Ho Fumana Matlotlo a Patiloeng
NA U kile ua fumana letlotlo le patiloeng sebakeng seo u neng u sa lebella hore u ka le fumana ho sona? Ke sona se ileng sa etsahalla Ivo Laud, e leng Paki ea Jehova ea Estonia, ka la 27 March, 2005. O ne a ntse a thusa Alma Vardja ea seng a hōlile, eo le eena e leng Paki, ho qhaqha setoro sa khale. Eitse ha ba tlosa lebota le ka ntle, eaba ba hlokomela boto e koahetseng lehlakore le leng la pilara. Ha ba tlosa boto eo, ba ile ba fumana lefaru le bophara ba lisenthimithara tse ka bang 10, le bolelele ba limithara tse 1,2, le le botebo ba lisenthimithara tse 10, le koahetsoeng ka lepolanka le tšoanang le boto eo. (1) E ne e le lefaru la matlotlo a patiloeng! E ne e le matlotlo a eng? Ke mang ea neng a a patile moo?
Lefarung leo ho ile ha fumanoa liphutheloana tse phuthetsoeng ka hloko ka pampiri e thata. (2) Ka har’a liphutheloana tseo ho ne ho e-na le lingoliloeng tsa Lipaki Tsa Jehova, tseo boholo ba tsona e neng e le lihlooho tse ithutoang tsa Molula-Qhooa, ’me tse ling tsa tsona e ne e le tsa 1947. (3) Li ne li ngotsoe ka makhethe ka letsoho ka puo ea Seestonia. Liphutheloana tse ling li ne li e-na le boitsebiso bo fanang ka leseli la hore na li patiloe ke mang moo. E ne e le litlaleho tsa ha Villem Vardja, e leng monna oa Alma, a ne a hlongoa lipotso. Ho ne ho boetse ho e-na le boitsebiso bo buang ka lilemo tseo a ileng a li qeta a le chankaneng. Ke hobane’ng ha a ne a ile a koalloa chankaneng?
Villem Vardja e ne e le mohlanka ea nang le boikarabelo har’a Lipaki Phuthehong ea Tartu ’me hamorao a ikarabella Phuthehong ea Otepää, naheng ea Estonia eo e neng e le karolo ea Soviet Socialist Republics. Kamoo ho bonahalang kateng, o ile a ithuta ’nete ea Bibele pejana ho Ntoa ea II ea Lefatše. Lilemo tse seng kae hamorao, ka la 24 December, 1948, ’muso oa Makominisi o ile oa tšoara Mor’abo rōna Vardja ka lebaka la mosebetsi oa bolumeli oo a neng a o etsa. Sepolesa sa mautloela se ile sa mo hloma lipotso sa ba sa mo hlokofatsa, e le ha se leka ho mo qobella hore a ntše mabitso a balumeli-’moho le eena. O ile a ahloleloa ho hlola lilemo tse leshome likampong tsa chankana tsa Russia, empa a sa fuoa monyetla oa hore a ipuelle khotla.
Villem Vardja o ile a lula a tšepahala ho Jehova, ho fihlela a e-shoa ka la 6 March, 1990. Mosali oa hae o ne a sa tsebe hore lingoliloeng tseo li ne li le teng moo. E tlameha ebe Mor’abo rōna Vardja o ne a batla ho mo sireletsa haeba ho ne ho ka etsahala hore a hlongoe lipotso. Ke hobane’ng ha a ile a pata lingoliloeng tseo? O ile a li pata hobane Komiti ea Tšireletso ea Naha ea Soviet Union, e leng KGB, e ne e atisa ho fihla thoso! matlong a Lipaki Tsa Jehova, e batla lingoliloeng tsa bolumeli. Mohlomong Mor’abo rōna Vardja o ile a pata lingoliloeng tseo e le ho tiisa hore balumeli-’moho le eena ba ne ba tla ba le lijo tsa moea, haeba ho ne ho ka etsahala hore KGB e ba amohe lingoliloeng tsohle. Lingoliloeng tse ling tse neng li patiloe li ile tsa fumanoa pejana, lehlabuleng la selemo sa 1990. Tse ling li ile tsa fumanoa Tartu, karolong e ka boroa ea Estonia. Le tsona li ne li patiloe ke Villem Vardja.
Ke hobane’ng ha re re lingoliloeng tsee ke letlotlo? Ke hobane likopi tsena tse neng li ngotsoe ka makhethe ka letsoho ebile li patiloe ka hloko, li bontša kamoo Lipaki li neng li ananela lijo tsa moea tse neng li fumaneha ka nako eo. (Mat. 24:45) Na u ananela lijo tsa moea tseo u li fumanang sebakeng sa heno hona joale? Tse ling tsa tsona ke Molula-Qhooa o fumanehang ka puo ea Seestonia le ka lipuo tse ling tse ka holimo ho 170.