Bontša Tumelo e Tšoanang le ea Bona

O Ile a Shebella, ’me a Leta

ELIA o ne a labalabela ho rapela Ntate oa hae oa leholimo boinotšing. Matšoele a pota-potileng moprofeta enoa oa ’nete a ne a sa tsoa mo bona a etsa hore mollo o theohe leholimong, ’me ha ho pelaelo hore bongata ba bona ba ne ba batla ho ithatisa eena. Pele Elia a nyolohela Thabeng ea Karmele e phahameng e puputloang ke moea hore a rapele Jehova Molimo boinotšing, o ile a lokela ho etsa mosebetsi o sa thabiseng. O ne a lokela ho bua le Morena Akabe.

Banna bao ba babeli ba ne ba sa tšoane ho hang. Akabe ea neng a apere seaparo se setle sa borena, e ne e le mokoenehi ea meharo, ea neng a huloa ka nko. Elia o ne a apere seaparo sa moprofeta—se itekanetseng, seo e ka ’nang eaba se ne se entsoe ka letlalo la phoofolo kapa ka boea bo ohliloeng ba kamele kapa ba pōli. E ne e le motho ea sebete haholo, ea tšepahalang le ea nang le tumelo. Ha letsatsi leo le e-ea malikelong ho ne ho se ho totobetse hore na banna bao ke batho ba mofuta ofe.a

Lintho ha lia ka tsa tsamaela Akabe le barapeli ba bang ba Baale hantle letsatsing leo. Bolumeli ba bohetene boo Akabe le mosali oa hae, Mofumahali Jezebele, ba neng ba bo ntšelitse pele ’musong oa Iseraele oa meloko e leshome bo ne bo talotsoe. Ho ne ho pepesitsoe hore Baale ke moritaoke. Molimo eo ea sa pheleng o ne a hlōlehile ho hotetsa mollo o pala ha baprofeta ba hae ba ntse ba itlatlarietsa, ba hobela ba bile ba itlhabaka. Baale o ne a hlōlehile ho sireletsa banna bao ba 450 polaong e neng e ba tšoanetse. Empa ho na le ntho e ’ngoe eo molimo eo oa bohata a neng a hlōlehile ho e etsa, ’me ho ne ho tla tloha ho totobala hore o hlōlehile ka ho feletseng. Ka lilemo tse fetang tse tharo, baprofeta ba Baale ba ne ba ntse ba ipiletsa ho molimo oa bona hore a felise komello e neng e oetse naha, empa Baale o ne a hlōlehile ho e felisa. Haufinyane, Jehova o ne a tla bontša hore ke Molimo oa ’nete ka ho felisa komello eo.—1 Marena 16:30–17:1; 18:1-40.

Leha ho le joalo, Jehova o ne a tla nka khato neng? Elia o ne a tla etsa eng ho fihlela ka nako eo? ’Me re ka ithuta thuto efe ho monna eo ea tšepahalang? A re boneng hore na re ka ithuta thuto efe ka ho hlahloba tlaleho e ngotsoeng ho 1 Marena 18:41-46.

Ho Tšepa Thapelo

Elia o ile a tla ho Akabe ’me a re: “Nyoloha, u je ’me u noe; etsoe ho na le molumo oa pula ea litloebelele.” (Temana ea 41) Na ho na le seo morena eo ea khopo a neng a ithutile sona linthong tse etsahetseng letsatsing leo? Ha ho boleloe ka ho toba, empa ha re bone mantsoe a pako, kōpo ea hore moprofeta a mo thuse ho rapela Jehova ’me a kōpe tšoarelo. Ha e le hantle, Akabe o ile “a nyoloha ho ea ja le ho noa.” (Temana ea 42) Elia eena o ile a etsa’ng?

“Ha e le Elia, a nyolohela tlhōrōng ea Karmele ’me a qala ho kokomala a kentse sefahleho sa hae pakeng tsa mangole.” Ha Akabe a il’o ja, Elia eena o ile a fumana monyetla oa ho rapela Ntate oa hae. Hlokomela boikokobetso bo hlalosoang mona—Elia o ne a iname hoo hlooho ea hae e neng e le haufi le mangole. Elia o ne a rapella eng? Ha ho hlokahale hore re ingoaee hlooho. Ho Jakobo 5:18, Bibele e re Elia o ile a rapella hore komello e fele. Ha ho pelaelo hore o ne a rapela a le tlhōrōng ea thaba ea Karmele.

