Hlaolela Litšobotsi Tse ka U Thusang ho Etsa Barutuoa

“E-eang ’me le etse batho ba lichaba tsohle barutuoa.”—MATHEU 28:19.

 1. Bahlanka ba bang ba Molimo ba nakong e fetileng ba ne ba lokela ho ba le tsebo le boikutlo bofe?

KA LINAKO tse ling bahlanka ba Jehova ba tlameha ho hlaolela tsebo le boikutlo bo tla ba thusa ho phetha thato ea hae. Ka mohlala, ka taelo ea Molimo, Abrahama le Sara ba ile ba tloha motseng oa Ure o atlehileng moruong ’me qetellong ha hlokahala hore ba be le litšobotsi le bokhoni boo batho ba lulang litenteng ba lokelang ho ba le bona. (Baheberu 11:8, 9, 15) Ho ne ho hlokahala hore Joshua a be sebete, a tšepe Jehova ’me a tsebe Molao oa Hae ha a etella Baiseraele pele ho kena Naheng e Tšepisitsoeng. (Joshua 1:7-9) ’Me ha ho pelaelo hore moea oa Molimo o ile oa ntlafatsa kapa oa chorisa tsebo leha e le efe eo e ka ’nang eaba Bezalele le Oholiabe ba ne ba se ba ntse ba e-na le eona e le hore ba ka kopanela ka katleho kahong ea tabernakele ’me ba etelle pele mosebetsing oa kaho le o amanang le oona.—Exoda 31:1-11.

 2. Re tla tšohla lipotso life tse amanang le mosebetsi oa ho etsa barutuoa?

² Lilemo tse makholo hamorao, Jesu Kreste o ile a fa balateli ba hae thōmo e reng: “E-eang ’me le etse batho ba lichaba tsohle barutuoa, . . . le ba rute ho boloka lintho tsohle tseo ke le laetseng tsona.” (Matheu 28:19, 20) Le ka mohla batho ba ne ba e-s’o ka ba fuoa tokelo ea ho etsa mosebetsi o kang ona. Ho hlokahala hore re be le litšobotsi life e le hore re etse mosebetsi oa ho etsa barutuoa? Re sebeletsa ho ba le litšobotsi tseo joang?

Bontša Hore U Rata Molimo ka ho Tebileng

 3. Taelo ea hore re etse barutuoa e re fa monyetla ofe?

³ Ho hlokahala hore re rate Jehova ka ho tebileng e le hore re ka buisana le batho le ho leka ho ba susumelletsa hore ba rapele Molimo oa ’nete. Baiseraele ba ne ba ka bontša hore ba rata Molimo ka ho mamela litaelo tsa hae ka lipelo tsohle, ka ho nyehela mahlabelo a tšoanelehang, le ka ho mo rorisa ka lipina. (Deuteronoma 10:12, 13; 30:19, 20; Pesaleme ea 21:13; 96:1, 2; 138:5) Kaha re etsa barutuoa, le rōna re boloka melao ea Molimo, ebile re bontša hore re rata Jehova ka ho bolella ba bang ka eena le ka merero ea hae. Re lokela ho bontša hore re kholisehile ka seo re se buang, re khethe mantsoe a nepahetseng a tla bontša kamoo re ikutloang kateng botebong ba pelo ka tšepo eo re e filoeng ke Molimo.—1 Bathesalonika 1:5; 1 Petrose 3:15.

 4. Ke hobane’ng ha Jesu a ne a thabela ho ruta batho ka Jehova?

⁴ Kaha Jesu o ne a rata Jehova ka ho tebileng, ho bua ka merero ea Molimo, ’Muso le borapeli ba ’nete ho ne ho mo thabisa haholo. (Luka 8:1; Johanne 4:23, 24, 31) Ha e le hantle, Jesu o itse: “Lijo tsa ka ke hore ke etse thato ea ea nthomileng le hore ke qete mosebetsi oa hae.” (Johanne 4:34) Mantsoe ana a mopesaleme a sebetsa ho Jesu: “Ke thabetse ho etsa thato ea hao, Molimo oa ka, molao oa hao o ka har’a litho tsa ka tse ka hare. Ke boletse litaba tse molemo tsa ho loka phuthehong e khōlō. Bona! Ha ke thibe molomo oa ka. Jehova, u tseba seo hantle.”—Pesaleme ea 40:8, 9; Baheberu 10:7-10.

5, 6. Ke tšobotsi efe e ka sehloohong eo batho ba etsang barutuoa ba lokelang ho ba le eona?

