Bophelo ba Hao bo ka ba le Morero!

BATHO ba bangata ba phelela chelete le lintho tse rekoang. Ba bang ba phelela ho iketsetsa lebitso lefatšeng. Ba bang ba phelela hore mosebetsi oa bona oa ho etsa litšoantšo e be o tsoileng matsoho. Ho boetse ho na le ba phelelang ho thusa ba bang. Empa ba bangata ha ba tsebe hore na ba phelela’ng.

Uena? Na u se u nahanne ka ho teba hore na u phelela’ng? Ke hobane’ng ha u sa hlahlobe lipakane tseo batho ba bang ba li hahamallang e le ho bona hore na li hlile lia khotsofatsa? Ke eng e etsang hore bophelo bo be le morero?

Chelete le Menyaka li na le Molemo o Itseng

Ho Moeklesia 7:12, Bibele e re: “Bohlale ke tšireletso joalokaha chelete e le tšireletso; empa molemo oa tsebo ke hore bohlale bo boloka ba nang le bona ba phela.” Ka sebele chelete e na le molemo. U hloka chelete e le hore u phele, haholo-holo haeba u na le boikarabelo ba ho hlokomela lelapa.—1 Timothea 5:8.

Bophelo bo ne bo ka ba joang hoja ho ne ho se na lintho tse thabisang tse rekoang ka chelete? Le hoja Jesu Kreste, Mothehi oa Bokreste, a ile a lumela hore ho ne ho se na moo a behang hlooho ea hae teng, ka linako tse ling o ne a thabela lijo tse monate le veine. Ho feta moo, ha aa ka a tlohela ho apara seaparo se turang.—Matheu 8:20; Johanne 2:1-11; 19:23, 24.

Leha ho le joalo, ha aa ka a phelela ho lelekisa menyaka. O ne a tseba hore na lintho tsa bohlokoa ke life. Jesu o itse: “Esita le ha motho a e-na le ho hongata haholo bophelo ba hae ha bo hlahe linthong tseo a nang le tsona.” Eaba o pheta papiso ea monna e mong oa morui ea neng a chaile haholo, ea ileng a ipolella a re: “Ke tla etsa joang, kaha joale ha ke na moo ke bokellelang lijalo tsa ka teng? . . . Ke tla qhaqha matlo a ka a polokelo ’me ke hahe a maholo, ’me ke tla bokellela lijo-thollo tsohle tsa ka le lintho tsohle tsa ka tse molemo moo; ’me ke tla re ho moea oa ka: ‘Moea, u na le lintho tse ngata tse molemo tse bolokiloeng ka lilemo tse ngata; khatholoha, u je, u noe, u ithabise.’” Na e ne e le phoso hore monna eo a nahane ka tsela eo? Ha a tsoela pele ho pheta papiso ena o re: “Molimo a re ho [morui eo], ‘Uena ea se nang kahlolo e molemo, bosiung bona ba batla moea oa hao ho uena. Joale, ke mang ea tla ba le lintho tseo u li bokeletseng?’” Le haeba motho eo a ne a bokeletse lijalo tsa hae, ha a e-shoa o ne a ke ke a thabela maruo ao a a bokeletseng. Qetellong, Jesu o ile a bontša seo bamameli ba hae ba ka ithutang sona, a re: “Kahoo ho joalo le ka motho ea ipolokelang letlotlo empa a sa ruela ho Molimo.”—Luka 12:13-21.

Ka sebele, re hloka chelete, ’me ho ithabisa ho na le molemo o itseng. Leha ho le joalo, chelete kapa menyaka hase lintho tsa bohlokoa ka ho fetisisa bophelong. Ho ruela ho Molimo, ke hore, ho phela bophelo bo khahlisang Molimo, ke eona ntho ea bohlokoa ka ho fetisisa eo re lokelang ho e hahamalla.

Na ho Iketsetsa Lebitso ke Ntho ea Bohlokoa?

Batho ba bangata ba phelela ho iketsetsa lebitso. Takatso ea ho iketsetsa lebitso, ho batla ho hopoloa ke ba bang, hase ntho e mpe. Bibele e re: “Lebitso le molemo ho feta oli e ntle, ’me letsatsi la ho shoa le molemo ho feta letsatsi la ho tsoaloa ha motho.”—Moeklesia 7:1.

Ha motho a e-shoa, ho joalokaha eka tlaleho ea bophelo bohle ba hae e ngotsoe. Haeba motho eo a entse lintho tse molemo, letsatsi leo a shoang ka lona le molemo haholo ho feta leo a tsoetsoeng ka lona kaha ho ne ho e-s’o ngoloe tlaleho ea letho.

