Rua Molemo Tokisetsong ea Sehlopha sa Tšebeletso ea Tšimo

1, 2. Batho ba bangata ba ikutloa joang ka tokisetso ea sehlopha sa tšebeletso ea tšimo?

NA U sa hopola letsatsi leo u neng u lumelloa ho ba mohoeletsi oa litaba tse monate? Letsatsing leo le thabisang, u ile oa ba karolo ea sehlopha se seholo sa barapeli ba Jehova ba rorisang lebitso la hae. (Pes. 148:​1, 2, 12, 13) Hona letsatsing leo, e ka ’na eaba u ile oa boela oa ba karolo ea sehlopha se senyenyane sa tšebeletso ea tšimo se entsoeng ka bahoeletsi ba seng bakae. Sehlopha sa tšimo se bapala karolo ea bohlokoa haholo ho re thusa ho phetha taelo ea Jesu ea hore re bolele litaba tse monate tsa ’Muso oa Molimo “lefatšeng lohle.”—Mat. 24:14.

² U ikutloa joang ka tokisetso ee? Morali oa bo rona Wendya o re: “Sehlopha sa rona sa tšimo se nthusitse ka litsela tse ngata. Ke ithutile mekhoa e mecha ea ho paka le ho ruta ho tsoa ho ba bang. Ke ile ka thusoa hore ke ipehele lipakane tsa moea ke be ke li finyelle ’me ke entse metsoalle e mengata ea sebele. Ke khonne ho etsa lintho tsena tsohle ka lebaka la tokisetso ena e lerato.” Mor’abo rona Rich o re: “Ke nka ho sebeletsa ke le molebeli oa sehlopha sa tšimo e le tokelo e babatsehang. Bahoeletsi ba thusa motho hore a sebeletse ho kolobetsoa, ’me molebeli oa sehlopha sa tšimo eena o na le menyetla e ikhethang ea ho thusa motho eo hore a ’ne a hatele pele le ka mor’a kolobetso.” Morali oa bo rona Dinah o re: “Tokisetso ea sehlopha sa tšimo ea babatseha. Ke nka batho ba sehlopheng sa rona e le lelapa leso.”

3. Re tl’o bua ka eng sehloohong see?

³ Sehloohong sena, re tl’o qala ka ho bua ka boikarabelo ba molebeli oa sehlopha sa tšimo le mothusi oa hae le ho bona kamoo ba ka hlokomelang sehlopha seo ba se abetsoeng. Ka mor’a moo, re tla hlahloba hore na rona re ka etsa’ng e le hore sehlopha sa rona sa tšimo se atlehe. Qetellong, re tla bona kamoo re ka ruang molemo kateng tokisetsong ena e lerato.

MOLEBELI OA SEHLOPHA SA TŠIMO LE MOTHUSI OA HAE

4. (a) Boikarabelo bo ka sehloohong ba molebeli oa sehlopha sa tšebeletso ea tšimo ke bofe? (b) Molebeli oa sehlopha o hlokomela batho ba sehlopheng sa hae joang? (Sheba lebokose le reng, “Lintlha Tse ka Thusang Molebeli oa Sehlopha sa Tšimo.”)

