Malapa a Bakreste—Latelang Mohlala oa Jesu!
“Kreste o ile a . . . le siela mohlala hore le latele mehato ea hae haufi-ufi.”—1 PET. 2:21.
1. (a) Mora oa Molimo o ile a phetha karolo efe ha ho ne ho bōptjoa lintho? (b) Jesu o na le maikutlo afe ka batho?
HA Molimo a ne a bōpa maholimo le lefatše, Mora oa hae oa letsibolo o ne a e-na le eena “[e] le mosebetsi ea hloahloa.” Mora oa Molimo o ile a boela a sebetsa le Ntate oa hae, ha Jehova a ne a rera a bile a bōpa liphoofolo le limela tse ngata tse sa tšoaneng mona lefatšeng le ha A ne a lokisa Paradeise eo batho ba neng ba tla lula ho eona. Mora oa Molimo, eo hamorao a ileng a tsejoa e le Jesu, o ne a rata batho haholo. “Lintho tseo [a] neng [a] li rata li ne li le ho bara ba batho.”—Liprov. 8:27-31; Gen. 1:26, 27.
2. (a) Jehova o file batho ba sa phethahalang eng e le hore a ba thuse? (b) Ke karolo efe e ’ngoe ea bophelo eo Bibele e fanang ka tataiso ho eona?
2 Ka mor’a hore batho ba babeli ba pele ba etse sebe, ho lopolla batho ba baetsalibe e ile ea e-ba karolo ea bohlokoa ea morero oa Jehova. Jehova o ile a fana ka sehlabelo sa thekollo sa Kreste e le hore batho ba fumane topollo eo. (Bar. 5:8) Ho feta moo, Jehova o fane ka Lentsoe la hae, e leng Bibele, le tataisang batho hore ba atlehe bophelong ho sa tsotellehe ho se phethahale hoo ba ho futsitseng. (Pes. 119:105) Lentsoeng la hae, Jehova o fa batho tataiso e ba thusang e le hore ba lule ba e-na le malapa a momahaneng le a thabileng. Mabapi le lenyalo, buka ea Genese e bolela hore monna o lokela ho ‘khomarela mosali oa hae ’me e be nama e le ’ngoe.’—Gen. 2:24.
3. (a) Jesu o ile a ruta eng ka lenyalo? (b) Re tla tšohla eng sehloohong see?
3 Ha Jesu a ne a le lefatšeng, o ile a hatisa hore morero oa lenyalo e ne e le hore batho ba lule hammoho ka ho sa feleng. O ile a ruta melao-motheo eo ha e sebelisoa, e neng e tla thusa litho tsa lelapa hore li qobe maikutlo le boitšoaro bo neng bo ka beha lenyalo kotsing kapa bo ka etsa hore malapa a hloke thabo. (Mat. 5:27-37; 7:12) Sehlooho sena se tla tšohla kamoo lithuto tsa Jesu le mohlala oo a ileng a o beha ha a ne a le lefatšeng li ka thusang banna, basali, batsoali le bana kateng hore ba phele bophelo bo thabisang le bo khotsofatsang.
Kamoo Monna oa Mokreste a Hlomphang Mosali oa Hae
4. Karolo eo Jesu a e phethang e tšoana joang le e phethoang ke banna ba Bakreste?
4 Molimo o khethile monna hore e be hlooho ea lelapa, feela joalokaha Jesu e le Hlooho ea phutheho. Moapostola Pauluse o ile a re: “Monna ke hlooho ea mosali oa hae joalokaha Kreste le eena e le hlooho ea phutheho, kaha e le mopholosi oa ’mele ona. Banna, le tsoele pele le rata basali ba lōna, feela joalokaha Kreste le eena a ile a rata phutheho ’me a inehela bakeng sa eona.” (Baef. 5:23, 25) Ka sebele, tsela eo Jesu a neng a tšoara balateli ba hae ka eona ke mohlala oa kamoo banna ba Bakreste ba lokelang ho tšoara basali ba bona ka eona. A re ke re hlahlobeng litsela tse ling tseo ka tsona Jesu a ileng a sebelisa matla ao a a filoeng ke Molimo.
