehova phatlalatsa. Ba ile ba isa tletlebo ea bona ho baapostola, ba ileng ba lokisetsa hore ho nkoe bohato ka potlako hobane tletlebo eo e ne e loketse. Ke mohlala o motle hakaakang oo baapostola ba o behetseng baholo ba Bakreste kajeno! Balisa bana ba Bakreste ba etsa bonnete ba hore ha ba ‘ithibe litsebe hore ba se ke ba utloa mohoo o belaelang oa ea tlaase.’—Liproverbia 21:13; Liketso 6:2-6.

Hlokomela Tšusumetso e Senyang ea ho Korotla

12, 13. (a) Ak’u etse mohlala ka liphello tseo ho korotla ho ka bang le tsona. (b) Ke’ng se ka ’nang sa susumetsa motho hore a korotle?

¹² Boholo ba mehlala ea Mangolo eo re e hlahlobileng e bontša hore ho korotla ho ile ha baka tšenyo e khōlō har’a batho ba Molimo nakong e fetileng. Ka hona, re lokela ho nahana ka ho teba ka tšusumetso e senyang eo ho korotla ho ka e bakang kajeno. Mohlomong papiso ena e ka re thusa. Ka tlhaho, mefuta e mengata ea lesenke e ratoa ke mafome. Ha mafome a hlokomolohuoa qalong, a ka ja lesenke hoo le ke keng la hlola le sa sebelisoa. Likoloi tse ngata li etsoa likarapa, e se hobane li ke ke tsa tsamaea, empa hobane lesenke la tsona le le mafome hoo ho leng kotsi ho tsamaea ka tsona. Re ka sebelisa papiso ee joang tabeng ea ho korotla?

¹³ Feela joalokaha mefuta e itseng ea lesenke e ratoa ke mafome, batho ba sa phethahalang ba tloaetse ho belaela. Re lokela ho itebela hore re lemohe letšoao leha e le lefe la ho belaela. Joalokaha mongobo le moea o letsoai o potlakisa hore lesenke le be mafome, litlokotsi li etsa hore re tloaele ho korotla. Ha re imetsoe likelellong, ntho e nyenyane feela e re khopisang e ka fetoha tabahali. Ha maemo a tsamaiso ena a ntse a mpefala matsatsing a ho qetela, mohlomong mabaka a etsang hore re belaele le ’ona a tla eketseha. (2 Timothea 3:1-5) Kahoo, mohlanka e mong oa Jehova a ka qala ho korotla ka e mong. Sesosa e ka ’na ea e-ba taba e nyenyane, e kang ho se khotsofalle bofokoli ba e mong, bokhoni ba hae kapa litokelo tsa hae tsa tšebeletso.

14, 15. Ke hobane’ng ha re sa lokela ho lumella tloaelo ea ho belaela hore e re laole?

¹⁴ Ho sa tsotellehe hore na lebaka la ho se thabe ha rōna ke lefe, haeba re ne re ka hlōleha ho laola tloaelo ea ho belaela, seo se ne se ka re bakela moea oa ho se khotsofale ’me sa etsa hore re be batho ba ratang ho korotla. Ka sebele, phello e senyang moeeng ea ho korotla e ka re silafatsa ka ho feletseng. Ha Baiseraele ba ne ba korotla ka bophelo lefeelleng, ba ile ba fetella hoo ba ileng ba beha Jehova molato. (Exoda 16:8) E se eka le ka mohla re ke ke ra etsa seo!

¹⁵ Mafome a ka fokotsoa ka hore lesenke le tlotsoe ka pente e thibelang mafome le ka ho potlakela ho lokisa matheba a mafome. Ka mokhoa o tšoanang, haeba re lemoha hore re tloaetse ho belaela, re ka khona ho ho laola haeba re rapella taba ena ka potlako ’me re leka ho e lokisa. Joang?

