Jehova oa Thaba ha U Mamela
“Mora oa ka, hlalefa ’me u thabise pelo ea ka.”—LIPROVERBIA 27:11.
1. Ke moea ofe o tletseng hohle molokong oa batho oa kajeno?
KAJENO moea oa boitaolo le oa ho se mamele o tletse hohle lefatšeng. Moapostola Pauluse o hlalosa lebaka la sena lengolong la hae le eang ho Bakreste ba Efese ha a re: “Ka nako e ’ngoe le [ne] le tsamaea ho tsona ho ea ka tsamaiso ea lintho ea lefatše lena, ho ea ka ’musi oa matla a moea, moea oo hona joale o sebetsang ho bara ba ho se mamele.” (Baefese 2:1, 2) Ha e le hantle Satane Diabolose, “’musi oa matla a moea,” o tšoaelitse lefatše lohle ka moea oa ho se mamele. O ne a etsa joalo lekholong la pele la lilemo, ’me o ’nile a etsa joalo ka matla a maholoanyane haesale a lelekoa leholimong hoo e ka bang ka nako ea Ntoa ea I ea Lefatše.—Tšenolo 12:9.
2, 3. Ke hobane’ng ha re lokela ho mamela Jehova?
2 Leha ho le joalo, joaloka Bakreste rea tseba hore re lokela ho mamela Jehova Molimo ka lipelo tsohle tsa rōna hobane ke ’Mōpi oa rōna, ’Moloki oa bophelo ba rōna, ’Musi ea lerato le Molopolli oa rōna. (Pesaleme ea 148:5, 6; Liketso 4:24; Bakolose 1:13; Tšenolo 4:11) Baiseraele ba mehleng ea Moshe ba ne ba tseba hore Jehova e ne e le Monehi-bophelo oa bona le Mopholosi oa bona. Ka lebaka leo, Moshe o ile a re ho bona: “Le ele hloko ho etsa feela joalokaha Jehova Molimo oa lōna a le laetse.” (Deuteronoma 5:32) E, ba ne ba lokela ho mamela Jehova. Empa, kapele ba ile ba tlohela ho mamela ’Musi oa bona.
3 Ke habohlokoa hakae hore re mamele ’Mōpi oa bokahohleng? Molimo o kile a laela moprofeta Samuele hore a re ho Morena Saule: “Ho mamela ho molemo ho feta sehlabelo.” (1 Samuele 15:22, 23) Ke hobane’ng ha ho le joalo?
Kamoo ho Mamela ho Leng “Molemo ho Feta Sehlabelo”
4. Re ka fa Jehova eng?
4 Kaha Jehova ke ’Mōpi, lintho tsohle tsa rōna tse bonahalang e se e ntse e le tsa hae. Ha ho le joalo, na ho na le ntho leha e le efe eo re ka mo fang eona? E, re ka mo fa ntho e ’ngoe ea bohlokoa haholo. Ntho eo ke eng? Re ka fumana karabo keletsong ena e reng: “Mora oa ka, hlalefa ’me u thabise pelo ea ka, e le hore nka araba ea ’nyelisang.” (Liproverbia 27:11) Ntho eo re ka e fang Molimo ke ho mo mamela. Le hoja maemo le limelo tsa rōna li sa tšoane, ha e mong le e mong oa rōna a mamela a ka shanofatsa polelo ea Satane Diabolose e lonya e reng batho ba ke ke ba lula ba tšepahala ho Molimo ha ba talimane le liteko. Eo ke tokelo e kaakang!
5. Ho se mamele ho ama ’Mōpi joang? Fana ka mohlala.
5 Molimo o thahasella liqeto tseo re li etsang. Oa ameha haeba re sa mo mamele. Joang? O utloa bohloko ha a bona mang kapa mang a khetha tsela eo e booatla. (Pesaleme ea 78:40, 41) Ha re re motho ea nang le lefu la tsoekere ha a je lijo tse loketseng tseo ngaka e neng e itse a li je ’me o tsoela pele ho ja lijo tse mo kulisang. Ngaka ea hae e amehileng ka eena e ne e tla ikutloa joang? Re ka kholiseha hore Jehova o utloa bohloko ha batho ba sa mo mamele, hobane o tseba liphello tsa ho hlokomoloha litaelo tsa hae tseo re lokelang ho phela ka tsona.