Pele ho moo, Jehova o ile a re: “Ke entse qeto ea ho fana ka pula holim’a lefatše.” (1 Marena 18:1) Kahoo Elia o ne a rapella hore Ntate oa hae a phethe thato ea hae, joalokaha Jesu lilemong tse ka bang sekete ka morao ho moo a ile a ruta barutuoa ba hae hore ba rapelle hore thato ea Ntate oa hae e etsoe.—Matheu 6:9, 10.

Re ithuta ho hongata ka thapelo mohlaleng oa Elia. Ntho e ka sehloohong eo Elia a neng a nahanne ka eona ke hore thato ea Ntate oa hae e phethehe. Ha re rapela, re lokela ho hopola hore “ho sa tsotellehe hore na ke eng eo re e kōpang ho ea ka thato ea [Molimo], oa re utloa.” (1 Johanne 5:14) Kahoo, ho hlakile hore re lokela ho tseba thato ea Molimo e le hore a ka re utloa ha re rapela—e leng lebaka le utloahalang la hore re khothalle ho ithuta Bibele letsatsi le leng le le leng. Ha ho pelaelo hore Elia o ne a boetse a batla hore komello e fele ka lebaka la tšotleho ea batho ba habo. E tlameha ebe o ile a leboha haholo ha a qeta ho bona mohlolo oo Jehova a neng a o entse letsatsing leo. Le rōna ha re rapela re lokela ho ameha ka boiketlo ba ba bang ’me re lebohe ho tsoa botebong ba pelo.—2 Bakorinthe 1:11; Bafilipi 4:6.

O ne a Kholisehile a Bile a Falimehile

Elia o ne a kholisehile hore Jehova o tla felisa komello, empa o ne a sa tiiseha hore na Jehova o tla nka khato neng. Kahoo, moprofeta eo o ile a etsa’ng ho fihlela nakong eo? Hlokomela hore na temana ea 43 e re’ng: “A re ho mohlanka oa hae: ‘Ka kōpo, nyoloha. U talime ka nģa ea leoatle.’ Kahoo a nyoloha ’me a talima eaba o re: ‘Ha ho letho ho hang.’ A tsoela pele ho re, ‘Khutlela teng,’ ka makhetlo a supileng.” Re ithuta lintho tse peli mohlaleng oa Elia. Tabeng ea pele, hlokomela hore moprofeta enoa o ne a kholisehile. Ebe u hlokomela kamoo a neng a falimehile kateng.

Elia o ile a batla bopaki ba hore Jehova o tla tloha a nka khato, eaba o re mohlanka oa hae a nyolohele holimo ’me a lekole hore na ho na le matšoao a hore pula e haufi. Ha mohlanka oa hae a khutla, o ile a re ka monyebe: “Ha ho letho ho hang.” Le ne le sele le bohoeng ba ntja. Empa, na u hlokometse ntho e sa tloaelehang? Hopola hore Elia o ne a sa tsoa re ho Morena Akabe: “Ho na le molumo oa pula ea litloebelele.” Ke hobane’ng ha moprofeta eo a ne a ka rialo empa ho ne ho se na maru a pula?

Elia o ne a tseba seo Jehova a se tšepisitseng. Kaha e ne e le moprofeta le moemeli oa Jehova, o ne a kholisehile hore Molimo oa hae o tla phelela lentsoe la Hae. Elia o ne a se na khoao—hoo e neng eka o se a ntse a utloa pula e na. Mohlomong re tla hopola sena se builoeng ke Bibele ha e hlalosa Moshe e re: “O ile a tsoela pele a tiile joalokaha eka o bona Ea sa bonahaleng.” Na Molimo ke oa sebele ho uena? O re file mabaka a mangata a hore re be le tumelo e joalo ho eena le litšepisong tsa hae.—Baheberu 11:1, 27.

Joale, hlokomela hore na Elia o ne a falimehile hakaakang. Ha aa ka a re mohlanka oa hae a khutlele morao ka lekhetlo le le leng kapa a mabeli, empa a re a khutlele ka makhetlo a supileng! Re ka inahanela hore na mohlanka eo o ne a khathetse hakaakang ke ho ea holimo le tlaase, empa Elia o ne a chesehela ho bona pontšo ’me ha aa ka a nyahama. Qetellong, ka mor’a hore mohlanka eo a khutlele lekhetlo la bosupa, o ile a re: “Bona! Ho na le leru le lenyenyane le joaloka seatla sa motho le nyolohang leoatleng.” (Temana ea 44) Na u ka bona ka mahlo a kelello hore na mohlanka eo o ile a lekanya joang ka seatla sa hae boholo ba leru le lenyenyane le hlahang ka nģa ea Leoatle le Leholo?b E ka ’na eaba leru leo ha lea ka la khahla mohlanka eo. Empa Elia o ne a nka leru leo e le la bohlokoa. Eaba o laela mohlanka oa hae hore a potlake, a re: “Nyoloha, u re ho Akabe, ‘Qhaneha! U theohe e le hore pula ea litloebelele e se ke ea u thibella ho tsamaea!’”

