“Ba ne ba Arohane ka Lipuo Empa ba Kopantsoe ke Lerato”

Topollo. Tokoloho. Pholoho. Ka lilemo tse makholo, batho ba ’nile ba labalabela ho lokoloha mathateng le matšoenyehong. Re ka sebetsana le mathata joang? Na ho na le mohla ho tla ke ho be le topollo? Haeba ho joalo, see se tla etsahala joang?

SENA e ne e le sehlooho sa letoto la likopano tsa matsatsi a mararo tse neng li hlophisitsoe ke Lipaki Tsa Jehova, tse ileng tsa qala ka May, 2006. Sehlooho se ne se re: “Topollo e Atametse!”

Ho tse robong tsa likopano tsena ho bile teng batho ba neng ba e-tsoa linaheng tse sa tšoaneng. Tsona li ne li tšoeroe ka July le August 2006, li tšoaretsoe Prague, motse-moholo oa Czech Republic; Bratislava, motse-moholo oa Slovakia; Chorzow le Poznan, Poland;a le metseng e mehlano e meholo ea Jeremane e leng Dortmund, Frankfurt, Hamburg, Leipzig le Munich. Kakaretso ea batho ba bileng teng likopanong tsena kaofela e ne e le ba ka holimo ho 313 000.

Ho ne ho rena moea oa mofuta ofe likopanong tsee? Li ile tsa fumana phatlalatso ea mofuta ofe? Ba bileng teng likopanong tsee ba ile ba ikutloa joang ka mor’a kopano?

Litlhophiso

Baeti hammoho le Lipaki tsa sebakeng seo ba ne ba lebeletse ka cheseho seo ba neng ba tseba hore e tla ba likopano tse matlafatsang moeeng tse sa lebaleheng. E ne e le mosebetsi o mongata haholo ho lokisetsa baeti marobalo a lekaneng. Ho tea mohlala, kopanong e neng e tšoaretsoe Chorzow, Lipaki tsa Mapolishe li ile tsa amohela baeti ba ka bang 13 000 ba tsoang Europe Bochabela malapeng a tsona. Baeti ba neng ba tlile kopanong ba ne ba e-tsoa Armenia, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, United States le Uzbekistan.

Batho ba bangata ba neng ba tlile kopanong ena ba ile ba tlameha ho etsa litokisetso tsa leeto la bona likhoeli tse ’maloa pele ho leeto. Tatiana eo e leng ’moleli oa kamehla ea tsoang Kamchatka, e leng hloahloa ea Russia e ka leboea bochabela ho Japane, o ile a qalella selemo esale pele ho boloka chelete bakeng sa leeto lena. O ile a lokela ho nka leeto la lik’hilomithara tse 10 500. Pele o ile a nka leeto la lihora tse 5 ka sefofane; eaba o tsamaea ka terene hoo e ka bang matsatsi a mararo, eaba o qetella ka ho tsamaea lihora tse 30 ka bese hore a tsebe ho fihla Chorzow.

Batho ba baloang ka likete ba ile ba ithaopela ho thusa mosebetsing o ileng oa etsoa pele ho likopano ho etsa hore mabala a lipapali le libaka tse a potileng e be libaka tse loketseng borapeli. (Deuteronoma 23:14) Mohlala o le mong feela, Lipaki tsa Leipzig li ile tsa etsa mosebetsi o motle oa ho hloekisa lebala la lipapali ’me li ile tsa tšepisa hore li tla boela li le hloekisa ha kopano e fela. Ka lebaka lena, liofisiri tse ikarabellang lebaleng leo li ile tsa hlakola molaoana o neng o hlaha tumellanong ea ho hira lebala leo, o neng o hloka hore ho lefshoe chelete e ngata bakeng sa litšenyehelo tsa ho hloekisa.

Ho Ntšoa Limemo

Lefatšeng ka bophara liphutheho li ile tsa tsebisa batho ka Likopano tsa sehlooho se reng “Topollo e Atametse!” Batho ba neng ba ea likopanong tse khethehileng ba ile ba kenya letsoho ka cheseho letšolong lena. Ba ile ba tsoela pele ho tsebisa batho ka kopano ho fihlela mantsiboea a maholo letsatsing le etellang kopano pele. Na cheseho ea bona e ile ea hlahisa litholoana?

