Lula U E-na le Boikutlo ba Kelello ba Kreste

“Le be le boikutlo ba kelello bo tšoanang le boo Kreste Jesu a neng a e-na le bona.”—BAR. 15:5.

 1. Ke hobane’ng ha re lokela ho leka ho ba le boikutlo ba kelello ba Kreste?

JESU KRESTE o ile a re: “Tloong ho ’na . . . ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela meea ea lōna khatholoho.” (Mat. 11:28, 29) Memo ena e etsoang ka lerato e hlalosa hantle boikutlo ba kelello bo lerato boo Jesu a nang le bona. O re behetse mohlala o motle ka ho fetisisa oo ho seng motho e mong ea neng a ka re behela oona. Le hoja Jesu e ne e le Mora ea matla oa Molimo, o ne a e-na le kutloelo-bohloko, a bile a le bonolo, haholo-holo ho bahloki.

 2. Re tla tšohla lintlha life tse amanang le boikutlo ba Jesu?

² Sehloohong sena le lihloohong tse peli tse latelang, re tla tšohla hore na ke joang re ka bang le boikutlo ba kelello bo tšoanang le ba Jesu ’me re lule re e-na le bona, re be re etsise “kelello ea Kreste” bophelong ba rōna. (1 Bakor. 2:16) Re tla tšohla lintlha tse hlano: Bonolo le boikokobetso ba Jesu, mosa oa hae, ho mamela ha hae Molimo, sebete sa hae le lerato la hae le sa feleng.

Ithute Maikutlong a Bonolo a Kreste

 3. (a) Thuto e ’ngoe ea boikokobetso eo Jesu a ileng a e ruta barutuoa ba hae ke efe? (b) Jesu o ile a etsa’ng ha barutuoa ba hae ba bontša bofokoli?

³ Jesu, Mora ea phethahetseng oa Molimo, o ile a ithaopela ho tla lefatšeng ho tla sebetsa har’a batho ba sa phethahalang, ba baetsalibe. Hamorao, ba bang ba bona ba ne ba tla mo bolaea. Ho sa tsotellehe seo, kamehla Jesu o ne a lula a thabile a bile a itšoere. (1 Pet. 2:21-23) Ha re ‘talima ka hloko’ mohlala oa Jesu, sena se ka re thusa hore le rōna re mo etsise ha re angoa ke liphoso le ho se phethahale ha batho ba bang. (Baheb. 12:2) Jesu o ile a mema barutuoa ba hae hore ba ‘kene le eena tlas’a joko ea hae’ ’me kahoo ba ithute ho eena. (Mat. 11:29, NW, ftn.) Ba ne ba ka ithuta eng? Se seng seo ba neng ba ka ithuta sona ke hore Jesu o ne a e-na le maikutlo a bonolo, le hore o ne a mamella barutuoa ba hae le hoja ba ne ba etsa liphoso. Bosiung ba pele Jesu a e-shoa, o ile a ba hlatsoa maoto, ’me ka ho etsa sena o ile a ba ruta thuto eo ba neng ba ke ke ba e lebala le ka mohla ea hore e be ba ‘ikokobelitseng pelong.’ (Bala Johanne 13:14-17.) Hamorao, ha Petrose, Jakobo le Johanne ba hlōloa ho ‘lula ba lebetse,’ ka mosa Jesu o ile a hlokomela hore baa fokola. O ile a botsa a re: “Simone, na u robetse? . . . Banna, le lule le lebetse ’me le rapela, e le hore le se ke la kena molekong. Ka ho hlakileng, moea o na le tabatabelo, empa nama ea fokola.”—Mar. 14:32-38.

4, 5. Mohlala oa Jesu o ka re thusa joang hore re sebetsane le liphoso tsa ba bang?

⁴ Re etsa’ng ha mora kapa morali oabo rōna a e-na le moea oa tlhōlisano, e le sefela-peloana, kapa a lieha ho sebelisa keletso eo a e fuoang ke baholo kapa “lekhoba le tšepahalang le le masene”? (Mat. 24:45-47) Le hoja e ka ’na eaba re itokiselitse ho amohela hore mekhoa ea nama e tloaelehile lefatšeng lena la Satane, ha barab’abo rōna e le bona ba bontšang mekhoa e joalo, sena se ka re khopisa haholo. Haeba liphoso tsa batho ba bang li re khopisa habonolo, re lokela ho ipotsa, ‘Ebe nka bontša “kelello ea Kreste” joang haholoanyane?’ Leka ho hopola hore Jesu ha aa ka a halefela barutuoa ba hae, esita le ha ba ne ba bontša hore baa fokola moeeng.

