Na U ka ba le Khotso Lefatšeng Lee le Tletseng Mathata?
NA U phela ka khotso? Ho hlakile hore batho ba bangata ha ba phele ka khotso. Ba phela libakeng tse tletseng lintoa, merusu ea lipolotiki, lintoa tsa merabe kapa bokhukhuni. Esita le haeba mathata ao a sa u ame, mohlomong u tšoenngoa ke bokebekoa, tlhekefetso le ho qhoebeshana le batho bao u kopanetseng khoebo le bona kapa baahisani ba hao. Malapeng le teng ho tletse lintoa feela ho e-na le hore e be sebaka sa khotso.
Batho ba bangata ba labalabela ho ba le khotso. Ba ka ba ba e batla ka ho ea kerekeng, ho ea litlelaseng tseo batho ba rutoang ho thuisa ho tsona, kapa ho ea lithupelong tsa yoga. Ba bang ba lumela hore ba ka ba le khotso ka ho etela libakeng tsa tlhaho—ho nka maeto a ho ea phomolong, ho ikhatholla ka ho hloa lithaba le ho tsamaea mahoatateng, kapa ho ea lilibeng tse tšikhunyang metsi a chesang. Esita le haeba batho ba batlang khotso ba bonahala eka baa e fumana, ka mor’a nakoana ba ka ’na ba lemoha hore khotso e joalo hase ea sebele ebile ke ea nakoana.
Ka hona, u ka fumana khotso ea sebele hokae? Mohloli oa khotso ke ’Mōpi oa rōna, Jehova Molimo. Hobane’ng? Hobane ke “Molimo ea fanang ka khotso.” (Baroma 15:33) “Khotso e tla ba ngata” ’Musong oa hae o tla tla haufinyane. (Pesaleme ea 72:7; Matheu 6:9, 10) Ena ke khotso e fetang khotso leha e le efe e ka bang teng ka lebaka la litumellano tse entsoeng ke batho. Hangata litumellano tseo li thibela ntoa ka nakoana. Empa khotso ea Molimo e tla felisa lisosa tsohle tsa ntoa le liqhoebeshano. Ha e le hantle, ho ke ke ha hlola ho e-ba le ea tla ithuta ntoa. (Pesaleme ea 46:8, 9) Ka sebele batho bohle ba tla qetella ba phela ka khotso!
Le hoja tšepiso ena ea nakong e tlang e le e babatsehang, u ntse u ka labalabela ho ba le khotso e itseng hona joale. Na ho na le tsela eo ka eona u ka ikutloang u e-na le khotso e ka u thusang ho mamella linakong tsee tse mahlonoko? Se thabisang ke hore Bibele e re bontša kamoo re ka fumanang khotso ea mofuta oo kateng. Ak’u nahane ka litsela tse ling tse bontšoang khaolong ea bone ea lengolo la moapostola Pauluse le eang ho Bafilipi. Re kōpa hore u ipalle temana ea 4 ho ea ho ea 13 Bibeleng.
“Khotso ea Molimo”
Temaneng ea 7 rea bala: “Khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” Motho a ke ke a fumana khotso ea mofuta ona feela ka ho thuisa kapa ho leka ho ntlafatsa botho ba hae. Ho e-na le hoo, khotso ena e tsoa ho Molimo. Khotso ena ke ea bohlokoa haholo hoo e “fetang monahano oohle.” Ka sebele e feta matšoenyeho ’ohle a rōna, tsebo le mabaka leha e le afe ao re ka a behang. Re ka ’na ra bona eka ho hang re ke ke ra tsoa mathateng ao re leng ho ’ona, empa khotso ea Molimo e ka re matlafatsa ka tšepo e thehiloeng Bibeleng ea hore ka le leng la matsatsi mathata ’ohle a rōna a tla be a felile.
Na ke ntho e ke keng ea khoneha? Batho ba ke ke ba khona ho finyella seo; empa “lintho tsohle lia khoneha ho Molimo.” (Mareka 10:27) Ho ba le tumelo le ho tšepa Molimo ho re thusa hore re tlohele ho tšoenyeha ho tlōla tekano. Ak’u nahane ka ngoana e monyenyane ea lahlehileng ka lebenkeleng le leholo. Oa tseba hore joang kapa joang ha a ka fumana ’mè oa hae, lintho li tla loka. Qetellong ha ’mè oa hae a mo fumane, o mo sika ka lerato ’me oa mo tšelisa. Ka tsela e tšoanang, le rōna re ka tšepa hore Molimo o tla re sika ka lerato. O tla re tšelisa ’me a qetelle a felisitse matšoenyeho ’ohle a rōna.