Paki e ’ngoe ea Mopolishe e bitsoang Bogdan e ile ea kopana le monna-moholo e mong ea neng a batla ho ea kopanong empa a re a ke ke a tseba ho nka leeto la lik’hilomithara tse 120 ho ea Chorzow kaha chelete ea hae ea penshene e le nyenyane haholo. Ho ile ha etsahala hore ho be le sebaka sa motho a le mong beseng eo phutheho ea moo e neng e e hirile. Bogdan o re: “Re ile ra bolella monna-moholo eo hore a ka tsamaea le rōna a sa lefe letho haeba a ka fihla sebakeng seo bese e tla tloha ho sona ka5:30 hoseng.” Monna-moholo eo o ile a amohela memo eo, ’me a ba teng kopanong. Hamorao o ile a ngolla barab’abo rōna mantsoe ana: “Ka mor’a hore ke ee kopanong ena, ke ikemiselitse hore ke be motho ea molemo.”

Mantsiboeeng a mang monna e mong ea neng a lula hoteleng eo ba tlileng kopanong Prague ba tsoa Brithani ba neng ba lula ho eona, o ile a bolella barab’abo rōna hore le eena o ne a ile kopanong letsatsing leo. O ne a susumelitsoe ke’ng hore a ee kopanong? Monna eo o ile a re ka mor’a hore a fuoe maqetšoana a memo ke bahoeletsi ba leshome ba fapaneng literateng tsa motse, o ile a tlameha ho ea! O ne a thabile haholo ’me o ne a ikemiselitse ho tsoela pele a ithuta.—1 Timothea 2:3, 4.

Lijo Tsa Moea Tse Tiileng

Lenaneong ho ile ha tšohloa tsela ea ho sebetsana le mathata a sa tšoaneng. Keletso e tobileng ea Mangolo e ile ea hlalosa hore na mathata ana a ka rarolloa joang kapa hore na batho ba ka a mamella joang.

Batho ba tšoenngoang ke botsofali, ho kula le ba hlokahalletsoeng ke baratuoa ba bona kapa ba nang le mathata a mang ba ile ba khothatsoa ka Bibele hore ba be le tšepo. (Pesaleme ea 72:12-14) Banyalani le batsoali ba ile ba utloa keletso ea Bibele ea hore na ba ka ba le manyalo a thabisang joang le hore na ba ka atleha joang ho hōlisa bana. (Moeklesia 4:12; Baefese 5:22, 25; Bakolose 3:21) Bakreste ba bacha—ba lulang ba le kotsing ea ho susumetsoa ke lithaka ka tsela e fosahetseng ha ba le sekolong empa ha ba le lapeng le phuthehong ba fuoa keletso e bohlale e tsoang Lentsoeng la Molimo—ba ile ba fuoa keletso e sebetsang ea hore na ba ka sebetsana joang le tšusumetso eo ba e fumanang ho batho bao ba phelang har’a bona le ho ‘balehela litakatso tsa tlhaho tsa bocha.’—2 Timothea 2:22.

Mokhatlo oa Bara ba Motho oo ka Sebele e Leng oa Machaba

Kamehla Lipaki Tsa Jehova li fumana tataiso e ntle ea Mangolo lipokanong tsa tsona. (2 Timothea 3:16) Leha ho le joalo, ntho e ileng ea etsa hore likopano tsena e be tse ikhethang, ke hore ho ne ho e-na le baeti ba tsoang linaheng tse ling. Lenaneo la moea likopanong tsohle tse khethehileng le ne le tšoana empa le tsamaisoa ka lipuo tse ’maloa. Letsatsi le leng le le leng litho tsa Sehlopha se Busang sa Lipaki Tsa Jehova li ile tsa fana ka lipuo ’me litlaleho tse tsoang linaheng tse ling li ile tsa etsa hore lenaneo e be le thabisang le ho feta. Lipuo tsena li ne li fetoleloa molemong oa hore batho ba lipuo tse sa tšoaneng ba neng ba le teng lenaneong ba li utloe.

Ba tlileng kopanong ba ne ba e-na le tjantjello ea ho kopana le bara le baralib’abo bona ba tsoang linaheng tse ling. Motho e mong ea neng a tlile kopanong o ile a re: “Ho fapana ha lipuo ha hoa ka ha fana ka mathata, ho e-na le hoo, ho ile ha natefisa kopano ena le ho feta. Baeti ba ne ba e-tsoa litsong tse sa tšoaneng, empa kaofela ba ne ba kopantsoe ke tumelo e le ’ngoe.” Ba neng ba le kopanong ea Munich ba behile litaba tjena: “Ba arohane ka lipuo empa ba kopantsoe ke lerato.” Ho sa tsotellehe hore na ba ne ba e-tsoa hokae le hore na puo ea habo bona e ne e le efe, ba neng ba tlile kopanong ba ne ba utloa hore ba har’a metsoalle ea ’nete—bara le barali babo bona ba moea.—Zakaria 8:23.