⁴ Molebeli oa sehlopha sa tšebeletso ea tšimo ke moholob ea khethiloeng ke sehlopha sa baholo hore a thuse bahoeletsi ba sehlopheng sa hae hore ba hatele pele moeeng. O etsa see joang? Ntho ea pele, o tsotella mohoeletsi e mong le e mong ea sehlopheng sa hae. (Liprov. 27:23) O ba tseba hantle ’me o bua le bona kamehla ho utloa hore na ba ntse ba ea joang. Ho etsa joalo ho mo thusa hore a ba matlafatse moeeng, a ba tšehetse ha ba imetsoe maikutlong le ho ba thusa ka lintho tseo ba li hlokang. (Liprov. 12:25; Esa. 32:2; Jak. 2:​15-17) Ntho ea bobeli, o thusa mohoeletsi e mong le e mong hore a phethe bosebeletsi ba hae ka botlalo. O etella pele mosebetsi oa boboleli ka cheseho beke le beke. O boetse o sebetsa le mohoeletsi e mong le e mong khafetsa e le hore a mo khothatse le ho mo koetlisa. Letsatsing leo a sa khoneng ho ea tšimong ka lona, o etsa bonnete ba hore mothusi oa hae kapa mohoeletsi e mong ea tšoanelehang o etella tšimo pele. Ntho ea boraro, o thusa bara ba bo rona ba kolobelitsoeng hore ba tšoanelehe ho fuoa boikarabelo ka phuthehong. (1 Tim. 3:1) Oa ba babatsa, o ba fa keletso e tsoang ka Bibeleng le ho ba koetlisa kamehla e le hore ba tšoanelehe ho ba bahlanka ba sebeletsang le ho ba baholo. Ho latela bohlokoa ba mosebetsi oa molebeli oa sehlopha, sehlopha sa baholo se khetha baholo ba tla khona ho phetha boikarabelo bona hantle.

5. Balebeli ba bang ba lihlopha ba kopana le mathata afe?

⁵ Ha molebeli oa sehlopha a ntse a hlokomela batho ba sehlopheng sa hae, a ka kopana le mathata. Mor’abo rona Jörg oa Jeremane ke molebeli oa sehlopha ’me joaloka baholo ba bangata, o na le likabelo tse ’maloa ka phuthehong. O re: “Ha ho bonolo ho ba molebeli oa sehlopha ha ka nako e tšoanang u na le likabelo tse ling. Kahoo, ka linako tse ling ho ba boima hore ke finyelle pakane ea ka ea ho bua le bahoeletsi bohle sehlopheng sa ka.” Mor’abo rona Abel oa Uganda, e leng moholo ea lilemo li 70 o re: “Re na le baholo le bahlanka ba sebeletsang ba seng bakae phuthehong ea rona. Ka lebaka leo, lihlopha tsa rona tsa tšimo li kholo. Kahoo, ha ke khone ho etsetsa mohoeletsi e mong le e mong leeto la bolisa hangata kamoo ke neng nka thabela kateng.” Mor’abo rona Obed oa Suriname, eo e leng moholo ka phuthehong o re: “Ke rata ho koetlisa ba bang. Empa ho koetlisa ba bang ho hloka nako le matla, hape ha se kamehla ke bonang batho bao ke ba koetlisang ba finyellang lipakane tsa bona ka pele. Kahoo, hangata ho koetlisa ba bang ke ntho ea pele eo ke e chechisetsang morao.” Balebeli ba lihlopha ba kopanang le mathata aa le a batlileng a tšoana le ’ona ba ka thusoa ke’ng?

6. Ha lihlopha tsa tšimo li le nyenyane, seo se thusa balebeli ba lihlopha joang ho hlokomela batho ba lihlopheng tsa bona?

⁶ Ha ho khoneha, baholo ba lokela ho etsa hore lihlopha tsa tšimo li be nyenyane e le hore molebeli oa sehlopha a ka khona ho tseba bohle ba sehlopheng sa hae hantle le ho ba thusa hore ba lule ba le haufi le Jehova. Empa ho thoe’ng haeba phutheho e na le baholo ba seng bakae? Ho e-na le ho etsa lihlopha tse kholo hoo molebeli oa sehlopha a tla imeloa ke ho phetha likarolo tsohle tsa boikarabelo ba hae, sehlopha sa baholo se ka khetha mohlanka ea sebeletsang hore a hlokomele sehlopha se itseng ka nakoana. Ha lihlopha li le nyenyane, balebeli ba lihlopha ba khona ho phetha boikarabelo ba bona ba bohlokoa ka ho fetisisa, e leng ho hlokomela bara le barali ba bo rona.