⁵ Ka lebaka la ho rata Molimo, ka linako tse ling batho ba sa tsoa ithuta ’nete ea Bibele ba bua ka Jehova le ’Muso ba kholisehile hoo ba khonang ho kholisa ba bang hore ba hlahlobe Mangolo. (Johanne 1:41) Ho rata Molimo ke eona ntho e ka sehloohong e re susumelletsang ho kopanela mosebetsing oa ho etsa barutuoa. Ka lebaka leo, a re etseng hore lerato leo le lule le le matla ka ho bala Lentsoe la hae kamehla le ho thuisa ka lona.—1 Timothea 4:6, 15; Tšenolo 2:4.

⁶ Ha ho pelaelo hore lerato leo Jesu Kreste a ratang Jehova ka lona le ile la mo thusa hore e be mosuoe ea chesehang. Empa leo hase lona feela lebaka le ileng la etsa hore e be ’moleli oa ’Muso ea atlehang. Joale, ke tšobotsi efe e ’ngoe e ileng ea etsa hore Jesu a atlehe ho etsa barutuoa?

Bontša Kameho e Lerato ho Batho

7, 8. Jesu o ne a talima batho joang?

⁷ Jesu o ne a amehile ka batho ’me a bontša hore o ba thahasella haholo. Esita leha e sa ntse e le “mosebetsi ea hloahloa” oa Molimo pele e e-ba motho oa nama, o ne a rata lintho tse amanang le moloko oa batho. (Liproverbia 8:30, 31) Ha Jesu a se a le lefatšeng, o ne a utloela batho bohloko, a khatholla ba neng ba tla ho eena. (Matheu 11:28-30) Jesu o ile a bonahatsa lerato le kutloelo-bohloko eo Jehova a nang le eona, ’me sena sa etsa hore batho ba rapele Molimo a le mong oa ’nete. Batho ba mefuta eohle ba ne ba mamela Jesu hobane ka lerato o ne a bontša hore o amehile ka bona le ka maemo a bona.—Luka 7:36-50; 18:15-17; 19:1-10.

⁸ Ha monna e mong a botsa hore na o lokela ho etsa’ng hore a rue bophelo bo sa feleng, “Jesu a mo sheba ’me a ikutloa a mo rata.” (Mareka 10:17-21) Tlaleho e mabapi le batho ba itseng ba ileng ba rutoa ke Jesu ha a le Bethani, e re: “Jesu o ne a rata Maretha le morali’abo le Lazaro.” (Johanne 11:1, 5) Kaha Jesu o ne a tsotella batho o ile a ba tella nako ea hae ea phomolo e le hore a ba rute. (Mareka 6:30-34) Ho ameha ka batho ba bang ka ho teba le ka lerato joalo ho ile ha etsa hore Jesu a atlehe ho feta mang kapa mang ho hulela batho borapeling ba ’nete.

 9. Pauluse o ne a e-na le boikutlo bofe ha a etsa barutuoa?

⁹ Moapostola Pauluse le eena o ne a ameha ka ho teba ka batho bao a neng a ba pakela. Ka mohlala, o ile a re ho ba neng ba fetohile Bakreste Thesalonika: “Re e-na le lerato le mofuthu bakeng sa lōna, ha rea ka ra khahloa ke ho le fa litaba tse molemo feela tsa Molimo, empa le meea ea rōna, hobane le bile ba ratoang ho rōna.” Ka lebaka la boiteko ba Pauluse bo susumetsoang ke lerato, ba bang Thesalonika ‘ba ile ba tloha litšoantšong tsa bona tse rapeloang ’me ea e-ba makhoba a Molimo ea phelang.’ (1 Bathesalonika 1:9; 2:8) Haeba joaloka Jesu le Pauluse re amehile ka batho e le kannete, le rōna re ka thabela ho bona ha litaba tse molemo li susumetsa lipelo tsa batho ‘ba nang le tšekamelo e nepahetseng bakeng sa bophelo bo sa feleng.’—Liketso 13:48.

Bontša Moea oa Boitelo

10, 11. Ke hobane’ng ha re lokela ho ba le moea oa boitelo ha re leka ho etsa barutuoa?

