Etsa Lintho Tumellanong Le Thapelo Ea Jesu E lerato

1, 2. Hlalosa seo Jesu a ileng a se etsetsa baapostola ba hae ba tšepahalang ka mor’a ho keteka Paseka ka 33 C.E.

KE KA shoalane, ka la 14 Nisane selemong sa 33 C.E. Jesu le metsoalle ea hae ba thabetse ho keteka Paseka, e ba hopotsang kamoo Molimo a ileng a lopolla baholo-holo ba bona bokhobeng Egepeta kateng. Empa barutuoa ba hae ba tšepahalang ba mothating oa ho fumana “topollo e sa feleng” ea boemo bo phahameng haholo. Letsatsing le hlahlamang, Moeta-pele oa bona ea se nang sebe o tla bolaoa ke lira tsa hae. Empa ketso ena e lonya e tla fetoha tlhohonolofatso. Mali a Jesu a tšolotsoeng a tla etsa hore batho ba lokolohe sebeng le lefung.—Baheb. 9:12-14.

² E le ho etsa bonnete ba hore ha re lebale tokisetso ena e lerato, Jesu o ile a theha tšebeletso e ncha ea selemo le selemo e ileng ea nkela Paseka sebaka. O ile a etsa sena ka ho qhetsola bohobe bo sa lomosoang, ’me ha a bo fetisetsa ho e mong le e mong oa baapostola ba hae ba tšepahalang ba 11, o ile a re: “Sena se bolela ’mele oa ka oo ka sebele o tla fanoa molemong oa lōna. Le ’ne le etse sena ho nkhopola.” O ile a etsa se tšoanang ka senoelo sa veine e khubelu, ’me a re ho bona: “Senoelo sena se bolela selekane se secha motheong oa mali a ka, a tlang ho tšolloa molemong oa lōna.”—Luka 22:19, 20.

 3. (a) Ke liphetoho life tse khōlō tse ileng tsa etsahala ka mor’a lefu la Jesu? (b) Ke lipotso life tseo re lokelang ho nahana ka tsona mabapi le thapelo ea Jesu e tlalehiloeng ho Johanne khaolo ea 17?

³ Selekane sa khale sa Molao se neng se le pakeng tsa Molimo le Baiseraele ba tlhaho se ne se le haufi le ho fela. Se ne se tla nkeloa sebaka ke selekane se secha se pakeng tsa Jehova le balateli ba Jesu ba tlotsitsoeng. Jesu o ne a tšoenyehile haholo ka boemo ba moea ba sechaba sena se secha sa moea. Baiseraele ba ne ba sa momahana borapeling ba bona ho Molimo ’me sena se ne se hlompholla lebitso la Molimo. (Joh. 7:45-49; Lik. 23:6-9) Ho e-na le hoo, Jesu o ne a labalabela hore balateli ba hae ba lule ba momahane e le hore ba sebetse ka kutloano ho isa thoriso lebitsong la Molimo. Tumellanong le seo, Jesu o ile a etsa’ng? O ile a etsa thapelo e matla ka ho fetisisa eo ho seng e tšoanang le eona, eo batho ba ka khonang ho e bala. (Joh. 17:1-26; sheba setšoantšo se qalong.) Ha re ntse re hlahlobisisa thapelo ena, a re ke re nahaneng ka lipotso tsena: “Na Molimo o ile a arabela thapelo ea Jesu? Na ke etsa lintho tumellanong le eona?”

4, 5. (a) Re ithuta’ng selelekeleng sa thapelo ea Jesu? (b) Jehova o ile a arabela kōpo ea Jesu e mabapi le bokamoso ba hae joang?

⁴ Jesu o ile a ruta barutuoa ba hae lintho tse ngata tse hlollang ho fihlela ka khitla. Ka mor’a moo, a phahamisetsa mahlo leholimong ’me a rapela a re: “Ntate, hora e fihlile; tlotlisa mora oa hao, e le hore mora oa hao a ka u tlotlisa, ho ea kamoo u mo fileng matla holim’a nama eohle, e le hore, mabapi le palo e feletseng eo u mo fileng eona, a ka e fa bophelo bo sa feleng. . . . Ke u tlotlisitse lefatšeng, kaha ke qetile mosebetsi oo u mphileng oona hore ke o etse. Kahoo joale, Ntate, u ntlotlise haufi le uena ka khanya eo ke neng ke e-na le eona haufi le uena pele lefatše le e-ba teng.”—Joh. 17:1-5.