5. Jesu o ile a sebelisa matla a hae joang ha a sebetsana le barutuoa ba hae?
5 Jesu o ne a e-na le “maikutlo a bonolo ’me [a] ikokobelitse pelong.” (Mat. 11:29) O ne a boetse a nka khato e matla ha ho hlokahala. Le ka mohla ha aa ka a hlokomoloha boikarabelo ba hae. (Mar. 6:34; Joh. 2:14-17) Ka mosa o ne a eletsa barutuoa ba hae, ’me ka linako tse ling o ne a bile a ba eletsa khafetsa ha ho hlokahala. (Mat. 20:21-28; Mar. 9:33-37; Luka 22:24-27) Leha ho le joalo, Jesu o ne a sa ba omanye kapa a sa ba tlotlolle, ebile o ne a sa etse hore ba ikutloe eka ha ba ratoe kapa ha ba khone ho phetha seo a neng a ba ruta hore ba se etse. Ho e-na le hoo, o ne a ba babatsa a bile a ba khothatsa. (Luka 10:17-21) Kaha Jesu o ne a tšoara barutuoa ba hae ka lerato a bile a ba utloela bohloko, ha ho makatse hore ebe ba ne ba mo hlompha!
6. (a) Monna a ka ithuta eng tseleng eo Jesu a neng a tšoara barutuoa ba hae ka eona? (b) Petrose o fa banna keletso efe?
6 Mohlala oa Jesu o ruta banna hore haeba ba etsisa bohlooho ba Kreste, ba ke ke ba hatella basali ba bona ka ho hloka kutloelo-bohloko, ho e-na le hoo, ba tla ba tšoara ka tlhompho ba be ba itelle bona ka lerato. Moapostola Petrose o ile a eletsa banna hore ba etsise mohlala oa Jesu oa ho bontša lerato ka hore ‘ba lule le basali ba bona ka mokhoa o tšoanang,’ ba “ba abela tlhompho.” (Bala 1 Petrose 3:7.) Joale monna a ka sebelisa matla ao Molimo a mo fileng ’ona joang, ’me ka nako e tšoanang a tšoare mosali oa hae joaloka motho ea lokeloang ke tlhompho?
7. Monna a ka hlompha mosali oa hae ka tsela efe? Bontša.
7 Tsela e ’ngoe eo monna a ka bontšang ka eona hore o hlompha mosali oa hae, ke ka hore a nahanisise ka maikutlo a mosali oa hae pele a etsa liqeto tse amang lelapa. Mohlomong o lokela ho etsa qeto mabapi le taba ea ho falla kapa ea ho fetola mosebetsi kapa litaba tse ling tse tloaelehileng, tse kang hore na ba tla ea phomolong hokae kapa ba tla fokotsa litšenyehelo tsa lelapa joang ha theko ea lintho e ntse e phahama. Kaha qeto eo a e etsang e tla ama lelapa, ho ka ba molemo ebile e ka ba ho bontša mosa hore monna a nahanele maikutlo a mosali oa hae. Seo se ka ’na sa mo thusa hore a etse qeto e loketseng, le e nahanelang, ’me ho tla ba bonolo hore mosali a mo tšehetse. (Liprov. 15:22) Banna ba Bakreste ba hlomphang basali ba bona, basali ba bona baa ba rata ebile baa ba hlompha, ’me habohlokoa ka ho fetisisa, Jehova oa ba amohela.—Baef. 5:28, 29.