Sheba Litaba ka Pono ea Jehova

16. Tloaelo ea ho belaela e ka hlōloa joang?

¹⁶ Ho korotla ho etsa hore re inahane borōna feela le mathata a rōna ebile ho etsa hore re hlokomolohe melemo e mengata eo re e fumanang joaloka Lipaki Tsa Jehova. E le hore re hlōle tloaelo ea ho belaela, re lokela ho lula re ikhopotsa melemo ena. Ka mohlala, e mong le e mong oa rōna o na le tokelo e babatsehang ea ho bitsoa ka lebitso la Jehova. (Esaia 43:10) Re ka hlaolela ho ba le kamano e haufi le eena, ’me ka nako leha e le efe re ka khona ho bua le “Ea Utloang thapelo.” (Pesaleme ea 65:2; Jakobo 4:8) Bophelo ba rōna bo na le morero oa sebele hobane re utloisisa tseko ea bobusi ba bokahohleng ebile re hopola tokelo eo re nang le eona ea ho tšepahala ho Molimo. (Liproverbia 27:11) Re ka kopanela kamehla mosebetsing oa ho bolela litaba tse molemo tsa ’Muso. (Matheu 24:14) Ho ba le tumelo sehlabelong sa thekollo sa Jesu Kreste ho etsa hore re be le letsoalo le hloekileng. (Johanne 3:16) Tsena ke litlhohonolofatso tseo re li fumanang ho sa tsotellehe seo re lokelang ho se mamella.

17. Ke hobane’ng ha re lokela ho sheba litaba ka pono ea Jehova, esita le haeba re e-na le lebaka le utloahalang la ho belaela?

¹⁷ A re lekeng ho sheba litaba ka pono ea Jehova, eseng ea rōna feela. Mopesaleme Davida o ile a bina a re: “Ntsebise litsela tsa hao, Jehova; nthute litsela tsa hao.” (Pesaleme ea 25:4) Haeba re e-na le lebaka le utloahalang la ho belaela, Jehova oa le bona. A ka lokisa taba eo kapele-pele. Joale ke hobane’ng ha ka linako tse ling a lumella hore tlokotsi e tsoele pele? Molemo oa seo e ka ’na ea e-ba ho re thusa hore re sebeletse ho ba le litšobotsi tse molemo, tse kang ho se fele pelo, mamello, tumelo le tiisetso.—Jakobo 1:2-4.

18, 19. Bontša liphello tse ka ’nang tsa e-ba teng ha re mamella re sa belaele ha re le maemong a sa thabiseng.

¹⁸ Ho mamella re sa belaele ha re le maemong a sa thabiseng, ha ho re thuse feela hore re ntlafatse botho ba rōna empa ho ka ’na ha boela ha khahla ba shebeletseng boitšoaro ba rōna. Ka 2003, sehlopha sa Lipaki Tsa Jehova se ile sa nka leeto ka bese se tsoa Jeremane se e-ea kopanong Hungary. Mokhanni oa bese eo e ne e se Paki, ’me o ne a hlile a sa batle ho ba le Lipaki ka matsatsi a leshome. Leha ho le joalo, qetellong ea leeto leo, o ne a fetotse maikutlo a hae ka ho feletseng. Hobane’ng?

¹⁹ Nakong ea leeto ho na le lintho tse ’maloa tse sa kang tsa tsamaea hantle. Empa Lipaki ha lia ka tsa belaela. Mokhanni eo o ile a re bapalami bana e ne e le ba molemohali bao a kileng tsamaea le bona! Ha e le hantle, o ile a tšepisa hore lekhetlo le latelang ha Lipaki li etela ha hae, o tla li amohela ’me a li mamele ka hloko. Bapalami bao ba ile ba mo khahla hakaakang ka hore ‘ba etse lintho tsohle ba sa korotle’!