¹⁰ Batho ba atlehang ho etsa barutuoa ba na le moea oa boitelo. Ka sebele ha ba nke hore ho bokella leruo ke ntho ea bohlokoa ka ho fetisisa. Ha e le hantle, Jesu o ile a re ho barutuoa ba hae: “E tla ba ntho e thata hakaakang bakeng sa ba nang le chelete ho kena ’musong oa Molimo!” Barutuoa ba ne ba maketse ha ba utloa seo, empa Jesu o ile a phaella ka ho re: “Bana, ke ntho e thata hakaakang ho kena ’musong oa Molimo! Ho bonolo hore kamele e tsoe lesobeng la nale ho e-na le hore morui a kene ’musong oa Molimo.” (Mareka 10:23-25) Jesu o ile a khothalletsa balateli ba hae hore ba phele ka tsela e itekanetseng e le hore ba ka tsepamisa mohopolo mosebetsing oa ho etsa barutuoa. (Matheu 6:22-24, 33) Moea oa boitelo o re thusa joang ho etsa barutuoa?

¹¹ Re lokela ho etsa boiteko bo matla e le hore re rute batho lintho tsohle tseo Jesu a li laetseng. Ka tloaelo motho ea etsang barutuoa o loanela ho khannela motho ea thahasellang thuto ea Bibele beke e ’ngoe le e ’ngoe. E le hore ba be le menyetla e eketsehileng ea ho fumana batho ba tšepahalang, baboleli ba bang ba ’Muso ba tlohetse mosebetsi oa boipheliso oa nako e tletseng ’me ba batla oa nakoana. Bakreste ba bangata ba ithutile puo e ’ngoe e le hore ba ka finyella batho ba merabe e meng ba sebakeng sa habo bona. Ba bang ba ikemiselitseng ho etsa barutuoa ba tlohile mahahabo bona ’me ba fallela sebakeng se seng kapa naheng e ’ngoe e le hore ba ka ikakhela ka setotsoana mosebetsing oa kotulo. (Matheu 9:37, 38) Motho o lokela ho ba le moea oa boitelo e le hore a finyelle sena sohle. Empa ho hlokahala ho eketsehileng hore motho a atlehe ho etsa barutuoa.

E-ba le Mamello Empa U se ke Ua Senya Nako

12, 13. Ke hobane’ng ha e le habohlokoa hore re mamelle ha re etsa barutuoa?

¹² Mamello ke tšobotsi e ’ngoe e re thusang ho etsa barutuoa. Ke habohlokoa hore batho ba nke khato ka potlako ha ba utloa molaetsa oa rōna oa Bokreste, empa hangata ho etsa barutuoa ho nka nako e telele ’me ho hloka hore re be le mamello. (1 Bakorinthe 7:29) Jesu ha aa ka a fella Jakobo pelo, e leng mor’abo ka ’mè oa bona. Le hoja kamoo ho bonahalang kateng Jakobo a ne a tseba ka mosebetsi oa Jesu oa boboleli, ho na le ntho eo ka nakoana e ileng ea mo sitisa ho ba morutuoa. (Johanne 7:5) Leha ho le joalo, nako e seng kae pakeng tsa ho shoa ha Kreste le Pentekonta ea 33 C.E., kamoo ho bonahalang kateng Jakobo e ile ea e-ba morutuoa, hobane Mangolo a fana ka maikutlo a hore eena le ’mè oa hae, le barab’abo le baapostola ba ne ba rapela hammoho. (Liketso 1:13, 14) Jakobo o ile a hatela pele hantle moeeng, ’me hamorao a jara boikarabelo bo boholo ka phuthehong ea Bokreste.—Liketso 15:13; 1 Bakorinthe 15:7.

¹³ Joaloka lihoai, Bakreste ba lema lintho tseo hangata li liehang ho hōla—tse kang ho utloisisa Lentsoe la Molimo, ho rata Jehova le ho ba le moea o kang oa Kreste. Sena se hloka hore ba mamelle. Jakobo o ngotse tjena: “Le se ke la fela pelo, barab’eso, ho fihlela ho beng teng ha Morena. Bonang! Sehoai se lula se letetse litholoana tsa bohlokoa tsa lefatše, ha se fele pelo mabapi le tsona ho fihlela se fumana pula ea pele le pula ea morao. Le lōna le se ke la fela pelo; tiisang lipelo tsa lōna, hobane ho ba teng ha Morena ho atametse.” (Jakobo 5:7, 8) Jakobo o ne a khothalletsa balumeli-’moho le eena hore ‘ba se ke ba fela pelo ho fihlela ho beng teng ha Morena.’ Ha ho ne ho e-na le ntho eo barutuoa ba neng ba sa e utloisise, Jesu o ne a ba hlalosetsa kapa a ba etsetsa lipapiso a sa fele pelo. (Matheu 13:10-23; Luka 19:11; 21:7; Liketso 1:6-8) Kaha Morena o se a le teng, ho hlokahala hore le rōna re mamelle ha re ntse re loanela ho etsa barutuoa. Ho ruta bao e bang balateli ba Jesu kajeno, ho lokela ho etsoe ka mamello.—Johanne 14:9.