Barapeli ba bangata ba Jehova ba ile ba e-ba le khotso ea Molimo nakong ea liteko tse thata ka ho fetisisa. Ka mohlala, nahana ka Nadine, ea ileng a senyeheloa ke mpa. O re: “Ke motho ea shoellang ka hare ha ke utloile bohloko, ’me ka linako tsohle ke leka ho itiisa joalokaha eka ha ho letho le lebe. Empa bonneteng, ke ne ke utloile bohloko haholo. Hoo e ka bang letsatsi le leng le le leng, ke ne ke tšollela pelo ea ka ho Jehova ka thapelo, ke mo kōpa ka tieo hore a nthuse. Ke ile ka lemoha hore thapelo e matla, kaha neng kapa neng ha ke ne ke ikutloa ke selebaletsoe e le kannete ’me ke nka hore ‘nke ke ka hlola ke khona,’ ke ne ke ikutloa ke imoloha ke bile ke e-ba le khotso. Ke ne ke ikutloa ke sireletsehile.”
Se Sireletsang Pelo ea Hao le Monahano
A re ke re khutleleng ho Bafilipi 4:7. Eona e re khotso ea Molimo e tla lebela lipelo le matla a rōna a kelello. Feela joalokaha molebeli a lebela mosebetsing oa hae, khotso ea Molimo e lebela lipelo tsa rōna, e le hore re se ke ra tlatsa likelello tsa rōna ka maikutlo a ba ratang lintho tse bonahalang, matšoenyeho a sa hlokahaleng haesita le boitšoaro bo sa khahliseng Molimo. Nahana ka mohlala ona.
Batho ba bangata lefatšeng lena le tletseng mathata ba lumela hore e le hore ba thabe ’me ba ikutloe ba sireletsehile, ba lokela ho ema hantle licheleteng. Ba elelitsoe ke litsebi, ba ka ’na ba tsetela chelete e ’ngoe ea bona liabong tsa mebaraka. Na joale ba ikutloa ba e-na le khotso? Eseng hakaalo. Ba ka ’na ba tšoenyeha ka ho sheba liabo tsa mebaraka ea lichelete letsatsi le letsatsi, ba ipotsa hore na ba rekise liabo, ba li reke kapa ba ke ba eme ho se hokae. Ha mebaraka e putlama, ba ka ’na ba qala ho tšoha. Bonneteng, Bibele ha e nyatse ho etsa matsete, empa e fana ka keletso ena e hlakileng: “Ea ratang silevera a ke ke a khotsofalla silevera, hape leha e le ofe ea ratang leruo a ke ke a khotsofalla chelete e kenang. Sena le sona ke lefeela. Boroko ba ea sebeletsang bo monate, ho sa tsotellehe hore na ke ho honyenyane kapa ho hongata hoo a ho jang; empa lintho tse ngata tsa morui ha li mo lumelle ho robala.”—Moeklesia 5:10, 12.
Bafilipi 4:7 e lihela likhala ka ho bolela hore khotso ea Molimo e lebela lipelo le matla a rōna a kelello “ka Kreste Jesu.” Ke joang Kreste Jesu a ka thusang motho hore a fumane khotso ea Molimo? Jesu o khatha tema ea bohlokoa ho phethahatseng morero oa Molimo. Jesu o ile a fana ka bophelo ba hae e le hore re ka lopolloa sebeng le lefung. (Johanne 3:16) O boetse o hlomamisitsoe hore e be Morena oa ’Muso oa Molimo. Ho tseba tema eo Jesu a e khathang ho ka re thusa haholo hore re be le khotso kelellong le pelong. Joang?
Haeba re bakela libe tsa rōna ho tsoa botebong ba pelo ’me re kōpa Molimo hore a re tšoarele motheong oa sehlabelo sa Jesu, Molimo o tla re tšoarela, e leng se etsang hore re be le khotso kelellong le pelong. (Liketso 3:19) Ha re elelloa hore re ke ke ra thabela bophelo ka ho feletseng ho fihlela ’Muso oa Kreste o fihla, re tla qoba ho ikimetsa bophelong joalokaha eka bophelo bo fella hona mona ha ho sa na bokamoso. (1 Timothea 6:19) Ke ’nete hore re ke ke ra ntšoa matšoenyehong ’ohle, empa re ka tšelisoa ke tšepo ea sebele ea hore haufinyane bophelo bo tla ba monate.
Kamoo U ka Fumanang Khotso ea Molimo
Joale u ka fumana khotso ea Molimo joang? Bafilipi 4:4, 5 e re beha leseling ha e re: “Kamehla thabang Moreneng. Ke tla boela ke re, Le thabe! Ho ba le kahlolo e molemo ha lōna ho ke ho tsejoe ke batho bohle. Morena o haufi.” Ha Pauluse a ngola mantsoe ao, o ne a koaletsoe Roma ka ho hloka toka. (Bafilipi 1:13) Ho e-na le hore a tletlebe ka hore o tšoeroe hampe, o ile a khothalletsa balumeli-’moho le eena hore kamehla ba thabe Moreneng. Ho hlakile hore thabo ea hae e ne e sa itšetleha ka maemo a hae, empa e ne e itšetlehile ka kamano ea hae le Molimo. Le rōna re lokela ho ithuta ho thabela ho sebeletsa Molimo ho sa tsotellehe maemo a rōna. Ha re ntse re ithuta Jehova ka ho eketsehileng, re bile re ikitlaelletsa ho etsa thato ea hae, re tla thaba le ho feta ha re mo sebeletsa. Seo se tla re fa khotsofalo le khotso ea kelello.
