Likarolo Tse ka U Thusang Tsa U ka Thaba ka ho sa Feleng!

Ha u sebelisa buka ea U ka Thaba ka ho sa Feleng!, na u thabela ho sebelisa livideo le lipotso tse hlahang ho eona? Likarolo tse reng “Batho ba Bang ba re,” “Seo U ka se Etsang” le “Batla” tsona? Ke lintho life hape tse ka u thusang ha u ntse u ithuta Bibele le batho?​—Mat 28:19, 20.

Likhatiso: Haeba u sebelisa buka e hatisitsoeng, u ka fumana livideo le lihlooho tse ling tse hlahang moo habobebe joang? Bukeng e hlahang sesebelisoeng sa elektronike, khetha e ’ngoe ea likarolo tse ’nè. Qetellong ea lethathamo la likhaolo, u ka khetha likhatiso tsohle tsa karolo e itseng. (Sheba setšoantšo sa 1.)

Ho Sebelisa “Printed Edition”: Haeba u ithuta le motho u sebelisa sesebelisoa sa elektronike, u ka ’na oa bona ho le molemo ho sebelisa “Printed Edition” nakong eo le ntseng le ithuta. Ha u butse khaolo, penya matheba a mararo a hlahang holimo ka lehlakoreng ebe u khetha “Printed Edition.” Tsela eo e hlahang ka eona e tla u thusa hore u lemohe hore na lintlha li hlaha joang bukeng e hatisitsoeng. Ho khutlela morao, penya matheba a mararo hape ebe u khetha “Digital Edition.”

“Na ke se ke Itokisitse?”: Mabokose a fumanehang ho elella qetellong ea buka, a bua ka lintho tse thusang motho hore a tšoanelehe ho ruta batho Bibele a sebetsa le phutheho le hore a kolobetsoe. (Sheba setšoantšo sa 2.)

Litlhaloso: Litlhaloso tse hlahang qetellong ea buka li hlalosa lintlha tse ling tsa bohlokoa. Bukeng e hlahang sesebelisoeng sa elektronike, ho na le linki e hlahang qetellong ea tlhaloso e u khutlisetsang moo le neng le ntse le bala teng. (Sheba setšoantšo sa 2.)