6. Ke’ng e tla re thusa ho mamela Molimo?
6 Ke’ng se tla thusa e mong le e mong oa rōna hore a mamele? Ke ho loketseng hore e mong le e mong oa rōna a kōpe Molimo hore a mo fe “pelo e mamelang,” joalokaha Morena Solomone a ile a kōpa. O ile a kōpa pelo e joalo e le hore a tsebe “ho lemoha pakeng tsa botle le bobe” e le hore a ahlole Baiseraele ba habo. (1 Marena 3:9) Re hloka “pelo e mamelang” e le hore re ka khetholla botle ho bobe lefatšeng leo ho lona moea oa ho se mamele o tletseng hohle. Molimo o re file Lentsoe la hae, lingoliloeng tse re thusang ho ithuta Bibele, liboka tsa Bokreste le baholo ba phutheho ba tsotellang e le hore re ka ithuta ho ba le “pelo e mamelang.” Na re sebelisa hamolemo litokisetso tseo tse entsoeng ka lerato?
7. Ke hobane’ng ha Jehova a nka ho mamela e le habohlokoa ho feta mahlabelo?
7 Tabeng ena, hopola hore nakong e fetileng Jehova o ile a bolella batho ba hae ba boholo-holo hore ho mamela ke habohlokoa ho feta mahlabelo a liphoofolo. (Liproverbia 21:3, 27; Hosea 6:6; Matheu 12:7) Ke hobane’ng ha ho ne ho le joalo, empa e le Jehova ea neng a laetse batho ba hae hore ba etse mahlabelo a joalo? Ha e le hantle, sepheo sa motho ea etsang sehlabelo ke sefe? Na o se etsa hore a khahlise Molimo? Kapa na o mpa a se etsa feela ho phetha molao? Haeba morapeli a hlile a lakatsa ho khahlisa Molimo, o tla etsa bonnete ba hore o mamela litaelo tsohle tsa Molimo. Molimo ha a hloke mahlabelo a liphoofolo, empa ntho ea bohlokoa eo re ka mo etsetsang eona ke ho mo mamela.
Mohlala o Lemosang
8. Ke hobane’ng ha Molimo a ile a tlosa Saule boreneng?
8 Tlaleho ea Bibele ea Morena Saule e hatisa hore ho mamela ke habohlokoa haholo. Saule o qalile e le morena ea ikokobelitseng le ea inyenyefalitseng, ‘a le monyenyane mahlong a hae.’ Leha ho le joalo, hamorao, ho ile ha bonahala boikhohomoso le monahano o fosahetseng liqetong tsa hae. (1 Samuele 10:21, 22; 15:17) Ka lekhetlo le leng, Saule o ne a lokela ho loana le Bafilista. Samuele o ile a bolella morena hore a mo letele hore a tl’o nyehela mahlabelo ho Jehova le ho fana ka litaelo tse eketsehileng. Leha ho le joalo, Samuele ha aa ka a tla kapele kamoo ho neng ho lebeletsoe kateng, ’me batho ba qala ho qhalana. Ha Saule a bona seo, a “qala ho nyehela sehlabelo sa secheso.” Sena ha sea ka sa khahlisa Jehova. Qetellong ha Samuele a fihla, morena o ile a ikemela ka hore kaha Samuele o liehile, o ile a “iqobella” ho nyehela sehlabelo sa secheso e le hore a nolofatse sefahleho sa Jehova. Ho ea ka Morena Saule, ho nyehela sehlabelo seo e ne e le habohlokoa ho feta ho mamela taelo eo a neng a e fumane ea hore a letele Samuele hore a tl’o etsa sehlabelo seo. Samuele o ile a re ho eena: “U entse ka booatla. Ha ua boloka taelo ea Jehova Molimo oa hao eo a u laetseng eona.” Ho se mamele Jehova ho ile ha etsa hore Saule a tlosoe boreneng.—1 Samuele 10:8; 13:5-13.