⁵ Nahana ka se ileng sa etsahalla moapostola Petrose. Ha Jesu a ne a mema Petrose hore a tsoe ka sekepeng ’me a tsamaee holim’a metsi a tle ho Eena, Petrose o ile a fela a etsa joalo ka nakoana. Joale Petrose o ile a sheba sefefo eaba o qala ho teba. Na Jesu o ile a halefa eaba o re ho eena: “U laehile! E mpe ebe u ithutile”? Che! ‘Kapele-pele Jesu o ile a otlolla letsoho, a mo tšoara ’me a re ho eena: “Uena ea nang le tumelo e nyenyane, ke hobane’ng ha u ile ua itesella ho belaela?”’ (Mat. 14:28-31) Haeba ho ka etsahala hore re sebetsane le mor’abo rōna ea bonahalang a haelloa ke tumelo, na le rōna ka tšoantšetso re ka otlolla letsoho ebe re mo thusa hore a be le tumelo e khōloanyane? Ka sebele eo ke thuto e bonahalang ka ho hlaka tseleng e bonolo eo Jesu a ileng a tšoara Petrose ka eona.

 6. Jesu o ile a ruta baapostola ba hae eng mabapi le ho batla botumo?

⁶ Petrose o ne a boetse ameha tabeng ea khang e sa khaotseng ea baapostola ea hore na e moholo ho ba bang ke ofe har’a bona. Jakobo le Johanne ba ne ba batla hore ’Musong oa Jesu, e mong a lule ka letsohong la hae le letona ’me e mong ka ho le letšehali. Ha Petrose le baapostola ba bang ba utloa sena, ba ile ba halefa. Jesu o ne a tseba hore e ka ’na eaba ba ne ba nkile maikutlo ana sechabeng seo ba neng ba hōletse ho sona. O ile a ba bitsa eaba o re: “Lea tseba hore babusi ba lichaba ba rena ka thata holim’a tsona le banna ba baholo ba sebelisa bolaoli holim’a tsona. Ha hoa lokela ho ba ka tsela ena har’a lōna; empa mang kapa mang ea batlang ho ba moholo har’a lōna e lokela ho ba mosebeletsi oa lōna, ’me mang kapa mang ea batlang ho ba oa pele har’a lōna e tla ba lekhoba la lōna.” Ka mor’a moo, Jesu o ile a bua ka mohlala oo a o behileng, a re: “Feela joalokaha Mor’a motho a sa ka a tlela ho sebeletsoa, empa ho sebeletsa le ho fana ka moea oa hae hore e be thekollo e le phapanyetsano bakeng sa ba bangata.”—Mat. 20:20-28.

 7. E mong le e mong oa rōna a ka kenya letsoho joang hore ho be le bonngoe ka phuthehong?

⁷ Ha re nahana ka boikokobetso ba Jesu, sena se ka re thusa hore re ‘itšoare joaloka ba banyenyane’ ha re e-na le barab’abo rōna. (Luka 9:46-48) Ha re etsa joalo ho ba le bonngoe. Joaloka ntate oa lelapa le leholo, Jehova o batla hore bana ba hae ba ‘lule hammoho bonngoeng’ ’me ba sebelisane. (Pes. 133:1) Jesu o ile a rapela Ntate oa hae hore Bakreste bohle ba ’nete ba tle ba be bonngoeng, e le hore “lefatše le ka ba le tsebo ea hore u nthomile le hore u ba ratile feela joalokaha u nthatile.” (Joh. 17:23) Kahoo, bonngoe ba rōna bo re khetholla hore re balateli ba Kreste. E le hore re be bonngoeng boo, re lokela ho sheba ho se phethahale ha batho ba bang ka tsela eo Kreste a neng a ho sheba ka eona. Jesu o ne a tšoarela, ’me o ile a ruta hore le rōna re ka tšoareloa hafeela re tšoarela ba bang.—Bala Matheu 6:14, 15.