Ho phaella moo, re khothalletsoa ho ba le kahlolo e molemo. Haeba re e-na le kahlolo e molemo, re ke ke ra lebella ho etsa lintho tse fetang seo re ka se khonang. Rea tseba hore ha rea phethahala; re ke ke ra ipabola linthong tsohle. Ka hona, ke hobane’ng ha u ka itima boroko u ntse u nahana hore na ke joang u ka etsang lintho ka tsela e phethahetseng, kapa hona hore na u ka li etsa joang ka tsela e ntle ho feta ea ba bang? Hape re ke ke ra lebella hore batho ba bang e be ba phethahetseng. Kahoo, re tla ba le khutso esita leha ba re khopisa. Tlhaloso e ’ngoe eo ka eona ho ka fetoleloang poleloana ea mathomo ea Segerike e reng “ho ba le kahlolo e molemo,” e ka ba poleloana e reng “ho inehela.” Haeba re inehela ha maemo a se kamoo re lakatsang kateng, re tla qoba likhang tseo hangata li sa ruiseng molemo oa letho, tseo ka linako tse ling li ka re sitisang ho ba le khotso le batho ba bang tsa ba tsa re amoha khotso ea kelello.
Polelo e latelang ho Bafilipi 4:5 e reng, “Morena o haufi,” e ka ’na ea bonahala e sa tsamaisane le seo ho buuoang ka sona. Haufinyane ha ’Muso oa Molimo o se o busa, Molimo o tla tlisa tsamaiso e ncha e tla nkela ea khale sebaka. Empa le hona joale, o ntse a ka ba haufi le e mong le e mong ea atamelang ho eena. (Liketso 17:27; Jakobo 4:8) Ha re elelloa hore o haufi le rōna, seo se etsa hore re thabe, re be le kahlolo e molemo ’me re se ke ra tšoenyeha ka mathata a kajeno kapa ka bokamoso, joalokaha temana ea 6 e bontša.
Ha re hlahloba temana ea 6 le ea 7, rea lemoha hore motho o fumana khotso eo ea Molimo ka ho rapela. Ba bang ba nka hore thapelo ke tsela e itseng feela ea ho thuisa, ba nahana hore thapelo ea mofuta leha e le ofe e ka eketsa khotso eo ba nang le eona. Leha ho le joalo, Bibele e bua ka puisano ea sebele le Jehova, puisano ea batho ba haufi-ufi joaloka ngoana ha a buisana le motsoali ea mo ratang ka lintho tse mo thabisang le tse mo tšoenyang. Ho khothatsa hakaakang ho tseba hore re ka buisana le Molimo ka ‘ntho e ’ngoe le e ’ngoe’! Re ka phetlela Ntate oa rōna ea leholimong sefuba ha ho e-na le ntho leha e le efe e botebong ba lipelo tsa rōna kapa eo re nahanang ka eona.
Temana ea 8 e re khothalletsa hore re nahane haholo ka lintho tse ka re tsoelang molemo. Leha ho le joalo, ho nahana ka tsona feela ha hoa lekana. Joalokaha temana ea 9 e bontša, re boetse re lokela ho sebelisa keletso e molemo eo Bibele e fanang ka eona. Ho etsa joalo ho tla etsa hore re be le letsoalo le khutsitseng. Maele a puo e ’ngoe a bua ’nete hakaakang ha a re: Letsoalo le khutsitseng ke mosamo o sa kukuneleng!
Ka sebele u ka apareloa ke khotso. Ke Jehova Molimo ea e fang ba atamelang haufi le eena le ba batlang ho latela tataiso ea hae. Ha u hlahloba Lentsoe la hae, e leng Bibele, u ka tloaelana le menahano ea hae. Hase hore ho bonolo ho latela melao ea hae. Empa u ke ke ua ikoahlaea haeba u entse sohle se matleng a hao kaha ‘Molimo oa khotso o tla ba le uena.’—Bafilipi 4:9.
[Ntlha e Qolotsoeng e leqepheng la 10]
“Khotso ea Molimo . . . e tla lebela lipelo tsa lōna.”—BAFILIPI 4:7
[Ntlha e Qolotsoeng e leqepheng la 12]
Ho khothatsa hakaakang ho tseba hore re ka buisana le Molimo ka ‘ntho e ’ngoe le e ’ngoe’