⁵ Hlokomela seo e neng e le sa bohlokoa ka ho fetisisa ho Jesu selelekeleng sa thapelo ea hae. Ntho e ka sehloohong eo Jesu a neng a amehile ka eona ke hore Ntate oa hae ea leholimong a tlotlisoe, ’me sena se nyallana hantle le kōpo ea pele eo a ileng a e etsa thapelong ea mohlala moo a ileng a re: “Ntate, lebitso la hao le ke le halaletsoe.” (Luka 11:2) Ntho e ’ngoe eo Jesu a neng a amehile ka eona ke litlhoko tsa barutuoa ba hae, e le hore ‘a ka ba fa bophelo bo sa feleng.’ Ka mor’a moo, Jesu o ile a kōpa, a re: “Ntate, u ntlotlise haufi le uena ka khanya eo ke neng ke e-na le eona haufi le uena pele lefatše le e-ba teng.” Jehova o putsa Mora oa hae ea tšepahalang ho feta kamoo a kōpileng kateng ka hore a fe Jesu “lebitso le khabane ho feta” la mangeloi ’ohle.—Baheb. 1:4.

 6. Ke sefe seo baapostola ba ileng ba lokela ho se etsa e le hore ba fumane bophelo bo sa feleng, hona re tseba joang hore ba ile ba atleha?

⁶ Jesu o boetse o rapela ka ntho eo rōna baetsalibe re lokelang ho e etsa e le hore re ka fumana mpho e sa re tšoanelang ea bophelo bo sa feleng. (Bala Johanne 17:3.) O re re lokela ho tsoela pele re “rua tsebo” ka Molimo le ka Kreste. Tsela e ’ngoe eo re ka etsang seo ka eona, ke hore re sebelise mahlo le litsebe tsa rōna ho ithuta ka ho eketsehileng ka Jehova le ka Mora oa hae. Tsela e ’ngoe ea bohlokoa eo re ka ruang tsebo ka Molimo ka eona, ke ka hore re ikutloele ka borōna thabo e tlisoang ke ho sebelisa seo re ithutang sona ka eena. Baapostola ba ile ba latela tsela ena e fanang ka bophelo, kaha Jesu o ile a tsoela pele ho rapela a re: “Ke ba file lipolelo tseo u mphileng tsona, ’me ba li amohetse.” (Joh. 17:8) Empa e le hore ba fumane bophelo bo sa feleng, ho ne ho hlokahala hore ba tsoele pele ho thuisa ka lipolelo tsa Molimo ba be ba li sebelise kamehla bophelong ba bona. Na baapostola ba tšepahalang ba ile ba atleha ho etsa see ho fihlela qetellong ea bophelo ba bona lefatšeng? Ruri ba ile ba etsa joalo. Re tseba seo hobane lebitso la e mong le e mong oa bona le ngotsoe ka tsela e ke keng ea hlakoloa majoeng a 12 a motheo oa Jerusalema e Ncha ea leholimo.—Tšen. 21:14.