9. Saule o ile a bontša joang hore o tloaetse ho se mamele Molimo?
9 Na ho na le seo morena a ileng a ithuta sona phihlelong ee? Che! Hamorao Jehova o ile a laela Saule hore a felise sechaba sa Baamaleke, se neng se ile sa hlasela Baiseraele ntle ho mabaka. Saule o ne a sa lokela ho qenehela esita le mehlape ea bona. O ile a mamela Jehova ka ho “bolaea Baamaleke ho tloha Havila ho ea fihla Shure.” Ha Samuele a fihla ho eena, morena o ne a thabisitsoe ke tlhōlo eo haholo ’me a re: “U hlohonolofalitsoe ke Jehova. Ke phethile lentsoe la Jehova.” Empa, Saule le batho ba hae ha baa ka ba latela litaelo tse hlakileng tseo ba neng ba li fuoe eaba ha ba bolaee Morena Agage le “tse ntlehali tsa mohlape oa likhutšoane le tsa mohlape oa liphoofolo tse khōlō le tse nonneng le lipheleu le sohle se neng se le molemo.” Morena Saule a itokafatsa ka ho re: “Sechaba se ile sa qenehela tse ntlehali tsa mohlape oa likhutšoane le tsa mohlape oa liphoofolo tse khōlō, ka morero oa ho etsetsa Jehova Molimo oa hao sehlabelo.”—1 Samuele 15:1-15.
10. Ke eng eo Saule a sa kang a ithuta eona?
10 Eaba Samuele o re ho Saule: “Na Jehova o thabela linyehelo tsa secheso le mahlabelo joalokaha a thabela ho mameloa ha lentsoe la Jehova? Bona! Ho mamela ho molemo ho feta sehlabelo, ho ela hloko ho molemo ho feta mafura a lipheleu.” (1 Samuele 15:22) Kaha Jehova o ne a entse qeto ea hore liphoofolo tseo li timetsoe, li ne li sa amohelehe bakeng sa ho etsa mahlabelo.
Mamela Linthong Tsohle
11, 12. (a) Jehova o talima joang boiteko ba rōna ba ho mo khahlisa borapeling ba rōna? (b) Motho a ka ’na a ithetsa joang ka ho nahana hore o etsa thato ea Molimo empa ha e le hantle a sa mamele?
11 Jehova o thaba hakaakang ha a bona bahlanka ba hae ba tšepahalang ba lula ba tiile le har’a mahloriso, ba bolela ka ’Muso leha batho ba sa thahaselle, ’me ba kopanela libokeng tsa Bokreste le hoja ba tlameha ho iphelisa! Ha re mamela Jehova linthong tseo tsa bohlokoa tsa moea re thabisa pelo ea hae! Jehova o ananela boiteko boo re bo etsang ka lerato borapeling ba hae. Batho ba ka ’na ba se ke ba natsa mosebetsi oa rōna o boima, empa Molimo o ela hloko linyehelo tsa rōna tse etsoang ka pelo eohle ’me oa li hopola.—Matheu 6:4.
12 Leha ho le joalo, e le hore re khahlise Molimo oa rōna ka ho feletseng, re lokela ho mamela likarolong tsohle tsa bophelo ba rōna. Le ka mohla ha rea lokela ho ithetsa ka ho nahana hore re ka nka menyetla ea ho tlōla melao e itseng ea Molimo hafeela re mo sebeletsa likarolong tse ling tsa bophelo. Ka mohlala, motho a ka ’na a ithetsa ka ho nahana hore haeba a itlosa molato ka ho etsa mesebetsi e itseng ea borapeli, a ke ke a ahloleloa boitšoaro bo bobe kapa phoso e itseng e tebileng. O ne a tla be a fositse hakaakang!—Bagalata 6:7, 8.
