Le Tšoanela ho ba Batho ba Mofuta Ofe?
1 Nako ea ho ikarabella e-ea atamela bakeng sa moloko ’ohle oa batho. Bibele e e bitsa “letsatsi la Jehova.” Ke nako ea ho lihuoa ha kahlolo ea bomolimo khahlanong le ba khopo; hape ke nako ea ho lopolloa ha ba lokileng. Batho bohle ba tla beng ba phela ka nako eo ba tla ikarabella bakeng sa tsela eo ba ileng ba phela ka eona. A nahanne ka sena, Petrose o phahamisa potso e fatang maikutlo: “Le tšoanela ho ba batho ba mofuta ofe”? O hatella bohlokoa ba ‘liketso tse halalelang tsa boitšoaro, liketso tsa boinehelo ba bomolimo, le ho lula re hopolela haufi letsatsi la Jehova,’ haesita le tlhokahalo ea ‘ho hloka letheba, ho hloka sekoli le ho ba khotsong.’—2 Pet. 3:11-14, NW.
2 Liketso Tse Halalelang Tsa Boitšoaro le Liketso Tsa Boinehelo ba Bomolimo: Boitšoaro bo halalelang bo akarelletsa mesebetsi e behang mohlala e bontšang tlhompho bakeng sa melao-motheo ea Bibele. (Tite 2:7, 8) Mokreste o tlameha ho qoba boitšoaro ba lefatše bo susumetsoang ke litakatso tsa boithati, tsa nama.—Ba-Roma 13:11, 14.
3 “Boinehelo ba bomolimo” bo hlalosoa e le “kamano ea botho le Molimo, e tsoang pelong e susumelitsoeng ke kananelo e tebileng bakeng sa litšoaneleho tsa hae tse ipiletsang.” Cheseho ea rōna tšebeletsong ke tsela e hlaheletseng eo ka eona re bonahatsang tšoaneleho ena. Ha re bolele ka lebaka la tlamo feela; ke ka lebaka la lerato le tebileng ho Jehova. (Mar. 12:29, 30) Kaha re susumetsoa ke lerato le joalo, re nka tšebeletso ea rōna e le pontšo e nang le morero ea boinehelo ba rōna ba bomolimo. Kaha boinehelo ba rōna e lokela ho ba bo sa fetoheng, re lokela ho kopanela kamehla mosebetsing oa boboleli. E lokela ho ba karolo ea bohlokoa ea kemiso ea rōna ea beke le beke ea mosebetsi.—Ba-Heb. 13:15.
4 Ho lula “re hopolela haufi” letsatsi la Jehova ho bolela ho le etsa ntho ea pele mehopolong ea rōna ea letsatsi le letsatsi, ho se mohla re le qhelelang thōko boemong boo e seng ba bohlokoa. Ho bolela ho beha lithahasello tsa ’Muso pele bophelong ba rōna.—Matt. 6:33.
5 Ho Hloka Letheba, ho Hloka Sekoli le ho ba Khotsong: Joaloka karolo ea bongata bo boholo, re ‘hlatsoitse liaparo tsa rōna ’me re li soeufalitse maling a Konyana.’ (Tšen. 7:14) Kahoo, “ho hloka letheba” ho bolela hore re tlameha ho itebela ka tieo hore bophelo ba rōna bo hloekileng, bo nehetsoeng bo se qaphaletsoe ke litšila tsa lefatše. Re ipoloka re “hloka sekoli” ka ho hanela litšusumetso tsa ho hahamalla lipakane tse se nang tšabo ea bomolimo, tsa lerato la lintho tse bonahalang hore li senye botho ba rōna ba Bokreste. (Jak. 1:27; 1 Joh. 2:15-17) Re bontša hore re phela “khotsong” ka ho bonahatsa “khotso ea Molimo” litšebelisanong tsohle tsa rōna le ba bang.—Ba-Fil. 4:7; Ba-Roma 12:18; 14:19.
6 Haeba ka katleho re itebela khahlanong le ho silafatsoa ke lefatše, ha ho mohla re tla “ipapisa le lefatše lena,” le ahlotsoeng ke Jehova. Ho e-na le hoo, mesebetsi ea rōna e metle e tla thusa ba bang hore ba bone phapang pakeng tsa “ea sebeletsang Molimo le ea sa o sebeletseng.”—Ba-Roma 12:2; Mal. 3:18.
7 Haeba ka hloko re etsa ‘mesebetsi e metle,’ lebitso la Jehova le tla tlotlisoa, phutheho e tla matlafatsoa ’me ba bang ba tla rua molemo. (1 Pet. 2:12) E se eka kamehla re ka ba batho ba mofuta ona.