Mantsoe a Teboho

Likopanong tse neng li tšoaretsoe Poland maemo a leholimo a ile a nonya maikutlo le mamello ea ba neng ba tlile kopanong. Hangata pula e ne e na ho bile ho bata haholo—maemo a mohatsela e ne e le likhato tse 14 tsa Celsius. Mor’abo rōna ea tsoang United States o ile a re: “Maemo ana a leholimo e ne e le a mabe le a batang ka ho fetisisa ao nkileng ka ba ho ona kopanong, ’me ke ne ke utloisisa lintho tse fokolang feela nakong ea lenaneo. Leha ho le joalo, moea oa machaba o hlollang, khotso e babatsehang haesita le kamohelo e mofuthu eo re ileng ra e fumana, li ile tsa etsa hore re lebale ka maemo a neng a se monate. Nke ke ka lebala kopano ena le khale!”

Ntho eo batho ba buang Sepolishe ba ke keng ba e lebala ka kopano eo ke tsebiso ea ho lokolloa ha buka ea Insight on the Scriptures ka Sepolishe—sena e bile moputso oa hore ebe ba ile ba mamella serame le pula. Bohle ba bileng teng Likopanong tsa “Topollo e Atametse!” ba ile ba thabela ho lokolloa ha buka e ncha ea Lula U Hopola Letsatsi la Jehova.

Ho na le mabaka a mang hape a etsang hore ba bangata ba hopole likopano tsena. Kristina, morali’abo rōna oa Leczech ea ileng a ithaopela ho tsamaea ka bese le ba neng ba tlile kopanong ba e-tsoa mose ho maoatle, o re: “Ha re ne re arohana, morali e mong oabo rōna o ile a mpitsetsa ka thōko, eaba oa nhaka ’me o re: ‘U ne u re hlokometse hantle haholo! U ile ua re tlisetsa lijo litulong tsa rōna ua ba ua re fa le metsi hore re noe. Rea leboha kamoo u ileng ua itella rōna kateng ka lerato.’” O ne a bua ka lijo tsa motšehare tseo baeti ba tsoang mose ho maoatle ba neng ba li lokiselitsoe. Morab’o rōna e mong o ile a re: “Re ne re e-s’o ka re etsa mosebetsi oa mofuta ona. Letsatsi le leng le le leng re ne re lokela ho isetsa batho liphutheloana tsa lijo tse ka bang 6 500. E ne e le ntho e amang maikutlo ho bona hore na e ne e le batho ba bangata hakaakang ba ileng ba ithaopela ho thusa, ’me ba ne ba akarelletsa le bana.”

Morali’abo rōna ea ileng a nka leeto la ho ea kopanong Chorzow a tsoa Ukraine o ile a re: “Ruri re hloletsoe ke lerato leo balumeli-’moho le rōna ba re bontšitseng lona le tsela eo ba re hlokometseng ka eona le eo ba fanang ka eona. Re haelloa ke mantsoe a teboho.” Annika oa Finland ea lilemo li robeli o ngoletse lekala la Lipaki Tsa Jehova le Poland mantsoe ana: “Ke ne ke sa lebella hore kopano ena e ne e tla ba e tsotehang hakana. Ke ntho ea bohlokoa haholo ho ba karolo ea mokhatlo oa Jehova kaha motho o ba le metsoalle lefatšeng ho pota!”—Pesaleme ea 133:1.

Se Builoeng ke Batho ba Neng ba Shebelletse

Pele ho likopano ho ile ha hlophisoa maeto a bohahlauli bakeng sa batho ba neng ba tlile likopanong. Libakeng tse ka ntle ho litoropo tsa Bavaria, baeti ba ile ba fapohela Liholong Tsa ’Muso tsa moo, moo ba ileng ba amoheloa ka mofuthu ke Lipaki tsa libakeng tseo. Motho e mong ea neng a tsamaisa bahahlauli eo e seng Paki o ile a khahloa haholo ke tsela eo Lipaki li neng li bontša lerato la bara ba motho ka eona. E mong oa ba neng ba tlile kopanong o re: “Ha re le ka beseng re khutlela hoteleng, motho ea neng a re bontša sebaka o ile a re re ne re fapane le batho ba bang bao a ileng a ba tsamaisa. Re ne re apere hantle re bile re e-na le tšebelisano le ba neng ba eteletse sehlopha sa rōna pele. Ho ne ho se na batho ba rohakanang ho bile ho se na pherekano. O ne a makalitsoe ke hore na ho tla joang hore batho ba neng ba sa tsebane ebe ba fetoha metsoalle ka ho panya ha leihlo.”