7. Liphuthehong tse nang le baholo ba seng bakae, balebeli ba lihlopha ba ka etsa’ng ho netefatsa hore bohle ba sehlopheng ba hlokometsoe? (1 Petrose 5:2) (Sheba setšoantšo.)

⁷ Haeba u molebeli oa sehlopha sa tšimo phuthehong e nang le baholo ba seng bakae, ameha ka ho koetlisa mothusi oa hao e le hore a ka u thusa ho hlokomela mohlape oa Molimo. (Bala 1 Petrose 5:2.) Mo abele mesebetsi e meng. Ka mohlala, mo kope hore a etelle pele tšebeletso ea tšimo ka linako tse ling. Ho bohlokoa hore le buisane ka hore na le tla thusa bahoeletsi joang hore ba ntlafatse bokhoni ba bona tšimong le ho lula ba le haufi le Jehova. Nako le nako, tsamaea le mothusi oa hao ha u etsa maeto a bolisa. Pele le ea ho mohoeletsi, buisanang ka hore na le il’o mo khothatsa joang. Ka mor’a leeto, buisanang ka hore na le tsamaile joang. Mo babatse le ho mo thusa moo a ka ntlafatsang teng haeba ho hlokahala. Ha nako e ntse e ea, mothusi oa hao a ka tšoaneleha hore e be molebeli oa sehlopha. (2 Tim. 2:2) U ka boela oa kopa Bakreste ba nang le boiphihlelo ho koetlisa ba bang tšimong. Bo-pula-maliboho le bahoeletsi ba bang ba nang le boiphihlelo ba ka sebetsa le batho ba qalang ho ea tšimong le ba se nang boiphihlelo. Hape, bahoeletsi ba nang le boiphihlelo ba ka thusa ba hlokang ho thusoa ka ho qalisa moqoqo tšimong, ho etsa maeto a ho boela kapa ho khanna lithuto tsa Bibele. Hona joale, a re hlahlobeng litsela tse tharo tseo ka tsona re ka kenyang letsoho hore sehlopha sa rona sa tšimo se atlehe.

KENYA LETSOHO HORE SEHLOPHA SA LONA SA TŠIMO SE ATLEHE

8. U ka kenya letsoho joang hore sehlopha sa lona sa tšimo se atlehe? (Baroma 1:12)

⁸ E-ba teng tšimong. Lea “khothatsana” ha le sebetsa ’moho tšimong. (Bala Baroma 1:12.) Ho sebetsa ’moho ho ka boela ha thusa ba sehlopheng hore ba ikutloe ba sireletsehile ha le sebetsa libakeng tse itseng le ho tsoha molota ha le bua le batho. Haeba mosebetsi oa boipheliso o u sitisa ho ba teng tšimong kamehla, kopa mohiri oa hao hore a fetole kemiso ea hao. Mohlomong a ka u lumella ho sebetsa ka linako kapa matsatsi a fapaneng. (Neh. 2:​4-6) Haeba bokuli kapa botsofali bo u sitisa ho kopana le sehlopha sa lona ka seqo, bua le molebeli oa sehlopha sa lona ka taba eo. A ka ’na a u thusa hore u kene sebokeng sa tšimo ka zoom le ho ngola mangolo kapa ho paka ka fono le ba bang sehlopheng. Na u mocha e bile u phetse hantle empa ha u khone ho ba teng tšebeletsong ea tšimo kamehla? Haeba ho joalo, hlophisa hore beke le beke u sebetse le motho e mong ka seqo sehlopheng sa lona. U ka ’na oa lokela ho nahana ka hore na ke’ng eo u e nkang e le ea bohlokoa bophelong ba hao kapa ho etsa liphetoho tseleng eo u sebelisang nako ka eona. (Bar. 12:11; Bakol. 4:5) Boiteko bohle boo u bo etsang ha se ba lefeela. Kopa Jehova hore a u thuse. A ka u fa ‘tabatabelo le matla a hore u etse lintho tse mo khahlisang.’—Bafil. 2:13.