 8. Re ka ithuta eng ka mohlala oa bahlanka ba Molimo ba mo sebelelitseng ka lilemo tse ngata?

⁸ Ho boetse ho na le lintho tse ngata tseo re ka ithutang tsona ha re etsisa tumelo ea ba qetileng lilemo tse ngata ba etsisa Kreste. Joaloka Jesu, hangata ba bontša hore baa utloisisa hore ba bang ha baa phethahala. Ba ithutile hore ho bontša kutloelo-bohloko e kang ea Kreste ha ho re thuse feela hore re ‘jare mefokolo ea ba seng matla’ empa ho boetse ho etsa hore ho be le bonngoe. Ho feta moo, ho khothalletsa phutheho eohle hore e bontše boikutlo ba kelello ba Kreste. Ba batla hore barab’abo bona le bona ba bontše boikutlo bo tšoanang le boo moapostola Pauluse a neng a batla hore Bakreste ba Roma ba be le bona: “E se eka Molimo ea fanang ka mamello le matšeliso a ka etsa hore har’a lōna le be le boikutlo ba kelello bo tšoanang le boo Kreste Jesu a neng a e-na le bona, e le hore ka tumellano le ka tlotlisa Molimo le Ntate oa Morena oa rōna Jesu Kreste ka molomo o le mong.” (Bar. 15:1, 5, 6) Ha ho pelaelo hore borapeli ba rōna bo momahaneng bo khahlisa Jehova.

 9. Ke hobane’ng ha re hloka moea o halalelang e le hore re etsise mohlala oa Jesu?

⁹ Jesu o ile a amahanya ho ‘ikokobetsa pelong’ le bonolo, boo e leng karolo ea tholoana ea moea o halalelang oa Molimo. Kahoo, ha re ntse re ithuta mohlala oa Jesu, re boetse re hloka moea o halalelang oa Jehova e le hore re ka etsisa mohlala oo ka tsela e nepahetseng. Re lokela ho rapella moea o halalelang oa Molimo re be re loanele ho ba le tholoana ea moea—e leng “lerato, thabo, khotso, tiisetso, mosa, molemo, tumelo, bonolo, boitšoaro.” (Bagal. 5:22, 23) Kahoo, ha re latela mohlala oa boikokobetso le bonolo oo Jesu a o behileng, re tla thabisa Ntate oa rōna ea leholimong, Jehova.

Jesu o ne a Tšoara Batho ba Bang ka Mosa

10. Jesu o ne a bontša mosa joang?

¹⁰ Mosa le oona ke karolo ea tholoana ea moea o halalelang. Ka linako tsohle Jesu o ne a tšoara batho ba bang ka mosa. Bohle ba neng ba batla Jesu ka tieo ba ne ba fumana hore o ‘ba amohela ka mosa.’ (Bala Luka 9:11.) Re ka ithuta eng ka mosa oo Jesu a neng a o bontša? Motho ea mosa o botsoalle, o bonolo, o na le kutloelo-bohloko ebile oa nahanela. Jesu o ne a le joalo. O ne a hauhela batho ‘hobane ba ne ba sohlokehile ’me ba qhalakane joaloka linku tse se nang molisa.’—Mat. 9:35, 36.

11, 12. (a) Hlalosa ketsahalo eo ho eona Jesu a ileng a bontša kutloelo-bohloko ka liketso. (b) U ka ithuta eng mohlaleng o boletsoeng moo?

¹¹ Jesu o ne a boetse a bontša qenehelo le kutloelo-bohloko ka liketso. Nahana ka ketsahalo e le ’ngoe. Mosali e mong o ne a khathalitsoe ke phallo e sa tloaelehang ea mali ka lilemo tse 12. Mosali enoa o ne a tseba hore ho ea ka Molao oa Moshe, boemo ba hae bo ne bo etsa hore eena le mang kapa mang ea mo amang e be ba sa hloekang bakeng sa borapeli. (Lev. 15:25-27) Leha ho le joalo, e tlameha ebe botumo ba Jesu le tsela eo a neng a tšoara batho ka eona, li ile tsa kholisa mosali eo hore Jesu o ne a e-na le matla a ho mo phekola ebile o ne a batla ho mo phekola. O ile a ’na a re: “Haeba nka ama liaparo tsa hae tsa ka ntle feela ke tla fola.” O ile a iteta sebete, eaba o ama liaparo tsa hae, ’me ka potlako a utloa hore o folile.

