Boitšoaro ba Bokreste Sekolong
1 Haeba u mocha oa Mokreste ea ntseng a kena sekolo, ho hlokahala hore u be le tumelo e matla hore u tle u boloke botšepehi. U pepesehile ho metsoalle e mebe le maemo a ka behang tumelo ea hao tekong. Ho bohlokoa hore u sebelise keletso ea Petrose ea ho ba “le motsamao o motle har’a bahetene, hore . . . ba rorise Molimo mohla o ba etelang, ha ba bontšisa mesebetsi ea lōna e metle.” (1 Pet. 2:12) U hloka sebete le boikemisetso hore u hlōle phephetso ena.
2 Ha u le sekolong leha u se sekolong, u hlaseloa ka linako tsohle ke litšusumetso tse silafatsang tsa likamano tsa botona le botšehali pele ho lenyalo, puo e litšila, koae le tšebeliso e mpe ea lithethefatsi. Letsatsi le leng le le leng, u tobana le liteko tse sokelang ho senya tlaleho ea hao ea botumo bo botle. Joaloka batho ba baholo, u tlameha ho “loanela tumelo” hore u khone ho mamella liteko tse joalo.—Juda 3; bona Molula-Qhooa oa July 15, 1991, maqepheng a 23-6.
3 Sekolong, ho na le mekete e bontšang ho rata naha le matsatsi a phomolo a lefatše. Na ua tseba hore sekolong sa heno ho bolokoa matsatsi afe a phomolo ea sechaba le a bolumeli? Haeba ho hlaha boemo bo phephetsang, na u ka ba “le letsoalo le letle, hore . . . ba sebang metsamao ea lona e metle ho Kreste ba hlajoe ke lihlong”?—1 Pet. 3:16.
4 U ka ’na ua hoheloa lerabeng ke lipapali tsa sekolo le ’moka ea boithabiso. U tlameha hore u be seli ho lemoha kamoo mesebetsi ena eo ho ka ’nang ha bonahala e thabisa e ka sekisetsang tumelo ea hao. Ho hlokahala hore u khethe metsoalle eo u tla thabela ‘ho tšelisana’ le eona, e le hore e mong a ka hahoa ke tumelo ea e mong.—Ba-Roma 1:12.
5 U ka Mamella, ka Thuso ea Jehova: Satane o lula a leka tumelo ea hao. Liteko tseo u tlamehang ho li mamella li ka ba boima, empa moputso o etsa hore ho li mamella ebe khato e loketseng. (1 Pet. 1:6, 7) U ke ke ua mamella ka katleho ka bouena; u tlameha ho batla thuso ea Jehova. Jesu o ile a khothalletsa barutuoa ba hae: “Falimehang, le rapele, hore le se kene molekong.” (Matt. 26:41) Taeo le boitšoaro ke tsa bohlokoa haholo.—1 Ba-Kor. 9:27.
6 Kamehla u hopole hore u ikarabella ho Jehova bakeng sa boitšoaro ba hao. (Moek. 11:9) Le hoja seo u se etsang e ka ’na eaba ha se bonoe ke ba bang, Jehova o hlokomela seo u se etsang ’me o tla fana ka kahlolo. (Ba-Heb. 4:13) Takatso e tiileng ea ho mo thabisa e lokela ho u susumelletsa ho ‘sebeletsa polokeho ea hao ka tšabo le ka thothomelo.’ (Ba-Fil. 2:12) Ho bala Lentsoe la Molimo letsatsi le letsatsi ho thusa haholo. Le tletse keletso e babatsehang le mehlala e metle eo u ka e etsisang.—Ba-Heb. 12:1-3.
7 Batsoali, le phetha karolo ea bohlokoa. Ho hlokahala hore le lebele bana ba lōna, le hlokomele mathata ao ba tobanang le ’ona ’me le fane ka thuso ha e hlokahala. Na le na le kamano e ntle le bana ba lōna? Na ka ho bona le kentse ka botebo kutloisiso e nang le kananelo ka melao ea Molimo le litekanyetso tsa hae? Ha bana ba lōna ba tobane le khatello le liteko, na ba matla, kapa ba inehela kapele? Na baa nyahama hobane ba tlameha ho ba ba fapaneng le lithaka tsa bona? Joaloka batsoali, le na le boikarabelo ba ho ba thusa. (Deut. 6:6, 7) Haeba le etsa mosebetsi oa lōna hantle, le ka ba thusa hore ba hlōle ntoeng ea tumelo.—Liprov. 22:6.