Kamoo Mosali a Bontšang Tlhompho e Tebileng ho Monna oa Hae
8. Ke hobane’ng ha mohlala oa Eva o lokela ho qojoa?
8 Jesu o behetse basali ba Bakreste mohlala o phethahetseng oa ho ikokobelletsa bolaoli. Maikutlo a hae le tsela eo a neng a nka bolaoli ka eona, a fapane hakaakang le a mosali oa pele! Eva o ile a hlōleha ho behela basali mohlala o motle oo ba ka o latelang. O ne a e-na le hlooho e khethiloeng ke Molimo, eo Jehova a neng a fetisa litaelo ka eona. Leha ho le joalo, Eva ha aa ka a hlompha bohlooho ba monna oa hae. O ile a hlōleha ho amohela taelo eo Adama a neng a mo boleletse eona. (Gen. 2:16, 17; 3:3; 1 Bakor. 11:3) Ke ’nete hore Eva o ile a thetsoa; empa o ne a lokela hore ebe o ile a botsa monna oa hae hore na o ne a lokela ho kholoa lentsoe leo le neng le re le mo bolella seo ‘Molimo a se tsebang.’ Ho e-na le hoo, o ile a inkela molao matsohong eaba o laela monna oa hae hore na a etse’ng.—Gen. 3:5, 6; 1 Tim. 2:14.
9. Jesu o beha mohlala ofe oa ho ikokobetsa?
9 Ho fapana le Eva, Jesu eena o ile beha mohlala o phethahetseng oa ho ikokobelletsa Hlooho ea hae. Maikutlo a hae le tsela eo a ileng a phela ka eona li bontša hore ha aa ‘ka a nahana ho inkela ka mahahapa, e leng, hore o lokela ho lekana le Molimo.’ Ho e-na le hoo, “o ile a ikhokhotha ’me a nka sebōpeho sa lekhoba.” (Bafil. 2:5-7) Kajeno, Jesu ke Morena ea busang ’me o ntse a e-na le maikutlo a joalo. O ikokobelletsa Ntate oa hae linthong tsohle ebile o tšehetsa bohlooho ba Hae.—Mat. 20:23; Joh. 5:30; 1 Bakor. 15:28.
10. Mosali a ka tšehetsa bohlooho ba monna oa hae joang?
10 Mosali oa Mokreste o etsa hantle ha a etsisa Jesu ka ho tšehetsa bohlooho ba monna oa hae. (Bala 1 Petrose 2:21; 3:1, 2.) Nahana ka boemo boo a nang le monyetla oa ho etsa sena ho bona. Mora oa hae o batla ho etsa ntho e hlokang hore a fumane tumello ho batsoali. Kaha batsoali ha ba e-s’o ka ba buisana ka taba ena, e ka ba hantle hore ’mè a mo botse, “Na u se u kōpile ho ntate oa hao?” Haeba mor’a a e-s’o kōpe, ’mè o lokela ho buisana le monna oa hae ka taba eo pele a etsa qeto. Ho feta moo, mosali oa Mokreste ha aa lokela ho hanyetsa monna oa hae kapa ho mo phehisa khang ka pel’a bana. Haeba a sa lumellane le monna oa hae ka taba e itseng, o tla bua le eena moo ba leng bang.—Baef. 6:4.
Mohlala oo Jesu a o Behetseng Batsoali
11. Jesu o ile a behela batsoali mohlala ofe?
11 Le hoja Jesu a sa ka a nyala kapa a ba le bana, o behetse batsoali ba Bakreste mohlala o motle. Joang? Ka lerato le ka mamello o ile a ruta barutuoa ba hae ka lipolelo le ka liketso. O ile a ba bontša hore na ba etse mosebetsi oo a neng a ba file oona joang. (Luka 8:1) Tsela eo Jesu a neng a tšoara barutuoa ba hae ka eona le maikutlo ao a neng a e-na le ’ona ka bona, e ile ea ba ruta hore na ba ne ba lokela ho tšoarana ka tsela efe.—Bala Johanne 13:14-17.
12, 13. Ho hlokahala eng e le hore batsoali ba be le bana ba tšabang Molimo?
12 Bana ba atisa ho latela mohlala oa batsoali ba bona, ebang ke o motle kapa o mobe. Kahoo, batsoali, ipotseng: ‘Mohlala oa rōna o ruta bana ba rōna eng mabapi le nako eo re e qetang re shebeletse TV le eo re e sebelisang boithabisong ha re e bapisa le eo re e sebelisetsang ho ithuta Bibele le ho kopanela tšebeletsong ea tšimo? Ha e le hantle ke sefe se tlang pele lelapeng la rōna? Na re beha mohlala o motle ka hore ntho ea bohlokoa bophelong ba rōna e be borapeli ba ’nete?’ Molao oa Molimo o lokela hore o be ka lipelong tsa batsoali pele, haeba ba batla hore bana bona ba hōle ba tšaba Molimo.—Deut. 6:6.