¹² Jesu o ile a hlokomela hore ho na le motho ea mo ammeng, eaba oa qamaka hore a bone hore na ke mang. Kaha mohlomong mosali enoa o ne a tšaba hore o tla khalemeloa ka matla hobane o ne a tlōtse Molao, o ile a oela fatše maotong a Jesu a ntse a thothomela eaba o mo bolella ’nete eohle. Na Jesu o ile a nyatsa mosali eo ea hlomolang pelo le ea neng a utloa bohloko? Che! O ile a mo khothatsa a re: “Morali, tumelo ea hao e u folisitse. Tsamaea ka khotso.” (Mar. 5:25-34) E tlameha ebe o ile a tšeliseha hakaakang ha a utloa mantsoe ao a mosa!

13. (a) Boikutlo ba Jesu bo ne bo fapane le ba Bafarisi joang? (b) Jesu o ne a tšoara bana joang?

¹³ Ho fapana le Bafarisi ba neng ba le lipelo li thata, le ka mohla Kreste ha aa ka a sebelisa matla a hae ho imetsa batho ba neng ba se ba ntse ba imetsoe. (Mat. 23:4) Ho fapana le moo, ka mosa le ka mamello o ile a ruta batho litsela tsa Jehova. Jesu o ne a le botsoalle ho balateli ba hae, a le lerato ka linako tsohle, a bile a le mosa, hape e le motsoalle oa ’nete. (Liprov. 17:17; Joh. 15:11-15) Esita le bana ba ne ba phutholoha ha ba e-na le Jesu, ’me ho hlakile hore le eena o ne a phutholoha ha a e-na le bona. O ne a sa phathahane hoo a neng a ke ke a emisa seo a neng a ntse a se etsa e le hore a iphe nako ea bana. Ketsahalong e ’ngoe, barutuoa ba hae ba neng ba e-na le monahano oa hore ke ba bohlokoa, o kang oa baeta-pele ba bolumeli ba mehleng ea bona, ba ile ba leka ho thibela batho hore ba se ke ba tlisa bana ba bona ho Jesu hore a ba ame. Jesu ha aa ka a thabela seo barutuoa ba hae ba neng ba se etsa. O ile a re ho bona: “Tlohelang bana ba banyenyane ba tle ho ’na; le se ke la leka ho ba thibela, etsoe ’muso oa Molimo ke oa ba joaloka bona.” Joale, ha a sebelisa bana hore a rute barutuoa ba hae thuto ea bohlokoa, o ile a re: “Kannete ke re ho lōna, Mang kapa mang ea sa amoheleng ’muso oa Molimo joaloka ngoana e monyenyane ho hang a ke ke a kena ho oona.”—Mar. 10:13-15.

14. Bana ba rua melemo efe ha ba thahaselloa ka tsela e molemo?

¹⁴ Nahana ka motsotsoana hore na hamorao ha ba bang ba bana bao e se e le banna le basali, ba ne ba tla ikutloa joang ha ba hopola hore Jesu Kreste o ile a ‘ba sika ’me a ba hlohonolofatsa.’ (Mar. 10:16) Bana ba kajeno le bona, ba tla hopola ka lerato baholo le batho ba bang ba bontšang hore ba ba thahasella e le kannete. Sa bohlokoa le ho feta, bana ba tsotelloang joalo e le kannete ka phuthehong, ba ithuta ba sa le banyenyane hore moea oa Jehova o ho batho ba hae.

Bontša Mosa Lefatšeng le Seng Mosa

15. Ke hobane’ng ha re sa lokela ho makala ha batho ba se mosa kajeno?

¹⁵ Kajeno batho ba bangata ba nahana hore ha ba na nako ea ho bontša batho ba bang mosa. Kahoo, letsatsi le letsatsi ha batho ba Jehova ba le sekolong, mosebetsing, ba nkile maeto le ha ba le tšimong, ba tobana le moea oa lefatše. Boitšoaro bo seng mosa bo ka ’na ba re soabisa, empa ha boa lokela ho re makatsa. Jehova o ile a bululela Pauluse hore a re lemose hore “matsatsing [ana] a ho qetela” a mahlonoko, Bakreste ba ’nete ba ne ba tla kopana le “baithati, . . . ba se nang lerato la tlhaho.”—2 Tim. 3:1-3.

