Lipotso Tse Tsoang ho Babali

Mebuso e tla phatlalatsa “khotso le tšireletseho” neng?

Joalokaha re ithutile sehloohong sa “Lipotso Tse Tsoang ho Babali” ho Molula-Qhooaa o sa tsoa hatisoa, haufinyane Jehova o tla kenya monahano oa hae ka lipelong tsa “manaka a leshome” (mebuso eohle ea lefatše) ho etsa hore e fane ka matla a eona ho “sebata se sefubelu” e leng Machaba a Kopaneng. Sebata sena se boetse se bitsoa “setšoantšo sa sebata.” (Tšen. 13:​14, 15; 17:​3, 16, 17) Ka mor’a moo, “manaka a leshome” le sebata se seng se e-na le matla a eketsehileng li tla felisa bolumeli ba bohata lefatšeng lohle. Na mebuso e tla phatlalatsa “khotso le tšireletseho”b pele kapa ka mor’a hore bolumeli ba bohata bo felisoe?—1 Bathes. 5:3.

Ka mantsoe a bonolo feela, ha re tsebe hantle hore na mebuso e tla phatlalatsa “khotso le tšireletseho” neng nakong e tlang. Haeba re ne re tseba lintlha tsohle, ho ne ho ke ke ha hlokahala hore re lule re falimehile. Empa ka makhetlo Jesu o ile a eletsa balateli ba hae, a re: “Le lule le falimehile.” (Mat. 24:42; 25:13; 26:41) Hona joale a re hlahlobeng ka hloko boprofeta boo moapostola Pauluse a ileng a bua ka bona lengolong la hae le eang ho Bathesalonika.

Pauluse o ile a ngola a re: “Neng kapa neng ha ba re: ‘Khotso le tšireletseho!’ Ba tla felisoa hang-hang ba sa lebella.” (1 Bathes. 5:​2, 3) Hangata lingoloa tsa rona li ne li hlalosa mantsoe a Pauluse ka tsela ena: Phatlalatso ea “khotso le tšireletseho” e tla etsoa hang pele mahlomola a moholo a qala e leng ha Babilona e Moholo,’muso oa lefatše oa bolumeli ba bohata, e qala ho felisoa. Phatlalatso ena e tla etsoa nakong e tlang, haesale e hlalosoa e le letšoao la ho qetela le tla bontša hore mahlomola a maholo a haufi le ho qala.

Leha ho le joalo, ka mor’a ho hlahloba taba ena ka hloko, ho bonahala ho e-na le tsela e ’ngoe eo e ka hlalosoang ka eona. Mohlomong phatlalatso ea “khotso le tšireletseho” e tla etsoa ka mor’a hore ho felisoe bolumeli ba bohata. Ke hobane’ng ha re cho joalo? A re hlahlobeng lipotso tse latelang.

Bolumeli ba bohata bo kentse letsoho joang lintoeng tsa mebuso? Bibele e re: “Ho oona [“letekatse le leholo,” e leng Babilona e Moholo] ho ile ha fumanoa mali . . . a bohle ba bolailoeng lefatšeng.” (Tšen. 17:​1, 5; 18:24) Ho theosa le histori, haesale letekatse le leholo le tšehetsa lintoa tsa mebuso ’me hangata le khothalletsa liketso tsa bokhukhuni. Kahoo, haesale bolumeli ba bohata bo khothalletsa ntoa eseng khotso le tšireletseho. Taba ena e etsa hore re ipotse: Na mebuso e tla phatlalatsa “khotso le tšireletseho” ka mor’a hore e felise Babilona e Moholo? Seo se ka etsahala empa re ke ke ra bua re tiile hore ho tla ba joalo.

Ho tla etsahala’ng ka mor’a phatlalatso ea “khotso le tšireletseho”? Pauluse o re: “Ba tla felisoa hang-hang ba sa lebella.” (1 Bathes. 5:3) Study note se hlahang temaneng ena Bibeleng ea Senyesemane se re: “Pauluse mona o bontša hore ho tla ba le nako e nyenyane kapa e ke ke ea e-ba teng ho hang pakeng tsa phatlalatso ea ‘khotso le tšireletseho’ le ho felisoa ha ba etsang phatlalatso eo. E tla ba taba e etsahalang kapele le eo ba ke keng ba e qoba.” Haeba mebuso ea lefatše ea lipolotiki e phatlalatsa “khotso le tšireletseho” ka mor’a hore bolumeli ba bohata bo felisoe, joale ka mor’a moo mebuso eo eohle e tla felisoa hang-hang ka ho panya ha leihlo.

Batho ba Jehova ba tla etsa’ng ha liketsahalo tsena tse boletsoeng esale pele li etsahala? Pauluse o re: “Lona bana beso ha le lefifing. Kahoo, letsatsi leo le ke ke la le tsometsa joalokaha khanya ea letsatsi e tsometsa lesholu.” (1 Bathes. 5:4) Nahana ka taba ena: Haeba phatlalatso ea “khotso le tšireletseho” e tla etsoa ka mor’a hore ho felisoe bolumeli ba bohata, joale batho ba Jehova ba tla tseba hore ho felisoa ha mebuso ho haufi haholo. Ho fapana le hoo, mebuso e tla beng e qeta ho phatlalatsa khotso le tšireletseho e tla ikutloa e sireletsehile ’me e ke ke ea lebella hore e tla felisoa. Ka hona, ho felisoa ha eona ho tla tla joaloka lesholu.

Joale re ka lebella hore ho etsahale’ng? Haufinyane, “manaka a leshome” le sebata se seng se e-na le matla a eketsehileng li tla felisa bolumeli ba bohata. Ena e tla be e le qalo ea mahlomola a maholo. Re boetse rea tseba hore neng-neng ka eona nako eo, mebuso e tla etsa phatlalatso ea “khotso le tšireletseho.” See se tla etsahala neng? Re se re hlahlobile litsela tse peli tse bontšang kamoo seo se ka ’nang sa etsahala kateng. Tsela ea pele: Phatlalatso eo e ka ’na ea etsoa pele bolumeli ba bohata bo felisoa. Tsela ea bobeli: Phatlalatso eo e ka ’na ea etsoa ka mor’a hore mebuso ea lipolotiki e felise bolumeli ba bohata ka ho felletseng. Re tla tlameha ho leta ’me re bone hore na ho tla etsahala’ng, hobane hangata boprofeta ba Bibele bo utloisiseha hamolemo ha bo se bo phethahala kapa ka mor’a hore bo phethahale.—Bapisa le Johanne 12:16.

Hona joale, taba ea bohlokoa ka ho fetisisa ha se hore na nakong e tlang phatlalatso ea “khotso le tšireletseho” e tla etsoa neng, empa ke hore na kamano ea rona le Molimo e joang. Re lokela ‘ho lula re falimehile ’me re e-na le likelello tse hlaphohetsoeng,’ e le hore re lule re itokisitse ho sa tsotellehe hore na ho tla etsahala’ng.—1 Bathes. 5:6.