9. Re ka etsa eng hore sehlopha sa rona sa tšimo e be se ratanang? (Baroma 12:13)

⁹ E-ba ea amohelang baeti. Re etsa hore sehlopha sa rona sa tšimo e be sehlopha se ratanang ha re ‘itloaetsa ho amohela baeti.’ (Bala Baroma 12:13.) Re ka bula matlo a rona bakeng sa seboka sa tšimo. Liphuthehong tse ling, lihlopha li buisana ka hore na ke sehlopha sefe se tla memela sebui sa moeti lijong. Le haeba sebui se sa tl’o khona ho ba teng lijong, ba bang sehlopheng ba ka kopana ho thabela lijo le botsoalle. Morali oa bo rona Sarah oa pula-maliboho e khethehileng o re: “Kea tšoenyeha ha ke lokela ho amohela baeti, kahoo ke leka ho batla litsela tsa ho tseba ba bang ho e-na le hore ke tšoenyehe haholo ka ho batla ho etsa lintho tse ngata.” Ha re sebetsa ka thata ho etsa hore sehlopha sa rona e be lelapa le ratanang, re tla momahana le ho atamela haufi le Jehova.—Neh. 8:10; Lik. 20:35.

10. Re ka etsa eng haeba re batla ho ntlafatsa karolong e itseng ea tšebeletso? (Liproverbia 1:5; 27:17) (Sheba setšoantšo.)

¹⁰ Nka khato. Re tla thabela ho ea tšimong le sehlopha sa rona ha re ntse re ntlafatsa bokhoni ba rona ba ho bolela le ho ruta. Na ho na le karolo ea tšebeletso eo u batlang ho ntlafatsa ho eona? Nka khato ka ho kopa pula-maliboho kapa mohoeletsi e mong ea nang le boiphihlelo sehlopheng sa lona hore a u thuse. (Bala Liproverbia 1:5; 27:17.) Tsebisa molebeli oa sehlopha pakane ea hao. A ka u thusa hore u e finyelle. U ka boela oa kopa le ba bang hore ba u thuse. Morali oa bo rona Heather o ile a etsa sona seo. Le hoja a le lihlong, o re: “Ke ile ka kopa morali oa bo rona oa pula-maliboho hore a nthuse ho etsa maeto a ho boela. O ile a ntšoara ka lerato le ka mosa, ’me a etsa litlhophiso tsa hore a tsamaee le ’na tšimong kamehla. O ile a ba a nthusa hore ke qalise thuto ea Bibele le motho eo ke neng ke ntse ke khutlela ho eena. Ke thabela hore ebe ke ile ka kopa thuso hobane hona joale ke thabela mosebetsi oa boboleli hape.” Ho hlakile hore re ka kenya letsoho ka litsela tse ngata hore sehlopha sa rona sa tšimo se atlehe.

RE KA RUA MOLEMO JOANG SEHLOPHENG SA RONA SA TŠIMO?

11, 12. Tokisetso ea sehlopha sa tšimo e ka u thusa hore u lule u le haufi le Jehova joang? Fana ka phihlelo.

¹¹ Re atamela haufi le Jehova. E mong le e mong oa rona a ka rua molemo moeeng ho tsoa tokisetsong ea sehlopha sa tšimo. Ka mohlala, batho bao Jehova a ba ratang haholo ba kang bahlolohali, likhutsana le ba holileng ba etsetsoa maeto a bolisa a nakong le a khothatsang. (1 Bathes. 2:8; Jak. 1:27) Re boetse re fumana koetliso eo re e hlokang likarolong tse fapaneng tsa mosebetsi oa ho bolela le ho ruta. Bara ba bo rona ba kolobelitsoeng ba behang mohlala, ba thusoa hore ba tšoanelehe bakeng sa ho fumana boikarabelo bo eketsehileng ka phuthehong.—1 Tim. 3:10.