 7. Ho “tseba” Molimo ho bolela’ng, hona ke hobane’ng ha e le habohlokoa hakaale?

⁷ Ho ea ka litsebi tsa Segerike, poleloana ea Segerike e fetoletsoeng e le “ho tsoela pele ba rua tsebo” e ka boela ea fetoleloa e le “ho tsoela pele ho tseba” kapa “ho tlameha ho tsoela pele ho tseba.” Meelelo eo ka bobeli e ea tlatsana ebile ke ea bohlokoa. Bibele ea Sesotho e fetoletse poleloana eo e ho Johanne 17:3 e le “hore ba u tsebe.” Kahoo, ‘ho tsoela pele ho rua tsebo’ ho bolela hore motho ha a khaotse ho ithuta ka Molimo. Leha ho le joalo, ho tseba Motho eo e moholo ka ho fetisisa bokahohleng ha ho bolele feela ho tseba ka hlooho litšobotsi tsa Molimo le morero oa hae. Re lokela ho mo rata haholo re be re be le kamano e haufi le eena. Hape re lokela ho rata bara le barali babo rōna. Bibele e re, “Ea sa rateng ha a tsebe Molimo.” (1 Joh. 4:8) Kahoo, ho tseba Molimo ho akarelletsa ho mo mamela. (Bala 1 Johanne 2:3-5.) Ruri ke tlotla e khōlō ho ba e mong oa batho ba tsebang Jehova! Empa, feela joalokaha ho etsahetse ho Judase Iskariota, motho a ka lahleheloa ke kamano eo ea bohlokoa le Jehova. A re sebetseng ka thata ho e boloka. Ha re etsa joalo, qetellong re tla fumana mpho e sa re tšoanelang ea bophelo bo sa feleng.—Mat. 24:13.

8, 9. Ke ntho efe e neng e le ka sehloohong tšebeletsong ea Jesu ea lefatšeng, hona ke litloaelo life tsa bolumeli tseo e tlamehang ebe o ile a li nyatsa?

⁸ Ha re ntse re bala thapelo ea Jesu e ho Johanne khaolo ea 17, hoa hlaka hore Jesu o ne a e-na le lerato le tebileng eseng feela bakeng sa baapostola ba hae empa le bakeng sa rōna. (Joh. 17:20) Ho ntse ho le joalo, re lokela ho utloisisa hore poloko ea rōna hase eona ntho e ka sehloohong eo Jesu a amehileng ka eona. Morero o ka sehloohong oa tšebeletso ea hae lefatšeng ho tloha qalong ho fihlela qetellong, e ne e le ho halaletsoa le ho tlotlisoa ha lebitso la Ntate oa hae. Ka mohlala, ha Jesu a ne a phatlalatsa thōmo ea hae a le synagogeng ea Nazaretha, o ile a bala ho tsoa moqolong oa Esaia a re: “Moea oa Jehova o holim’a ka, hobane o ntlotselitse hore ke bolelle mafutsana litaba tse molemo.” Ntle ho tika-tiko, e tlameha ebe ha Jesu a ne a bala mantsoe ana o ile a phatlalatsa lebitso la Molimo ka ho hlaka.—Luka 4:16-21.

⁹ Nako e telele pele Jesu a tla lefatšeng, baeta-pele ba bolumeli ba Bajuda ba ne ba sa khothalletse batho ho sebelisa lebitso la Molimo. Re ka kholiseha hore Jesu o ile a nyatsa ka matla tloaelo eo e sa thehoang Mangolong. O ile a re ho bahanyetsi ba hae: “Ke tlile ka lebitso la Ntate, empa ha le nkamohele; haeba e mong osele a ne a ka fihla ka lebitso la hae, le ne le tla mo amohela.” (Joh. 5:43) Kahoo, matsatsi a seng makae pele ho lefu la hae, Jesu o ile a totobatsa ntho e ka sehloohong eo a neng a amehile ka eona bophelong ba hae ka hore a rapele a re: “Ntate, tlotlisa lebitso la hao.” (Joh. 12:28) Ka hona, ha rea lokela ho makatsoa ke hore ebe Jesu o bontša ho ameha ka lebitso la Ntate oa hae thapelong ena eo re ntseng re e hlahloba.

10, 11. (a) Jesu o ile a tsebahatsa lebitso la Ntate oa hae joang? (b) Barutuoa ba Jesu ba lokela ho ba le sepheo sefe?

¹⁰ Jesu o ile a rapela a re, “Ke senotse lebitso la hao ho batho bao u mphileng bona lefatšeng. E ne e le ba hao, ’me u mphile bona, ’me ba bolokile lentsoe la hao. Hape, ha ke sa le lefatšeng, empa bona ba lefatšeng ’me ke tla ho uena. Ntate ea halalelang, ba lebele ka lebaka la lebitso la hao leo u mphileng lona, e le hore ba ka ba bang feela joalokaha re le bang.”—Joh. 17:6, 11.

