Babali ba Batla ho Tseba

Na Lipholiso Tsohle Tsa Mohlolo li Etsoa ka Matla a Molimo?

Ha ho pelaelo hore Jehova Molimo o na le matla a ho folisa. Hape ha ho pelaelo hore a ka fa barapeli ba hae matla a ho etsa joalo. Ka mohlala, nakong ea baapostola, ho folisa ka mohlolo e ne e le e ’ngoe ea limpho tse ikhethang tsa moea oa hae o halalelang. Moapostola Pauluse o ile a ngola: “Ponahatso ea moea e fuoa e mong le e mong bakeng sa morero o molemo. Ka mohlala, e mong ka moea o fuoa puo ea bohlale, . . . e mong o fuoa limpho tsa lipholiso ka moea oo o le mong, . . . e mong o fuoa ho profeta, . . . e mong o fuoa maleme a fapaneng.”—1 Bakorinthe 12:4-11.

Leha ho le joalo, hona lengolong leo le eang ho Bakorinthe, Pauluse o ile a boela a bolela hore limpho tsa mohlolo tsa moea o halalelang oa Molimo li ne li tla fela. O ile a re: “Ebang ho na le limpho tsa ho profeta, li tla felisoa; ebang ho na le maleme, a tla khaotsa; ebang ho na le tsebo, e tla felisoa.”—1 Bakorinthe 13:8.

Lekholong la pele la lilemo, Jesu Kreste le baapostola ba hae ba ne ba folisa ka mohlolo. Nakong eo ea baapostola ha phutheho ea Bokreste e ne e sa le ncha, limpho tsa moea tse akarelletsang matla a ho folisa li ne li tlisa thoriso lebitsong la Molimo, ebile e le pontšo ea hore Jehova o amohela phutheho eo e neng e sa tsoa thehoa ea Bokreste ’me oa e hlohonolofatsa. Empa ka mor’a hore e hōle ’me e tsitse, ho e-na le hore e sebelise limpho tse khethehileng e le ho bontša hore e tšehelitsoe ke Molimo, e ne e tla bontša seo ka ho ba le tumelo e sa thekeseleng, tšepo hammoho le lerato. (Johanne 13:35; 1 Bakorinthe 13:13) Ka hona, hoo e ka bang ka selemo sa 100 C.E., Molimo ha aa ka a hlola a fa batho matla a ho folisa ka mohlolo e le pontšo ea hore oa ba amohela.a

Empa u ka ’na ua ipotsa, ‘Ke hobane’ng ha ke ntse ke utloa ka litlaleho tsa batho ba folisitsoeng ka mohlolo?’ Ka mohlala, tlaleho ea koranta e ’ngoe e ile ea bua ka monna e mong eo ho neng ho thoe o ne a tšoeroe ke kankere. O ne a e-na le lihlahala hloohong, liphieong hammoho le ka har’a masapo. Ho hang o ne a se na tšepo bophelong ho fihlela ha ka le leng Molimo a “bua” le eena. Tlaleho eo e re matsatsi a ’maloa hamorao, kankere ea hae e ne e folile.

Ha u utloa lipale tse tšoanang le eo, ke hobane’ng ha u sa ipotse: ‘Na tlaleho eo ke ’nete? Na ho na le bopaki bo ngotsoeng ke lingaka bo tšehetsang tlaleho eo? Esita le haeba ho bonahala eka motho e mong o ile a folisoa ka tsela e itseng, na Bibele e ruta hore Molimo ke eena ea fanang ka matla a liketsahalo tsohle tseo ho bonahalang e le tsa ho folisoa ka mohlolo?’

Karabo ea potso ena ea ho qetela ke ea bohlokoa haholo. Jesu o ile a lemosa balateli ba hae: “Itebeleng ho baprofeta ba bohata . . . Letsatsing leo, ba bangata ba tla re ho ’na ‘Morena, Morena, na ha rea ka ra profeta ka lebitso la hao, le ho leleka bademona ka lebitso la hao, le ho etsa mesebetsi e matla e mengata [mehlolo] ka lebitso la hao?’ Leha ho le joalo ka nako eo ke tla ba bolella: Ha kea ka ka le tseba le ka mohla! Tlohang ho ’na, lōna ba etsang tlōlo ea molao.”—Matheu 7:15, 21-23.

Kahoo, ho hlakile hore seo ho thoeng ke lipholiso tsa mohlolo e ka ’na eaba li etsoa ka matla a mang, eseng a Molimo. E le ho qoba ho thetsoa ke ba ipolelang hore ba etsa mehlolo ka lebitso la Molimo, re lokela ho fumana tsebo e nepahetseng ea Molimo, re sebelise bokhoni boo Molimo a re fileng bona ba ho nahana, ’me re ithute tsela ea ho khetholla ba etsang thato ea hae.—Matheu 7:16-19; Johanne 17:3; Baroma 12:1, 2.

[Mongolo o botlaaseng ba leqephe]