Mor’abo rōna ea neng a sebetsa Lefapheng la Phatlalatso kopanong ea Prague o re: “Hoseng ka Sontaha ofisiri e neng e okametse mapolesa a neng a behile maemo a litaba leihlo kopanong, e ile ea re etela. E ile ea hlokomela hore ho ne ho rena khotso, eaba e bolela hore ha ho na letho leo e le etsang. E ile ea boela ea re batho ba sebakeng seo ba lulang haufi le mabala a kopano ba ne ba botsa hore na lenaneo e ne e le la mofuta ofe. Ha a bitsa lebitso Lipaki Tsa Jehova feela hangata batho ba ne ba tšoha, ’me ofisiri ena e ne e re: ‘Haeba batho ba ne ba ka itšoara joaloka Lipaki Tsa Jehova, re ne re ke ke ra hloka mapolesa.’”

Ba Bangata ba se ba Lopollotsoe!

Lentsoe la Molimo Bibele, le tšoana le borokho bo kopanyang batho ba litso tse sa tšoaneng, bo kopanyang Bakreste hore ba be le khotso le bonngoe. (Baroma 14:19; Baefese 4:22-24; Bafilipi 4:7) Likopano tse khethehileng tsa “Topollo e Atametse!” li bontšitse bonnete ba sena. Lipaki Tsa Jehova li se li lopollotsoe litlokotsing tse ngata tse tšoenyang lefatše lena. Ho se mamellane, mabifi le khethollo ea merabe—ha ho boleloa mathata a seng makae a aparetseng batho—li batla li felisitsoe har’a tsona ’me li lebeletse nako eo ka eona lintho tsena li tla be li felile lefatšeng lohle.

Ba bileng teng likopanong tsena ba ile ba iponela ka mahlo bonngoe bo teng har’a Lipaki tse tsoang linaheng tse sa tšoaneng le litsong tse sa tšoaneng. Sena se ile sa totobala qetellong ea likopano. Bohle ba ne ba opa liatla, ba haka metsoalle ea bona e mecha ba bile ba nka le lifoto ka lekhetlo la ho qetela. (1 Bakorinthe 1:10; 1 Petrose 2:17) Ba tlileng kopanong ba ne ba thabile ba bile ba kholisehile hore haufinyane ba tla lopolloa mathateng le matšoenyehong ’ohle ’me ba ile ba khutlela mahae le liphuthehong tsa habo bona ba boetse ba ikemiselitse ho tšoara ka thata “lentsoe [la Molimo] la bophelo.”—Bafilipi 2:15, 16.

[Mongolo o botlaaseng ba leqephe]

[Lebokose/Setšoantšo se leqepheng la 10]

Ho Buuoa ka Lipuo tse 25 Joalokaha Eka ke ka Puo e le ’Ngoe

Likopanong tseo tse robong kaofela, lipuo li ile tsa fanoa ka puo ea sebaka ka seng. Likopanong tsa Jeremane lipuo li ile tsa fanoa ka lipuo tse ling tse 18. Dortmund lipuo li ile tsa fanoa ka Searabia, Sefarsi, Sepanishe Sepotoketsi, le Serussia; Frankfurt teng li ile tsa fanoa ka Sefora, Senyesemane le Seserbia/Secroatia; Hamburg lipuo li ile tsa fanoa ka Sedache, Sedanishe, Seswedishe le Setamile; Leipzig teng li ile tsa fanoa ka Sechaena, Sepolishe le Seturkey; ’me Munich li ile tsa fanoa ka Puo ea matsoho ea Sejeremane, Segerike le Setaliana. Kopanong ea Prague lipuo tsohle li ile tsa fanoa ka Seczech, Senyesemane le Serussia. Bratislava teng lipuo li ile tsa fanoa ka Puo ea matsoho ea Seslovak, Sehungary Senyesemane le Seslovak. Chorzow lipuo li fanoe ka Puo ea matsoho ea Sepolishe, Sepolishe, Serussia le ka Seukraine. Poznan teng li fanoe ka Sefinnishe le Sepolishe.

Lipuo tse 25 kaofela! Ruri ba tlileng kopanong ba ne ba arohane ka lipuo empa ba ne ba kopantsoe ke lerato.

[Setšoantšo se leqepheng la 9]

Batho ba Croatia ba neng ba tlile kopanong Frankfurt ba ile ba thaba ha ba fumana “Phetolelo ea Lefatše le Lecha” ka puo ea bona