¹¹ Ho etsa hore barutuoa ba hae ba tsebe lebitso la Ntate oa hae ho ne ho akarelletsa ho fetang feela hore a le bitse. Jesu o ile a ba thusa ho tseba hore na ha e le hantle Jehova ke mang. O ile a ba ruta ka litšobotsi tse babatsehang tsa Molimo le tsela e lerato eo a sebelisanang le rōna ka eona. (Ex. 34:5-7) Hona joale Jesu e se e le Morena leholimong, ’me o tsoela pele ho thusa barutuoa ba hae ho tsebahatsa lebitso la Jehova lefatšeng lohle. Ka sepheo sefe? Ka sepheo sa hore ho bokelloe barutuoa ba eketsehileng pele ho bofelo ba tsamaiso ena e khopo ea lintho. Ha nako eo e fihla, o tla pholosa lipaki tsa hae tse tšepahalang ’me batho bohle ba tla tseba lebitso la Jehova le leholo!—Ezek. 36:23.

12. Ke lintho life tse tharo tse hlokahalang e le hore re atlehe mosebetsing oa rōna o pholosang bophelo?

¹² Ha Jesu a ntse a le lefatšeng, o ile a sebetsa ka thata ho thusa barutuoa ba hae hore ba hlōle bofokoli ba bona. Sena se ne se hlokahala e le hore ba ka qetela mosebetsi oo Jesu a neng a o qalile. Jesu o ile a rapela a re, “Feela joalokaha u nthometse lefatšeng, le ’na ke ba rometse lefatšeng.” E le hore ba atlehe mosebetsing ona o pholosang bophelo, Jesu o ile a hatisa lintho tse tharo tse neng li hlokahala. Ea pele, o rapella hore barutuoa ba hae e se ke ea e-ba karolo ea lefatše le litšila la Satane. Ea bobeli, o rapella hore ba halaletsoe, kapa ba bolokoe ba halalela ka hore ba sebelise ’nete ea Lentsoe la Molimo. Ea boraro, ka makhetlo Jesu o kōpa ka tieo hore barutuoa ba momahanngoe ke lerato leo eena le Ntate oa hae ba ratanang ka lona. Sena se bolela hore re lokela ho itlhahloba. E mong le e mong oa rōna o lokela ho ipotsa, ‘Na ke etsa lintho tumellanong le likōpo tsa Jesu tse tharo?’ Jesu o ne a kholisehile hore haeba barutuoa ba hae ba etsa lintho tseo, batho ba bangata ba ne ba tla amohela molaetsa oa bona.—Bala Johanne 17:15-21.

13. Thapelo ea Jesu e ile ea arabeloa joang lekholong la pele la lilemo C.E.?

¹³ Ha re bala buka ea Liketso Tsa Baapostola, e leng buka e latelang Likosepele tse ’nè, re ka bona hore thapelo ea Jesu e ile ea arabeloa. Nahana ka lintho tse neng li ka ’na tsa baka karohano har’a Bakreste ba lekholong la pele la lilemo, bao e neng e le Bajuda le Balichaba, barui le mafutsana, makhoba le benghali. Leha ho le joalo, ba ne ba le bonngoeng hoo ba neng ba ka tšoantšoa le litho tse sa tšoaneng tsa ’mele oo Jesu e leng hlooho ea oona. (Baef. 4:15, 16) Ruri eo e ne e le ketsahalo ea mohlolo kaha ba ne ba phela lefatšeng le arohileng la Satane! Thoriso eohle e lokela ho isoa ho Jehova, eo ka ho sebelisa matla a moea oa hae o halalelang sena se ileng sa etsahala.—1 Bakor. 3:5-7.