16. Re ka etsa’ng hore ho rene mosa o kang oa Kreste ka phuthehong?

¹⁶ Ka lehlakoreng le leng, moea o ka phuthehong ea ’nete ea Bokreste oa khatholla, o fapane le oa lefatše le seng mosa. Ha re etsisa Jesu, e mong le e mong oa rōna a ka kenya letsoho hore ho be le moea oo o molemo. See re ka se etsa joang? Taba ea pele, ba bangata ka phuthehong ba hloka thuso le khothatso hobane baa kula kapa ba na le mathata a mang. Ho ka etsahala hore ebe “matsatsing [ana] a ho qetela,” mathata ao aa eketseha, empa ho hang ha a macha. Mehleng ea ha ho ne ho ngoloa Bibele, Bakreste ba ne ba e-na le mathata a tšoanang. Kahoo, joalokaha ho ne ho loketse hore Bakreste ba neng ba phela ka nako eo ba thusane, le hona joale ho loketse hore re thusane. Ka mohlala, Pauluse o ile a khothalletsa Bakreste hore ba ‘bue ka mokhoa o tšelisang le meea e tepeletseng maikutlo, ba tšehetse ba fokolang, ba be le tiisetso ho bohle.’ (1 Bathes. 5:14) Sena se akarelletsa ho sebelisa mosa o kang oa Kreste.

17, 18. Litsela tse ling tseo re ka etsisang mosa oa Jesu ka tsona ke life?

¹⁷ Bakreste ba na le boikarabelo ba ho ‘amohela barab’abo bona ka mosa,’ ho ba tšoara ka tsela eo Jesu a neng a tla ba tšoara ka eona, ho bontša kameho ea ’nete ka bao e leng khale re ba tseba le bao mohlomong re qalang ho teana le bona. (3 Joh. 5-8) Feela joalokaha Jesu a ile a ithaopela ho bontša kutloelo-bohloko ho batho ba bang, le rōna re lokela ho etsa joalo, kamehla re khatholle ba bang.—Esa. 32:2; Mat. 11:28-30.

¹⁸ E mong le e mong oa rōna a ka bontša mosa ka ho etsa ho hong ho bontšang hore o tsotella batho ba bang. Batla litsela le menyetla ea ho etsa joalo. Bontša thahasello ka liketso! Pauluse o ile a fana ka khothatso ena: “Ka lerato la bara ba motho le bontšane lerato le mofuthu,” eaba o eketsa ka ho re, “etellang pele ho bontšaneng tlhompho.” (Bar. 12:10) Seo se bolela ho latela mohlala oa Kreste, ho tšoara ba bang ka mofuthu le ka mosa, ho ithuta ho bontša “lerato le se nang boikaketsi.” (2 Bakor. 6:6) Ha Pauluse a hlalosa lerato leo le kang la Kreste o ile a re: “Lerato lea tiisetsa ’me le mosa. Lerato ha le boulele, ha le ithorise, ha le ikhohomose.” (1 Bakor. 13:4) Ho e-na le ho jara bara le barali babo rōna ka pelo, e se eka re ka mamela keletso ena: “Le bontšane mosa, le be le qenehelo e bonolo, le tšoarelane ka bolokolohi feela joalokaha Molimo le eena ka Kreste a ile a le tšoarela ka bolokolohi.”—Baef. 4:32.

19. Ho bontša mosa o kang oa Kreste ho hlahisa litholoana life tse molemo?

¹⁹ Ha re loanela ho ba le mosa o kang oa Kreste re bile re o bontša ka linako tsohle le maemong ’ohle, sena se tla etsa hore re fumane moputso o moholo. Moea oa Jehova o tla sebetsa ka bolokolohi ka phuthehong, o thuse e mong le e mong hore a be le tholoana e ntle ea moea. Ho phaella moo, ha re latela mohlala oo Jesu a re behetseng oona ’me re thusa ba bang hore ba o latele, borapeli ba rōna bo etsoang ka thabo le bo momahaneng bo tla thabisa Molimo ka boeena. Kahoo, e se eka kamehla re ka loanela ho bontša bonolo ba Jesu le mosa oa hae ha re sebelisana le batho ba bang.

Na U ka Hlalosa?

• Jesu o ile a bontša joang hore o ne a le “maikutlo a bonolo ’me [a] ikokobelitse pelong”?

• Jesu o ile a bontša mosa joang?

• Litsela tse ling tseo re bontšang bonolo le mosa o kang oa Kreste ka tsona ke life lefatšeng lee le sa phethahalang?

[Setšoantšo se leqepheng la 8]

Ha tumelo ea mor’abo rōna e thekesela, joalokaha ea Petrose e ile ea thekesela, na re tla nanabetsa letsoho ebe rea mo thusa?

[Setšoantšo se leqepheng la 10]

U ka etsa joang hore ka phuthehong ho rene mosa?