13. Ha re le moo batho ba sa re boneng, re ka ’na ra lekoa joang hore na re mamela Jehova kapa che?
13 Ka hona, re ka ipotsa potso ena, ‘Na ke mamela Jehova linthong tseo ke li etsang letsatsi le letsatsi, esita le tseo ho bonahalang e le tsa botho?’ Jesu o itse: “Motho ea tšepahalang ho se senyenyane o tšepahala le ho se seholo, ’me motho ea sa lokang ho se senyenyane ha aa loka le ho se seholo.” (Luka 16:10) Na re ‘tsamaea botšepehing ba lipelo tsa rōna’ esita le ‘ka har’a matlo a rōna,’ moo ba bang ba sa re boneng? (Pesaleme ea 101:2) E, ha re le ka har’a matlo a rōna, botšepehi ba rōna bo ka ’na ba lekoa. Linaheng tse ngata moo lik’homphieutha li leng teng matlong a mangata, litšoantšo tse nyonyehang li fumaneha habonolo ka ho tobetsa konopo feela. Lilemong tse seng kae tse fetileng, motho o ne a ke ke a bona litšoantšo tse joalo ntle le hore a ee libakeng tsa boithabiso bo bontšang boitšoaro bo litšila. Na ka boikokobetso re tla ela hloko mantsoe a Jesu a reng: “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae”? Na ruri re tla hana esita le ho sheba litšoantšo tsa boitšoaro bo bobe? (Matheu 5:28; Jobo 31:1, 9, 10; Pesaleme ea 119:37; Liproverbia 6:24, 25; Baefese 5:3-5) Ho thoe’ng ka mananeo a TV a bontšang pefo? Na re lumellana le Molimo oa rōna, eo ‘ka sebele moea oa hae o hloileng mang kapa mang ea ratang pefo’? (Pesaleme ea 11:5) Kapa ho thoe’ng ka ho noa joala ho feta tekano ha re le moo batho ba sa re boneng? Bibele e nyatsa botahoa, empa e boetse e lemosa Bakreste hore e se ke ea e-ba makhoba a “veine e ngata.”—Tite 2:3; Luka 21:34, 35; 1 Timothea 3:3, NW, mongolo o botlaaseng ba leqephe.
14. Re ka bontša ka litsela life hore re mamela Molimo litabeng tsa lichelete?
14 Karolo e ’ngoe eo ho eona re lokelang ho ba hlokolosi ke ea ho sebetsana le litaba tsa lichelete. Ka mohlala, na re ne re ka kenella mekhoeng ea ho rua kapele e sekametseng bomenemeneng? Na re hoheloa ke mekhoa e seng molaong ea ho qoba ho lefa lekhetho? Kapa, na ho e-na le hoo, re ikitlaelletsa ho mamela taelo ea ho ‘fa bohle tse ba lokelang, ea batlang lekhetho, re mo fa lekhetho’?—Baroma 13:7.
Ho Mamela ho Susumetsoang ke Lerato
15. Ke hobane’ng ha u mamela litaelo tsa Jehova?
15 Ho mamela melao ea Molimo ho tlisa mahlohonolo. Ka mohlala, ha re sa tsube koae, re itšoere hantle, re hlompha khalalelo ea mali, re ka qoba ho tšoaroa ke mafu a itseng. Ho ekelletsa moo, ka ho phela tumellanong le ’nete ea Bibele likarolong tse ling tsa bophelo, re ka ’na ra rua molemo litabeng tsa lichelete, tsa kahisano, kapa tsa lelapa. (Esaia 48:17) Ka nepo ho ka thoe melemo e joalo ke mahlohonolo a bontšang hore melao ea Molimo ea sebetsa. Ho ntse ho le joalo, lebaka le ka sehloohong la hore re mamele Jehova ke hobane rea mo rata. Ha re sebeletse Molimo ka mabaka a boithati. (Jobo 1:9-11; 2:4, 5) Molimo o re file bolokolohi ba ho ikhethela ho mamela mang kapa mang eo re batlang ho mo mamela. Re ikhethela ho mamela Jehova hobane re batla ho mo khahlisa le hobane re batla ho etsa se nepahetseng.—Baroma 6:16, 17; 1 Johanne 5:3.
16, 17. (a) Jesu o ile a bontša joang hore o mamela Molimo hobane a mo rata ho tloha pelong? (b) Re ka etsisa Jesu joang?