Ke mohlala o mong o motle oo Elia a re behetseng oona. Le rōna re phela nakong eo ka eona Molimo a tla tloha a phethahatsa morero oa hae. Elia o ile a letela hore komello e fele; bahlanka ba Molimo ba kajeno ba letetse ho fela ha tsamaiso ea lintho ea lefatše lena le senyehileng. (1 Johanne 2:17) Re lokela ho lula re falimehile joaloka Elia ho fihlela Jehova Molimo a nka khato. Ha Mora oa Molimo, Jesu a eletsa balateli ba hae, o ile a re: “Ka hona, le lule le lebetse, hobane ha le tsebe hore na Morena oa lōna o tla ka letsatsi lefe.” (Matheu 24:42) Na Jesu o ne a bolela hore balateli ba hae ba ne ba ke ke ba tseba letho ka hore na bofelo bo tla tla neng? Ha ho joalo, hobane o ile a bolela lintho tse ngata tse neng li tla etsahala lefatšeng pele bofelo bo fihla. Kaofela ha rōna re ka ithuta ka pontšo ena e qaqileng ea “qetello ea tsamaiso ea lintho.”—Matheu 24:3-7.c

Karolo e ’ngoe le e ’ngoe ea pontšo eo ke bopaki bo matla le bo kholisang. Na bopaki boo bo lekane ho re susumelletsa hore re phahamele mapoqo? Leru le le leng le lenyenyane le hlahang le ne le lekane ho kholisa Elia hore Jehova o ne a tla tloha a nka khato. Na moprofeta eo ea tšepahalang o ile a soetseha?

Jehova o Tlisa Topollo le Mahlohonolo

Ha tlaleho ena e tsoela pele e re: “Khabareng maholimo a fifatsoa ke maru le moea ’me ha qala ho na pula e ngata ea litloebelele. Akabe a ’na a palama ’me a ea Jezriele.” (Temana ea 45) Lintho li ile tsa etsahala ka lebelo. Ha mohlanka oa Elia a ntse a bolella Akabe molaetsa oa moprofeta, leru leo le lenyenyane le ile la fetoha maru a mangata, ’me leholimo la fifala. Ha foka moea o matla. Qetellong, ka mor’a lilemo tse tharo le halofo, pula e ile ea na naheng ea Iseraele.d Naha eo e omileng ea koloba. Ha pula eo e na ka matla, nōka ea Kishone e ile ea e-ja litlhokoa, ntle ho pelaelo e hlatsoa mali a baprofeta ba Baale ba bolailoeng. Baiseraele ba marabele ba ile ba fuoa monyetla oa hore ba tlose tšusumetso e mpe ea borapeli ba Baale naheng.

Ka sebele Elia o ne a tšepile hore ho tla ba joalo! Na Akabe o ne a tla baka ebe o furalla tšusumetso e mpe ea borapeli ba Baale? Lintho tse neng li etsahetse letsatsing leo li ne li fane ka mabaka a utloahalang a hore a etse liphetoho tse joalo. Ke ’nete hore ha re tsebe seo Akabe a neng a se nahana ka nako eo. Tlaleho e re bolella feela hore morena o ile “a ’na a palama ’me a ea Jezriele.” Na ho na le seo a neng a ithutile sona? Na o ne a ikemiselitse ho fetola metsamao ea hae? Se ileng sa etsahala hamorao se bontša hore ha hoa ka ha e-ba joalo. Leha ho le joalo, Akabe le Elia ba ne ba sa ntse ba tla bona liholo.

Moprofeta oa Jehova o ile a qala ho tsamaea ka tsela eo Akabe a tsamaileng ka eona. O ne a tlil’o tsamaea leeto le lelelele, tseleng e lefifi, e metsi. Empa ho ile ha etsahala ntho e sa tloaelehang.

