Ka Sebele Liketso Tsohle Tse Mpe li Tla Felisoa!

MOLIMO o re file Lentsoe la hae le bululetsoeng, le re hlalosetsang hore na ke hobane’ng ha batho ba etsa lintho tse fosahetseng. Hape o re file bolokolohi ba hore re ikhethele, a ba a re fa matla a hore re khone ho itaola, e leng se etsang hore re khone ho khetha hore re se ke ra etsa lintho tse fosahetseng. (Deuteronoma 30:15, 16, 19) Ka lebaka leo, re ka khona ho lemoha haeba re sekametse ho etsa lintho tse itseng tse fosahetseng ’me ra nka khato e loketseng. Etsoe haeba re qoba ho etsa lintho tse fosahetseng, seo se tla re thabisa se be se thabise le bao re phelang le bona.—Pesaleme ea 1:1.

Leha ho le joalo, ho sa tsotellehe hore na re leka ka matla hakae re le batho ka bomong hore re qobe ho etsa lintho tse fosahetseng, lefatše lona le tletse ka liketso tse khopo tseo batho ba lulang ba li etsa. Bibele ea lemosa: “Tseba sena, hore matsatsing a ho qetela ho tla ba le linako tse mahlonoko tseo ho leng thata ho sebetsana le tsona.” E le ho re bontša hore na ke eng e tla etsa hore matsatsi ao e be a “thata ho sebetsana” le ’ona, e re: “Batho e tla ba baithati, ba ratang chelete, ba ikhopolang ho tlōla, ba ikhohomosang, banyefoli, ba sa mameleng batsoali, ba se nang teboho, ba sa tšepahaleng, ba se nang lerato la tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba ikhohomosang ka boikakaso, ba ratang menyaka ho e-na le ho rata Molimo, ba nang le ponahalo ea boinehelo ba bomolimo empa ba se na ’nete matleng a bona; ’me bana u ba furalle.”—2 Timothea 3:1-5.

Mohlomong u hlokometse polelo e reng “matsatsing a ho qetela” mantsoeng a boprofeta a qotsitsoeng ka holimo. U nahana hore e bolela’ng? Ka tloaelo feela, ha ho thoe ‘matsatsi a ho qetela’ motho o nahana ka ntho e itseng e tla fela. Ke eng eona eo? Hlokomela hore na Molimo o tšepisa eng Lentsoeng la hae.

Ba khopo ba tla felisoa ka ho feletseng.

“Ho setse nakoana e seng kae, ’me ea khopo ha a sa tla hlola a e-ba teng; ka sebele u tla lebisa tlhokomelo sebakeng sa hae, ’me o tla be a le sieo. Empa ba bonolo ba tla rua lefatše, ka sebele ba tla fumana thabo e phethehileng khotsong e ngata.”—PESALEME EA 37:10, 11.

“Jehova o lebela bohle ba mo ratang, empa bohle ba khopo o tla ba felisa.”—PESALEME EA 145:20.

Ho ke ke ha hlola ho e-ba le ba hatellang ba bang.

“O tla lopolla ea futsanehileng ea hoeletsang ho kōpa thuso, le ea hlorileng le mang kapa mang ea se nang mothusi. O tla lopolla meea ea bona khatellong le pefong.”—PESALEME EA 72:12, 14.

“Pōpo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.”—BAROMA 8:21.

Batho ba tla fumana lintho tseo ba li hlokang.

“Ka sebele e mong le e mong o tla lula tlas’a sefate sa hae sa morara le tlas’a sefate sa hae sa feiga, ho ke ke ha e-ba le ea etsang hore ba thothomele.”—MIKEA 4:4.

“Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. Etsoe matsatsi a sechaba sa ka a tla ba joaloka matsatsi a sefate; ’me bakhethoa ba ka ba tla sebelisa mosebetsi oa matsoho a bona ka botlalo.”—ESAIA 65:21, 22.

Ho tla rena toka.

“Joale, na ka sebele Molimo a ke ke a etsa hore toka e etsetsoe bakhethoa ba hae ba hoeletsang ho eena bosiu le motšehare . . . ? Kea le bolella, O tla etsa hore ba etsetsoe toka ka potlako.”—LUKA 18:7, 8.

“Jehova o rata toka, a ke ke a tlohela ba tšepahalang ba hae. Ka sebele ba tla lebeloa ho isa nakong e sa lekanyetsoang.”—PESALEME EA 37:28.

Ho loka ho tla nkela boithati sebaka.

“Ka sebele baahi ba naha e behang ba tla ithuta ho loka.”—ESAIA 26:9.

“Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona.”—2 PETROSE 3:13.

Batho Baa Fetoha le Hona Joale

Ha ho pelaelo hore kaofela ha rōna re thabisoa ke litšepiso tseo. Empa re ka kholiseha joang hore ka sebele li tla phethahala? Ha e le hantle, re se re ntse re e-na le bopaki ba hore seo Molimo a se tšepisitseng se tla etsahala. Ke bopaki bofe? Ke ba hore batho ba limilione lefatšeng ka bophara kajeno ba se ba ntse ba atleha ho fetola botho ba bona hore e se ke ea e-ba baithati, ba itšoereng hampe kapa ba mabifi, ho e-na le hoo, ba ithutile ho ba batho ba tšepahalang, ba nang le khotso le ba mosa. Kajeno Lipaki Tsa Jehova tse fetang limilione tse supileng ke mokhatlo oa bara ba motho lefatšeng kaofela o sa angoeng ke mathata a bakoang ke morabe, setso, bochaba, lipolotiki le boemo ba moruo, e leng oona a bakileng lehloeo le lengata hakana, liketso tse mabifi hammoho le tšollo ea mali historing ea batho.a Taba ea hore liphetoho tse joalo li etsahala mehleng ena ke bopaki bo matla ba ho lumela hore seo Molimo a se tšepisitseng se tla phethahala ka tsela e hlollang.