13 Haeba batsoali ba ikitlaelletsa ho sebelisa melao-motheo ea Bibele litabeng tse tloaelehileng, bana ba bona ba tla hlokomela sena. Ba tla nkela hloohong seo batsoali ba ba bolellang sona le seo ba ba rutang sona. Leha ho le joalo, haeba bana ba hlokomela hore batsoali ba etsa se fapaneng le seo ba se buang, ba ka ’na ba etsa qeto ea hore melao-motheo ea Bibele e thata kapa hase ea bohlokoa. Ka lebaka leo, bana ba ka ’na ba inehela habonolo khatellong ea lefatše.
14, 15. Batsoali ba lokela ho thusa bana ba bona hore ba rate lintho life, hona tsela e ’ngoe eo ba ka etsang see ka eona ke efe?
14 Batsoali ba Bakreste baa hlokomela hore ho hōlisa ngoana ha ho bolele ho mo hlokomela ka lintho tseo a li hlokang nameng feela. Ka lebaka leo, e ka ba booatla ho ruta ngoana hore a phehelle lipakane tse tla etsa hore a atlehe linthong tsa nama feela. (Moek. 7:12) Jesu o ile a ruta barutuoa ba hae hore lintho tsa moea e lokela hore e be tsona tse tlang pele bophelong ba bona. (Mat. 6:33) Kahoo, batsoali ba Bakreste ba lokela ho etsisa Jesu ka hore ba leke ka matla ho khothalletsa bana ba bona hore ba phehelle lipakane tsa moea.
15 Tsela e ’ngoe eo batsoali ba ka etsang sena ka eona, ke ka hore ba batle menyetla ea hore bana ba bona ba tloaelane le batho ba tšebeletsong ea nako e tletseng. Nahana hore na e ka ba ho khothatsang hakaakang hore bacha ba tloaelane le bo-pula-maliboho kapa molebeli oa potoloho le mosali oa hae. Ha baromuoa, basebeletsi ba Bethele le ba etsang mosebetsi oa machaba oa kaho ba le etetse, ba ka bua ka cheseho ka melemo ea ho sebeletsa Jehova. Ha ho pelaelo hore baeti bao ba tla le phetela liphihlelo tse monate. Mohlala oa bona oa ho itella tšebeletso o ka thusa bana ba lōna hore ba etse liqeto tse bohlale, ba ipehele lipakane tse tlotlehang ’me ba fumane thuto e loketseng e tla ba thusa hore ba itjare ha ba le tšebeletsong ea nako e tletseng.
Bana—Le Tla Thusoa Ke’ng Hore le Latele Mohlala oa Jesu?
16. Jesu o ile a hlompha batsoali ba hae ba lefatšeng le Ntate oa hae ea leholimong joang?
16 Bana, le lōna Jesu o le behetse mohlala o motle. Jesu o ile a fuoa Josefa le Maria hore ba mo hlokomele ’me o ne a ba mamela. (Bala Luka 2:51.) O ile a hlokomela hore le hoja ba ne ba sa phethahala, Molimo o ne a ba file boikarabelo ba ho mo hlokomela. Ka lebaka leo, o ne a lokela ho ba hlompha. (Deut. 5:16; Mat. 15:4) Ha Jesu a se a hōlile, kamehla o ne a etsa lintho tse khahlisang Ntate oa hae ea leholimong. Seo se ne se bolela hore o ne lokela ho hlōla liteko. (Mat. 4:1-10) Bacha, ka linako tse ling le ka ’na la lekeha hore le se ke la mamela batsoali ba lōna. Kahoo, le ka thusoa ke’ng hore le latele mohlala oa Jesu?