¹² Bona kamoo morali oa bo rona Wendy eo re buileng ka eena pejana, a ruileng molemo kateng tokisetsong ea sehlopha sa tšimo. O re: “Kaha ntate oa ka o ne a hanyetsa Lipaki, ho ne ho e-ba thata hore ’mè oa ka a ee tšimong mafelo-beke le sehlopha sa rona sa tšimo. Leha ho le joalo, ’na o ne a ntumella ’me ke ne ke ea. Ke ile ka ba motsoalle oa morali oa bo rona e mong ea holileng oa pula-maliboho. O ile a ntataisa le ho nthusa hore ke be le bokhoni bo ileng ba ntsoela molemo tšimong le ka phuthehong. Ke hopola makhetlo a ’maloa ha molebeli oa rona oa sehlopha a mpha keletso e tsoang ka Bibeleng. Keletso eo e ntse e ntsoela molemo le kajeno.”

13. Sehlopha sa tšimo se re thusa ho ba le metsoalle e re ratang le e re tšehetsang joang? (Sheba setšoantšo.)

¹³ Re ba le metsoalle e re ratang le e re tšehetsang. Re ba le setsoalle se tiileng le batho ba sehlopheng sa rona ha re ntse re sebetsa le bona mahetla a bapile tšimong. (Bafil. 1:27) Ha sehlopha sa tšimo se le senyenyane, seo se ka nolofalletsa batho ba lihlong le ba sa khoneng ho phutholoha har’a batho ba bangata hore ba etse setsoalle se haufi le ba bang. (2 Bakor. 6:13) Linakong tse thata tse kang ha re kula, re nyahame kapa re lla ka lebaka la ho hlokahalloa ke baratuoa ba rona, re ka tšepa hore metsoalle ena e tla re tšehetsa. (1 Bathes. 5:14) Ha ho pelaelo hore re tla hloka metsoalle e molemo haholo nakong e tlang. (Mat. 24:21) Mathata a rona a ka ’na a se ke a fela, empa re ka khona ho a mamella haeba re tseba hore re na le Bakreste-’moho le rona ba re ratang le ba re tšehetsang.—Liprov. 17:17.

14. Re rua molemo joang sehlopheng sa rona sa tšimo linakong tsa likoluoa le maemong a tšohanyetso?

¹⁴ Re fumana thuso nakong ea maemo a tšohanyetso. Re fumana thuso e nakong haholo sehlopheng sa rona sa tšimo ha ho e-na le mafu a seoa, likoluoa tsa tlhaho, ha re hloka thuso e potlakileng ea lingaka, ha re hlorisoa le ha re e-na le mathata a lichelete. Ka mohlala, phuthehong e ’ngoe le e ’ngoe, Komiti ea Tšebeletso ea Phutheho e sebetsa le balebeli ba lihlopha ho etsa moralo oa ho thusa batho ba nang le litlhoko tse khethehileng. Balebeli ba lihlopha ba etella pele mosebetsi oa ho batla malapa ’ohle a lihlopheng tsa bona e le hore ba tsebe hore na ba hloka thuso efe, e akarelletsang thuso ea tsa lingaka, lijo, metsi, bolulo le liaparo. Kannete ena ke thuso e lerato eo re e fumanang ho tsoa lihlopheng tsa rona tsa tšimo.

15. Ke eng e re momahanyang kaofela ha rona ka mokhatlong oa Jehova?

¹⁵ Mokhatlo oa Jehova o moholo haholo. Karolo e leholimong feela e na le mangeloi a tšepahalang a se nang palo. Karolo e lefatšeng e na le batho ba ka holimo ho limilione tse robong ’me e ntse e hola ka sekhahla letsatsi le letsatsi. (Zak. 8:23; Tšen. 5:11) Barapeli bohle ba Jehova ba sebetsa e le ngatana-’ngoe ho bolela litaba tse monate tsa ’Muso oa Molimo. (Tšen. 14:​6, 7) E se eka re ka rua molemo tokisetsong ea sehlopha sa tšebeletso ea tšimo, e leng tokisetso e re thusang ho rorisa Jehova ka lipelo tsohle tsa rona.—Pes. 111:1.