14. Le hoja re sa fele pelo, ke joang re ka sebelisang nako ea rōna ka bohlale ha re etsa barutuoa?

¹⁴ Le hoja re e-na le mamello, lentsoe ha le behe litholoana ho batho ba bangata bao re qalisang lithuto tsa Bibele le bona. (Matheu 13:18-23) Ka lebaka leo, ha re entse sohle seo re ka se khonang ho ba thusa, re bontša hore re bohlale ka hore re khaotse ho senya nako le batho ba joalo ebe re leka ho batla ba tla ananela ’nete ea Bibele haholoanyane. (Moeklesia 3:1, 6) Ke ’nete hore esita le batho ba thahasellang ba ka ’na ba hloka nako e teletsana hore ba fetole pono ea bona, maikutlo a bona le lintho tseo ba li nkang e le tsa bohlokoa bophelong. Kahoo ha re ba felle pelo, joalokaha Jesu a sa ka a fella barutuoa ba hae pelo ha ba thatafalloa ke ho talima lintho ka tsela e nepahetseng.—Mareka 9:33-37; 10:35-45.

Hlaolela Tsebo ea ho Ruta

15, 16. Ke hobane’ng ha e le habohlokoa hore re behe litaba ka tsela eo ho leng bonolo ho e utloisisa ’me re lokisetse hantle ha re etsa barutuoa?

¹⁵ Lintho tsa bohlokoa tse tla re thusa ho atleha ho etsa barutuoa ke ho rata Molimo, ho ba le moea oa boitelo le mamello. Hape ho hlokahala hore re hlaolele tsebo ea ho ruta hobane e tla re nolofalletsa ho hlalosa litaba ka tsela e hlakileng le e bonolo. Ka mohlala, lintho tse ngata tse ileng tsa buuoa ke Mosuoe e Moholo, Jesu Kreste, li ne li le matla hobane ho ne ho le bonolo ho li utloisisa. Mohlomong u hopola lipolelo tse kang tsena tseo Jesu a ileng a li bua: “Le ipolokele matlotlo leholimong.” “Le se ke la fa lintja se halalelang.” “Bohlale bo pakoa ke mesebetsi ea bona hore bo lokile.” “Le lefe Cesare lintho tsa Cesare, empa le lefe Molimo lintho tsa Molimo.” (Matheu 6:20; 7:6; 11:19; 22:21) Ha e le hantle, Jesu ha aa ka a bua lipolelo tse khutšoanyane feela. O ne a ruta batho ka mokhoa o hlakileng ’me a hlalosa lintho ha ho hlokahala. U ka etsisa mokhoa oo Jesu a neng a ruta ka oona joang?

¹⁶ Ntho e ka sehloohong e tla re thusa ho ruta ka tsela e bonolo le e hlakileng ke ho lokisetsa ka hloko. Mohoeletsi ea sa lokisetsang o ea lolololo. Ha e le hantle, a ka etsa hore lintlha tsa bohlokoa li se ke tsa hlaka ka lebaka la ho bolela sohle seo a se tsebang ka taba e itseng. Ho fapana le hoo, mohoeletsi ea lokiselitseng hantle o nahana ka motho eo a mo rutang, o thuisa ka taba e tšohloang, ’me o hlakisa se hlokahalang feela. (Liproverbia 15:28; 1 Bakorinthe 2:1, 2) O nahana ka lintho tseo seithuti se seng se ntse se li tseba le hore na o lokela ho hatisa lintlha life nakong ea thuto. Ho na le lintho tse ngata tse thahasellisang ka taba e itseng tseo ho ka etsahalang hore ebe mohoeletsi oa li tseba, empa o tla ruta ka mokhoa o hlakileng haeba a tlohela boitsebiso bo sa hlokahaleng.

17. Re ka thusa batho joang hore ba utloisise Mangolo?

¹⁷ Jesu o ne a sa bolelle batho lintlha feela, empa o ne a boetse a ba thusa hore ba nahane. Ka mohlala, ka lekhetlo le leng o ile a botsa potso ena: “U nahana joang, Simone? Marena a lefatše a amohela lekhetho la thepa kapa lekhetho la hlooho ho bo-mang? Ho bara ba ’ona kapa ho basele?” (Matheu 17:25) E ka ’na eaba re rata ho hlalosa Bibele hoo re lokelang ho ithiba e le hore re fe seithuti monyetla oa hore se itlhalose kapa se hlalose taba e tšohloang thutong ea lehae ea Bibele. Ho hlakile hore ha rea lokela ho botsa batho lipotso tse ngata haholo. Ho e-na le hoo, ka ho sebelisa temoho, lipapiso tse ntle, le lipotso tse nahannoeng ka hloko re ka ba thusa ho utloisisa lintlha tsa Mangolo tse ka har’a lingoliloeng tsa rōna tse thehiloeng Bibeleng.