Buka ea Bibele ea Moeklesia e ngotsoe ke Morena Solomone. Moholoane oa Solomone ea bitsoang Absalome, eo e neng e le ngoan’abo ka ntat’a bona, o ne a batla ho iketsetsa lebitso. Leha ho le joalo, ho bonahala bara ba hae ba bararo ba ka beng ba ile ba fetisetsa lebitso la hae melokong e latelang ba ile ba shoa ba sa le banyenyane. Joale, Absalome o ile a etsa’ng? Mangolo a re: ‘Absalome o ile a ikemisetsa sefika Khohlong ea Morena, etsoe o ile a re: “Ha ke na mora e le hore lebitso la ka le ’ne le hopoloe.” Kahoo a rehella sefika seo ka lebitso la hae.’ (2 Samuele 14:27; 18:18) Mesaletsa ea sefika seo ha e e-s’o fumanoe. Liithuti tsa Bibele li tseba Absalome e le lerabele le tummeng hampe, le ileng la etsa ’momori oa ho liha ntat’a lona Davida boreneng.

Kajeno ba bangata ba batla ho hopoloa ka seo ba se finyeletseng. Ba batla ho tuma bathong bao maikutlo a bona a lulang a fetoha. Empa, botumo bo joalo bo fella kae? Christopher Lasch o itse bukeng ea The Culture of Narcissism: “Mehleng ea kajeno, eo ka eona katleho e kaloang ka bocha ba motho, botle ba hae le ho khema le linako, botumo bo fela ka ho panya ha leihlo, ’me ba tummeng sechabeng ba lula ba tšoenyehile ka hore ba tla lahleheloa ke botumo boo.” Ka lebaka leo, likhalala tse ngata li inehella lithethefatsi le joala, ’me hangata sena se khutsufatsa bophelo ba tsona. Bonneteng ho batla botumo ke ho suha lerapo la puleng.

Kahoo, ke mang eo re batlang ho ba le botumo bo botle mahlong a hae? Jehova o ile a sebelisa moprofeta Esaia hore a re ka batho ba bang ba ileng ba mamela Molao oa hae: “Ke tla [ba] fa sefika le lebitso ka tlung ea ka le ka har’a marako a ka . . . Ke tla [ba] fa lebitso ho isa nakong e sa lekanyetsoang, le ke keng la felisoa.” (Esaia 56:4, 5) Batho ba khahlisang Molimo ba tla ba le “sefika le lebitso” kahobane ba mo mamela. Molimo o tla hopola lebitso la bona “ho isa nakong e sa lekanyetsoang” e le hore ba se ke ba felisoa. Bibele e re khothalletsa hore re iketsetse lebitso le joalo—e leng botumo bo botle mahlong a Jehova, ’Mōpi oa rōna.

Esaia o ne a bolela esale pele ka nako eo ka eona batho ba tšepahalang ba tla rua bophelo bo sa feleng Paradeiseng lefatšeng. “Bophelo bo sa feleng” Paradeiseng eo ke “bophelo ba sebele”—e leng bophelo boo Molimo a neng a rerile hore batho ba bo phele ha a ba bōpa. (1 Timothea 6:12, 19) Ho e-na le ho phela bophelo ba nakoana le bo sa khotsofatseng, na ha rea lokela ho hahamalla bophelo boo bo sa feleng?

Ha Hoa Lekana ho Hahamalla ho Etsa Litšoantšo le ho Ruisa Sechaba Molemo

Baetsi ba bangata ba litšoantšo ba labalabela ho ntlafatsa mosebetsi oa bona e le hore ba ka finyella seo ba nkang hore ke mosebetsi o tsoileng matsoho. Bophelo ba hona joale bo bokhutšoanyane haholo hore ba ka finyella seo. Ha a se a fetile lilemo tse 90, Hideo, eo ho buuoeng ka eena sehloohong se fetileng, o ile a ikitlaelletsa ho ntlafatsa tsebo ea hae ea ho etsa litšoantšo. Le hoja moetsi oa litšoantšo a ka fihla moo a reng o khotsofaletse mosebetsi oa hae, ka nako eo a ka ’na a se ke a hlola a etsa litšoantšo tse ngata joaloka ha a sa ntse a le morolo. Empa ho ne ho ka etsahala’ng haeba a ne a phela ka ho sa feleng? Ak’u inahanele hore o ne a tla fumana menyetla e babatsehang hakaakang ea ho ntlafatsa tsebo ea hae!

Ho ka thoe’ng ka ho hahamalla ho ruisa sechaba molemo? Ke hantle hore motho a hlokomele mafutsana ’me a sebelise matlotlo a hae bakeng sa ho a thusa. Bibele e re: “Ho fana ho tlisa thabo e khōlō ho feta ho amohela.” (Liketso 20:35) Ka sebele ho tsotella batho ba bang hoa khotsofatsa. Leha ho le joalo, esita le haeba motho a ka qeta bophelo bohle ba hae a hahamalla seo, a ka finyella eng a ’notši? Re ke ke ra imolla ba bang ka ho feletseng mahlomoleng a bona. Ho sa tsotellehe hore na batho ba ka fuoa lintho tse ngata hakae tse bonahalang, li ke ke tsa khotsofatsa tlhoko ea bohlokoa eo ba bangata ba sa e natseng, ’me e sala e sa khotsofatsoa bophelong ba bona. Tlhoko eo ke efe?