Ho Tšoarela ho Hlahisa Bonngoe

20. Ke hobane’ng ha re lokela ho tšoarelana?

²⁰ Ho thoe’ng haeba re e-na le pelaelo ka molumeli-’moho le rōna? Haeba taba eo e le khōlō, re lokela ho sebelisa melao-motheo e fumanoang mantsoeng a Jesu a tlalehiloeng ho Matheu 18:15-17. Leha ho le joalo, sena se ke ke sa hlokahala kamehla, kaha boholo ba lintho tseo re belaelang ka tsona ke tse nyenyane. Ke hobane’ng ha u sa nke boemo boo e le monyetla oa hore u ithute ho tšoarela? Pauluse o ile a ngola a re: “Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong. Esita le joalokaha Jehova a ile a le tšoarela ka bolokolohi, le etse joalo le lōna. Empa, ntle ho lintho tsena kaofela, le ikapese lerato, etsoe ke tlamo e phethahetseng ea bonngoe.” (Bakolose 3:13, 14) Na re ikemiselitse ho tšoarela? Na Jehova ha a na lebaka la ho belaela ka rōna? Leha ho le joalo, khafetsa o re utloela bohloko ebile oa re tšoarela.

21. Ba mamelang ho korotla ba ka ’na ba ameha joang?

²¹ Ho sa tsotellehe hore na pelaelo ea rōna ke efe, ho korotla ho ke ke ha rarolla litaba. Lentsoe la Seheberu le bolelang “ho korotla” le ka boetse la bolela “ho luma-luma.” Ka tloaelo, re ikutloa re sa phutholohe ha re e-na le motho ea lulang a korotla ’me re leka ho mo qoba. Haeba re korotla kapa re luma-luma, ba re mametseng le bona ba ka ’na ba ikutloa ka tsela e tšoanang. Ha e le hantle, ba ka ’na ba ikutloa ba sa phutholoha hoo ba ke keng ba rata ho tloaelana le rōna haholo! Ho luma-luma ho ka ’na ha etsa hore motho e mong a re ele hloko, empa ka sebele ho ke ke ha etsa hore motho eo a re rate.

22. Ngoanana e mong o ile a re’ng ka Lipaki Tsa Jehova?

²² Ho tšoarela ho hlahisa bonngoe—e leng ntho eo batho ba Jehova ba e ananelang haholo. (Pesaleme ea 133:1-3) Naheng e ’ngoe ea Europe, ngoanana ea lilemo li 17 oa Mok’hatholike o ile a ngolla ofising ea lekala ea Lipaki Tsa Jehova a li thoholetsa. O ile a re: “Ke oona feela mokhatlo oo ke o tsebang oo litho tsa oona li sa aroloang ke lehloeo, meharo, ho se mamellane, boithati, kapa ho hloka bonngoe.”

23. Re tla tšohla eng sehloohong se latelang?

²³ Ho ananela melemo eohle ea moea eo re e fumanang joaloka barapeli ba Molimo oa ’nete, Jehova, ho tla re thusa ho hōlisa bonngoe le ho qoba ho korotlela ba bang litabeng tsa botho. Sehlooho se latelang se tla bontša kamoo litšobotsi tsa bomolimo li tlang ho re thibela ho korotla ho kotsi le ho feta—e leng ho korotlela karolo e lefatšeng ea mokhatlo o hlophisitsoeng oa Jehova.

Na U sa Hopola?

• Ho korotla ho akarelletsa eng?

• Liphello tsa ho korotla li ka tšoantšoa le eng?

• Ke’ng e ka re thusang ho hlōla tloaelo ea ho korotla?

• Ho ikemisetsa ho tšoarela ho ka re thusa joang hore re tlohele ho korotla?

[Setšoantšo se leqepheng la 14]

Ha e le hantle Baiseraele ba ile ba korotlela Jehova!

[Setšoantšo se leqepheng la 17]

Na u leka ho sheba litaba kamoo Jehova a li shebang kateng?

[Litšoantšo tse leqepheng la 18]

Ho tšoarela ho hlahisa bonngoe ba Bokreste