18. “Tsebo ea ho ruta” e akarelletsa eng?

¹⁸ Mangolo a bua ka “tsebo ea ho ruta.” (2 Timothea 4:2; Tite 1:9) Bokhoni bo joalo ba ho ruta, ha bo akarelletse feela ho thusa motho ho hopola lintlha ka hlooho. Re lokela ho leka ho thusa seithuti sa Bibele hore se utloisise phapang pakeng tsa ’nete le leshano, botle le bobe, bohlale le booatla. Ha re ntse re etsa joalo ’me re ikitlaelletsa ho thusa motho hore a rate Jehova ho tloha pelong, a ka ’na a bona hore na ke hobane’ng ha a lokela ho Mo mamela.

Kopanela ka Cheseho Mosebetsing oa ho Etsa Barutuoa

19. Bakreste bohle ba kenya letsoho joang ha ho etsoa barutuoa?

¹⁹ Phutheho ea Bokreste ke mokhatlo o hlophisitsoeng oa batho ba etsang barutuoa. Ha motho a qala ho ba morutuoa, ha ho thabe feela Paki ea Jehova e mo fumaneng le ho mo thusa hore a ithute seo Bibele e se rutang. Ha batho ba etsa letšolo la ho batla ngoana ea lahlehileng, a ka ’na a fumanoa ke motho a le mong feela sehlopheng seo. Empa ha ngoana eo a khutlisetsoa ho batsoali ba hae, e mong le e mong ea neng a kentse letsoho letšolong la ho mo batla oa thaba. (Luka 15:6, 7) Ka ho tšoanang, phutheho ea tšoarisana ha ho etsoa barutuoa. Bakreste bohle ba ba le seabo ho batleng bao e ka ’nang ea e-ba barutuoa ba Jesu. ’Me ha motho a qala ho tla libokeng Holong ea ’Muso, Mokreste e mong le e mong ea teng o mo thusa hore a ananele borapeli ba ’nete. (1 Bakorinthe 14:24, 25) Ka lebaka leo, Bakreste bohle ba ka thabela hore ebe ho etsoa barutuoa ba bacha ba makholo a likete selemo le selemo.

20. U lokela ho etsa’ng haeba u batla ho ruta ba bang ’nete ea Bibele?

²⁰ Bakreste ba bangata ba tšepahalang ba ka thabela ho ruta motho ka Jehova le ka borapeli ba ’nete. Leha ho le joalo, ho sa tsotellehe boikitlaetso ba bona e ka ’na eaba ha ba e-s’o khone ho etsa joalo. Haeba u e mong oa batho bao, tsoela pele ho matlafatsa lerato la hao ho Jehova, ameha ka batho, itele, u se ke ua fela pelo ’me u leke ho ntlafatsa tsebo ea hao ea ho ruta. Ka holim’a tsohle, ha u rapela bolela hore u lakatsa ho ruta motho ’nete. (Moeklesia 11:1) Tšeliseha hobane ua tseba hore sohle seo u se etsang tšebeletsong ea Jehova se tlatsetsa mosebetsing oa ho etsa barutuoa o tlotlisang Molimo.

Na U ka Hlalosa?

• Ke hobane’ng ha mosebetsi oa ho etsa barutuoa e le teko ea lerato la rōna ho Molimo?

• Batho ba etsang barutuoa ba lokela ho ba le litšobotsi life?

• “Tsebo ea ho ruta” e akarelletsa eng?

[Setšoantšo se leqepheng la 25]

Bakreste ba bontša hore ba rata Molimo ka ho tebileng ka ho etsa barutuoa

[Setšoantšo se leqepheng la 25]

Ke hobane’ng ha batho ba etsang barutuoa ba tlameha ho thahasella ba bang?

[Setšoantšo se leqepheng la 25]

Tse ling tsa litšobotsi tseo batho ba etsang barutuoa ba lokelang ho ba le tsona ke life?

[Setšoantšo se leqepheng la 25]

Bakreste bohle baa thaba ha ba bona mosebetsi oa ho etsa barutuoa o atleha