Empa ha e le hantle ke eng e etsang hore batho ba etse liphetoho tse joalo? Karabo e fumanoa tšepisong e ’ngoe ea Bibele, e tlalehiloeng ke moprofeta Esaia. O ile a ngola:

“Phiri e tla lula ka nakoana le konyana e tona, lengau le bothe le potsanyane, ’me namane le taoana e moetse le phoofolo e fepehileng hantle li be hammoho; moshanyana o tla li etella pele. . . . Le tau e tla ja joang joaloka poho. Ka sebele ngoana ea anyang o tla bapalla mokoting oa masumu; ngoana ea khoesitsoeng o tla kenya letsoho mokoting o kenyang leseli oa noha e chefo. Li ke ke tsa ntša kotsi leha e le efe kapa tsa baka tšenyo leha e le efe thabeng eohle ea ka e halalelang; hobane ka sebele lefatše le tla tlala tsebo ea Jehova joalokaha metsi a koahetse leoatle.”—Esaia 11:6-9.

Na boprofeta boo bo ipuela feela ka nako eo liphoofolo li tla beng li phela ka kutloano le batho? Che, ha bo bue ka hoo feela. Hlokomela hore karolo e qetellang ea mantsoe ao e bontša hore na phetoho eo e tla bakoa ke eng: “Hobane ka sebele lefatše le tla tlala tsebo ea Jehova.” Na ho tseba ka Molimo ho ka fetola boitšoaro ba liphoofolo? Le hanyenyane! Empa ho ka fetola batho, ebile hoa ba fetola! Boprofeta bona bo bua ka batho bao e ka ’nang eaba ba ne ba e-na le mekhoa ea bophoofolo, ba neng ba tla e tlohela ebe ba hlaolela ho ba le botho bo kang ba Kreste ka ho ithuta le ho sebelisa seo Bibele e se rutang.

Ka mohlala, nahana ka Pedro.b O ile a kena mokhatlong oa likhukhuni hobane a ne a lumela hore o loanela toka. Ka mor’a hore a koetlisoe, o ile a laeloa hore a e’o qhomisa liahelo tsa mapolesa ka seqhomane. O ile a tšoaroa ha a ntse a lokisetsa ho etsa joalo. Pedro o ile a hlola chankaneng likhoeli tse 18, moo a ileng a ’na a tsoela pele ka mesebetsi ea bokhukhuni. Nakong eona eo, mosali oa Pedro o ile a qala ho ithuta Bibele le Lipaki Tsa Jehova. Ha a lokolloa chankaneng, Pedro le eena o ile a qala ho ithuta Bibele, ’me seo a ithutileng sona ka Jehova Molimo se ile sa mo susumelletsa hore a etse liphetoho tse khōlō tseleng eo a neng a ikutloa ka eona ka bophelo. Pedro o re: “Ke leboha Jehova haholo hore ebe ke ne ke e-s’o bolaee motho nakong eo ke neng ke sa le sekhukhuni. Hona joale ke sebelisa sabole ea moea oa Molimo, e leng Bibele, ho fa batho molaetsa oa khotso ea sebele le toka—e leng litaba tse molemo tsa ’Muso oa Molimo.” Pedro o ile a ba a etela liahelong tseo a neng a rerile ho li ripitla ’me a bolella batho ba ho tsona ka molaetsa oa khotso le oa lefatše le tla beng le se na liketso tse mabifi.

Tsela e matla eo Lentsoe la Molimo le amang batho ka eona e re fa mabaka a matla le ho feta a hore re lumele hore tšepiso ea Molimo ea hore liketso tsohle tse khopo li tla fela e fela e le ’nete. Ruri batho ba ke ke ba hlola ba etsa lintho tse fosahetseng empa ba tla fetoha hore e be batho ba molemo. E se khale, Jehova o tla felisa mohloli oa liketso tsohle tse khopo, Satane Diabolose, eo e leng eena ea hlohlelletsang le ho laola lintho tse etsahalang lefatšeng. Bibele e re: “Lefatše lohle le rapaletse matleng a ea khopo.” (1 Johanne 5:19) Empa o tla felisoa e se khale. Ba hanang ka boomo ho tlohela liketso tsa bona tse khopo le bona ba tla felisoa. E tla ba thabo e kaakang ho phela nakong e babatsehang joalo!

Motho o lokela ho etsa’ng e le hore a fumane bokamoso boo? Hopola hore “tsebo ea Jehova” ke eona e etsang hore batho ba fetohe kajeno, ebile ke eona e tla etsa hore ho be le liphetoho lefatšeng ka bophara nakong e tlang e haufi. Haeba le uena u ka fumana tsebo e nepahetseng ea Bibele oa ba oa e sebelisa—joaloka Pedro—u ka lebella hore u tla phela lefatšeng leo ho lona “ho loka ho tla aha.” (2 Petrose 3:13) Ka hona, re u khothalletsa hore u sebelise monyetla ona o ntseng o le teng oa hore u ithute ka Molimo le ka Jesu Kreste, etsoe seo se ka bolela bophelo bo sa feleng ho uena.—Johanne 17:3.

[Mongolo o botlaaseng ba leqephe]

[Ntlha e Qolotsoeng e leqepheng la 9]

Le uena u ka lebella ho phela lefatšeng leo ho lona “ho loka ho tla aha.”—2 PETROSE 3:13