16 Jesu o behile mohlala o phethahetseng oa ho mamela Jehova ka lebaka la ho Mo rata ho tloha pelong. (Johanne 8:28, 29) Ha Jesu a le lefatšeng, “o ile a ithuta ho mamela linthong tseo a ileng a utloisoa bohloko ke tsona.” (Baheberu 5:8, 9) Joang? Jesu “o ile a ikokobetsa ’me a mamela ho isa lefung, e, lefu thupeng ea tlhokofatso.” (Bafilipi 2:7, 8) Le hoja Jesu a ne a mamela ha a le leholimong, leha a le lefatšeng o ile boela a lekoa e le ho bona hore na oa mamela. Re ka kholiseha hore Jesu o tšoaneleha hantle ka litsela tsohle hore a sebeletse e le Moprista ea Phahameng bakeng sa barab’abo ba moea hammoho le batho ba bang ba lumelang.—Baheberu 4:15; 1 Johanne 2:1, 2.
17 Ho thoe’ng ka rōna? Re ka etsisa Jesu ka ho nka ho mamela Molimo e le ntho ea bohlokoa ’me re bontše seo ka ho etsa thato ea hae. (1 Petrose 2:21) Ka bomong re ka khotsofatsoa ke hore ho rata Molimo ho re susumelletsa ho phetha litaelo tsa Jehova, esita le linakong tseo ka tsona re hatelloang kapa re lekoang hore re etse se fapaneng. (Baroma 7:18-20) Sena se akarelletsa hore re ikemisetse ho mamela litaelo tsa ba etellang pele borapeling ba ’nete, le hoja ba sa phethahala. (Baheberu 13:17) Jehova oa thaba ha re mamela litaelo tsa hae le ha re le moo batho ba sa re boneng.
18, 19. Liphello e ba life ha re mamela Molimo ho tloha pelong?
18 Kajeno, ho mamela Jehova ho ka ’na ha akarelletsa ho mamella mahloriso e le hore re lule re tšepahala. (Liketso 5:29) Hape, ho mamela taelo ea Jehova ea ho bolela le ho ruta ho hloka hore re mamelle ho fihlela bofelong ba tsamaiso ena ea lintho. (Matheu 24:13, 14; 28:19, 20) Ho hlokahala hore re mamelle e le hore re tsoele pele ho bokana ’moho le barab’abo rōna, le hoja re ka ’na ra imeloa ke likhatello tseo lefatše le re tlisetsang tsona. Molimo oa rōna ea lerato o elelloa ka ho feletseng boiteko boo re bo etsang ba ho mamela litabeng tse joalo. Leha ho le joalo, e le hore re ka mamela ka ho feletseng, re lokela ho loanela ho hlōla takatso ea rōna ea boetsalibe ’me re furalle bobe, ha re ntse re ithuta ho rata se molemo.—Baroma 12:9.
19 Ha re sebeletsa Jehova ka lerato le ka lipelo tse tletseng kananelo, ho rōna “e ba moputsi oa ba mo batlang ka tieo.” (Baheberu 11:6) Mahlabelo a loketseng aa hlokahala hape aa rateha, empa se thabisang Jehova haholo ke hore re mo mamele ka ho feletseng hobane re mo rata.—Liproverbia 3:1, 2.
U ka Araba Joang?
• Ke hobane’ng ha re ka re ho na le seo re ka se fang Jehova?
• Saule o ile a etsa liphoso life?
• U ka bontša joang hore ua lumela hore ho mamela ho molemo ho feta sehlabelo?
• Ke’ng se u susumelletsang ho mamela Jehova?
[Setšoantšo se leqepheng la 26]
Ngaka e amehileng ka mokuli e ne e tla ikutloa joang ha a hlokomoloha keletso ea eona?
[Setšoantšo se leqepheng la 28]
Ke eng e ileng ea etsa hore Jehova a halefele Morena Saule?
[Setšoantšo se leqepheng la 30]
Na u mamela litaelo tsa Molimo ha u le lapeng moo batho ba sa u boneng?