Ke’ng se Etsang Hore Bophelo ba Hao bo be le Morero?
KENNY o ne a sebeletsa k’hamphani e sebetsanang le likonteraka tsa khoebo, a khanna selailai, ’me a e-na le folete e majabajaba sebakeng sa barui motseng o moholo. Kaha e ne e le mokaubere litabeng tsa ho tsubella moeeng ka pharachuti, o ne a thabela ho tsubella a le bophahamong ba limithara tse likete. Na see sohle se ne se mo khotsofatsa bophelong? The Wall Street Journal e re o ile a re: “Joale ke se ke le lilemo li 45, ’me ha ke na bokamoso . . . Ke phelela lelea.”
Elyn o ne a ikoetlisa ka matla hore e be sebapali se hloahloa sa ho thellisa leqhoeng. O ile a qetella e le sebapali se hlaheletseng, ’me a fumane botumo boo a neng a ntse a bo batla. Ka pelo e bohloko Elyn o ile a re: “Empa e kae thabo eo ke neng ke e lebeletse? Ke ne ke hlorile habohloko. Qetellong ke ne ke tla tsofala, ’me le hoja ke ne ke eme hantle licheleteng, ke ne ke tla be ke phelela lelea haeba e le sona feela seo ke se phelelang.”
Kaha Hideo o ne a tumme ka ho tsoaka mebala ka bokhabane, ho etsa litšoantšo e ne e le eona ntho e ka sehloohong bophelong ba hae. Ha aa ka a rekisa litšoantšo tsa hae; o ne a nahana hore ho etsa joalo ke ho nyenyefatsa mosebetsi oa ho etsa litšoantšo. Ho elella qetellong ea bophelo ba hae ba lilemo tse 98, o ile a fa musiamo e ’ngoe boholo ba litšoantšo tsa hae. O ne a phelela ho etsa litšoantšo. Empa o ne a sa khotsofala hobane a nahana hore ha ho mohla a tla ke a etse mosebetsi o tsoileng matsoho.
Batho ba bang ba ikakhela ka setotsoana ho thuseng ba bang. Ka mohlala, nahana ka motsamaisi e mong oa khoebo ea libaesekopo oa Hollywood. Kaha e ne e le motlatsi oa mopresidente oa k’hamphani e khōlō ka ho fetisisa ea libaesekopo United States, o ne a tloaelane le batho ba tummeng ’me a lula sebakeng sa barui. Ha a ne a le phomolong Cambodia, ngoanana ea itseng o ile a tla ho eena a kōpa chelete ha a ntse a e-ja sebakeng sa ho jela se Phnom Penh. O ile a mo fa dolara le seno-mapholi. Ngoanana eo o ile a thaba. Leha ho le joalo, mantsiboeeng a latelang ngoanana eo o ne a boetse a le sebakeng seo, a ntse a kōpa. Motsamaisi enoa o ile a bona hore ho ne ho hlokahala thuso e eketsehileng.
Ka mor’a selemo, a etsa qeto ea ho tlohela ho sebetsa khoebong ea boithabiso e le hore a thuse batho ba Cambodia ba futsanehileng. O ile a haha sekolo se fanang ka bolulo, lijo le thuto. Leha ho le joalo, ka linako tsohle maikutlo a hae aa loantšana—seo a se finyeletseng sea mo thabisa ebile sea mo khotsofatsa, empa o nyahamisoa le ho ferekanngoa ke mathata a ntseng a hloa manolo holimo ao a tlamehang ho sebetsana le ’ona.
Batho bana ba bane ba boletsoeng ka holimo ba ne ba nahana hore ba tseba seo ba se phelelang. Ho ntse ho le joalo, ka mor’a hore ba finyelle pakane eo ba e sebelelitseng ka thata, ba ile ba ikutloa eka ba hametse letanteng. Morero oa hao ke ofe bophelong? Ke lintho life tseo u li etelletsang pele bophelong ba hao? Na u kholisehile hore hamorao u ke ke ua ikoahlaela tsela eo u phelang ka eona?