14. Thapelo ea Jesu e arabetsoe joang mehleng ea kajeno?

¹⁴ Ka masoabi, lintho li ile tsa fetoha ha baapostola ba shoa. Feela joalokaha ho ile ha boleloa esale pele, bokoenehi bo ile ba ja setsi, ’me ba fella ka maquloana a Bokreste-’mōtoana. (Lik. 20:29, 30) Empa ka selemo sa 1919, Jesu o ile a lokolla balateli ba hae ba tlotsitsoeng botlamuoeng ba bolumeli ba bohata ’me a ba kopanya hammoho ka “tlamo e phethahetseng ea bonngoe.” (Bakol. 3:14) Mosebetsi oa bona oa ho bolela o behile litholoana life lefatšeng ka bophara? “Linku tse ling” tse ka holimo ho limilione tse supileng tse tsoang “lichabeng tsohle le melokong eohle le bathong bohle le malemeng ’ohle” li bokeletsoe ho ba mohlape o le mong o bonngoeng le batlotsuoa ba Molimo. (Joh. 10:16; Tšen. 7:9) Ruri ena ke karabo e hlollang thapelong ea Jesu e reng, “e le hore lefatše le ka ba le tsebo ea hore [uena Jehova] u nthomile le hore u ba ratile feela joalokaha u nthatile”!—Joh. 17:23.

15. Jesu o ile a etsa kōpo efe e khethehileng molemong oa barutuoa ba hae ba tlotsitsoeng?

¹⁵ Pejana mantsiboeeng a la 14 Nisane, Jesu o ile a fa baapostola ba hae tlotla ka ho etsa selekane le bona sa hore ba buse le eena ’Musong oa hae. (Luka 22:28-30; Joh. 17:22) Kahoo, ha Jesu a rapella bohle bao e neng e tla ba balateli ba hae ba tlotsitsoeng o ile a re: “Ntate, ha e le ka seo u mphileng sona, ke lakatsa hore, moo ke leng teng, le bona ba ka ba le ’na, e le hore ba bone khanya ea ka eo u mphileng eona, hobane u nthatile pele lefatše le thehoa.” (Joh. 17:24) Sena se etsa hore linku tse ling tsa Jesu li thabe ho e-na le ho ba mōna, ebile ke bopaki bo eketsehileng ba bonngoe bo renang har’a Bakreste bohle ba ’nete ba lefatšeng kajeno.

16, 17. (a) Qetellong ea thapelo ea hae, Jesu o ile a re o ikemiselitse ho tsoela pele a etsa’ng? (b) Re lokela ho ikemisetsa ho etsa’ng?

¹⁶ Ka lebaka la tšusumetso ea baeta-pele ba bona ba bolumeli, batho ba bangata lefatšeng kajeno ba khetha ho iphapanyetsa bopaki bo totobetseng ba hore ka sebele Jehova o na le bahlanka ba momahaneng ba mo tsebang. Ho ne ho le joalo le mehleng ea Jesu. Kahoo, o lihela likhala ka mantsoe ana a khathollang: “Ntate ea lokileng, ka sebele, lefatše ha le u tsebe; empa ’na kea u tseba, ’me bana baa tseba hore u nthomile. Ke ba tsebisitse lebitso la hao ’me ke tla le tsebahatsa, e le hore lerato leo u nthatileng ka lona le ka ba ho bona ’me ’na ke be bonngoeng le bona.”—Joh. 17:25, 26.

¹⁷ Ke mang ea ka latolang hore Jesu o ile a etsa lintho tumellanong le thapelo ea hae? E le Hlooho ea phutheho, o tsoela pele ho re thusa hore re tsebahatse lebitso la Ntate oa hae le morero oa hae. E se eka re ka tsoela pele ho ikokobelletsa bohlooho ba hae ka hore re mamele taelo ea hae ea hore re bolele litaba tse molemo ka cheseho re be re etse barutuoa. (Mat. 28:19, 20; Lik. 10:42) Hape, e se eka re ka sebetsa ka thata hore re boloke bonngoe ba rōna ba bohlokoa. Ha re etsa joalo, re tla be re etsa lintho tumellanong le thapelo ea Jesu ’me seo se tla isa thoriso lebitsong la Jehova ebile se tla re tlisetsa thabo ea ka ho sa feleng.