17, 18. (a) Bacha ba thulana le khatello efe sekolong? (b) Bacha ba lokela ho hopola eng e ka ba thusang hore ba hlōle liteko?
17 Ho ka etsahala hore ebe boholo ba bana bao u kenang sekolo le bona ha ba tsotelle melao ea Bibele hakaalo kapa ho hang ha ba e natse. Ba ka ’na ba leka ho u qobella hore u etse lintho tse fosahetseng ’me ba u soma haeba u hana ho li etsa. Na bana bao u kenang sekolo le bona ba ke ba u bitse ka mabitso a somang hobane u hana ho etsa lintho tse itseng le bona? Haeba ho joalo u ee u etse joang? Ua tseba hore ha u lumela hore batho ba u tšose ebe u se u etsa ntho eo ba e etsang, u tla soabisa batsoali ba hao u be u soabise le Jehova. Haeba u ne u ka latela bana bao u kenang sekolo le bona qetello ea hao e ne e tla ba efe? Mohlomong u ipehetse pakane ea ho ba pula-maliboho kapa mohlanka ea sebeletsang kapa ho sebeletsa moo ho hlokahalang bahoeletsi ba ’Muso ba bangata, kapa ho sebeletsa Bethele. Na ho tloaelana le bana bao u kenang sekolo le bona ho tla u thusa hore u finyelle lipakane tsa hao?
18 Lōna bacha ba ka phuthehong ea Bokreste, na ho na le mohla le eeng le be maemong a behang tumelo ea lōna tekong? Le ee le etse joang? Nahanang ka motho ea le behelang mohlala, e leng Jesu. Ha aa ka a inehela tekong empa ka tieo o ile a emela seo a neng a tseba hore se nepahetse. Ha le hopola seo, le tla ba le matla a hore le bolelle bao le kenang sekolo le bona ka ho hlaka hore ha le batle ho kopanela le bona ha ba etsa seo le tsebang hore se fosahetse. Joaloka Jesu, tsepamisang mohopolo tšepong ea ho sebeletsa Jehova ka thabo le ho mo mamela bophelo bohle ba lōna.—Baheb. 12:2.
Se Tlisang Thabo ka Lapeng
19. Ke bophelo ba mofuta ofe bo etsang hore batho ba thabe e le kannete?
19 Jehova Molimo le Jesu Kreste ba batla hore batho ba atlehe. Le hoja re sa phethahala, ho ntse ho ka etsahala hore re thabe. (Esa. 48:17, 18; Mat. 5:3) Jesu o ile a ruta linnete tse etsang hore batho ba thabe, empa hase tsona feela tseo a ileng a li ruta barutuoa ba hae. Jesu o ile a boela a ba ruta tsela e molemohali ea ho phela. Ho phaella moo, o re sietse mohlala oo re ka o latelang oa hore na motho a ka phela ka tsela e loketseng joang a bile a e-na le maikutlo a loketseng. Ho sa tsotellehe hore na karolo ea rōna ke efe ka lapeng, kaofela ha rōna re ka rua molemo mohlaleng oa hae. Kahoo, banna, basali, batsoali le bana, latelang mohlala oa Jesu! Ruri ho amohela lithuto tsa Jesu le ho etsisa mohlala oa hae ke hona ho tlisang thabo le khotsofalo ka lapeng.
U ka Araba Joang?
• Banna ba lokela ho sebelisa matla ao Molimo a ba fileng ’ona joang?
• Mosali a ka etsisa mohlala oa Jesu joang?
• Batsoali ba ka ithuta’ng tseleng eo Jesu a neng a tšoara barutuoa ba hae ka eona?
• Bacha ba ka ithuta’ng mohlaleng oa Jesu?
[Setšoantšo se leqepheng la 8]
Monna ea nang le lerato o tla etsa’ng pele a etsa qeto e amang lelapa?
[Setšoantšo se leqepheng la 9]
Ke boemo bofe bo fang mosali monyetla oa hore a tšehetse bohlooho ba monna oa hae?
[Setšoantšo se leqepheng la 10]
Bana ba etsisa mekhoa e metle ea batsoali ba bona