“Letsoho la Jehova la e-ba holim’a Elia, hoo a ileng a itlama letheka ’me a matha ka pel’a Akabe ho ea fihla Jezriele.” (Temana ea 46) Ho hlakile hore “letsoho la Jehova” le ne le sebetsa ho Elia ka tsela ea mohlolo. Jezriele e ne e le bohōle ba lik’hilomithara tse ka bang 30, ’me Elia o ne a se a hōlile.e Nahana feela ha moprofeta eo a itlama ka liaparo tsa hae tse telele, a li tlama thekeng e le hore li se ke tsa mo horeletsa ho tsamaea, a ntan’o matha tseleng eo e tletseng metsi—a papaela hoo a ileng a tšoara koloi ea morena, a e feta a ba a e siea!

Ha ho pelaelo hore Elia o ile a ikutloa a hlohonolofalitsoe haholo. E tlameha ebe o ile a thaba ha a utloa a e-na le matla, mahlahahlaha le mokoka o joalo—oo mohlomong a neng a e-s’o ka a e-ba le oona le bocheng ba hae. Re ka ’na ra hopola boprofeta bo tiisang hore batho ba tšepahalang ba tla phela hantle ’me ba be mahlahahlaha lefatšeng le tlang la Paradeise. (Esaia 35:6; Luka 23:43) Ha Elia a ntse a matha tseleng eo e metsi, o ne a kholisehile hore o khahlisa Ntate oa hae, Molimo a le mong feela oa ’nete, Jehova.

Jehova o labalabela ho hlohonolofatsa batho. Ho sebeletsa tlhohonolofatso eo hase tšenyo ea nako. Joaloka Elia, ho hlokahala hore re falimehe, re sekaseke bopaki bo matla bo bontšang hore Jehova o tla tloha a nka khato mehleng ena e kotsi le e mahlonoko. Joaloka Elia, re na le mabaka a utloahalang a ho ba le tšepo e feletseng litšepisong tsa Jehova, “Molimo oa ’nete.”—Pesaleme ea 31:5.

[Mongolo o botlaaseng ba leqephe]

[Lebokose/Setšoantšo se leqepheng la 19]

Komello ea Mehleng ea Elia e Nkile Nako e Kae?

Moprofeta oa Jehova ea bitsoang Elia o ile a bolella Morena Akabe hore komello eo e nkileng nako e telele e ne e tla fela haufinyane. Ho ile ha fela ha e-ba joalo “ka selemo sa boraro”—ho tloha letsatsing leo Elia a ileng a phatlalatsa ka lona hore ho tla ba le komello. (1 Marena 18:1) Jehova o ile a nesa pula nakoana ka mor’a hore Elia a bolele hore e tla na. Kahoo, ba bang ba ka ’na ba etsa qeto ea hore komello e ile ea fela selemong sa eona sa boraro le hore e nkile nako e ka tlaase ho lilemo tse tharo. Leha ho le joalo, Jesu le Jakobo ba re komello eo e ile ea nka “lilemo tse tharo le likhoeli tse tšeletseng.” (Luka 4:25; Jakobo 5:17) Na Bibele ea ikhanyetsa tabeng ee?

Ha ho joalo. Iseraeleng ea boholo-holo nako ea komello e ne e e-ba telele, e nka hoo e ka bang likhoeli tse tšeletseng. Ha ho pelaelo hore ha Elia a tsebisa Akabe ka komello eo le ne le se le ntse le baletse ka nako e telele. Ha e le hantle, komello ena e ne e qalile hoo e ka bang likhoeli tse tšeletseng pejana. Kahoo, ha Elia a phatlalatsa komello “ka selemo sa boraro” ho tloha phatlalatsong ea hae ea nakong e fetileng, komello e ne e se e nkile lilemo tse ka bang tharo le halofo. Ho ne ho se ho fetile “lilemo tse tharo le likhoeli tse tšeletseng” ha batho bohle ba ne ba tlil’o bona ha ho etsoa teko e khōlō Thabeng ea Karmele.

Joale nahana ka nako ea ha Elia a qala ho etela Akabe. Batho ba ne ba lumela hore Baale ke molimo “ea kaletseng maru,” ea neng a tla nesa pula e tla felisa komello. Ha komello e nka nako e telele ka ho sa tloaelehang, mohlomong batho ba ne ba ipotsa ba re: ‘O kae Baale? O tla nesa pula neng?’ Ha ho pelaelo hore phatlalatso ea Elia ea hore ho ke ke ha e-ba le pula kapa phoka pele a laela hore li be teng e ile ea nyahamisa barapeli bao ba Baale.—1 Marena 17:1.

[Tlhaloso ea Moo Setšoantšo se Nkiloeng Teng]

Pictorial Archive (Near Eastern History) Est.

[Setšoantšo se leqepheng la 18]

Lithapelo tsa Elia li ile tsa bontša hore o labalabela hore ho etsoe thato ea Molimo