Re Tlameha ho Khotsofatsa Tlhoko eo re Bōpeletsoeng le Eona

Thutong ea hae ea Thabeng Jesu o ile a bua ka tlhoko ea bohlokoa eo re bōpeletsoeng le eona ha a re: “Ho thaba ba elang hloko tlhoko ea bona ea moea, kaha ’muso oa maholimo ke oa bona.” (Matheu 5:3) Ka lebaka leo, ho ea ka Bibele thabo ea ’nete ha ea itšetleha ka leruo, botumo, se finyeletsoeng mosebetsing oa ho etsa litšoantšo kapa oa ho ruisa sechaba molemo. Empa e itšetlehile ka hore re khotsofatse tlhoko ea rōna ea moea—e leng tlhoko ea ho rapela Molimo.

Moapostola Pauluse o ile a khothalletsa ba neng ba sa tsebe ’Mōpi hore ba mo batle. Pauluse o itse: “[Molimo] o entse ho tsoa mothong a le mong sechaba se seng le se seng sa batho, ho lula holim’a lefatše lohle, ’me o laetse linako tse behiloeng le meeli e behiloeng ea ho lula ha batho, hore ba batle Molimo, haeba ba ka mo phopholetsa ’me ka sebele ba mo fumana, le hoja, ha e le hantle, a se hōle le e mong le e mong oa rōna. Etsoe ka eena re na le bophelo ’me rea sisinyeha ’me re teng.”—Liketso 17:26-28.

Ke habohlokoa hore re khotsofatse tlhoko ea ho rapela Molimo e le hore re thabe e le kannete bophelong. Ho khotsofatsa tlhoko ea rōna ea moea ho boetse ho etsa hore re be le tšepo ea ho fumana “bophelo ba sebele.” Ak’u nahane ka mohlala oa Teresa ea ileng a tuma haholo naheng ea habo ka ho ba Moamerika oa pele oa Moafrika oa ho ba khalala letotong la litšoantšiso tsa hae tse nkang hora. Leha ho le joalo, ka mor’a nakoana o ile a beha meja fatše. Hobane’ng? O ile a re: “Ke kholisehile hore ho mamela keletso ea Lentsoe la Molimo ke tsela e molemohali ea ho phela.” Teresa o ne a sa batle ho senya kamano ea hae le Molimo ka ho bapala karolo e khothalletsang ho kopanela liphate le pefo litšoantšisong tsa thelevishene. O ile a khaotsa ho ba khalala ea thelevishene eaba o qala ho phela bophelo bo khotsofatsang e le kannete, kaha e ile ea e-ba ’moleli oa nako e tletseng oa litaba tse molemo tsa ’Muso oa Molimo, a leka ho thusa batho ba bang ho ba le kamano e ntle le Molimo.

Ho tlalehoa hore motho e mong ea neng a sebetsa le Teresa o ile a re mabapi le qeto ea Teresa ea ho beha meja fatše: “Ke ne ke utloile bohloko hobane ke sa batle ho bona a nyahlatsa seo ke neng ke nahana hore se tla mo ntša le botleng. Empa ho hlakile hore o ne a fumane se molemohali.” Hamorao Teresa o ile a hlokahalla kotsing ea koloi. Leha ho le joalo, ka mor’a lefu la hae, motho eena enoa ea neng a sebetsa le eena o ile a re: “O ne a thabile, ’me ke eona ntho ea bohlokoa ka ho fetisisa bophelong. Ke ba bakae ho rōna ba ka thabang ka tsela eo?” Batho ba etelletsang pele kamano ea bona le Molimo, esita leha ba ka shoa, ho na le tšepo e babatsehang ea hore ba tla tsoha pusong ea ’Muso.—Johanne 5:28, 29.

’Mōpi o na le morero ka lefatše le ka moloko oa batho o phelang ho lona. O batla hore u utloisise morero ona ’me u thabele bophelo bo sa feleng Paradeiseng lefatšeng. (Pesaleme ea 37:10, 11, 29) Joale ke nako ea ho ithuta ho eketsehileng ka Jehova, ’Mōpi oa maholimo le lefatše, le morero oa hae ka uena. Lipaki Tsa Jehova tsa moo u lulang teng li tla thabela ho u thusa ho rua tsebo eo. Ka kōpo buisana le tsona kapa u ngolle bahatisi ba makasine ena.

[Setšoantšo se leqepheng la 5]

Ke hobane’ng ha monahano oa morui ea boletsoeng papisong ea Jesu o ne o fosahetse?

[Setšoantšo se leqepheng la 7]

Na u ka rata ho phela ka ho sa feleng Paradeiseng lefatšeng?